﴿إِنَّ فِي خَلْقِ السَّمَاوَاتِ وَالْأَرْضِ وَاخْتِلَافِ اللَّيْلِ وَالنَّهَارِ لَآيَاتٍ لِأُولِي الْأَلْبَابِ﴾ – [آل عمران: 190]


💚🕌

يا أخوي ويا أُختي ☝️
دقيقة من وقتك ، وتاني واصل
واصل قراية حتى لو حسيت الكلام طويل🤔
لانو ح يفيدك كتيير 😄

اعمل البقول ليك عليهو خلال الدقيقة دي 🤝

في كم زر دايرك تتدوس عليها إيقاف ، وتشغل واحد بس
طوال الدقيقه تكون شغال بي زر واحد بس
وبعد الدقيقه دوس تشغيل تاني وواصل حياتك عادي .👏

اول حاجة
دوس على زر الأهداف إيقاف
العمل إيقاف
السعي إيقاف
الأسره والعلاقات كلها إيقاف
الشهوة ، الحب ، القروش
النفس إيقاف إقاف إيقاف
ووقف كل حاجة بتدور في ذهنك 💚
ودوس بس على زر " التفكُّر " تشغيل ✅

وعاين في السماء ✨
خلي نظرك في النص وحاول إستشعر المساحه بدون تحرك نظرك ، وإتخيل فوق لي السماء وإنتَ ماشي لي فوق المسافه قدر شنو ؟؟
يلا حرك نظرك على جوانب السماء
لقيتها قدر شنو ؟؟ 🤔
ما عارف مش
برضو خلها دي 95٪ قالوا علماء الفلك
(بدون السماء لأنو ماف اداة دنيوية ح تقدر تصل السماء)
ال95 دي كلها ما قبل السماء وما بعد السماء فالله أعلم به

السماء دي قدر شنو ، وورا السماء في شنو
ودا كلو فكَّر فيهو وإستشعرو فقط ♥️


لكن تعال أوريك أنا ال 5٪
عدد معاي عندك كم
محيط، بحر، نهر ، جبل ، صحراء ، غابة كثيفة ؟
كم دولة ، كم عِرق ، ثقافه ، وإسم ؟ ونبض ؟
عندك كم حيوان، طائر وسابح وزاحف وسائر ؟
في كم من النِعم الدنيوية عموم ؟ إبتداء من لقمة الأكل مروراً بالتلفون الفي يدك وكل م حولك، إنتهائاً بعافية بدنك (أعظم النعم في الدنيا)
كم ؟
كم حجم الكره الأرضيه عموم ؟🌍
خليك من حجمها الكلي

إنت عارف إنو البشر كلهم وساكنين متفرقين على مساحات
مالين أقل من 10٪ بس بي دولهم من مساحة الكرة الأرضية 🌎؟

طيب لو جمعناهم كلهم وعملنا ليهم شوارع وحدائق وخدمات بسيطه ، في مكان واحد تفتكر بشيلو كم من مساحة الكرة الارضية ؟
تعال اوريك
ح يشيلوا %0.35
من المساحه الكليه اللي هي قدر فرنسا بس
فرنسا بس ممكن تسكن كل ناس العالم ، وين باقي الكره الارضية ؟
الباقي وااااااااااسع صح ؟

يلا رغم وساعو دا، تعال نقارنو مع نجيمة بس وأقرب نجمه لينا هي الشمس ☀️
إنت عارف الشمس لو بقت مجوفه ممكن نخت جواها مليون وثلاثمئة ألف كرة أرضية ذي حقتنا ؟؟
1,300,000 كره أرضية = الشمس

شايف النجوم البتتلالا في سماك بالليل وبتتونس بيها وبي جمالها، وبتذكرها في الغزل والاشعار ؟ ⭐✨
يلا دي النجم الواحد منها ممكن يجيب أضعاف حجم الشمس بنفس أضعاف الجابتو الشمس من حجم الأرض او يزيد

⭐ اضعاف 🌞 اضعاف 🌎
بملاين المراات

ودا النجم الواحد ناهيك عن عددها
وإنو في نجوم بتضاعف حجم النجوم التانية أضعاف ، (اللي ما يعلم بيها إلا الله)

والله عظمة تحيير 💚

دي حاجة العقل بديك error لو حاولت تتخيلها
عشان كدا نسيبها لله وحده ونرجع منها شوية


وتعال شوف حسابات النجوم دي كلها إتجاهلها وحتى حسابات مساحة الأرض لوحدها إتجاهلها ،

تعال مساحة فرنسا والناس والشوارع والحدائق القلناها دي بس

إنت تسوى شنو ؟🤔
بالنسبة لي مساحة فرنسا وعدد سكانها
إنت كلك عمود كهرباء واحد ، والعمود زاتو فايتك بالطول لا فوق ، 😄

أحلامك، طموحات، اعمالك ، علاقاتك ، سعيك ،
كلها قيمتها شنو ؟ لو هي سبيل لمعصية الله ؟🤔

سيارتك المن حقوق الناس ، علاقاتك المشبوهه ،بيتك الماكلو من ورثه او خشيت في أرض جارك يعني شنو

تسوى شنو ؟ 🧐

تخيل لو مسكت حبة سمسم بين ضفرين ورفعتها قلت دي أنا وباقي الأرض دا كلو (الكون)
إنت عارف ح تكون ظلمت السمسمه ☝️
إنتَ أصغر من كدا بي كتير
السمسمه ممكن تلقى مساحه بالنسبة لي الارض ،
أكتر من إنك تلقى مساحه بالنسبة لي الكون

يا أخوي ويا أختي 😊
إنت لا شي، نو ون، نثينج 😄
الأفضل ليك تراجع نفسك لأجل نفسك ☝️
وما تغترا وتتفاخر وتسابق لأجل زوال وإنت إلى زوال
وين الفايدة ؟ 🤨
وتسابق بي طرق مشبوهه كمان دي مصيبة مصيبة زاتو م بتوصِف فاجعتك والله 😥

لكن عشان ما أظلمك أنا والله تعالى أنصفك 😊

إنتَ ، شيء ، إنت إنسان معروف والله خلقك وكرمك وميزك عن باقي مخلوقاته ♥️
وسلمك رسالة تاديها في سنين عمرك المقدرة، بإختلاف عددها من زول لي التاني ،✅

إنت إنسان جاتك رسالة ، وعندك إمتحان ، وعندك نتيجة ودا الشيء المفرض تعمل بيهو عشانك انت☝️🤝

ودي الازرار المفروض تخليها على التشغيل في حياتك👏✅
زر الرسالة ، تعرف الله تعالى قال ليك شنو عبر محمد صلى الله عليه وسلم ، ومحمد قال ليك شنو من وحي الله ليهو ،
معرفة علم يقين 💚

زر الإمتحان ، تطبق اللقيتو في الرساله وعشان تلقى درجات إضافية تتبع سنة محمد والخلفاء من بعده وسير صحابته ،
تطبيق من يسعى للتفوق 📿
والتطبيق يكون أفعالك وأداء عباداتك وتحاول تبحَّر في الافعال الحسنه 🌸

والنتيجة ، بتظهر لمن عمرك ينتهي
لكن وإنت حي تخلي في بالك وداخل أعماق قلبك مؤقن بها أتم اليقين إنو النتيجة البتطلع ليك هي من فضله تعالى ورحمته بك ما من عملك، وانت مش بتعمل حاجة لله إنت بتعمل لي نفسك ☝️💚

وأخيراً عاين في النجوم وخليك من احجامها عاين في جمالها وإستشعر عظمة الله وهي بتتلألأ وكون مبسوط ✨😄
لانو الله قال لا تحزنوا ولا تهنوا ولا تيأسوا ولا تقنطوا

وجاهد نفسك وأسعى 🕌💚
أخد رست عن ضجيج الحياة وصخبها
وأعبد الله وأتكل كل إمورك عليه
وأرجع أسعى لي دنياك وإنت خات تقوى الله وخوفك منه ورجائك له نُصب عينيك

وادعي دائماً ، بالهداية والصلاح والتثبيت 🌸♥️

اللهم إهدنا وأصلحنا وثبتنا على دينك وسنة نبيك ، ويا مقلب القلوب ثبت قلبي على دينك 🤲🏽💚🕌

والدين حياة 🕌♥️

فما ظنكم بربِّ العالمين ؟؟♥️

🕌💚

صيني اتشاكل ما مرتو هي قالت ليهو
퓨처는 푶 첔퓿 팔 퓨쳐의
وهو قال ليها
팔 퓨 촡 퐆 톄
عليكم الله الغلطان منو🙂💔

صلاة الخسوف والدعاء سُنة ♥️

قد تظن أن لا أحد يحبك
والحقيقة أن لا أحد يحبك فعلا

لذا توقف عن الشك وخليك واثق من نفسك
😂😂😂🤣🤣

#متتتتيين ..تجى #اللحظة البتقيف لي فيها #فى الباب ..😍😍😍
وتقول لى ..
حلفتتك #بالنبى ما تطلع بي .
قميصك #الوسخااااااااان ده ..😢😢

وتجى #تطلع القميص👕 بى يدها وتدينى ضربة #على خفيف كده فى #كتفى ..🙈
وتقول لى ..😍😍 مع #اني بغير عليك .. 🙈❤ بس #مابرضى اقولو على حبيبي 😒 #وسخااااان .😢😢

علي الطلاق #ادردق فى الواطة عشان اوسخ #البنطلون واسمع #النغمات دى تانى .. 😍😍🙈🙈😂😂😍

خرجت #من_العملية
فلم ترى #عيناها سوى #والدها فسالت وعيناها #مليئة بالدموع 😭😭
اين #زوجي ❓
فاجابها #والدها : الم تعرفي من تبرع لك #باالقلب 😯❤
فصرخت #وهي تبكي #لاااااا😭😭
فقال لها #والدها : بهظر معاك #ياطيرة 😂😂
طلع #برا يجدع ليهو #سفة😅😅😂
بنات اخر #زمن عايشات على المسلسلات #التركيه بس
😊😊
المشكله انو #العملية بتاعت #لوووووووز
😂😂😂😂😂😂

.لا سايقين #عربات 🚘 ولا #مرتبطين 💑ولا في زول #شغال بينا 🌚 ولا #عندنا زول #بخاف علينا 💔 ولا #سمحين 😢 ولا حتى #مقرشين 💸

ومتحير في #نفسي مبسوط كدا من #شنوو😜😜😜😂😁😃😋😉😍😆😀😝

الهنود:
البطل بدقو فيهو وملان دم وح يطعنو خلااص😣😖🔪

البطله: " رااااهوووول اي لوف يووو اي لوووف يوووو يووو يوووو يو"

البطل: هاااع " الخونه كلهم ميتين"⛓🔨⚔🔥

"اي لوف يو تو سانجيتا"🐸💃
موجسي شالي كورجي ...موجسي شالي كوورجي 💃💃
وانتهى الفلم على كده👏😂😂😂🐸💦💦💦 🌚

ـ سُبل الرشاد ✨🕯️



الحلقه الأولى من سلسلة سُبل الرشاد ح تكون المفتاح للبدايه في السُبل ، والبداية ليك في الإتباع
زي ما كل مجموعة طُرق عندها طريق رئيسي
ح تكون الحلقه دي السبيل الرئيسي البتتوجه منو لباقي السُبل ،

إنت لمن تكون ماشي مكان ح تكون قررت جواك قبل تتحرك صح ؟
يلا نفس الفكره الطريق لله وللأعمال ببدأ أولاً بالقلب قبل الأفعال ، لانو القلب هو البوصله إذا صحّت نيته إستقام المسير حتى لو تعثرت الخطوات

والرشاد يبدأ من الداخل ✅

قال النبي ﷺ:
(إنما الأعمال بالنيات ، وإنما لكل امرئ ما نوى )
(رواه البخاري ومسلم)


لازم في كل الأعمال تتوجه لله تعالى قبل تنفيذها
تخلي نيتك فيها خالصه لله تعالى ،
ما عشان الناس قاعد إعملوا كدا ولا عشان نظرة مجتمع
و لا شُكر ولا إنتظار رد جميل في حال كانت خدمه لي زول

﴿يَوْمَ لَا يَنفَعُ مَالٌ وَلَا بَنُونَ * إِلَّا مَنْ أَتَى اللَّهَ بِقَلْبٍ سَلِيمٍ﴾
[الشعراء: 88-89]

لانو القلب والنيه هما الأساس والعمل ما هو إلا نتاج ما بداخلك (قلبك ونيتك )

وكما قال النبي ﷺ:
(ألا وإن في الجسد مضغة ، إذا صلحت صلح الجسد كله ، وإذا فسدت فسد الجسد كله ، ألا وهي القلب )
(رواه البخاري ومسلم)

ذكّر نفسك يومي بأنو أعمالك لله وحده لا لشيء سواه
وأسأل نفسك قبل النوم ، العملتو الليله بقربني من الله أم ببعدني ؟
جاوب على سؤالك وم تهتم بالكمال المهم الصِدق وحبّه حبّه حتى تكون إن شاء الله في طريق أكثر إستقامه وأقرب للصلاح،
وإتزكّر
أعمالك لله
رجاءك من الله
توجهك لله
خوفك من الله
صبرك لله
وتحرى النيّه في كل إمورك ✅



اللهم أجعل أعمالنا ونياتنا ، ما نسر وما نعلن خالصاً لوجهك الكريم ، واللهم إجعل في قلوبنا نورا وفي عقولنا نورا من فوقنا نورا ومن تحتنا نورا وعن يميننا نور وعن شمالنا نورا
اللهم توفنا مسلمين وألحقنا بالصالحين 🤲🕌💚

الحلقه الجايه ح تكون عن الحديث المذكور (ألا وإن في الجسد مُضغه)
متين بتفسُد ؟
ومتين بتصلُح؟

والله تعالى أعلى وأعلم

والدال على الخيرِ كفاعله ♥️

والدين حياة 🕌 💚

من أصلح قلبه وأخلص فعله جمع خير الدنيا والآخرة، ونال رضا الله والطمأنينة في نفسه 🕌💚

اعمل عملك خالصًا لله، فإن ما كان لله دام ونما، وما كان لغيره انقطع وفني 🕌💚

‏سأرحل وستندمون ، بس خايف ارحل

وما تندمون عشان كذا قاعد 🌚💔😂