من الحاجات الظابطه اللي مُمكن نعملا في المواسم العظيمة زي رمضان، إنو نكتب دعواتنا♥️
والله الحركة دي مافي أجمل منها..
لأنه عادة بكون في أحداث كبيرة حاصله في حياتك أو حاجات مُهمة دايراها، فبتدعي بيها طوالي وبتنسى حاجات تانية كتيرة محتاجه معونة الله وسنده فيها،
فلما تكتبيها وتدعي بيها كلها في جلسات الدعاء بتلقي إنك ما ناسيه دعوة.
وغالبًا حتحفظيهم وفي سجودك حتنذكري كتير منهم❤️
فلو ما كتبتي أمشي أكتبي أي شي دايرهو فأنت تسألين الكريم
...
وفي الحديث ( ليسأل أحدكم ربه حاجته كلها حتى شسع نعله إذا انقطع ) شسع النعل يعني بالبلدي "سير السفنجة" لما يتقطع
فما تقولي الحاجة دي ما مهمة!
أدعي الله حتى في تفاصيلك البتتخيليها تافهة ما بتحتاج دعوة
لأنو مافي أريح من إنك ترمي حمولك الكبيرة وحتى همومك الصغيرة على اللّه عز وجل
تتيقني فيهو ويكون هو وجهتك الأولى والأخيرة في كل شيء♥️
هل في أريح من كده!
..
دخلنا في النصف الثاني من الشهر واقتربت أفضل الليالي
فإن ضيّعت ما فات فلا تضيعي القادِم🌸❤️

وما تنسوني وأهلي في صالح دعواتكم
#إيلاف_بدرالدين

أمس بنضحك أنا وصحبتي على انها بتلبس الخيمة أو الحرملة، ويوم في المطار بنادو فيها يا "حجة فلانة" يا "حجة فلانة" وهي ما جايبه خبر..

لغاية ما النهاية ركّزت إنو دا اسمها..

والقصة دي وزيها بتكون حصلت لعدد كبير من البنات ممنّ يلبسن الحجاب بشروطه الصحيحة

وقد تكون دي من أكثر الحاجات البتضايق الأنثى في مسألة الحجاب في الزمن دا وتنفّر اللي عايزه تتحجّب!

المجتمع اللي ببدأ يضايقها بجمل زي يا خالة ويا حجة أو يشوفوها غير موافقة لمقاييس الجمال العندهم..

واحنا من طبعنا كنساء بنحُب الزينة والظهور في أجمل صورة في عيون الكُل

لكن..

الصورة الذهنية اللي اتزرعت في نفوس بشر هذا الزمان، عن انه كزولة شباب لازم ألبس قصير أو ضيّق وأِبرز مفاتني!

خلّت الأمور تتقلب رأسًا على عقب!

دكتور "عبد الرحمن ذاكر" كان اتكلّم في النقطة دي وسأل ليه الطفلة الصغيرة بيلبّسوها بيكيني في البحر؟

لو فكرتي في السؤال حتلقيهو منطقي، نحنا بقينا منمطين على إنو الجمال تعرّي ولبس قصير وما حنكون حلوين إلا كده لدرجة الطفلة اللي لسه ما بتفتِن بيلبسوها بكيني!

أنا عن نفسي بقيت بحِب الخمار لدرجة بعيدة، يمكن ساعدني إنه ف مصر عادي بتلبس، وأنا من زمان عاجبني ولما كنتا أشوف صور ناس أمي زمن بلبسو خمارات بتعجبني شديد وبقول يوم حشتريهو وألبسو ..

إحساس إنه في شيء مغطيك وساترك وما محتاجه تجرجري الطرحه كل مرة والله الإحساس دا حلو شديد❤️

كمية الثقة والراحة اللي بتختها فيني قطعة القماش دي ما طبيعية

مرتاحه من أعمق حته في قلبي وأنا لابسه الخمار

طبعا مع مراعاة إنه اللبس يكون واسع
لأنه ما منطقي تلبسي ليك اسكريت ضيق مثلًا ومعاهو خمار أكيد!

غير كده الخمار بكون ثابت عندي وما بتعولق زي الطرحه الكبيرة ..

أنا من البني آدميين اللي مستحيل الطرحة تثبت عندي بس الخمار ياااه ! بتصندد صنددة من مرقة الصباح لي دخلة المِساء ..

آخر مرة طلعتا مع ناس البيت قررتا أصغّر طبْقة الخمار بمعنى أخلّي الخمار يكون مُنسدل أطول ومغطّي أكبر ..

كنتا حاسه إني معولقة لكن ناس البيت ما أدوني فرقة قالو لي ما أجمل الستر وطبلو لي😂

المهم مرقنا واتصورنا وأي شي

لما جينا راجعين وأنا بشوف في الصور والله قلتا ليهم صدقتو طلع سمح عديل الستر دا❤️

أنا عارفه نحنا كنساء بنحِب الأناقة ..

لكن ما أي شي يقولو ليك دا أناقة وموضة تلبسيهو!

وما بيعني إنك لمّا تطبقي شروط الحجاب حتتبشتني أبدًا والله ..

طلعي لي الفكرة دي من راسك تمامًا ..

وخليك عارفه نحنا بتحركنا كتير من الأحيان شهوات برضو في حياتنا وأهواء خصوصًا لما نبعد من ربنا ونمشي ورا الدنيا الخداعة

ففي اللي ممكن تلبس عشان تلفت نظر الرجال ويقولو حلوة!

وقد ما يكون المعنى دا واضح عندها لكن أنا وإنتي وكلنا نفسنا الناس والرجال يشوفونا حلوين ويطروا على جمالنا وأناقتنا

ودا هو ذاتو مربط الفرس وموضع الاختبار، ربنا أداك متنفس حلال لي الرغبة الجواك دي، والمتنفسات دي كتيرة يعني في البيت، وسط بنات مع المحارم وهكذا !

أما الأماكن اللي حتقابلي فيها رجل غريب فدي المطلوب منك تتستري فيها وتلبسي الحاجة البترضي الله.

وكتير قد ناخد الحجاب كشي بديهي وعادي وما بنفكر كتير انه فرض وعبادة ولما نطبقه فأكيد بإذن اللّٰه لنا الأجر.

لما تطلعي من بيتك ماشه الدكان تجيبي حاجة، المشوار الصغير دا حسنات ليك وإنتي لابسه الحجاب الصحيح بإذن اللّٰه

فأبدي فكّري من الليلة وأدعي إنه ربنا يرزقك الحجاب الذي يرتضيه

قد تجيك الهداية بين يوم وليلة وتتقلبي تمامًا

ولغاية ما تجيك بإذن اللّٰه ما تبطلي دعاء وما تبطلي تمشي في الخطوات الصحيحة

ألبسي شراب مثلًا لو ما بتلبسي لقدمك

اشتري اسكيرتات واسعة بدل الضيقة

طرح أكبر بدل الصغيرة

وهكذا إنتي ماشه بإذن اللّٰه وخاته النية تصلي لي البرضي ربنا أو لو متّي تموتي وإنتي ساعيه❤️
#إيلاف_بدرالدين

ما أسعد الإنسان حين يذكُره أخٌ له في سجدة، لا تنسونا في صالِح دعواتِكم، فلعلّها ليلة القدر❤️

أسأل اللّه أن يجعل أقداركم فرحًا وسعادة
#إيلاف_بدرالدين

مع فقدك للكثيرين في حياتك موتًا أو سفرًا أو رحولًا بلا استئذان أو استئذانًا بلا وداع!
تغدو أكثر تيقُّنا وإيمانًا بأنّ الدنيا لا يدوم لك فيها حبيبٌ ولا رفيقٌ ولا صديقٌ ولا أهل .. وأكثرَ ثباتًا لتقِف أمام البابِ تلوِّح لهم حتى وإن لم يلتفتو لك ..
ذلك أنّنا في دارٍ أهلُها مرتحلون دومًا، إن لم يكُن في معاشِ الدنيا فإلى ربهم يذهبون.
المكانُ الوحيدُ الذي قد تضمن بقائهم بجانبك فيه هو مقعدُك في الجنّة حيثُ الآخرةُ دارُ القرار ..
اللّهم اجتماعًا في الجنّة مع أحبتنا أجمعين❤️🌸
#إيلاف_بدرالدين

من الأشياء التي أفادتني فائدة عظيمة عبر سنوات عديدة وغيّرت نظرتي للأعمال الروتينية كأعمال المنزل مثلًا -فبِتُّ أقبِلُ عليها بكُل حُبٍ وسعادة- هو سماع المحاضرات.
عبر البودكاست في آخر سنتين أو اليوتيوب أو أي تطبيق كان ومِن قبلها كُنت أسمع ما حمّلته عبر اللابتوب أو حتّى من الراديو، كإذاعة الفرقان.
المهم أنّ ما أدركتُه مؤخّرًا هو كم المعلومات الكبير والفائدة الذي حصّلته عبر السّماع فقط، بل إنّ أكثر ما رسخ في ذهني ما سمعته خلال قيامي بأعمال روتينية.
كالغسيل أو والطبخ وما إلى ذلك ..
بل أذكر أنني في سنة 2020 أدمنتُ سماع البودكاست، ولا زلت أذكر الشعور اللطيف الذي ينتابني صباحات الجمعة، حين أضع سماعتي وأبدأ في تنظيف المنزل بل كُنت أتمنّى أن لا أنتهي من العمل .
ما أود قوله أنّ هناك أوقاتًا ثمينة وعظيمة نمتلِكُها في خِضمّ ضجّة تفاصيل يومنا، ويمكننا التعلّم فيها دون أن نجلس لنتعلم.
فلذلك نصيحة أقدمها لك "جرّبي أن تستمعي لما يفيدك أثناء أعمالك الروتينية أو ذهابك للجامعة أو العمل وما إلى ذلك"
دعكِ من الأغاني التي قد تكون لطيفة في بدايتها لكنها واللّٰه تورثك فراغًا وضيقًا في القلب.
والحمد للّه الخير كثير فهناك ما هو في المواضيع الشرعية والعلمية والعملية وغير ذلك ..
يمكنك اختيار ما تشائين
وابدئي بالبودكاست الخفيف إن كنت شخصًا ملولًا، وهكذا شيئًا فشيئًا تعتادين على المحاضرات الطويلة.
أسأل الله أن يفتح عليكن بالعلم النافع والعمل الصالح 💙
#إيلاف_بدرالدين

ولو دا كلو مافي ففي الإعلام بي أشكالو المختلفة والتلفزيون والتلفون البتشوفي فيهو نموذج النجاح المُصدر ليك من النساء= إمرأة على الأغلب مُتنازلة أو تنازلت فيما بعد عن الحجاب سواء بصورة كلية أو جزئية
وهي ذاتا بتكون اتأثرت بالنموذج القبلها بدون أي تفكير أو تحليل
فيتعلق قلبك بالنماذج ديل وتبدي تقلديهم بدون ما تشعري
❤️🌧️❤️🌧️❤️

أنا حجابي ما مكتمل لسه وأرى فيه الكثير من النواقص لكن نحاول نمشي خطوة خطوة
اشتري طرح كبيرة ❤️
ألبسي اسكريت أوسع ❤️
الشفونة بدليها بي قماش ما يكون شفاف ❤️
أقري عن الحجاب حتعرفي إنو التفسخ دا مئة سنة لي وراء ما كان في حتى الغرب كان مختلف
وهكذا رويداً رويداً إن شاء اللّٰه تصلي
وقبل كل شي أولاً وأخيراً كتري الدعوات لي وليك إلى أن يُتم اللّٰه لنا الحجاب الذى يرتضيه❤️

في التعليقات👇🏽
فلم وثائقي جميل شديد لي نساء أسلموا وعلاقتهم بالحجاب اسمو " الإسلام في المرأة"
ركزوا في الكلام البتقولو المُنقبة البريطانية لما قررت تغطي وجهها❤️

#إيلاف_بدرالدين

إعادة نشر

يا سَعدَنا يا صاحبة بعشرِ ذي الحجة💙🌸

وحتى لا تضيع نفحاتُ هذه الأيام هباءً..
1/حاولي تتخلصي من كل المسؤوليات الغير مهمة وركزي علي العبادة والذكر والدعاء وأنوي الإستمرارية مش بس أيام وتعدي💙🌸
2/زي ما بتدي قيمة لي العشرة الأواخر من رمضان، الأيام دي برضو تستحق منك تديها قيمة عظيمة💙🌸
3/دعواتك الكتبتيها في ورقة في رمضان اكتبيها تاني وزيدي عليها كمان إنتي ووضعك، ولكِ رب كريم💙🌸
4/أنوي إنك تحافظي على الصلاة إذا ما محافظة عليها💙🌸
5/ساعدي نفسك بي إنك تسمعي فيديوهات أو محاضرات وتشحني نفسك إيمانياً💙🌸
6/أفرحي لأنو اللَّه سبحانه وتعالى بلّغك أيام عظيمة زي دي وختّا جواك الرغبة في العمل والعبادة💙🌸

7/حاولي قدر ما تقدري تعملي طاعة.. تتصدقي.. تصلي.. تصومي.. تسبّحي.. تقرأي قرآن.. ويا حبّذا لو بدأتي الحِفظ💙🌸

8/وعشان ما نكتّر الكلام.. كُل شي غالبك من عبادات أو من سيئات حابة تتخلصي منها أو من أماني أخروية أو ورغبات دنيوية، فاجعلي رفيقك الدُعاء💙🌸

9/تخيّري ساعاتِ الإجابة في السجود، وبين الآذان والإقامة وعند إفطار الصائم و وقت السحر ويوم عرفة💙🌸

#أخيراً
واللَّه يا سعدنا يا صاحبة بعشرِ ذي الحجة💙🌸
وإن المحروم من لا يُدرِكُ فضلها، ولم يفهمُ قيمتها وتمضي عليه كما مضت سائِرُ أيامِ دهرهِ.
إنها يا صاحبة أيامٌ معدودات.. وغداً نبلُغُ التراق ويأتي الفِراق.
لا تنسوني في صالِح دُعائِكم💙🌸
#إيلاف_بدرالدين

من الحاجات الاكتشفتها هنا في مصر "الشعب الارتري" أنا ما عارفه ليه ما كنتا بلاقيهم في السودان!

لكن الناس ديل يكاد يكونو بحبو السودان والسودانيين أكتر مننا نحنا ذاتنا..

أما لو جينا للملامح .. فأنا كان عندي إرتريا وإثيوبيا واحد! لكن لقيت إنه الارتريين بشبهو السودانيين شديد، بل الارتري ما بعرفه إرتري إلا يقول لي أنا إرتري!

الحاجة دي بتخلق جواي سؤال الهوية الما عندو إجابات إلا في كتب التاريخ ومحاولات علماء الجينات، وبتخليني أكره فكرة الحدود البتفصل الناس وبقعد أفكّر في الجد المشترك الجاب الناس دي واتفرعت منو!

قد تشوفو الحاجة دي غريبة بس أنا نفسي لما أخش الجنة بإذن ربّي، أسأله جلّ في علاه يوريني قدرته العظيمة وكيف الناس دي تناسلت وتفرعت من سيدنا آدم لآخر بشري على الأرض، مسألة خلق أبونا آدم وإنه يوم وراء يوم البشرية كبرت دي حاجة عظيمة ومبهرة بالنسبة لي!

نفسي أعرف جدودي كانو كيف وأشكالهم كانت كيف لغاية ما في النهاية جيت أنا

وكيف الجينات دي تحولت وتشكلت لغاية ما أدتني التقاطيع والملامح واللون

وتحولت وتشكلت عشان تدّي مختلف الألوان والأشكال للبشر

والإجابة دي ما بتشفيني إلا من الخالق العظيم جلّ في علاه

#إيلاف_بدرالدين

كتير ما بسمع بنات حوليني بقولو "ما بقدر ألبس عباية أو ما بقدر ألبس طرحه كبيرة السخانة او
اللبس الزي دا ما عملي وصعب وغيرها من الجمل اللي تدور حول نفس النقطة"

فجايه أقول ليهم إنه كلامهم صحيح!

للأمانة الحجاب بي نظرة عامة قد يبدو صعب مع الحياة الإحنا عايشنها

طالعين نازلين وراكبين مواصلات، تفاصيل العالم المتمدّن اللي الحريم فيهو جاريات ورا لقمة عيشهم أو إنجازتهم أو قرايتهم، كلها واقعيًا وبي القياسات المادية أنسب ليها البنطلون والبلوزة

لكن ربنا سبحانه وتعالى العالم بكل شي، فرض عليك كمرأة في كل الأزمان والأحوال ترتدي الحجاب الشرعي وتطبّقيهو بشروطه اللي برتضيها الله عز وجل.

كونه الخروج من البيت أصبح فرض على المرأة دا ما معناها تسقط الحجاب الشرعي مقابل ملابس عملية أكتر!

لأنه لو بالمبدأ دا فيبقى الصلاة ما عملية وما جايه مع الحياة الكلّها درش دي لأنها ممكن تقطع لينا شغل أو قراية مستغرقين فيها!


أنا كإيلاف - على الجانب العملي وليس التزكوي- اتعودتا على لبس العبايات في الجامعة، قبل الجامعة ولغاية بداياتا كنتا بلبس عادي بناطلين

بس بعد الجامعة حبيت العبايات واتعودتا عليها بل وصلتا مرحلة حرفنه عديل
أضرب ليكم مثال؟
قبل كم يوم بتاع ركشة كان حيرجع فيني
والحته كانت ضيقة شديد لي إنّي أعدّي
ولابسه عباية الأم جناحات ديك "هي ما عباية درِش ومواصلات لكن أنا اتعودتا"

المهم أنا عملتا حركة كده بسرعة ورفعتا العباية وعديت بي المكان الضيق دا بكل سهولة بدون ما عبايتي تمسك ف الركشة أو أعفصا ولا كده!

وقبل فترة اشتريت إدناءة لأول مرة، ولما لبستها أول يوم ومع شنطة الضهر، لقيتا صعبة وما عملية للدرِش بي سبب أطرافا الواسعة شديد فركنتها شوية كده

لكن لأنّها عاجباني رجعتا لبستها كم مرة وأول أمس أدركتا إنٌها بقت مريحة وعادية وما مضايقاني زي الأول
لكن الحصل شنو!
ياها نفس الإدناءة الواسعة والعباية الواسعة الطويلة بس الفكرة في التعوّد

يعني غالبًا الجمل اللي ذكرناها أول البوست دي كلها حجج واهية عشان ما تلبسي الحجاب سواء من نفسك الأمّارة بالسوء أو من الشيطان

إضافة لإنه البت في فترة طفولتا ومراهقتا قد تكون ما هُيّأت على إنها تلبس الحجاب ولا أهلها اتكلمو معاها على اعتبار كده كده حتلبسو.. ثم فجأة لما تلقاهو وجب عليها تشوفه صعب!

يعني نستنتج شنو!

"الحجاب سهل لكن إنتي مصعباهو بي حُججك"

مصيرك تتعودي على اللبس الطويل والواسع لو قررتي تطبّقيهو لأنه دا طبع الإنسان بيقدر يتأقلم عادي

سنين طويلة كان الحجاب ثابت وراسخ بل حتى في الغرب كان استايلهم الفساتين الطويلة المنفوشة اللي ممكن يركبو بيها فوق ظهر حصان عادي جدًا

والقصة في النهاية قصّة قلوب..
كلّما اقترب القلب من اللّه صارت الطاعة سهلةً يسيرة، وما إن يبتعد! سيُفتحُ أمامه ألفُ طريقٍ لها ويقول "لا أستطيع"
اللهم أرشدنا لِما ترتضيه❤️
#إيلاف_بدرالدين

في دوّامةِ المصاعِب التى أمرُّ بها على المستوى الشخصي وعلى مستوى البلاد..
أكثر ما يُهمّني أن أنظُرَ إلى قلبي آخِر اليوم فأجدَ النور فيه رغم الظلام الدامِس حولي.. والرغبة في الحياةِ على توفُّرِ أسباب الموتِ روحاً وجسداً
أن تبقى المرونةُ رفيقتي والإبتسامة محيا وجهي..
أن أظلَّ مُشبعةً بالإطمئنان رغم الخوف حولي.. مانحةً للحُبِّ لا ينضبُ عندي..
يكفيني أن لا تسقُط روحي وسط الرُكام.. ولا تضيع نفسي بين الزِحام.. ولا يغرق أمَلي في بحرِ اليأس.
وأن تبقى رغبتي في الحياة والسعي لتحقيقِ الأحلامِ مُتّقدةً💖🌸
وهذا كلّهُ لا يُمنحُ إلّا مِنك يا اللّٰه.. فلك الحمدُ على ما تمنحنا إيّاهُ مِن صمودٍ في غمرةِ الإبتلاءات❤️
#إيلاف_بدرالدين

صحبتنا امتحنت أربعة مرات عشان تقدر تدخل كلية الصيدلة..!

في التلاته مرات الأولى كانت بتنجح لكن ما بتجيب نتيجة تدخّلا في القبول العام، لغاية ما في المرة الرابعة قدرت تجيبا.

أبدًا ما كانت محتقرة نفسها أو شايفه إنّها ما أهل للنجاح، عادي عايشه حياتا بل بالعكس كانت أعقلنا في القراية لما تجي الامتحانات هي البتقعد تقرينا وتشرح لينا الشيتات وحرفيًا بتنقذنا.

ومن ساعة ما اتخرجنا وهي التزمت بي الشغل كطبيبة صيدلانية، وقدرت بي شغلها دا تنجز مسؤوليات بالنسبة ليها أولوية في الفترة ديك زي إنها قرّت أخوانا الأصغر منها بي شغلا وكسرت بيتهم وبنتو من جديد!

دا كلو اللهم بارك في خلال 4 سنة من تخرجنا سنة 2017، وهي داخل حدود السودان البلد الكلو تقلبات ومشاكل دا..

أنا بشوف فيها قصة نجاح والتزام عظيم، ومتأكده إنها لو اتيحت ليها فرصة أوسع من كده حتبدع وتنجز أكتر وأكتر.

حكيت قصتا الليلة عشان نستقي منها حكمة إنو عدم النجاح ما مقياس!

المقياس الحقيقي هو إلتزامك واجتهادك في الحياة محل ما ربنا ختّاك

أنا الليلة وأنا راجعة من كورس الأنميشين بعد استلمتا شهادتي، اتذكرتا يوم النتيجة وأنا ببكي وبجعّر قال يعني عشان ما ذاعوني! ضحكتا على إنو تفكيري كان محدود وأنا اليوم بعمل في حاجات ما ليها علاقة بي الجامعة القريتا، كلها اجتهدتا فيها براي وفخورة بي اجتهادي💙

السودان بلد تقليدي لدرجة بعيدة والعالم فايته بي سنين ضؤئية

لذلك...
نجحتا ! فالجامعة ما الراحة، لسه راجيك كتييير شديد تتعلّمه.

ورسبتا فدي ما نهاية الحياة، دا درس عشان تصلّح الغلط والتقصير وتلتزم وتعاين للأمور من منظور تاني

وفي الحالتين اتذكر إنو الدنيا أوسع شديد من خُرم امتحان الشهادة.
#إيلاف_بدرالدين

وإنتي لابسه وبتعايني لروحك في المرايه قد تحسي إنّو أحلى لو كان من غير طرحه!
والفلات العندك أحلى من دون شراب !
والشعر والخصل أحلى لو ظهرت والناس شافت جمالها !
والفستان أو العباية حلو لو ربطنا ليهو حزام وضيّقناهو !
قد تكون مرت عليك الخواطر دي في لحظةٍ ما، لكن طردتيها قدر الإمكان والتزمتي
أبشّرك إنه دا هو الجهاد، تقاومي رغبتك في حُب الزينة والحِلية مقابل حُب الله للستر والحجاب

واتذكري دائمًا إنه الحجاب عبادة.. عبادة.. عبادة اختص بها الله المرأة.

وإنك بتؤجري في كل لحظة بتلبسي فيها الحجاب

يعني يومك البره وإنتي حايمه ومهلكه وتعبانه ومسخنه وملتزمه بي حجابك دا كلو أجر ماشي بإذن اللّٰه ❤️

واتعلمي عن الحجاب واطلعي من الكمفورت زون بتاعت المجتمع البتقول ليك الحجاب طرحه بس تختيها ! اعرفي شروطه وطبقيها في لبسك

واقري الآية دي بي تمعُّن واستشعري فيها خطاب الله المباشر ليك
(يَا أَيُّهَا النَّبِيُّ قُلْ لأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلابِيبِهِنَّ ذَلِكَ أَدْنَى أَنْ يُعْرَفْنَ فَلا يُؤْذَيْنَ وَكَانَ اللَّهُ غَفُوراً رَحِيماً )
أسأل الله يوفقنا جميعًا للحجاب الذي يرتضيه❤️
#إيلاف_بدرالدين

الحُبُّ لا يفهمُ المسافات .. فهو يربطنا بمن في أقاصي الأرض كأنهم جوارنا طالما في قلوبنا مكان لهم❤️
فعلى جلسة الغداء نقول "تُرى ماذا يأكُل فلان الآن؟!
وحين أُنسِ حديثٍ نختمُ ب-يا ليته كان بيننا"
الحب يُخرِسُ الفقد مهما أجحفَ في حقّنا ويحتالُ عليه بشوقهِ..
فالّلذين غادرونا ومضوا للتراب لا تزال تحويهم صدورنا.. فتارة نُخرجُ صورهم القديمة نتأمّلُ فيها.. وتارة نرى أطيافهم في أركانِ البيتِ ودائماً نُحبُّ أن يتضمن دعائنا ورجائنا للَّه ذِكرَهم..
للحُبِّ بريقٌ لا يَفنى وحبلُ وصلٍ يسبِقُ المسافاتِ طولاً ومِطرقةٌ تهدِمُ موانِعَ اللقاءِ المُستحيل❤️
Distance is just a test to see.. how far love can travel!
#إيلاف_بدرالدين

يا أخوانا واللّه الورَع دا شي سمح خلاص 💙🌸

عندي ود خالتي قمنا وإتربينا سوا من إحنا صغار حرفياً ما كُنّا بنتفارق وكمان رضعنا سوا.

لمّا كبر بقى بي دقنو، وبنطلونو القصير يعني أنصار سنة في مصطلح الناس وما شآء اللَّه تبارك اللَّه حافظ عدد لا يُستهان به من أجزاء كتاب اللَّه.

ود خالتي دا بالرغم من إنو تفاصيل حياتنا كلها كانت مع بعض وياهو إتربينا أنا وأخواني وأولاد خالتي ديل كُلنا في البيت الكبير باعتبارنا أخوان.

لما يفتحو ليهو الباب بعلّي صوتو بي السلام عليكم كُلنا بنعرف إنو جاء...

لما يكون ماشي في الشارع ما برفع عينو ويعاين لي بت حتي أنا مرات بشوفو من بعيد لي بعيد وبكون ماشي ما بركز معاي إلا ألفتو أنا ..

كتير بتكلم معاي يا مدنقر رآسو يا بعاين في مكان تاني، أصلو ما بدقق ويحسسني بي أي حرج أو كده.

لو أمي جوه الغرفه ونادتو بستأذن وبقيف مسافه وبسألنا خلاص أخُش؟ لغاية ما نأذن ليهو

كتير بنعاني في بيوتنا من الحته دي، ومن إنو في رجال بخشو توشك وما براعو لي الشي دا.

سورة النور دي ما قرّونا ليها ساكت وفصلوها لينا تفصيل في سنه تالته،
الأئمه في الخُطب كتير بذكروا إنو ما تخش على النساء ساي.

بعرف صحبه لي إتنقّبت بي سبب إنو أولاد أهلا بجو خاشين توشك بدون إحم ولا دستور.

فيعني حقيقي ربنا يجازي خير كُل البخاف ربنا فينا إحنا النساء وما بدخّلنا في حرج وبراعي لي الإستئذان الربنا أمرنا بيهو💙

#إيلاف_بدرالدين

رحمَ اللَّهُ إمرءاً عرفَ قدرَ حُزنِه فصبر ٰ ) 💙
#إيلاف_بدرالدين

أكثر فكرة تخيفني حول الشباب والموت ..!
أن أكون متطلّعة للحياة، مستبعدة تمامًا إمكانية موتي في هذا العُمر، غافلة لاهية بغرور الشباب والعافية والنِعم ثم إذ بها روحي تُقبضُ على غفلة.
اللهم أعوذ بك من موت الفُجاءة في ساعة الغفلة
اللهم اقبضني وأنت راضٍ عنّي💙
#إيلاف_بدرالدين

كلما أمي تكون فترة بعيدة من البيت بزيد فهمي بصورة أعمق لدور الأم ..

دائما بقول لي أمي لما ترجع إنه البيت كان كئيب من غيرك وبكون بعنيها حرفيًا.

غياب الأم ما غياب عادي! غياب تحسه بغير شكل البيت ياها نفس الحيط والكراسي والسراير لكن البيت فاقد روحه وطمأنينته وسلامه

على الرغم من إنها فترات قاسية على قلبي لكنها محببة إليّ في تفكُّرها، وفي تجاربها وفي المسؤولية البجرب أشيلا كاملة بدون سند أمّي.

قدر ما بحاول أكون في مكان أمي وأشيل دورها بي كل تفاصيله ما بقدر لأني بي بساطة ما أم!

ودي أحاسيس خلّتني أحب الأمومة أكثر وأكثر وأتوق لإني أتوّج بيها كما أمّي، وأن يشعر طفلي بما أشعره تجاه أمي ووجودها وغيابها.

ولأنه الأمومة دي عندها سر خاص عظيم وضعه سبحانه وتعالى في عواطف الأمهات، كيف بتقدر الأم تكون مركز البيت وتحب دا وتتحمّل دا وتشفق على دا كلهم بنفس القلب💙

لذلك مهما بلغت الأنثى من مناصب ومراتب وعاشت وطلعت ونزلت وأخدت من الدُنيا حتظل جائعة لي إنها تكون أُم💙

وعمري ما حقدر أفهم كيف النسويات بحاربو أحاسيس جميلة زي دي، إذ لا مبرر إلا انتكاس الفطرة!

ربنا يرزقنا جميعًا
#إيلاف_بدرالدين

صباح الخير💙
أمّا بعد ..
ليس سيئاً أن لا نملك أحداً يُحبّنا ونختار على خانة الإرتباط كلمة "سنقل" لتزين صفحاتنا وحكايانا وقصةً يضحك عليها أصدقائنا
السيءُ هو أن نبيع قلوبنا بأرخص الأثمان لمن لا يستحقها فقط لأجل أن نؤنس ليالينا الفارغة،
السيءُ هو أن ننام على حافةِ حُلمٍ وهمي مُتيقّنين في بواطِننا أن نهايتهُ قد لن تكون كما نُريد،
السيءُ هو رغبتنا الساذجةُ في أن يُسمّينا الناسُ عُشاقاً!
،،
كثيرون يملكون حُباً رائعاً ولا يخبروننا به، وآخرون يُشاركوننا وهمَ حبهم حتى نظن أنه لا فِراق بينهم ثم تُفاجِئُنا نهاياتُهم المُفجعة.
الحقيقةُ أننا جميعاً فُطرنا على رغبةِ أن نكون محبوبين وأن نجد من يهتم بنا ويكترثُ لقلوبنا، لكن.. !
وحتى يبلُغنا رزقُ الحُب، فمن مسؤليتنا تجاهُ قلوبنا أن نحفظها لأجل من يستحق، ونضعها بين يديه يجدها غضةً كما هي، مُتلهفةً لمنح الحُب، وصندوق أسرارٍ عنوانُه: كُنت أنتظرك أنت❤️
#إيلاف_بدرالدين