Kitob tumanida Janubiy Afrikalik malakali pedagog faoliyat boshladi

Maktabgacha va maktab ta’limi vazirligining “Til egasi” loyihasi doirasida Kitob tumanidagi 96-umumta’lim maktabida Janubiy Afrikadan kelgan xorijiy malakaga ega o‘qituvchi — Lungane Jobe o‘z faoliyatini boshladi.

Mazkur loyiha doirasida yurtimiz ta’lim muassasalariga xorijiy mutaxassislarni jalb etish, o‘quvchilarga chet tillarini o‘rgatishda ilg‘or tajriba va samarali metodikalarni tatbiq etish ko‘zda tutilgan. Shu maqsadda Kitob tumanidagi 96-maktab jamoasiga qo‘shilgan ingliz tili fani o‘qituvchisi Lungane Jobe dars jarayonlariga zamonaviy yondashuvlarni tatbiq etmoqda.

U o‘quvchilar bilan muloqotchan, qiziqarli va interfaol darslar tashkil etayotgani, ayniqsa, tinglab tushunish va og‘zaki nutqni rivojlantirishga alohida e’tibor qaratayotgani bilan ajralib turadi. Yangi pedagogning faoliyati o‘quvchilarning ingliz tiliga bo‘lgan qiziqishi va motivatsiyasini oshirishga xizmat qilmoqda.

Ta’kidlash joizki, “Til egasi” loyihasi chet tillarini chuqur o‘qitish orqali yoshlarning global bilim maydoniga kirib borishi va raqobatbardosh kadr sifatida shakllanishiga keng imkoniyat yaratmoqda. Kitob tumanida ushbu loyiha doirasida xorijlik mutaxassisning faoliyat boshlagani ta’lim sifatini oshirishga qaratilgan izchil islohotlarning amaliy ifodasidir.

🔍Quyidagi havolani bosing va Kitob tumani hokimligi telegram kanaliga qo'shiling👇👇👇
❤https://t.me/joinchat/WIzE6dryhMqccL7h

💬Facebook | 📸Instagram | 🌍Web sayt|  ✅Telegram | ✅Twitter | 📹YouTube