🔥💜Keep going

بتذكر مرة كنت راجع مع صحبي كنا في زيارة لواحد زميلنا كان عامل عملية، مشينا عملنا معاهو الواجب وفي أثناء ما راجعين وراكبين المواصلات، بديت اتكلم مع صحبي عن إنو الامتحانات جات بعد دا والناس تبدأ تحفر عشان نجيب نسبة كويسة في سنة تالت ونقدر نفرح أهلنا، قام قال لي والله ياخ الناس ما بترحمنا كلو كلو من امتحنا السنة الأولى وما اتوفقنا في النسبة العايزنها، وامتحنا تاني ولسة هم بتكلمو فينا وبعاينو لينا بنظرات ما جميلة على أساس إنو لو كنا شاطرين كان جبناها من أول من سنة وكدا، قلت ليو الحمد لله على كل حال وما علينا بيهم نعمل العلينا والباقي على ربنا، شال نفس كدا وقال لي "ونعم بالله" .
سكتنا مسافة كدا وقال لي إنت عارف ذكرتني قصة بتاعت واحد قريبنا، قلت ليو قصة شنو، قال لي عندنا واحد قريبنا كان من أشطر الناس في العائلة وفي المدرسة البقرأ فيها ولمن امتحن الناس كلها متوقعة إنو يتذاع في التلفزيون وكدا، وكانوا شبهِ ضامنين الحاجة دي، حتى بقو يقولوا ليو اقرأ طب الخرطوم كويس معاك، وفي ناس بقولوا ليو أخير ليك تشوف منحة خارج السودان وكدا، ومرت الأيام وجات النتيجة وكانت الصدمة في إنو أحرز ٧٨٪، مع أنها نسبة كويسة بس ما كانت متوقعة أبدًا، ومن هنا بدأت المشكلة وكلام الناس كِتر شديد، ودا شنو مش قلتو شاطر، ودي شنو النسبة الجابها دي، وشكلو شطارتو كانت من مساعدات ناس المدرسة ليو، ودا عشان أمو أستاذة كانت بتصحح ليو ساي وبتوري الأستاذة يتساهلوا معاه، وغيرها من الكلام الصادم، لحدي ما سببو دخلو قريبنا دا في حالة نفسية، من البيت بقى ما بطلع عشان ما يسمع كلام الناس عنو، والكلام دا أخد فترة طويلة معاو لحدي ما قِدر يرجع يختلط مع الناس تاني بس المشكلة وين إنتَ عارف؟
قلت ليو وين؟
قال رفض يرجع يعيد تاني، لا وكمان خلىّ التعليم كلو كلو، وانتهى بيو المطاف عامل طُلبة، وبقى شغال يبني بس يطلع من الصباح يجي راجع البيت بقروش بسيطة وتعبان ينوم ويقوم اليوم التاني، وأمو كل يوم بتبكي وهي شايفاهُ تعبان كدا، لا وبتبكي عشان تعب عمرها معاو كلو انتهى وبقى عامِل يومية بس، مرت سنة كاملة عليو وهو بالحالة دي لحدي ما جاء خالو الكان مغترب، وقعد اتكلم معاو وحاول يقنعه بكل الطرق بس هو كان رافض، في آخر شئ قال ليو أنا بسوقك معاي السعودية والفيزا وأي شئ عليّ بس على شرط تمتحن السنة دي، ولو ما جبت الدرجة العايزها بسوقك معاي، ولو جبت الدرجة العايزها الجامعة عليّ أنا وبقريك لحدي ما تتخرج، المهم قريبنا دا وافق على كلام خالو وخصوصاً بعد التشجيع القدمو ليو خالو، كان الرجوع بالنسبة ليو صعب شديد وكيف يرجع يقرأ مع ناس كان خلاهم وراو بي كم سنة، بعد تعب قدر كسر الحاجز دا وامتحن تاني وقدر يحرز نسبة ٩٣.٧٪ وحقق حلمو ورجع فرّح أمو من جديد، ودخل طب الخرطوم واتخرج وهو حاليًا واحد من أفضل الأطباء الموجودين في مجال المسالك البولية.

بعد صحبي خلص من القصة، الكان أثرها واضح في تعابير وشي، قلت ليو شوف أثر الكلمة كان سببها شنو في المرة الأولى وأثرها شنو في المرة التانية، وكيف حولت زول من عامل يومية لي أفضل طبيب.

حكيت القصة دي عشان في الأيام البسيطة الجاية متوقع يتم إعلان نتائج امتحانات الشهادة، فبتمنى من أي زول عندو زول امتحن السنة دي يخت بالو لي أي كلمة بتطع منو، ويفكر كويس عن كمية الأثر الممكن تحدثو الكلمة دي، ويكون عارف أنهم يستاهلوا كل الخير وأي نتيجة يحرزوها هي شرف لينا كلنا؛ بسبب الظروف السيئة المرو بيها السنة دي، وإن شاء الله أي طالب امتحن السنة يعانق حلمو الاتمناهو ويقدر يفرح قلب وأبوهُ، وأمو.

__________
#أمين_عبدالماجد

422 viewsAmin Abdo, 13:43