شسمة خل اصلي و اجي اسولف وياكم

اريد اسولف وياكم
عن السنة الجديدة و شوية عن هالسنة 🎀🩷

قبل كل شيء
الحمدلله دائمًا و ابدًا على كل شي صار ،
السيئ قبل الجيد ، لأن اكيد الله عنده حكمة بكل طريق و موقف يخلينا بيه 🩷

چانت سنة مليانة مليانة احداث متوقعت حعيش حتى نصها .. بس شاء الله و شاء القدر اقدر أخوض تجربتها بكل تفاصيلها
و صدقًا أريد أشكر نفسي ، أحسني طلعت منتصرة ؟ نوعًا ما … ما نهيت ألسنة بمأساة او بؤس إنما نهيتها
ب عادي ميخالف كل شي حيصير قصة و ذكريات

بهالسنة حققت جزء مو قليل من اهدافي
صحيح ما حققت كُل شي چنت كاتبته بأهداف 2024 … بس ميخالف! قابل وين راحت السنين و وين راحت الأهداف ؟ هياتها كلها موجودة و كلنا موجودين 🩷
نسعى و نتعب نحققها لحد ما نحققها و نشوف نفسنا أبطال لا خاب ظننا بالله ولا خاب ظننا بنفسنا 🥹🩷
رُغم كل الي صار هالسنة من مواقف عافت بية ندبات مرح اتعافى منها عن قريب إلا إنه اني راضية و قنوعة و أحمد الله على كُل شي …. سعادة الإنسان ما تنشاف من اللحظات الحلوة المتتالية ، سعادة الإنسان تنشاف من خروجه من المعارك … والله حتى لو خسران !
المهم خرج من المعركة و كلنا لازم نعرف إنه
* خسارة المعركة لا تعني خسارة الحرب *
الحياة بأكملها معركة طاحنة ، ولو خرجنا منها منتصرين ولو بمعركة وحدة فهذا أعظم إنجاز يقدمه الإنسان لنفسه و حياته 🩷
فالحمدلله على كل المعارك الي انهزمت بيها ، الحمدلله على كل الدروس الي تعلمتها ، الحمدلله حتى على الصدمات الي رح أواجه صعوبة أتخطاها ..
كل سنة تعلمني أمور جديدة و كل سنة أفوز و اخسر بمعارك و كل سنة أحصل و أخسر أشياء و أشخاص و كل سنة انهيها بميخالف الحمدلله، الحمدلله ما خسرت نفسي
فيارب لا تفجعني بخسارة نفسي أبد 🩷
اني فخورة بنفسي و فخورة بكل خطوة اتخذتها بحياتي و فخورة بالنقطة الي اني بيها هسة لأن كلها معناها اني دأتقدم و ما واگفة بمكاني ما فاقدة الأمل ما فاقدة الثقة بالله ما فاقدة إيماني بالله …
صحيح مو راضية عن كومة امور بحياتي بس الأهم مرح أرضى إلى أن اشوف نفسي بمكان أحسن🩷

فيارب يكتب الأحسن الي و الكم بالسنة الجديدة و يارب كل سنة تكون أحلى من القبلها
إحنا كبرنا ع التمني ، تعلمنا ندعي 🩷

اني اكره الشغل الي تحتاج تشتغل بي كل يوم كلش هواي ساعات و احسه مصيبة بشرية من اول ما انوجدت هالفكرة و الفقرة بالتاريخ لليوم

بحيث اليوم تعريف الانسان الناجح هو الي يشتغل هواي و تشوفه طول وقته يشتغل و مشغول

بينما الحقيقة هاي مو انسان ناجح انما انسان حياته كلها شغل ( حتى لو يحصل هواي فلوس من هالشي )

احب الشغل الي يعتمد ع الذكاء او التخطيط الصحيح و استغلال الوقت الموجود او على شغل طويل بس ايام محددة

طبعًا صحيح اكو شغل ميرهم الا هيچ بس الي اقصده انه هاي مو احسن حياة بالعالم

يعني داتخيل الشهر ٣٠ يوم اني كل يوم اشتغل و طريق الروحة و الرجعة و كل شي .اقل شي ٨-١٠ ساعات

زين نوم ٨-١٠ ساعات همين

المجمل وقت الانسان لذاته و حياته قليل كلش

و لحد يكلي الانسان لازم يكرس نفسه للشغل ترة اخوان هالمنطق يخزي والله بس الحياة الي دنعيشها احنا للاسف هذا واقعها

اليوم الاول من 2025 ..
بسمِ رب البدايات نبدأ ، بإسمك اللهم نخوض دروباً جديدة ‏اجعلها يا الله بداية خير ، آملين ألّا نضل ولا نتعثر 🤍.

هَتعدي .. بَس هَتدعس عليا لمّا تعدي
وانهض وانا كلّي كسور وكدمات💔

الجو صاير مثل گلبي
بداخله بجيه بس ساكت ومتحمل .

شايفين من تحسون الوقت الي حتلتقون بيه بالشخص الي منتظريه ديقترب ؟؟

و هيچ شوية شوية اقتربتوا تلتقون

اني هيچ داحس وي نفسي

احسني چنت غريبة على نفسي كلش كلش و ما مقدرتها قدرها الي تستحقه و لا مطيتها قيمتها الحقيقية لدرجة هواي امور ما اعرفها عنها ولا ناطيتها فرصة تسويهم