🌟 Sharh: Islom tarixi — imon, sabr, tavakkul va poklikning eng yuksak namunasidir. Ayniqsa, sahobalar hayoti mo‘min uchun yorqin ibrat maktabidir. “Sahobalardan maktublar” asari esa ushbu bebaho merosni qalblarga yaqin, tushunarli va ta’sirli shaklda yetkazuvchi nodir kitobdir. Bu asar sahobalarning farzandlariga, musulmon rahbarlariga, birodarlariga yozgan samimiy maktublaridan iborat bo‘lib, har bir satrida hikmat, nasihat va ruhiy uyg‘otish bor. Kitob o‘quvchini sahobalarning Allohga bo‘lgan muhabbati, Rasululloh ﷺga bo‘lgan sadoqati, dunyo sinovlariga sabr bilan qarashi va oxiratni ustun qo‘ygan pok e’tiqodi bilan tanishtiradi. “Sahobalardan maktublar” — mo‘min qalbini tarbiyalaydigan, uni sabr, ixlos, diyonat, adolat va halollikka chorlovchi kitobdir. Asarda tavba, taqvo, dunyo va oxirat o‘rtasidagi muvozanat, qalbni isloh qilish, farzand tarbiyasi, imonning qadr-qimmati kabi mavzular keng yoritilgan. Muallifning ta’kidlashicha, sahobalarning hikmatli nasihatlari — bu nafaqat tarix, balki har bir mo‘min uchun amaliy qo‘llanmadir. Kitob mo‘minni nafaqat o‘ylantiradi, balki ruhni poklaydi, qalbni yumshatadi, Allohga qaytish yo‘liga yo‘naltiradi.

📚 Sharh: “Ikki yetim” Ali Tantoviy qalamiga mansub, yurakka o‘tiradigan, ko‘zga yosh keltiradigan va chuqur ibrat beradigan hayotiy asardir. Kitob 5 ta hikoyadan iborat bo‘lib, har biri inson qalbini larzaga soladigan, o‘ylantiradigan voqealarni o‘z ichiga oladi. Asarning birinchi hikoyasi kitob nomiga mos ravishda “Ikki yetim” haqida. Unda onadan juda erta ayrilgan ikki begunoh bolaning hayoti, ularning boshidan kechirgan og‘ir sinovlari, mehrga zor yashagan kunlari ta’sirli tarzda tasvirlanadi. Ularning o‘gay onasi tomonidan ko‘rgan zulmlari, beparvolik va adolatsizliklari o‘quvchini befarq qoldirmaydi. Bu hikoya orqali muallif yetimning qalbi naqadar nozik, ularning ko‘ngli naqadar tez sinishini juda aniq his qildiradi. Kitob faqat yig‘latib qo‘ymaydi, u insonning hayotga bo‘lgan qarashini o‘zgartiradi. Ota-ona ne’matining qadrini anglatadi, sabrning naqadar buyuk kuch ekanini tushuntiradi, mehr va rahm-shafqatning inson hayotidagi eng muhim boylik ekanini yurakka joylaydi. Har bir hikoya o‘quvchini o‘z nafsini tekshirishga, atrofdagilarga boshqacha nigoh bilan qarashga undaydi. “Ikki yetim” shunchaki hikoyalar to‘plami emas. Bu asar hayot darsi, sabr darsi, mehr darsi. Kitobni o‘qib, inson ko‘p narsani qayta o‘ylab chiqadi, shukr qilishni, bor ne’matining qadriga yetishni, yetimning haqqini unutmaslikni o‘rganadi.

🌟 Sharh: Ali Tantoviyning “Ikki qariya” kitobi meni judayam ta’sirlantirib yubordi desam, xato bo’lmas. Bu kitob muallifning “Hayotiy qissalar” to’plami asosida tartiblangan turkum asarlarni o’z ichiga oladi. “Ikki qariya” kitobidan ham 5 ta hikoya o’rin olgan bo’lib, ularning har biri bir-biriga o’xshamasligi, sodda va hayotiy yozilgani bilan ajralib turadi. Menga ayniqsa kitobdan: “Ikki qariya” va “Shayx shijoati” hikoyalari ko’proq yoqdi. Kitob mutolaasining birinchi hikoyasida ikki qariyaning oilada bir-biriga bo’lgan ko’magi, suyanchi va mehrini o’zgacha ta’riflangani bilan sizni ta’sirlantirsa, mutolaa so’nggidagi ustozning qayg’uli va g’amgin qismati haqidagi hikoya sizni o’ylashga undaydi. “Shayx shijoati” haqidagi ketma-ket hikoyalarida esa yosh o’smir yigitlarga, shayxning o’rinli nasihatlari berilgan. Kitobni yoshlarga ham, o’rta va keksa yoshdagilarga ham bemalol tavsiya qila olaman. Sababi shu hajmi kichik kitobda sizga o’rnak bo’ladigan mavzular ko’tarilgan. Ali Tantoviy bu asar orqali o‘quvchini hayotga jiddiyroq nazar bilan qarashga undaydi. Inson bugun qilayotgan amallari ertangi kunining asosi ekanini, vaqtning qadriga yetish, gunohdan tiyilish, ezgulikka shoshilish naqadar muhim ekanini yurakka yetib boradigan tarzda bayon qiladi. Kitob insonni dunyoga haddan ortiq bog‘lanmaslikka, oxiratni unutmaslikka, halollik, sabr va shukr bilan yashashga chorlaydi.