🇰🇿 ҚФФ Қазақстан ұлттық құрамаларына арналған жаңа ойын формасын таныстырды

Қазақстан футбол федерациясы ұлттық құрамаларға арналған жаңа ойын формаларын таныстырды. Adidas компаниясы UEFA-ның UEFA Kit Assistance Scheme бағдарламасы аясында жаңа жиынтықты дайындады.

Жаңа экипировка үйдегі ойындарға (сары түсті) және сырт алаңдағы (көк түсті) кездесулерге арналған екі жиынтықтан тұрады. Қазақстан құрамасы аталған бағдарлама аясында Adidas компаниясынан форма алған Еуропаның он ұлттық құрамасының қатарына енді. Ұлттық құрамалар жаңа формамен алдағы екі жыл бойы өнер көрсетеді.

UEFA Kit Assistance Scheme - ұлттық қауымдастықтарды қолдауға бағытталған және олардың қажеттілігіне сай заманауи спорттық киіммен қамтитын бағдарлама. Сонымен қатар, қатысушыларға Adidas Locker Room сервисі қолжетімді. Бұл жүйе арқылы жеке дизайндағы экипировкаларды әзірлеуге және тапсырыс беруге болады.

Ұлттық құраманың жаңа формадағы алғашқы матчы маусымда өтеді. Қазақстан құрамасы жолдастық кездесулерде Армения және Венгрия құрамаларына қарсы алаңға шығады.

«ҚМДБ Алаш» командасы - «ҚФФ Достық кубогының» иегері

Астанада елімізде тұратын түрлі діни конфессиялар арасында «ҚФФ Достық кубогы» өтті. Бұл турнир дін өкілдері арасындағы өзара түсіністікті нығайтқан маңызды алаң ретінде дәстүрлі түрде ұйымдастырылып келеді.

Жарысқа 9 конфессияны таныстыратын 15 команда қатысты. Олардың арасынан «ҚМДБ Алаш» командасы «ҚФФ Достық кубогын» жеңіп алды. Сондай-ақ «Бахаи Астана» командасы 2-орынды, «Catholic Team» командасы 3-орынды иеленді.

Мұндай дода УЕФА-ға мүше елдер арасынан Қазақстан, Израиль және Англияда ұйымдастырылып келеді. Қазақстан конфессиялар мен қатысушы команда санынан көш бастап тұр. Турнирдің бас серіктесі – «QAMQOR-ASTANA» қоғамдық қоры.

Айта кету керек, «ҚФФ Достық кубогы» еліміздегі діни бірлестіктер арасындағы келісім, бейбітшілік және достық құндылықтарын насихаттау, олардың арасындағы байланысты дамыту және нығайту мақсатында өтті.