🔥💜Keep going

لاقاني فيديو قبل فترة عن بت ومعاها أخوها كانوا راكبين عربية وتقريبًا وقفّوا العربية بتاعتهم جنب الصيدلية الكانوا عايزين يشيلو منها علاجات، فنزل الود عشان يتناول العلاج لكن اتأخر شوية فالبت قررت تلحقو وتشوف السبب الأخرو شنو، وهي بتقفل في العربية، لاحظت إنو في راجل كبير في العمر لابس ليو نظارة شمسية كدا قاعد في القهوة الجنب الصيدلية ومن قبيل بيعاين ليها من وقفوا العربية عينو ما زحت منها أبدًا، اضايقت شديد من الحركة وفسرت نظراتهُ على أنها نظرات ما محترمة، وقبل ما تقفل العربية كويس أخوها جاءها ، وطوالي أشرت ليو على الراجل وقالت ليو من قبيل بعاين فيني وزي ما شايف لسه بعاين فينا، ومن قبيل ما عايز يشيل عينو مني، وأخوها الموضوع ضايقو شديد وفات على الراجل بغضب كدا وعايز يشاكلو، وكان واضح عليه زول مشاكل بس، فقام بزعلة كدا نهرو وضرب النظارة اللابسها لمن طارت من وشو ووقعت في الأرض وقال ليو "احترم نفسك ياخ دي قدر بتك، وبي شيبك دا ما بتخجل تعاين لي بت كدا" وكانت المُفاجأة إنو الراجل طلع كفيف وكل نظارتهُ ديك كانت بدون قصد ليس إلا، أخو البت اتأثر شديد وزعل من نفسو على التصرف دا، وقام رفع النظارة بسرعة ولبسها ليو وبدأ يعتذر ليو ويتأسف ليو شديد عن الحصل، وأما أختو كانت مراقبة المنظر من بعيد فلمن شافت أخوها رفع النظارة وبدأ يعتذر جات علي أخوها وقبل ما تصل اتضحت ليها نتيجة تسرعها في الحكم عليو، البت من قبل ما تصل بدأت تبكي وتقريبًا شعور البت وصل ليكم تمامًا، بس الحمد لله الراجل كان طيب شديد وكل ردودو كانت لطيفة جِدًا، وحتى قال ليهم انا طلبت من ود اخوي يخت لي الكرسي مقابل الحائط عشان اتلافى المشكلات البنهج دا بس شكلو الود ما عمل زي ما وريتو واسي أنا لي قريب ساعة راجيو قال ح يجي يوصلني بس اتأخر شوية فأصروا عليو إنو يوصلوا محل ماشي رفض في البداية بس تاني بعد ما أصروا عليو شديد وافق يمشي معاهم، ومشو معاو لحدي ما وصلوهُ البيت وهم كلهم أسف على الحاجة الحصلت دي.

كتير من المواقف البتحصل لينا بكون سببها التسرع في الحكم على الآخرين، وبدون أي تفكير بنبدأ نحلل ونهاجم الناس بدون ما نخت عذر عن السبب الحصلت بيو الحاجة دي، فلازم نتعلم نخت ألف تفسير لأي حاجة بتحصل لينا وما نستعجل في الحكم عشان ما نقع في موضع ندامة، وزي ما كان بتقول لينا حبوبة زمان
«العجلة عجلة الشيطان، والتأنِّي تأنِّي الرحمـٰن».

__________
#أمين_عبدالماجد

418 viewsAmin Abdo, 11:31