🔥💜Keep going

بوست طويل و بنم عن رأي شخصي :

أهم ما علمتني ليه الحياة لحدي أسي في العلاقات .. إنو حرفياً كلما تقرب أكتر كلما الأحاسيس بتزيد سلباً و إيجاباً .. فمع الزمن لو التفهم و المراعاة ما بقو عاليين شديد .. الأحاسيس السلبية دي بتزيد شديد بالقدر المهما كانت العلاقة دي في مرحلة من المراحل خرافية بتبدا تتحول لعلاقة سامة للحد البعيد ..
أسوء حاجة ممكن تحسس بيها الطرف التاني في علاقتكم دي سواء صحبة زمالة أبوة أمومة إنك مستسهلو ..
مستسهل زعلو عشان برضى سريع .. مستسهل تبعد و تقرب .. مستسهل أي شي ممكن يكون بأذي الطرف التاني دا .. و ياهو مع الزمن بتتحول العلاقة دي لمركزية الزول المستسهل دا -الممكن يكون ما واعي بالحاجة دي و ما قاصدها خالص - ..
و بالمناسبة الحاجة دي ما غلطان فيها المستسهل دا بس غلطان فيها برضو التاني الما وقف في حدودو البتخليه يتأذي و طبعاً احنا كبشر عندنا قدرة غريبة نتأقلم مع أي وضع و نباري روحنا لو ما كنا مصحصحين و ياهو خاتين قدامنا مآلات الحاجات دي !!

تاني أسوء حاجة ممكن تعملها للزول التاني المعاك - أياً كان نوع العلاقة - إنك تقرر بدلو متين يزعل و متين ما يزعل و مفروض يتصل ليك في الوقت دا و تقرر بدلو مبرراتو ،و تكون بتقيس على إفتراضات بس و تبني عليها نتائج واضحة و تنفذها -قد تكون قوية و قد تكون لا - لكن في النهاية إفتراضات .. و نكون متفقين إنو مافي أي زول في الحياة دي مرتاح .. مافي أي زول خالي هموم .. بعيداً عن إنو انت حضرة سيادتك شايف هموم الزول التاني دا ولا شي قصاد همومك فااا دا ما محلك خالص في النهاية الهموم و كل الأحاسيس و التفاعلات الإنسانية حسب قيمتها عندنا الجاية نتيجة من حاجات كتيرة بطول عمرو يعني .. اللو ما حتقدر تتقبلها فأكسروا حنك من بدري و ريحوا روحكم ..
كلامي دا ما مطلق .. فيهو مساحة سداد و مقاربة لكن بسيطة شديد و بإشتراطات كتيرة شديد ..

خليك عارف طبيعي تتصرف تصرف غلط .. لكن ما طبيعي خالص تتمادي فيهو ..

طبيعي تزهج و تزعل و تضايق لكن ما طبيعي خالص تقلل من احترام المعاك ..

طبيعي تكون عندك حد معين من الأنا لكن بالقدر الما بيتعداك و لا بيأذي زول تاني في دائرتو ...

بمشي و بجي و أقول إنو الحياة دي أصعب من إنك تجيب زول تاني يصعبها ليك زيادة ..

فأنا بعتذر شديد من أي زول طيلة حياتي أذيتو و انا ما حاسة .. استسهلتو و انا ما حاسة .. و قصرت معاه و ما عملت معاه الواجب .. العفو و العافية ..

و بعتذر من كل زول كان قريب لي شديد و فجأة انا بعدت و بقيت ماخدة مساحة أكبر .. لكن بنحتاج مرات نكون ماخدين مساحتنا و هم ياخدو مساحتهم عشان نقدر نتعايش..

في دعوة كدة بقيت بدعي بيها دايما بعد قريتها إنو
"اللهم خفافاً لا لنا ولا علينا؛ لا نؤذِي ولا نؤذَى؛ لا نجرح ولا نُجرَح؛ لا نهين ولا نُهان..
اللهم عبوراً خفيفاً لا نشقى بأحدٍ ولا يشقى بنا أحد "
اللهم آمين آمين ..

208 viewsHamas✨💜, 16:43