واحد ينام صيف يكعد يلكاهه شتاء 😭✨

فد كم كلمه منج نصيحة الي انا طالبه سادس

الي حكوله الج و لكل طلاب السادس
اني يمكن اقل وحدة من اصحاب القنوات تسولف وياكم بكل فتراتكم الدراسية لان عندي تروما من المدرسة و السادس 😂
بس رغم هذا من اتذكر شلون تخرجت و دادرس تخصص و كلية زينة اكول الف الحمدلله الف الحمدلله
فاول شي اريد اكوله هو ربي يكتب الكم هالسعادة و اضعافها هم ♥️

ثاني شي و اهم شي
كل واحد يوصل السادس معناها انسان ناجح ، لكن النجاح يتطلب استمرارية ، و شد حيل حتى يدخل كلية زينة ، مو شرط طبية و غيره انما يدخل الي هو يريده سواء طبية او هندسة او فنون ، كلها تخصصات حلوة و مرغوبة و إذا مو اليوم فباجر و إذا مو تعيين فقطاع خاص و إذا مو بالعراق فبغيره و الف حل اكو ، الي يحتاجه الواحد هو صبر و إيمان بالله ثم إيمان بنفسه

معناها كلكم مؤهلين تعيشون مستقبل زين بس هذا المستقبل لازم انتوا الي تتعبون على موده ، تجتهدون و تشدون حيلكم ، و إلا الإنسان الناجح الحقيقي شلون يوصل بدون تعب ؟

الدخول و صار شامل يعني كلها رح تگدر هالسنة تمتحن فالمدة الي بقت مدة كافية ، تدرسون زين تراجعون زين و تدعون لنفسكم
و لكل الطلاب وياكم حتى الله يوفقكم و يكتبلكم الي تريدوه او الاحسن من عنده

مرح أكلكم ما عدكم وقت و استعجلوا و كلام ثگيل مثل هذا لان ادري تعرفوه زين ، بس رح اسألكم، تريدون تجازفون بعمركم كله مقابل تسختون كم اسبوع و كم شهر ؟

تعبوا هسة ، كثفوا الجهد ، حتى ترتاحون و انتوا مطمئنين سويتوا الي عليكم و هذا اهم شي ، حصلتوا الي تريدوه او حصلتوا غيره هذا مو مهم تدرون ليش ؟
لان الله ما ينطي فقط على قدر تعبكم ، انما ينطي على الي سبحانه يشوفه مناسب اكثر الكم و لحياتكم و لمستقبلكم … لهذا من تسوون كل الي عليكم خليكم راضين بالنتيجة حتى لو ما اجت مثل ما تريدون 100%
كله بتدبير رب العالمين يهون

مرح اگلكم تعبوا هسة حتى ترتاحون بالكلية لان ماكو هيچ كلام والله 😂 الراحة الوحيدة هي إنه مشايلة هم إذا عندي مستقبل او لا بس الكلية متعبة اكثر بعد 😂

بس تبقى مريحة من هواي نواحي أهمها ماكو الضغط النفسي مال شكد المعدل و يا تخصص اريد و يا كلية ادخل و وين اروح و وووو…

آخر شي اريد اگوله هو ربي يوفقكم و يحميكم و يعوضكم عن كل شي لان اكيد جزء مو قليل بيكم مروا بظروف صعبة هالسنة ، بس الله موجود دائمًا و يعرف شنو الأحسن لكل واحد و ينطي إشارات و يسهل الطريق للي يسعى بي

لهذا خافوا ما اگلكم لتخافون ♥️
الخوف طبيعي ، كلش طبيعي ، بس لتخلون الخوف و التوتر يأكلكم و يأثر على دراستكم ، بالعكس خليكم صبورين و متيقنين من رحمة الله و من جهدكم لان محد جهده يضيع حتى الي يحصل طريق غير الي چان يحلم بي ♥️

ايابة كل بجياتي هنا، الندم البؤس، الخنكَة، كلمة الـ "ليش" بعد شي إنتَ مسويه، كلشي هنا يطلع