(وزن عگيلي للامام القاسم ع)

يارمله اشموعچ طفيها
والحنه بدمعچ دوفيـها
**
يارملـه اوليـدچ عالغبره
والحنه صارت دم نحره
گعدت يمّه تنوح الزهره

دمعتها الجاسم تجريها
يارمله اشموعچ طـفيها
****
عريس وبالحومه اتگنطر
يارمله وبسيوف العسكـر
اولــيــدچ طايح ومـــوذر

دم تنزف جثته امخليها
يارمله اشموعج طفيها
****
الله يــعينج يام الـقاسـم
فوگ الغبره اوليدچ نايم
شاب ونام بنحره الصارم

عاف الدنيا وكل مابيها
يارمله اشموعچ طفيها
*****
امنيتچ چنتي اتشوفينه
عريـس ابنج واتـزفـيـنه
واصـبع چـفه اتحـنـيـنه

واشموع الفرحه اتعلگيها
يارمله اشـموعج طـفيها
****
يارمله يكون الله بعونج
مذبوح وجدام اعـيونـج
خابـت يارمـله اضـنونچ

من شفتي الهامه امطبريها
يارمله اشـموعـچ طـفـيـها
****
شفتي اوليدج وبياحاله
طايـح وادوسه الخـيّاله
راح حسين ولـمّن شـاله

بسيوف الجثه امگطعيها
يارمله اشموعچ طـفيها
*****
يام جاسم انتي مأجروه
عريس انطيتي مشكوره
حگچ تبچـين ومـعـذوره

والتفگد چا شيضل بيها
يارمله اشموعج طفيها
*****
چم شاب احنه اليودعنه
مثلـچ يارمـله وضـيـعـنه
انعرس لـيـهــم نــتــمـنـه

جـثـمـان انـزف تالـيـها
يارمله اشموعچ طفيها
***
عمار حسن الدراجي١/محرم١٤٤١

ليــــــش ظالم يادهــــــر ويانة
خذت منة اعزازنة بدنيانة
----------------------------------------
شمعة الشــــــــبان دمعتها جــــــرت
تاكـــل بخيط العمر بالطف دوت
جاسم العريس شمعاتة طــــفت
ابــــني ادور عليه خالي امچانة
-----------------------------------------
الجمر بالروح ما همني الجــمر
روحي مسبية بفركَتك والهجر
عمري اخذة وياك شلي بالعمر
روحي بــفراكَك تون حــــــزنانة
----------------------------------------
الهلاهل مــــــوت بسيوف الحرب
وحنــــتك من وريدك منخـــــــضب
كَمت اطش ادموع بديار الغرب
للعــــــــــــرس راح الــــــــــولد ماجانة
------------------------------------------
يابعد روحي يالبعــــــــــــــمر الورد
هاك سيفك والدرع يلله استعد
رسومك الحلوات مردني مــرد
شلون احمل فــــــــركَتك حيرانة
------------------------------------------
هذا حد دنــــــــــــياي لهنا عيشتي
انه من بعــــــــــدك غريبة بدنيتي
يمة خذني وياك شنهي ظلتي
بدار وحــــــشة بيها اون سهرانة
------------------------------------------
يا رباي الراح ياتعب السنــــــــين
يمة الله وياك رايح يالحنــــــــين
نغـــدي انة وياك فدوة للحُسين
ليش عايش من مشــــــوا خلانة
----------------------------------------
يمة طب للموت عيش بكربله
للشهيد اتصــــير اعظم مــــــنزله
اخذ كَلـــــــبي وياك يا تالي هله
اخلافك ايموت الكَلب بأحزانة
-----------------------------------------
أسالكم الدعاء رائد الاسدي

  يبني جسام            تنتهي احلام 
     ليل الأحزان             يفرهد اوطان 
    تموت الورود          وتبذبل اغصان
*************************************************
جاسم لون ثوب العرس يكسر خواطر ناسه
شفتك كمر اربع طعش سابح بدم من راسه
اليفكد اعز ما عالكلب وبعرسه شنهو حساسه
يصبح اله ثوب الدمع والحزن جن مقياسه

اول ايام              عيون متنام 
ليل الاحزان         يفرهد اطان
تموت الورود     وتبذبل اغصان
*************************************************
باجر شمعتك تنطفي وامك تره تشوف الويل
وباجر انه  من البجي للكومه مابيه حيل
ويمكن اشوفن ياكمر حنه العرس دم يسيل
وينكسر كلبي من اصد دوسس بحوافر للخيل

عايشه وهام         ترد للخيام 
ليل الاحزان         يفرهد اوطان
تموت الورد         وتذبل اغصان
**************************************
عريس ينزف للحرب حاله غريبه أعلينه
ونسمع اصوات من الخيم هلبت يرد والينه
ما تحمل فراك وهجر رملة تعرفها حنينه
مكسور وتناطر بقت وتصيح ابني  وينه

بدموع والام           تصيح جسام
ليل الاحزان            يفرهد اوطان 
تموت الورد           وتذبل اغصان
*********************************
يوليدي كلبي ينكسر من تمر زفة عرسان
جسام صارت زفتك السوح الحرب بالميدان
يالبعدك بعمر الورد يوليدي شفتك ذبلان
خيم على كلبي الحزن وبروحي بانيله اوطان 

سيوف وسهام       بجسمك تنام
ليل الاحزان        يفرهد اوطان
تموت الاورد      وتذبل اغصان
**************************************
واخر رويات الحزن رمله غريبه بالشام
محتاره بفكد الولد ساعه تسكت الايتام
من عيونها يفيض الدمع وبالكلب تحمل آلام
 وتكول لوجاسم عدل انه ابد ما انظام 

وتحمل الام        بذكره جسام
ليل الاحزان       يفرهد اوطان
تموت الاورد     وتذبل اغصان

الى خادم الحسين الشاعر:موسى نعيم الزيدي
*********************************

#القصيدة الثالثه

القاسم ( ع )
.......
بست النحر منه
حس خدي جن حنه
عريس هذا البطفوف
متحني بخضاب السيوف
حس خدي جن حنه
.......
يا يمه جسام العمر
من بعد شلون انتظر
انظر واشوفاً صحبتك
گدامي تتباها وتمر
وانظر واشوفاً حالتي
وينك يا روحي يابدر

وينك تطيبلي العيون
يبني وترد وي اليجون

وبرجعته اتمنه
بست النحر منه
.....
وبزفتك امشي بفرح
ليل ويمر بيه الصبح
وافتح عيوني بنظرتك
اغفه واحس كلبي ربح
واتخايلك يم الجفن
نسمه وشعر رمشي سرح

ضحكت طفل امه السبب
بشفايفه الفرح كتب

ارد اكسر الونه
بست النحر منه
......
لا يالولد لا تبتعد
تدري انه لحضاتك اعد
رد وانحني الصدر استرح
درب التروحه مايرد
رد يبني اسمع ضحكتك
مكفاك يمردني مرد

منتظره عمري لشوفتك
ما اعيشاً اله بضحكتك

ضوگني الجنه
بست النحر منه
....
لبس الابو لايك الك
انت الامير وي الملك
لازم اسويلك حرز
لا تنحسد من الفلك
اخر وصيتي ونظرتي
اوكف اكبالي ارد اسألك

وارد انظر عيونك عدل
معقوله اشوفك تنكتل

يم صدره ادنه
بست النحر منه
.......
مشيول اجه وظهري انكسر
اتعثر بطيف الجدم
كمت علطولي اتشاهدت
بعد العمر كلشي انهدم
واصبح وجودي ودنيتي
مايسواً بسعر العدم
كمت وصحت ياخالقي
يرجعلي وانه انزفله دم

دمي انه يجري علارض
وكل خيلهم جسمي ترض

بس لحضه اشمنه
بست النحر منه

....
حيدر عيسى البديري

#القصيدة الخامسه

يا جاسم يا جاسم ٢
......
صول ياسبع الهوامش صول يانور النضر
صول يا بيرغ عمامك سكن اعداك بسقر
حير الكون وعيونه شلون هل هذا الكمر
ميل الطفوف وزلمهه لا تخلي الهم اثر

يا جاسم يا جاسم
......
صيح يا عمي الهواشم ما ينزلون بسكوت
بهوستك يا عمي ادري ترهب اعداك وتموت
مثل جذع النخله تبقه يابسه وما بيها صوت
ادري ما خذ طبع حمزة بس عله الصعبه تفوت

يا جاسم يا جاسم
....
اكسر اخشوم التضدك واحني بسيفك ركاب
چانو يعدون عدهم الف من عزم الشباب
بحد ضربتك من تأشر ما تخلي الهم عتاب
مرو عليك بثواني وانتهو صارو سراب

يا جاسم يا جاسم
......
حنتك وسط المعاره وزفتك بين الجيوش
والشمع والياس طولك حنتك صارت نقوش
نازل بوسط الكتائب تمشي وبسيفك تحوش
بزود تتخير القاده دربك جثثهه مفروش

يا جاسم يا جاسم
....
بعمر طيف بعمر ورد وبالجمال شيوصفك
يا حسن يوسف بكربك وين يكدر يعرفك
وبالشجاعه الاحمديه انت باين موقفك
شما يحطولك مراتب ادري محد يوصفك

يا جاسم يا جاسم
...

حيدر عيسى البديري

١٣/٩/٢٠١٧

يا رمله يا رمله طفي الشمع يا رمله
مات العرس بالميدان
بدلي الشمع بالاحزان
طفي الشمع يا رمله
......
يا رمله صينيت العرس شيليها
المن اشموع اگبالنه مشعليها
جاسم مشه المن بعد نضويها

مزفوف راح لحومه
المن نحضر هدومه

الحمله الحمله ما يرد من الحمله
يا رمله يا رمله طفي الشمع يا رمله
.....
المن الياس وهالرورد ناثرته
ليا زفه قصدج هذا المحضرته
والحنه هاي المن بعد شايلته

تحنه بدمومه وليدج
حنة الجنه يريدج

تحنن له تحنن له بالجنه و تحنن له
يا رمله
......
يا رمله عرس القاسم بيا حمله
فرحان رايح للحرب شو شكله
ما جنه نازل للمنيه وجتله

مثل الكمر ويلالي
بيرغ يرفرف عالي

مو سهله مو سهله چتل الولد مو سهله
يا رمله يا رمله طفي الشمع يا رمله
.....
العرس صار بنصرته لعمه حسين
بالحومه صارت فرحته راد الدين
ما راد دنيه التنضر بس بالعين

طب للحرب والبسمه
تحله عله خده الرسمه

من شكله من شكله لون الورد من شكله
يا رمله يا رمله طفي الشمع يا رمله
.....
غافي عله تربان الحرب لوليله
متعود ينام عله صوتج ليله
نادي يرمله بصوتج وگوليله

نايم يبعد عيوني
واني امشي وي اضعوني

ما يحله ما يحله اي شي بعد ما يحله
يا رمله يا رمله طفي الشمع يا رمله
___
حيدر عيسى البديري

#القصيدة الرابعه

طلع جاسم للحرب
وين الي يلاكونه
غيره لف برايته
تلمع من عيونه

حيو جاسم يخوتي حيو جاسم

....
برز جسام الكمر حنت الزفه بأديه
دخل للحومه عرس وحده والدنيه عليه
يزئر ويمشي بثبات ما يهم للي يجيه
وزع بكيفه الحياة بكيفه قسمها بمشيه

بيده غرد صارمه
هذا ابن حامي الحمه

حيو جاسم يخوتي حيو جاسم
......
طلع من بين الخيام حمزه وبهيئه علي
السبط تنظر مشيته وهيبته من الكافلي
بطرف نظراته ورموش الكتائب تنجلي
يرجف بجفه الحسام يغلي منحرهم غلي

كله صاحت ذو الفقار
تنگط عيونه شرار

حيو جاسم يخوتي حيو جاسم
...
طلع قاسم عالجموع يرتل بنص ايته
سيفه يضرب بالوجوه يفرزن الها بنضراته
الي ما لاحه بيمن شطر هامه بيسرته
ابن هاشم والنعم والنعم من صولته

عاد بالطف خيبره
قلع جيش بخنصره

حيو جاسم يخوتي حيو جاسم
.....
من يشد بين النزال ينعرف من بسمته
كباله ما تبقى جيوش لو يردد نخوته
تشرد اكباله وتحير من يرفرف رايته
زوده من عمه الحسين وعلي جنه بخزرته

بعينه كامو يرجفون
يكتل بنضر العيون

حيو جاسم يخوتي حيو جاسم
.....
كله صاحت منه غوث محد اكباله وگف
بزوده ما هم بالالوف كلشي اكباله شگف
لو يريد عله الفرات جان هم بيده غرف
وانكتب وسط السطور واسمه بالجربه انعرف

جان رواها الخيام
وجربته وصلة سلام

حيو جاسم يخوتي حيو جاسم
.....
حيدر عيسى البديري

القاسم (عليه السلام)

يبني يا طعم الهوه
الساعه ساعه نينوى
—————————————
عيف عرسك .. يبن ابوك الساعه ساعه نينوى
شوف عمك .. الهاي ساعه ذخر خلاك ودوه
گال البس .. هدمي يبني واعتني وي الهوه
زلمه اريدك .. مثل عمك خل يخلولك لوه

وخطفتك مثل الضوه
الساعه ساعه نينوى
—————————————
جيش وحدك .. كون بالحمله يحسبونك جمع
ومن تهوس .. بالسمه صوتك اريداً ينسمع
وطعم سيفك .. دمومهم رايدها تخلط بالدمع
من شبابك .. صوت من الجيش رد حيدر يشع

شايل بجفه اللوه
الساعه ساعه نينوه
————————————
هنا عصابه .. شدها خضره فوك گصتك يا كمر
وبيها طلسم .. لا يحسدونك ييمه بالنضر
وامشي هيده .. الجيش يعرف كله من جفك حذر
مو السهله .. يمه اريدك تعتني لگلب الخطر

وكل بطل بيدك هوه
الساعه ساعه نينوى
————————————
غطي وجهك .. حسن وجهك حير الكاع وسمه
والكواكب .. تاهت وحارت وهي منضمه
كمر طالع .. عفت بعدك أم گلبها مهدمه
بس مدامع .. ظلت عله النوح بس معلمه

تدعي يم جده رتوه
الساعه ساعة نينوى
————————————
ساعد الله .. گلبي وانه ام واسأل الام تفتهم
بيدها تهم .. تلبس هدوم الحرب لا مو حلم
والله والله .. كون يتفده بنجم جبت النجم
اخذ روحي .. وروحه من راح ومشه بجدمه يهم

مشو للحومه سوه
الساعه ساعه نينوى
————————————
حيدر عيسى البديري

الامام القاسم عليه السلام (نزله)
———————

بعمامته الخضره نزل بيهم
ينضر يشوف اول وتاليهم
ابن الحسن .. ابن الحسن

——————
ميدانهم باسمه انكتب
والموت بجفوفه گلب
ابن الهواشم بالغضب
كل جيشهم اصبح حطب


رد بيده حملات الوصي عليهم
بعمامته الخضره نزل بيهم

ابن الحسن .. ابن الحسن
——————
عباس نادا للحرب
حيهم اريدك ع الصعب
خل رايتك بيهم تهب
تعصفهم بنارك شهب

والموت ضرباتك تراويهم
بعمامته الخضره نزل بيهم

ابن الحسن .. ابن الحسن
——————
ناثر جعوده وصارمه
واضح ضربته معلمه
بالغضب عدوانه عمه
مأيد بأملاك السمه

الجيش بقياداته يساويهم
بعمامته الخضره نزل بيهم

ابن الحسن .. ابن الحسن
———————
اشجعهم گباله شرد
كل جيهم يمه ارتعد
شاب وطري عوده بعد
نازل ولا همه عدد

كثر الالوف ولا يهم ليهم
بعمامته الخضره نزل بيهم

ابن الحسن .. ابن الحسن
———————
ابن الحسن ناده وسمع
كل جيشهم ذهنه طبع
هالهاشمي جفه رفع
يعرفونه سيفه لو لمع

مثل العصف سيفه يخليهم
بعمامته الخضره نزل بيهم

ابن الحسن .. ابن الحسن
———————
حيدر عيسى البديري

٢٠/٧/٢٠١٩

الشمع يطفه ويشتعل بعيوني
بعرس جاسم لواجه يذكروني
مثل البخور اتئملت بنار اشتعل بس خلصت
مالحكو طفوني
--------------------------------------
الشمس غابت وافرشت مصلايتك
البيت وحشه بلايه طعم حجايتك
جاسم ارجع والله كلبي بعازتك
الشمس تطفه وانته نور ولايتك
حالي ريشه وريح هجرك عالي
الدنيه شنهي من يموت الغالي شلي بيهه اتعذبت بنار اشتعل بس خلصت
----------------------------------------------
الوالده اتبجي الصخر لومات ابنهه
تذكر اربات الطفولة يدر لبنهه
هالمصايب يبني امك عجزنهه
جرحك وضعن السبايه دولبنهه
مابقه منكم جسد بس ذكريات
بعيني ميته الدنيه ماظلت حياة
روحي ماتت من رحت بنار اشتعل بس خلصت
-------------------------------------------
ليلة الوحشه عشتهه شكد ثكيله
الله يرحم كلمن يفارك خليله
النجمه بعيونه تصير شكد ذليله
اليفكد ابنه يضيع مايعرف دليله
يله وين اهل الرحم دلوني
يم ابني جاسم بالكبر نزلوني
بكبره اندفن اني ردت بنار اشتعل بس خلصت
- - - - - - - - - - - - - - - - - - - - -
ماشفت عرسك كبل شيب الكبر
شفت خيل وفارس يرض بالصدر
وشاب طايح ع الثره بعز الظهر
عفته نجمه وضيع أوصافه الفجر
الخيل ماخلت ملامح لونه
كبل جاسم هسه متعرفونه
ماعرفته وضيعت بنار اشتعل بس خلصت
-------------------------------------------
راسه ينزف وذكرت فارس مضر
ابني جاسم جنه حيدر وانطبر
كحل اعيون المواقف ماخسر
بجنة الله ودرب الحسين انتصر
الكاع تعرف غيرته وصولاته
الحسن جنه ابن الحسن وكفاته
يبني ادري اتحملت بنار اشتعل بس خلصت

الشاعر مهند الدريساوي

محررررم 1441 هـ رمله والقاسم .ع.

منك رايــــــده چلمه چلمه
لو طف لو عرس يمى يمى
لو شمعة او عطر هاب . لو دم يبني واتراب
اتخير يجاسم

يجمل روح . كافي اتنوح . غالي اعلية دمعـك
شنهو اتريد . جاسم گول . بس ارفعلي صبعك
اتريد افراح . لو ترتـــاح . گلي وشينفعــــك
كون اتريد . زفه او عيد . گلي او هسه اشبعك

گول الرايـده لمــك لمـك
ميظل بالگلب همـك همك
خليني اسمع اجواب . لو دم يبني واتراب
اتخير يجاسم
________________________
يبني اليــوم . قرر ويـــن . تتوجه حياتـــــك
لو عريـــس . لو تختــــار . طفك وابرضاتــك
هاي اشموع . هاي اسيوف . واختار امنياتـــك
لو لحسيــن . لو دنيــــاك . شنهو اتريده ذاتك

اختار الينفعك باچر باچر
يبني او لاتظل حاير حاير
تدري اشينفع الشاب . لو دم يبني واتراب
اتخير يجاسم
________________________
ثوب افراح . ثوب احروب . گدامك يغالـــــي
شنهو اتريد . إلبس گوم . او ريح هسه بالــي
اختار البيه . راحه او فوز . هسه او يمى تالي
ساكت ليش . يا جســــام . گوم او رد سؤالي

اتخير يالولد بدله بدله
زفه لو حرب تحله تحله
جرحي ابقصتك طاب . لو دم يبني واتراب
اتخير يجاسم
__________________________
حنتك هاي . يبني اهنا . للخيمة جبتهـــا
مد ايديك . خنحنيـــك . زفتك لو ردتهــا
والشوباش . والشمعات . جاسم حظرتها
هاي ايديك . كون اتريد . بالحنه اصبغتها

أم او حگي أتمنه اتمنه
أنظر أبني يتهنه اتهنه
أفرح وانسه العتاب . لو دم يبني واتراب
اتخير يجاسم
__________________________
حلمي اوياك . يا جســـام . أنظر مره عرســك
او ثوب افراح . يالمحبوب . يبني ابأيدي البسك
اشگد فرحان . وما زعـلان . يمى اتگلي احسك
حلمي الگاك . بس مرتاح . وامريحها نفســـك

لكن حلمـي اتغير اتغير
تنصر عمك اتحظر اتحظر
العمك لا تسد باب . لو دم يبني واتراب
اتخير يجاسم
________________________
أتمنـــــاك . يحله اوليد . العمك تمشي يبنـي
واتناديــــه . يالمحبوب . الگاع الحومه خذنـي
عرسك صار . الطف جسام . وآنه اقبل تهدنــي
يم لحسيــن . أمشي او صيح . يمك عمي خلني

أترك يالولـد زفتك زفتك
العمك لا تعز جثتك جثتك
يوليدي الفرح غاب . لو دم يبني واتراب
اتخير يجاسم

حيدر الحلفي

محررررم 1441 هـ رمله والقاسم .ع.

بالطف شبابك راح . لكن غداً ترتاح
والدنيا عالت بيك . اخذتها من ايديك . ضحكة شبابك
المثلك يجاسم فتى . ثوب العرس بدلته
مو ثوب الحروب

مات الفرح يوليدي . فك الحزن بيبانــه
والدنيا أيس منها . منك لأن زعلانــــه
طلگها لتصد الها . لا تهتم الدنيانــــــه
باچر فرحتك ترجع . وآنه اشكثر فرحانه

بالجنة يمى اتشوف . حور التحني اچفوف
وآنه انظرك فرحان . واتگلي ما زعلان . عوضني الله
اليتعب يجد ضحكته . ثوب العرس بدلته
مو ثوب الحروب
________________
كلما اصد لعيونـــــــك . ابچي واهلن حسره
وسفه ابترب تتخلـــــه . بعدك يجاسم زهـره
اشتسوى الحياة ابدونك . مّره ابغيابك مّــــره
كبرتك ابأيديــــــــــة . تاليها تبقى ابحفــره

لا ما اصدگ هاي . ما تبقى انته اوياي
واعيونك الحلوات . انظرهن امغمضات . والدم عليهن
والما گطع وردته . ثوب العرس بدلته
مو ثوب الحروب
_________________
اعرف شبابك رايح . بس الزمن شيوگفـه
واللي ييمى ابعمرك . حَنه يجاسم چفـــه
والشمعة من يشعلها . راعيها لا ما تطفه
فرحانه وي راعيها . هالليلة زفته اتعرفـه

المثلك يجاسم صار . عرسه ابفرح واشعار
بس انته عرسك وين . بالجنة يم إحسين . يم الزچية
واليلتقي ابجنته . ثوب العرس بدلته
مو ثوب الحروب
________________
اتمنيت احظر حنـــه . واعجنها بالصينيـة
او گدام ابوك اوليدي . تتحنه أي بيديـــة
وتلبسها هاي البدلة . يوليدي والخاچيــة
وربعك تجيك اتبارك . بعد المسه ليليـــة

واتنادي الك مبروك . والبيتك ايزفوك
وآنه الأطش چكليت . يوليدي وسط البيت . وافرح يجاسم
المثلك صبح غايته . ثوب العرس بدلته
مو ثوب الحروب
________________
اچفوفك يجاسم حلوه . وسفه الدمه ايغطيها
حنه ابأخير ايامــــي . اتمنيت اشوفن بيهـا
روحك بعد ما صــدگ . يايمى ما حاچيهــــا
والبدلة هاي الحلوه . ابقى آنه اشمن بيهــا

يوليدي احله اثياب . افرشها فوگ الباب
كلما احنن ليـــك . اشتمها واشعر بيك . بدلة زفافك
البالهم گضت دنيته . ثوب العرس بدلته
مو ثوب الحروب
_________________
مثلك شباب اهوايه . حَشدّ الله إيسموهـم
برض العراق اهنانه . باچر سوى ايدفنوهم
باچر يجاسم مثلك . صوب الوغه ايزفوهـم
مثلي آنه تنحب امهم . بدماهم ايحنوهـــم

مثلك بعد شبان . اتغطيهم التربان
وامهم تنادي اهواي .مشكوره يادنياي . خذتي الأوده
والتشتعل شمعته . ثوب العرس بدلته
مو ثوب الحروب

حيدر الحلفي

محرررم 1441 هـ القاسم ورمله . ع .

وصيتي اوياچ لشموع .. يظلن فوگ گبري
ييمى او هاي لدموع .. علية اهناك تجري
الي لو ليلة مريتي . ييمى جيبي صينيتي
وصيتي . وصيتي

صعب لوداع يايمـــــى .. لچن مجبور ارحــل
الورد مرات يارملـــــه .. اذا مجبور يذبــــل
ابد ماريد دلالـــــــــچ .. على جسام يزعــل
او دموعچ هاي يم گبري .. ييمى اهناك تنهــل

اعله گبري اهناك كل يوم .. ييمى اهواي گعدي
عله العريس تقريـــــن .. قصايد كون عنــــدي
اسمعچ لو الي اقريتي . ييمى جيبي صينيتي
وصيتي . وصيتي
___________
احلفچ جيبي صينيتي .. يرمله الگبري فدوه
تخلي اشموع الي بيها .. ييمى او حنه حلوه
تعاي او ذكري ايامي .. ابدموعچ گلبي يروه
بيمى او سولفي اويايه .. اسمعچ وآنه جوه

عله الصينيه ياريــــت .. ييمى اتخلي صوره
ألي واتگولي هالشاب .. مشه امجَرَح شعوره
إذا ما ابچي حبيتي .. ييمى جيبي صينيتي
وصيتي . وصيتي
__________________
وصيتي اعليچ يا يمـــــى .. ألي اتجيبين حنه
اعله گبري اوچفي يارمله .. ايتحنه اهناك چنه
او قصيدة يمى ذكرينــي .. تگولي ابطور ونه
او تصبي يمى دمعاتـــچ .. عله اللي ما اتهنه

اعله گبري اورود ياريت .. ييمى اهواي طشي
ييمى او مــــاي لورود .. علية اهناك رشــي
ورد لو انتي طشيتي . ييمى جيبي صينيتي
وصيتي . وصيتي
____________
اريد اتجيبي يا رملــــــــه .. الي بدلات زفتـــــي
اعله گبري او بلكت اتشعري .. ييمى ابعرسي انتـي
عله لتراب خل تجـــــــري .. دموع او كتبي قصتـي
گبر جسام هذه ابنـــــــي .. مشه او راحت فرحتي

الحلم ما عاد موجود .. الحلم بتراب نايم
صبح والناس سموه .. حلم مذبوح جاسم
حلم بس چان إمنيتي . ييمى جيبي صينيتي
وصيتي . وصيتي
_____________
اعله گبري كتبي لحچيهن .. الچ چم كلمة هســــــه
يعالم جاسم اوليــــــدي .. رحل في يوم عرســــه
بدل ثوب العرس ابنـــي .. الحرب ثوبه يلبســــــه
مشه وانباگت احلامــــه .. اختفت من عندي شمسه

يأول شاب يا حيف .. رحل ما شاف فرحـه
ترك ضحكات دنياه .. او شبگ ياناس جرحه
يدنيا جاسم اخذيتي . ييمى جيبي صينيتي
وصيتي . وصيتي
______________
ييمى دلي صحبانـــي .. اعله گبري خل يجوني
او عَلي يقرون فاتحتي .. اخافنهم نســــــوني
تعاي اوياهم الگبــري .. اخاف ايتيهونـــــــي
ييمى ابذيچه عشرتنـه .. اريد ايذكرونــــــــي

ييمى خبري لصحــاب .. مشه جسام عنكم
وصيته الگبره كل يوم .. زيارة ايريد منكـم
اعله گبري اصحابي وديتي . ييمى جيبي صينيتي
وصيتي . وصيتي
______________
اشكثر شبان يايمــــى .. ابأرض لعراق مثلـي
بعد يرحون من امهــم .. وابوهم گلبه يغلـــي
دموع امهم مثل دمعـچ .. ييمى اهناك يهلـــي
حشد شعبي يسموهم .. الحسن بالطيف گلـي

ييمى ابعمر الــورود .. عمرهم ما دريتي
وبعد لستشهد ايصيح .. مثل جاسم منيتي
اليموت ابأمه حسيتي . ييمى جيبي صينيتي
وصيتي . وصيتي

حيدر الحلفي

محرررم 1441 هـ القاسم ع

جسام .. يحله إمن العرس
جسام .. يا گمره او شمس
جمالك چن قصيدة . كتبها إحسين بيده
يحله إمن العرس

يبيك اشويه من محلاة الحسين
اشحلاتك يمى تشبه أحله عمين
يوارث من ابوك الكرم مو دين
اذا تمشي الأرض ترتاح مرتين

سر بيك .. من تمشي ابخجل
هالگـاع .. تتحول عســــــل
حياتك أي سعيدة . كتبها إحسين بيده
يحله إمن العرس
_______________________
يطولك من شموخ الغالي عبـــاس
إذن حگها تحسدك جاسم النــــاس
اذا زفك عليمن ننثر اليـــــــــاس
مشيتك ياس كون انطشلك احساس

عباس .. تشبه بالوصف
جسام .. بس كلك ترف
حلاة ابن الصميدة . كتبها إحسين بيده
يحله إمن العرس
________________________
يالمحلي العشيرة ازغير او شــاب
ابذهب مخلوق إنته مو من اتـــراب
العرب صفنت عليك او حتى الاجناب
عليك اهواي طلعوا جاسم اللقــاب

لقبــوك .. ورده امفتحه
الشافاك .. لو ميت صحه
فلا ظنها بعيدة . كتبها إحسين بيده
يحله إمن العرس
_________________________
يطير او غازلتك حتى الطيــــــور
عطر بالخيمة اشم ثاري انته لبخور
دعيت الربي واصرخ ربي مشكـور
لأن جسام عندي ابيوم عاشـــــور

لخيام .. حلاها الولــد
جسام .. چيه بيهن گعد
طفح لؤلؤ وريدة . كتبها إحسين بيده
يحله إمن العرس
________________________
غصن واتمايلت مابيــن الازلام
عليك اهواي صفنت حتى الخيام
الجمالك ظلت اترف حتى الاعلام
احترام النور وجهك سجدن اسهام

حيــاك .. صرخت كربله
ابجسام .. يامية هــــلا
إلك كلشي التريده . كتبها إحسين بيده
يحله إمن العرس
________________________
عليك اللامه حلوه اهواي حليـــان
حلت بيك الطفوف او حله الميدان
يطولك أحله من اهواي شبـــــان
اشحلات السيف بيدك وانته زعلان

والسيف .. يتمايل غــزل
بيديـــك .. چن مثلك زعل
زعل يعزف نشيدة . كتبها إحسين بيده
يحله إمن العرس

حيدر الحلفي

*بشان عبدالله الرضيع*

🚩🚩🚩🚩🚩

*عبدالله يبني*
            *سهمك ذبحني* 
                           *عبدالله يبني*

&&

حسبيت احساب لاچن طلع مگلوب
يـبني من تكبـر افصل بيدي الثـوب
لاچـن اسهام الـغدر صوبت لگلوب
حرمله بنبله ذبحني دمعي مسچوب
*النوح فني*
           *سهمك ذبحني*
                            *عبدالله يبني*

&&

بـعد عينك ياجـنيني الـمهد خـالـي
اگماطك اشتمه ياروحي يمه اللولي
ماتغيب ارسوم وجـهك عن خـيالي
عـالـترب مذبـوح يوليدي اگبـالـي
*مينام جفني*
          *سهمك ذبحني*
                       *عبدالله يبني*

&&

يبني يازهرة حياتي وسلوت الروح
صعبـه يايمه اشوفـك يمي مذبـوح
بالدمه مخضب ونحرك كله اجروح
وانـا ابچـي يـاعزيـزي بالله لاتـروح
*موتك شعبني*
           *سهمك ذبحني*
                       *عبدالله يبني*

&&

اه يـغصن الـغرستـك  بيـن الضلوع
روحي مختنگه بهواها عيني ادموع
من شفت نحرك بنبله گلبي مفجوع
وحشه بعدك دنيتي الامل مگطوع
*من رحت مني*
        *سهمك ذبحني*
                     *عبدالله يبني*

*عاشقة الولايه*

          *نسالكم الدعاء*

https://t.me/khdmat

اهز مهدک ولولیلک
دللول دللول
یلوَلَد یبني
🍂🍂🍂🍂🍂🍂🍂🍂
یلولـد یبنــي یعمــري ولبــت احشاي
غیمــه وتزخ ابمطــرهه انتــه بسمـاي
مــن اهز مهــدک ولولي تزهــي دنیاي
تجري عافیتي او يروحي مجره الماي

تناغیلـــي وناغیلَک
اهز مهدک و لولیلک
دللول دللول
یلولد یبني
🍂🍂🍂🍂🍂🍂🍂🍂
یبنـي من تصرخ افز ومایضـل حیل
اگعد ابســرعه وگمطـک تالي اللیل
تبتسِــم لیـه ویهـوّد ذاک العویـل
روحي اطش ابفرحهه طشت السیل

یفر گلبــي ویحییلَک
اهز مهدَک ولولیلَـک
دللول دللول
یلولد یبني
🍂🍂🍂🍂🍂🍂🍂🍂
مــن انامن یبنــي یمک تجلـي الهموم
لازمــه مهــدک چفوفــي وتارکه النوم
انتــه کل الدنیــه لیــه وما الک سوم
چن احسَّک قطعه مني ابگلبي مظموم

ابوسط عیني اباریلــَک
اهز مهـــدک ولولیلَـک
دللول دللول
یلولد یبني
🍂🍂🍂🍂🍂🍂🍂🍂

انته کل لهفه ابکلامي صعبه انســاک
ونته کل دگه ویه نبضي تبتدي ویاک
کلمــن ایدقق کلامــي یقراء طرواک
ولیرکز فـي عیوني ایشوفَک اهناک

یگلبنـــي سهر لیلک
اهز مهدک ولولیلـــک
دللول دللول
یلولد یبني
🍂🍂🍂🍂🍂🍂🍂🍂
یوسف ابردة غمیصــه رد العیـون
وبني رد السهم ویلي ابنحره مدفون
وبتدت قصـة عذابي وخابت اضنون
یا نظَر یحمــل یشوفـه مرمي اشلون

سهم نحرَک سلَب حیلَک
اهز مهــدک ولولیـلَـــک
دللول دللول
یلولد یبني
🍂🍂🍂🍂🍂🍂🍂🍂

✍🏻حمید خنفري

دللول_ دللول ____يبني عبد الله
دللول_دللول_____ عليك واسم الله

دهري شيبني _ دللول
يالولد يبني _دللول

انه امك ياحبيبي و جيت اهزن بالمهد
والمهد من شفته خالي گلبي يوليدي نمرد
يلي ست اشهور عمرك وسفه عني تبتعد
ابدال حضني يامدلل نايم ابحضن للحد

دللول دللول_ يصعب فراگه
دللول دللول___روحي مشتاگه

إرجع لحضني دللول
يالولد يبني دللول

____؟؟_______

على نومات المگابر ليش يبني استعجلت
بعدك ازغيرون يمه ومن حناني مشبعت
من رحت لليوم وانه هاي عيني ماغفت
و من فرگتك ياملل والله روحي اتمرمرت


دللول دللول__ اعليك در صدري
دللول دللول__ والدمع يجري

الهجر تعبني دللول
يالولد يبني__دللول

_؟؟________

عمت عيني على نحرك ليش صابوه بسهم
ريتهم صابوه نحري وبيه يندار الآلم
من شفت دم برگبتك يالولد حيلي نهدم
وينك وين المنيه گماطك أصبح كله دم

دللول دللول__ وشيطلبونك
دللولدللول___ ومايرحمونك

يومك ارهبني دللول
يالولد يبني_دللول

____؟؟_____

شلون عفت امك وحيده وليدي يابعد العمر
والله ماشبعيت منك واذبحوك اهل الغدر
زغير ياعبد الله يبني وخان وياك الدهر
ريت يمدلل انام وياك انه بنفس بالگبر

دللول دللول.....وياه دفنوني
دللول دللول..... خابت ضنوني

فگده عذبني دللول
يالولد يبني دللول

✍ رقيه أم أباذر السكيني

الي عبدالله الرضيع

طفل عمره ايام منك ما سلم
تذبح احلام الطفوله يا سهم
آه يا سهم آه
،،،،،،،،،،،،،،،،،،،،،،،،،،،،،،،،،،،
لاتكلي سدداني حرمله
اشجان ظنك سهله هاي المسأله
جان ترفض هل الأمر ما تقبله
وعند ابو اليمه الموقف سجله
اشلون صوبت النحر      وبكل جساره
لجله اينوح الصخر.        يبجي بغزاره
     آه يا سهم آه
        ،،،،،،،،،،،،،،،،،،،،،،،،،،،،.   
اشايل انت من قساوه ومن ظلم
ابحال امه  اشصار ما عندك علم
مات وياه وانذبح. أجمل    حلم
وحرمله ما ينحسب وي الزلم
سددك نحو الرضيع       وصوبيته
والأمر كلش فظيع.        ويا إذيته
        آه يا سهم آه
      ،،،،،،،،،،،،،،،،،،،،،،،،،،،،،،،،،،،
أرق من جنح الفراشه منحره
شستفاديت ابضربته. يا تره
بجى الاكوان وفجعهه منظره
وعين ابو اليمه تصدله ناظره
ليش ما عندك خجل     جان استحيت
سنه عمره ما كمل.        ما حسبيت
       آه يا سهم آه
       ،،،،،،،،،،،،،،،،،،،،،،،،،،،،،
يا قساوة گلبك اليذبح ورد
جان منك قبلت نحره وترد
وعلى الظالم حرمله انت تهد
أدگله انا الهل فعل ما مستعد
هذا ابن المتقين.  وجده طاهه
وترفعه جف الحسين    ما تراهه
آه يا سهم آه
         ،،،،،،،،،،،،،،،،،،،،،،،،،،،،،،،،،
انت تتحاسب وتدخل محكمه
وكل حشود الكفر ذيج الظالمه
في محرم خلوا أتسيل الدمه
بالطفوف القصه جدآ مؤلمه
جم طفل يصرخ ألم.    ما مرتوي
ما ينفعك كل ندم.     فعلك سوي
         آه يا سهم آه
     ،،،،،،،،،،،،،،،،،،،،،،،،،،،،،،

شنو عذرك يا ترى  وشتعتذر
نفس فعلة حرمله وفعل الشمر
لا تگلي انا مو بيدي الأمر
عل رضيع اگلوبنه تسعر جمر
نارنه ما تنطفي    مثل الطفوف
والأمر لا مو خفي.  والكل تشوف
       آه يا سهم آه

        خادم أهل البيت
✍️الشاعر هادي الساعدي✍️

#قصائد_الرضيع



نزلة لعبدالله الرضيع عليه السلام

ضم الطفل ضمّه. لا تنفجع امّه
*

عبدالله مذبوح النحر ألمن بعد جبته
يبن امي فت گلبي الطفل بعيوني من شفته
بالخيمه ملهوفه وتون تنتظره والدتّه
كل لحظه تسأل عالطفل يبن امي رايدتّه
ريّض يبواليمّه لا تنفجع امّه
*

يبن امي من نحر الطفل طلع السهم طلعه
امّه الرباب بياوضع بفراگه منفجعه
لو شافت بنحره السهم ما تگدر تودعه
يمكن تموت من الالم لو عاينت وضعه
امسح اثر دمّه. لا تنفجع امّه
*

گاللها يختي الطاهره اخذي الطفل مني
هَد حيلي يختي بذبحته من رفرف بحضني
لمن گطع نحره السهم بچفوفه عانقني
عبدالله بچفوفي انذبح وبسرعه ودّعني
من حالته وسهمه. لا تنفجع امّه
*

سمعت رباب ام الطفل وتعنّت تشوفه
تصرخ يعبدالله وتحن مهضومه ملهوفه
شافت ابنها منذبح ومخضّبه چفوفه
ويلاه يبني صرخت ودمعتها مذروفه
لا ينطق بكلمه لا تنفجع امّه
*

شبگت ابنها والسهم متعلّگ بنحره
عبدالله يبني نادته ومختنّگه بالعبره
ميّت طفلها ما شرب من النهر گطره
ظلّت تون عله الطفل وتنادي ياحسره
من منحره تشمّه. لا تنفجع امّه
*

خلّت طفلها بالمهد والدم ترس مهده
مذبوح ابنها والجرح ما تگدر اتشدّه
يوليدي ياذيك السهم مذهوله وتنشده
شبگت طفلها وحضنته وتشمّه من خدّه
والدم صبغ جسمه. لا تنفجع امّه

سيد زيد الفحام
_____________________

الى عبدالله الرضيع ع


شحالها التفگد ولد لو لفت يم المهد
ومن تلولي شلون يا عظم الرزيه
**
آهّ يا ﮔلب الرباب ومحنت امصابه
علـى مهد الطفـل دمعتها سجابــه
تكلــه شحال ﮔلـــب اليفكـد احبابه
سهم نحرك ييمه يوجـع اصوابــه
خالي مهدك من اصد يبني ينصاب الچبد
تدري التفارﮒ طفل تنصب عزيه
ومن تلـولي شلون ياعظم الرزيه

*
علــى جمــر انتظارك عيشت روحــي
وتهدم يبني صبري وطاحت اسفوحي
ﮔرب يـــوم الــولاده وبطلت نــوحــي
وﮔلت انــت التضمد بيدك اجـــروحي
ما حسبت من الزغر تشعل ابڰلبي الجمر
وجمر المضيعه طفل تلهب ســريه
ومن تلولي شلون ياعظم الــرزيه

*
انتظرتك عيد يمّه اتمــر على ايامي
وﮔلــت بس الولـــد يمحيلي الامــي
حلمْ مـــرّ وحسافه راحـــت احلامي
وعلي دهــري بنبال الفاكده يرامي
ما خَطه نبله الدهر صابني ابنص النحر
واليصوبها الـــدهر يعنــي المنيه
ومن تلولي شلون ياعظم الرزيه
*

أصــدّ لمهـدك انـــه يبنـي يالغـــالي
يذبحني من اشوفه موحش وخالـي
ييمه انسه واضم ايدي اعلى دلالي
أحـــس انتـــه بديّــــه وتــراوالــي
احساسي يا يمه وهم صـــوبه ذاك السهم
وردت طيفك لـــو يمر مره عليه
ومن تلولي شلون ياعظم الرزيه

*

اﮔماطـك يمه ذكرى بـــروحي أضمنه
اطلعـــه وشمّـــت امفـارﮒ اشمـــنــه
نـــاري التستعــر مــا تطفه بالـــّونه
يعبـــدالله دليلـــي ابيــش اصبـرنــــه
يمه اصبره بيا دمع وصبري مر ما ينجرع
من امَـدْچفــي للمهد ترجـع خليه
ومن تلولي شلون ياعظم الرزيه

*

زغير اعلى الڴبر طولك يبعد امـك
وتمنيتـه يضمنـي ﮔبـــل لا ضمـــك
يالمغسـل ييمه مـــن نـــزف دمــك
مخنوڴـه ودليلــي يهيد لــو شمــك
انته للـــريه الهـــوه ﮔلبي منك مـــا روه
يمه بس عطرك يـــرد الروح اليه
ومن تلولي شلون ياعظم الرزيه
*
الشاعر
موسى البديري