شمسُ الخميس إذا تغيب، فزد من الصلاة على الحبيب🤍

عارف يعني إيه النبي صلى الله عليه وسلم بنفسه يوصيك إنك تصلى عليه يوم الجمعة! لا ويحفزك بإن صلاتك معروضة عليه (فأكْثِروا عليَّ منَ الصَّلاةِ فإنَّ صلاتَكُم معروضةٌ عليَّ..)
كيف تُعرِض!

الي مش ف المبادرة دي والله فايته كتييررررر 🥺🤍🤍🤍🤍 جزى الله عننا شيخنا🥺🤍 تقدروا تستدركوا مافات بسهولة🤍
لينك المبادرة
https://t.me/Enhaelashr

بعيدا عن انتشار السِّبحة الالكترونية وتعدد أنواعها ، بس هيفضل ذكر الله على الأنامل وعُقل الأصابع ليه لذة مختلفة وهتفضل دي هي الطريقة الوحيدة الي عليها أجر لوحدها غير أجر الذكر عشان سُنة
عن عبد الله بن عمرو رضي الله عنهما: رأيت رسول الله صلى الله عليه وسلم يعقد التسبيح بيده. وفي زيادة له: بيمينه.🤍🤍🤍

زاحم الميمز والفيديوهات والخناقات والناس الي مش طايقة نفسها والي بيفرهد هنا و و بسبب الحر والصيف بإن الحر يفكرك بالدار الآخرة ف تكون بمثابة كرباج ليك إنك مش قد كام درجة حرارة هنا امال بتعمل معاصي اخرتها نار ليه؟
دا غير إن حرفيا الحر دة من النار مش مجازا ، قال النبي صلى الله عليه وسلم «اشْتَكَتِ النَّارُ إلى رَبِّهَا فَقالَتْ: رَبِّ أكَلَ بَعْضِي بَعْضًا، فأذِنَ لَهَا بنَفَسَيْنِ: نَفَسٍ في الشِّتَاءِ ونَفَسٍ في الصَّيْفِ، فأشَدُّ ما تَجِدُونَ مِنَ الحَرِّ، وأَشَدُّ ما تَجِدُونَ مِنَ الزَّمْهَرِيرِ» وطبعا هتقول ودة بس نَفَسها امال هي تبقي ايه؟ ف مالك بتشتغل عشانها ليه؟!

حابة أقول إن هيفوتك كتير لو ما حطيتش لنفسك ورد ولو بسيط لسماع الشيخ علاء حامد القناة فيها فوق ٣٥ قائمة تشغيل يعني سلاسل .. عقيدة وتفسير وفقه وأصول الالتزام والاستقامة وصدقا جزى الله عننا شيخنا
مش بتعرف تنتظم أوي ع إنك تسمع سلسلة كاملة؟ ، الشيخ بيعمل دورات كل فترة بيمسك فيها سلسلة م السلاسل دي او ممكن واحدة جديدة تتبعتلك حلقة اسبوعيا مثلا ومعاها ملخصاتها وتفريغاتها وامتحان ع كل محاضرة وامتحان ع الدورة كلها
السلاسل هتلاقيها ف قناة اليوتيوب الرسمية
https://youtube.com/channel/UCwLgnvgp32d8bHtQljXqWeQ

والاعلان ع أي دورة هيكون هنا
http://t.me/Alaa_Hamed1
وغير الدورات والسلاسل في فيديوهات قصيرة مثمرة لمواضيع مختلفة 🤍
انوي الخير ، ودووس💪🤍

وِردُ اليومِ 🤍 اخر درسين ف السلسلة الجميلة ❤️❤️
متاح سماع الحلقتين طول الأسبوع والبنوتة الي حابة تشارك باستفاداتها تبعت لأدمن جروب الواتساب وهنزل مشاركاتكم بإذن الله
الي حابة تدخل تبعت ريكورد بصوتها ع البوت دة
https://t.me/ROGY220_bot

تبقي لابسة كعب يجيب خشونة ف الركبة والظهر والصوابع، وتلبس توب تحت البلوزة الشيفون عشان مش مريحة لوحدها وخناقات ف لبس البنطلون والفستان القصير الي ما بتعرفش توطي منه، شعرها الي بتتخنق منه وهو سايب وما بتزهق منه ملموم، او لو محجبة معاناه عشان يدخل فالطرحة او تتحول لحسونة ومش عارفة تلبس استايل اسكيني ع بلوزة طويلة ولا بوي فريند ع بلوزة قصيرة ، الميكب الي بتقعد ساعات تحطه ولو حد خبطها وبوظ حَودة الايلاينر يبقي يقول علي نفسه يا رحمن يا رحيييم وف الاخر مش عايزة تلبس النقاب، عشان بيخنقها 🙂
﴿أَن تَقولَ نَفسٌ يا حَسرَتا عَلى ما فَرَّطتُ في جَنبِ اللَّهِ وَإِن كُنتُ لَمِنَ السّاخِرينَ﴾

لاحظت إن كذا بنت دخلتني ف جروب تسريبات ٣ث ، ودة لإن صاحب الجروب بيطلب منهم يضيفوا اكبر عدد عشان يسرب الامتحان
حبيت أقول إن الغش حراااام اتقي الله ، عارفة إن السنادي اتظلمتوا و و و بس هيفضل الغش حرام وانك تفتحي الامتحان قبل معادة حرام ومشاركتك ف جروب التسريبات واضافة الناس ليه حرام .. انتي ممكن تضيفي صحباتك وانتي يوم الامتحان يحصلك ظرف او النت يفصل او ما ترضيش تفتحيه وهم يفتحوه وتاخدي ذنبهم
٣ث مش نهاية العالم ف ما تبيعيش فيها دينك

لو لقينا مكان بيمنع دخول الأذكياء وبيعمل اختبار ذكاء لو نجحت ما بتدخلش، هقعد بقي اعيط عشان نفسي اخش مع الاغبيا الي جوة؟؟!
*مكان بيمنع دخول المحجبة والي لابسة واسع هيبقي جوة فيه حلقة قرآن يعني؟!
وبعدين ثواني بس، أنا اروح المكان دة الي فيه خمور وبيكيني و و وعادي؟؟! وطبعا مش هقدر انكر المنكر ف هنفعهم واصرف هناك؟!
الاساس إني ما اروحش المكان اصلا مش اروح ويرفضوني وارجع اعيط ، وإن رفضهم ليا كمحجبة ما يسيئش بحد غيرهم .. وزي ما قال الشيخ محمد الغليظ مصر مافيهاش اماكن ينفع يرفه فيها حد بيحب ربنا ومش عايز يغضبه

أربع وعشرون ساعه وتنتهي حالة الموسيقي التي وضعتيها أربع وعشرون ساعه قد كُتب في صحيفتكِ الآلاف من
السيئات ... 💔

-وايه المشكلة اما تتجوزيه مش ملتزم، اتجوزيه وممكن يتوب علي ايدك
=وايه المشكلة لما اتجوزه مابيعرفش يقرا ويكتب واعلمه انا؟ ، ولا ايه المشكلة لما اتجوزه مابيشتغلش وننزل ندور علي شغل سوا؟!
تاني...
﴿أَن تَقولَ نَفسٌ يا حَسرَتا عَلى ما فَرَّطتُ في جَنبِ اللَّهِ وَإِن كُنتُ لَمِنَ السّاخِرينَ﴾

قصة بعنوان..
=يوه يا عم فلقتنا بقصصك دي اللي ماحدش بيسمعها غيري و٣ اخواتك، وياريتها حقيقية، دي خيالية تبقي قاعد ف أمان الله تلاقي هوبا حصان بيطير فوقك
-طب ايه رايك إن القصة الي هحكيها دلوقتي دي حقيقية ومافيهاش خيال خالص، تسمع؟
=مش مرتاحلك بس ماشي .. بس لو طلع فيها حيوانات بتتكلم ولا باظ يطير هتحاسب إنت ع الشاي
-يا أخي فوووق بقي إنت ف بيتي عالة عندنا بقالك ٣ أيام
=طيب يا عم احكي
تابعوا🤍
-احم احم .. قصة بعنوان "دخل الحرامي"
=وأنا نايمة ..
-رغم إن تعليقك سخيف بس أنا كنت مستنيه ، لما دخل الحرامي وأنا نايمة ايه انطباعنا الأول عنه؟
=شوف قلة ادبووو؟؟!
-وأنا نايمة، لا انا مش بكمل الاغنية .. دة حرامي شوف قلة أدبووو عشان دخل يسرق شقة وصاحبة البيت نايمة ، فما بالك بحد يدخل يسرق ومش يسرق شقة دة يسرق الشقة نفسها ويطرد أهلها منها ، وكل دة وأهل البيت صاحيين مش نايمة؟!
=ولا عاملة نفسي نايمة؟؟!
-لا كنت صاحية ، اقصد هم كانوا صاحيين .. بص يا سيدي، الحكاية بتبدي بواحد اسمه أبو إسراء ومش عارفينله اسم ليه هو نفسه لانه مالوش بطاقة معينة كل شوية يروح بلد شكل يتجوز واحدة يخلف كام عيل ويسيبها ويلف ف البلد خراب الخراب ويروح ع غيرها وبتاع اتجوز كتير جدا
=وإسراء دي بنته من أنهي بلد
-لا هو ما خلفش بنت اسمها إسراء اصلا بس انا مسميه كدا عشان شكله يدي ع أبو إسراء، المهم زوجاته الي ماتت والي مش طايقة تعيش مع عيالة او أي حاجة من طرفه فضلوا يبلغوا عنه فكان الحل انه نجمع بينه وبين عياله ف مكان بعيد عن الوَش وكدا
=صح برضه الراجل عايز يلم الشمل تاني
-لا، هو كان مكمل خراب بس زي ما تقول كدة ماحدش طايقه ف كذا مكان ومالوش عازة ، فقالوا نجمعهم ف شقة واحدة ويتلموا بقي
=مين الي قالوا؟
-أبو ريما وشركاه
=ودة إنت الي مسميه كدة؟
-لا دة عشان بنته الكبيرة اسمها ريما عادي
=تمام كمل
-نروح لعيلة تانية خالص ساكنة ف بيت ما بسلام وعيلة كبيرة وليها اسمها ف وسط الناس وسمعتهم زي الفل اسمهم عيلة أبو فادي
فجأة الباب خبط سموعليكوا ازيك يا عمو أنا صاحب فادي ابنك ف دخل ، بعدها الباب خبط سموعليكوا ازيك يا عمو أنا فادي ابنك .. وفضلت عيلة أبو إسراء تتسرسب ف بيت ابو فادي .. اصل انا صاحبة اخت فادي ، اصا انا الاكس بتاعة فادي وهكذا .. ف البيت بقي سوق ف نفسه كدة الي هو منين بيودي ع فين إنتوا مين؟؟! .. قعد ابو إسراء ع ترابيزة السفرة بتاعة ابو فادي قالو بص يا ابو فادي ياخويا شقتي ماشاء الله شِرحة وبِرحة وتساع م الحبايب ألف مافيش مشكلة تعيشوا معانا ونديكم اوضتين م البيت بتاعنا
=ليه هو كان بيت أبوه!
-دة الي أنا قولته والي أبو فادي قاله يسطا والله، فضلوا يتخانقوا كتير ف ابو إسراء دمع كدة وقاله أنا ما كنتش عايز اقولك ع الحقيقة، البيت دة بتاعنا من ٣ الاف سنة ، جوز عمتي سوسن عدي من جنب البيت دة من ٣ آلاف سنة وعطس .. وآثار عطسته لسه موجودة، لينا حق ف البيت دة زي ما جراثيم جوز عمتي سوسن سكنت البيت دة نسكن فيه ف أبو فادي قاله يرحمكم الله وكل حاجة بس يا حاج دة بيتي! .. تؤتؤ يا أبو فاادي بيتناا ، وبعدين احمد ربك إني رضيت اعيشك معايا لا هجرتك ولا طردتك ، دنا حتى مديك حتة من بيتي ، حتة من عطسة جوز عمتي سوسن يا نكار الجميل إنت
زهق أبو فادي م المناهدة والرغي ف اتجه للعنف ولسة هيبدأ يدافع عن بيته هو وأهله دخلت بقي عيلة أبو ريما بالزغاريد واهلا اهلا اهلا بأعز الحبايب ، وريما تزغرط وأبو ريما نفسه فضل يزغرط م الفرحة ومبروك يا أبو إسراء ع البيت الجديد صبرت ونولت يا أخويا ، العطسة الحلال ما تروحش أبدا
بص كدة من فوق لتحت لأبو فادي وقال لا مؤاخذة ما نعرفش إن عندكم ضيوف يا أبو إسراء ، نستأذن احنا بقي
في اوضتين ف الدور الي فوق بتوع الضيوف قعدهم فيهم ما تخليهمش كدة ف اي حتة ف بيتك يا أبو إسراء ياخويا ، ويلا عقبال ما نجيلك ف فرح إسراء او عقبال ما تجيب إسراء اصلا ، بيفتح أبو إسراء الشنط الي جاتلهم هدية من ابو ريما لقاها سلاح وقنابل وبتاع لزوم الدفاع عن النفس عشان عيلة ابو فادي طلعت قفووشة اوي بجد
رجع تاني للسفرة وقال هاه يا جماعة نقلتوا هدومكم ولا لسة؟! .. واحد من عيال أبو إسراء قام مزعق وبدأ يدافع عن بيته ف خدله طلقتين والسلام، هاه يا جماعة عايزين أوضة الضيوف الي بحمام ولا أنهي؟
واحد تاني شاف الطلق ركبه سابت وسمع الكلام، وواحد تالت حس بآثار العطسة ع جدران البيت بقي عايز ينضم لفريق ابو إسراء عشان خاف ليموت لكن هو كدة ف وسط أهله خاين وف وسط عيلة أبو إسراء مش مضمون، واحد تالت خد عياله وسافر لشارع تاني، الجيران سمعوا بالحوار بدأوا يدافعوا عن أبو فادي اخدولهم كام عركة كدة نيمتهم م المغرب وبقوا يسموا بناتهم كلهم إسراء حبا ف أبو إسراء الغالي وعم عيااالي

كلها كام يوم ودخل أبو إسراء أوضة الضيوف "الي عايش فيها أبو فادي" ومتعصب حاسس إن الوضع مش عاجبه؟ ليه ياخدوا اوضتين ما كفاية اوضة واحدة! .. ليه يبقي ليها بلكونة ويقعدوا يستغيثوا وبتاع ما نخليها قطاع لوحدها لاحد يدخلها ولا يخرج منها
وبعدين رسمة البيت موضحة إنكم واخدين حتة كبيرة ، ومين الي راسم البيت؟ حمادة أخو إسراء حتي بص،، طب اتاخر شوية ، كمان شوية، عجلة ورا يا ابو فااادي.. بقولك صح .. شغلك وكل حاجة كانت باسمك أخوك عمل توكيل لنفسه بيها وما تقلقش
=بس أكيد الناس مش هتسكت ع حاجة زي دي وبعدين دي عيلة واحدة وسط شوارع وعائلات مدينة كاملة لو اتحدوا هيتخلصوا منهم
-لو اتوحدوا بقي، ما أبو إسراء كل ما حد ينطق كلمة فادي ع لسانه يقوله بص العصفورة؟ طب بص الاختراعات طب بص الآيفون؟ وطبعا أبو ريما بيزغرط علي طول ف عامل دوشة الناس مش مركزة
-يؤسفني أقولك يا صاحبي إن الوضع فضل كما هو عليه، كل ما حد من اخوات فادي يحاول يدافع بأي شكل يبقي إرهابي وبيخوف أم إسراء، وهم يقتلوا عادي، يبقي واحد بيطلع ف الروح ومتبهدل ضرب وهو واقع بيموت يكسر كوباية من نيش أم إسراء تيجي أم إسراء وأم ريما تصووت مش ع الميت لا عشان دة كان اخر كوباية م الطقم الصيني يا فادي يا إرهابي ، وفضل عدد كبير من أولاد أبو فادي متمسكين بأرضهم رغم إن كل يومين أبو إسراء يطلع بحجة فارغة ويضيق عليهم اوضتهم اكتر إلا إنهم متمسكين
=مش مقتنع! .. الموضوع ما يقتنعش بيه عيل صغير ازاي عالم كامل يقتنع بيه!
-الزن ع الودان أمر م السحر، ودول فضلوا يزنوا ٧٠ سنة! حطوا عصافير ف كل بيت من الجيران عشان تشغلهم ، قفلوا ع أهل أبو فادي ف اوضة متر ف متر منغير أي منفذ عشان صوتهم ما يوصلش، وعيلة ريما تعترف بيهم دولة ليها عاصمة وتخلي الجيران يطبعوا معاهم لمدة ٧٠ سنة تخليك تصدق ، تخلي ناس لسة مولودة جديد شايفة إن ابو فادي ارهابي كل شوية يرمي طوب! ما يسيبلهم البلد ويمشي جت ع الاوضة المتر ف متر ما أرض ربنا واسعة ونخلص م الحوار دة!
-دي مش قصة خيالية ولا هطلعلك أرنب بيغني فيها ، دي حكاية بلد بينك وبينها كام ساعة بالعربية ، حكاية بلد فيها مسجد النبي صلى الله عليه وسلم فضل مدي للكعبة ظهره ومتجه ليه هو قبلة ويصلي قبل تحويل القبلة ، المسجد الي ربنا اختاره يكون المحطة الي تفصل ما بين الملأ الأعلي وأهل الارض وكان ممكن النبي يعرج للسماء من مكة عادي ، المسجد الي الانبياء كلهم عليهم السلام صلوا فيه ورا النبي صلى الله عليه وسلم، قصة الأرض الي ملك أخوك الي حرفيا بيفديها بدمه وإنت قاعد تتصفح سوشيال بلا هدف
قصة الانسانية الي بتسمع فيها عن أب مجمع اهله ف اوضة واحدة مستنيين الموت سوا عشان زهقوا من الفراق والموسيقي التصويرية للجلسة الاسرية دي هي صوت القذايف ليس إلا .. قصة عقيدة ربنا رسخها ليك ف القرآن الكريم ﴿لَتَجِدَنَّ أَشَدَّ النّاسِ عَداوَةً لِلَّذينَ آمَنُوا اليَهودَ وَالَّذينَ أَشرَكوا ..﴾[المائدة: ٨٢] ، عدوك الأول ف بيت اخوك الي إنت ليك فيه جزء كبير جدا من دينك وبيعمل فيه كدة، دي قصة حرامي بجح ضربت معاه الحظ مع ناسعايزة تفرق بينك وبين أخوك المسلم م الأول
=والحل؟ ، إنت عارف إن الي نفسنا فيه هنعتقل قبل ما نبدأ ننفذه!
-الحل الوحيد إنك ما تنساش! ما تلهثش ورا أي تريند ف تشوف إن قضية فلسطين تريند قعدله كام يوم ومشي، ما تنساش إن تهاونك ف دينك هنا يساوي هزيمة هناك، ماتنساش وإنت بتتجوز تحط نية إن قضية فلسطين هتترسخ ف قلب ولادك قبل ما الإعلام يعرفهالهم بالمشقلب ، ماتنساش تتعلم وتتابع الاخبار ويكون عندك وعي دائم للقضية، ما تنساش إن دي قضية دين قبل ما تكون عرض او أرض ، لو ملك السعودية باع مكة بكرة الصبح هتسيبها وتروح تطوف حول تمثال رمسيس؟ .. ما تنساش إنها هتتحرر كدة كدة ف ما تنساش إنك تكون ع الجانب المشرف من القصة الي لا يمكن تكون خيالية ..

بقلم/ سارة فريد
هستني رأيكم بس هستنى نشركم ليها أكتر ، حتى لا ننسي قضيتنا🤍🤍🤍🤍

اللي لسه مدخلوش مبادرة الشيخ حازم شومان للعَشر خسران كتير صدقًا، أكيد قلبك مش جاهز لإستقبال العشر، وأكيد محتاجة تستعدي .. المبادرة مثمرة جدًا اللهم بارك، وكل يوم واجبات عملية حاولي تطبقيها كلها أو بعضها ..💚

*مالا يُدرك كله لا يُترك كله*🍃

https://t.me/Enhaelashr/273

قبل ما تتحمق وإنت بتدافع عن فكرة إن يجوز نترحم ع أموات غير المسلمين أو غيرها م القضايا فتقول دة حتي ربنا عز وجل قال "ورحمتي وسعت كل شيء" ، إبدأ الآية صح وانهيها ، بتر النص من صفات أهل البدع والضلال ف احذروا ، الآيتين كاملين: ﴿وَاكتُب لَنا في هذِهِ الدُّنيا حَسَنَةً وَفِي الآخِرَةِ إِنّا هُدنا إِلَيكَ قالَ عَذابي أُصيبُ بِهِ مَن أَشاءُ وَرَحمَتي وَسِعَت كُلَّ شَيءٍ فَسَأَكتُبُها لِلَّذينَ يَتَّقونَ وَيُؤتونَ الزَّكاةَ وَالَّذينَ هُم بِآياتِنا يُؤمِنونَ۝الَّذينَ يَتَّبِعونَ الرَّسولَ النَّبِيَّ الأُمِّيَّ الَّذي يَجِدونَهُ مَكتوبًا عِندَهُم فِي التَّوراةِ وَالإِنجيلِ يَأمُرُهُم بِالمَعروفِ وَيَنهاهُم عَنِ المُنكَرِ وَيُحِلُّ لَهُمُ الطَّيِّباتِ وَيُحَرِّمُ عَلَيهِمُ الخَبائِثَ وَيَضَعُ عَنهُم إِصرَهُم وَالأَغلالَ الَّتي كانَت عَلَيهِم فَالَّذينَ آمَنوا بِهِ وَعَزَّروهُ وَنَصَروهُ وَاتَّبَعُوا النّورَ الَّذي أُنزِلَ مَعَهُ أُولئِكَ هُمُ المُفلِحونَ﴾
[الأعراف: ١٥٦-١٥٧]

ما بخافش من حاجة قد البوستات دي ، يا جماعة احنا والله ما قد ذنوبنا لوحدنا مش هنستحمل والله ما هنستحمل مثقال ذرة كمان، ما تدلوش حد ع حاجة تغضب ربنا🥺💔

أعترف إني من أكبر المقصرين في أمر أذكار الصباح والمساء -غفر الله لي- ، بداية من تهاون ف ميعادها وانتهاء بإني أرددها منغير حتي ما أفهم بقول ايه .. لكن صدقا أنا بحمد ربنا عليها جدا جدا ، لإني ف أي يوم أنا قرأت فيه الأذكار بشعر براحة غير طبيعية صدقا ومهما حصلت حاجة تخوفني مجرد ما بفتكر إني قرأت الأذكار خلاص الموضوع انتهي أنا مش هتصاب بشر حتي لو إيه الي جرا هيبقي خير ليا ، من نعم ربنا علينا فعلا ومحتاجين نشكرها بإننا نواظب عليها ، لإن التهاون فيها مالهاش تفسير غير "عضلاتك مقوية قلبك" 🤷🏻‍♀️