🌟 Kitob: Fotimaning bolasi
🌟 Muallif: Xosima Umon
🌟 Sahifalar: 143 bet


📖 Sharh: Kitobning muqovasidanoq o‘quvchini og‘ir va iztirobli bir hayot hikoyasi kutib turgani seziladi. Bu asar bolalik, mehrga chanqoqlik, bosim va tushunilmaslik qurboniga aylangan bir bolaning fojeali hayoti haqida. Hikoya markazida Fotima ismli ayol va uning farzandi turadi. Onaning 3 nafar farzandi bo'lib, ularning o‘rtanchasi Yusuf edi. Asar aynan shu bolakayning ichki dunyosi, iztiroblari va sindirilgan orzulari haqida hikoya qiladi.

Yusuf akasi va singlisiga qaraganda bilim olishda sustroq bo‘ladi. Uning IQ darajasi sekin o‘zlashtiradigan bolalar qatoriga kiradi. Ammo bu holat bolaning aybi emasligini Fotima xonim anglay olmaydi. Aksincha, u jamiyat oldida “aqli zaif bolasi bor ona” bo‘lishni qabul qila olmay, Yusufni o‘z manfaati va g‘ururi yo‘lida qurbon qiladi.

Yusuf maktabdan tashqari son-sanoqsiz qo‘shimcha mashg‘ulotlarga majburan qatnaydi, uyga juda kech qaytadi, charchagan holida ham yana vazifalar bajarishga majbur bo‘ladi. Dam olish, bolalarcha quvonish, o‘yin - uning hayotida deyarli yo‘q.

Yusufning yagona panohi rassomchilik edi. U chizish orqali ichidagi og‘riqlarni, aytilmagan so‘zlarni, yuragidagi alamni qog‘ozga tushirar edi. Ammo afsuski, ona bu qiziqishni ham yo‘qqa chiqaradi. “Rassomchilikdan foyda yo‘q”, degan gaplar bilan Yusufni eng so‘nggi taskinidan ham mahrum qiladi.

Asarda onaning farzandlar o‘rtasidagi adolatsiz munosabati juda og‘riqli tarzda tasvirlanadi. Akasi va singlisiga bo‘lgan mehr, Yusufga kelganda sovuqlikka aylanadi. Shu sababli Yusuf o‘zini xuddi o‘gay ona qo‘lida yashayotgandek his qiladi, tirik bo‘lsa-da, ortiqcha bo‘lib yashaydi.

Bosim, mehrsizlik va tushunilmaslik oxir-oqibat Yusufni eng dahshatli fikrga olib keladi: u hayotdan voz kechishni o‘ylab qoladi… Shu yerda asar eng keskin nuqtaga yetadi. Lekin eng muhim, eng hayratli voqealar oldinda. Davomini aytib berish esa bu kitobning ta’sirini kamaytiradi. Eng to‘g‘risi esa uni o‘zingiz o‘qib, Yusufning taqdiri bilan yuzma-yuz kelish)

Bu kitob o‘quvchini befarq qoldirmaydi. U ota-onalarni o‘ylantiradi, farzand tarbiyasidagi xatolar qanchalik og‘ir oqibatlarga olib kelishini ochiq ko‘rsatadi. Eng muhimi, bu asar bizga shuni eslatadi: bola faqat natijalar bilan emas, qalbi bilan ham sevilishi kerak.


🕯 Hayotiy, og‘riqli va juda ta’sirli asar.
O‘qib bo‘lgach, uzoq vaqt xayoldan ketmaydi…
Ba’zi sahifalar esa yurakka og‘ir botadi.

Hazratim 🌟

Mutma'inn

Oxirzamondamiz: gunoh, fahsh keng tarqalgan dunyomizda erkaklar uchun eng chiroyli boshpona bu uning oilasidir)

©️Fotima r.a ning isrofsiz to'yi.

🌟 Kitob: Tarixdan hikoyalar
🌟 Muallif: Ali Tantoviy
🌟 Sahifalar: 127 bet


🕯 Sharh: Ali Tantoviyning “Tarixdan hikoyalar” asari o‘tmish voqealari orqali bugungi inson hayotiga chuqur saboq beradigan, ibrat va tafakkurga boy kitobdir. Asar 7 ta tarixiy hikoyadan iborat bo‘lib, har bir hikoya inson taqdiriga, axloqiga va tanlovlariga bevosita ta’sir qiladigan muhim darslarni o‘z ichiga oladi.

Kitobning eng e’tiborga molik jihati shundaki, har bir hikoyani o‘qir ekaningiz, voqealar rivojidan kelib chiqib, “oxiri shunday bo‘lsa kerak”, deb o‘zingizcha xulosa qilasiz. Ammo Ali Tantoviy hikoyani butunlay kutilmagan tarzda yakunlaydi. Oxiri esa o‘quvchini hayratga soladi, o‘ylantiradi va uzoq vaqt xotiradan chiqmaydi. Aynan shu jihati kitobni yanada qiziqarli va ta’sirli qiladi.

Asardagi eng esda qoladigan hikoyalardan biri oxirgi hikoya bo‘lib, u ikki aka-uka Ahmad va Xalaf haqida. Bu voqea o‘quvchini Hobil va Qobil qissasini eslatadi. Otalari ularga merosni teng qilib qoldirib ketadi. Ahmad bu boylikni halol savdogarlikka sarflab, mehnati va aqli bilan katta savdogarga aylanadi. Xalaf esa boylikni o‘yin-kulgi, kayfu safoga sovurib yuboradi.

Pul tugagach, Xalafning qalbida hasad va ochko‘zlik paydo bo‘ladi. U akasining boyligiga ko‘z olaytirib, avval ishonchiga kiradi, so‘ng esa eng og‘ir jinoyatni qiladi... akasini o‘ldirib, barcha boylikni egallash niyatini ko‘ngliga tugadi. Qilichni ko‘targan paytda esa shunday voqea sodir bo‘ladiki, o‘quvchi beixtiyor hayratda qoladi… Bu joyni aytib berish kitobning ta’sirini kamaytiradi. Eng yaxshisi o‘zingiz o‘qib, o‘sha lahzani his qilish.

“Tarixdan hikoyalar” - faqat o‘qish uchun emas, balki o‘ylash, xulosa chiqarish va tarbiya uchun yozilgan kitob. Uni farzandlarga, uka-singillarga o‘qib berish ayniqsa foydali, chunki undagi har bir hikoya hayotiy saboq va axloqiy dars bilan yakunlanadi.


📚 Tarix, axloq va hayotiy ibratni birlashtirgan juda qimmatli asar. O‘qib bo‘lgach, har bir hikoya sizni: “Agar men shu o‘rinda bo‘lganimda, qanday yo‘l tutardim?” degan savol bilan yolg‘iz qoldiradi.