صباح الخير
حسبي الله عالدوام

قبل شوي شفت ريلز شخص ناشر وهو يدعي جوا المطر وكله يقين انُ دعواته حتستجاب ، شفت أشخاص بالكومنتات شگد سيئين لدرجة كاتبين شنو هالخرافات وكاتبين كلام لدرجة مسوين الله سبحانه قاسي ومديستجاب دعواتنا 🥰
هواي ناس مأخذين هيج فكرة الصراحه مو بس فئة معينه لدرجة واصلين مرحلة ميعرفون شي عن رب العالمين غير انه شلون حيعذبعم إذا ماعبدوه او شلون راح يدخلون النار بس هذا 🤩
اعترف اني وكلنا بمرحلة هيج چنا
بس بعد ما كبرت وصفنت عرفت هواي أشياء

عرفت ان رب العالمين هو احن من اي احد بالكون علينا ، وهو الرؤوف والرحيم علينا وهو اللي يغفرلنا عن سيئاتنا ولأن هو فعلاً احن علينا حتى من روحنا ميستجيب دعائنا لأمور خفيه منعرف الحكمة منه رب العالمين يحبنا ومن حبه ألنا يبتلينا بهواي بلاءات حتى نرجع اله ومانتعلق بغيره ينطينا الشي الأحسن حتى لو مانحس هو احسن او مناسب النا رب العالمين يستحق الشكر والثناء كليوم وكل ساعة وكلشي مريت بي بحياتي إذا جان سيئ او حلو اني اشكر رب العالمين عليه لان اعرف ينطيني اكثر من ماياخذ مني ف الحمدلله دائماً وأبداً والحمدلله ع نعمة وجوده ولطفه علينا وعلى تدابيره 🙏

لو احلامنا تشوف شكد نتعب وندعي
حتى نوصل الها جان هي الحلمت بينا

عادي اگول "عادي" بس هيَّ مو عادي؟🤷🏻‍♀️

كلمة عادي أحيانًا يختفي خلفها ألف عتب ، ألف ليش ، ألف خيبة ، ألف حزن ، ألف حسافة ، ألف ندم وألف مووو عاااادي ، بس نگولها علمود نتخلص او ننهي شي ماله إي فائدة من بقائه واستمراره.

الحمدلله ع نعمه التناسي
والتجاوز والتخطي والتعايش
والتحمل والصبر
يعني داشوف مواقف كدامي تضوجني من صدك
وره كم يوم انساها كلياً
جديات لو ما النسيان احنه شلون نعيش؟

اني طبعي م ارجع ويه اي شخص كطعت علاقتي بي ماحب يعني !!!
جان تقريباً كم شخص كاسر هلقاعده مو لان هو مميز بس لان اني مخلينه مميز بعيوني
بس جديات اكثر شي تعلمته
انُ "لتكسرون قواعدكم"
اتجاه اي احد

كل موقف خلوك بي راح يجي يوم
يكونون تحت نفس الموقف وكدام عيونك
لان هذا قانون كوني وغصبا ع الكل

موقف صار اليوم ويايه بالجامعة
بالمحاضرة الأولى حسيت شوية بتعب
واختنكت بحيث كمت اتنفس بصعوبة
فطلعت غسلت وكعدت برا شوية "لاحظت كمية الناس الطيبة هواي" أكثر من طالبه اجتني تكلي خو ما محتاجه شي ، ابو الأمنية اجاني كلي اكعدي بالسيارة خاف باردة تردين اخذج للمستشفى ، أكثر من طالب كلي خوية محتاجه شي بيج شي ، بعدها دخلت للقاعة دايخه والدكتور گال منو من الطلاب يروح وياها، واجتني صديقتي المقربه و بنيه حتى مااعرفها ورحنه للمستشفى شوية أوكسجين شوية فنتولين و أبر والوضع صار تمام ، و كمية الناس اللي راسلوني وسألوا عليه حسيت إن هاليوم بكد ما صعب بكد لطيف والناس بعدها تحب تساعد بعض .

مرات من تصفن وتتذكر فد أيام أو مواقف ماكو ولا كلمة توصف شعورك غير كلمة
حــــــرامات والله

كارمن هسة سؤال رغم الضغوطات وكلشي شلون محافظة على نفسج من الاكتئاب ولج خلك الحياة ماشاء الله اللخ؟

هذا خوش سؤال صراحة اني ما جنت هيج عندي طاقة قبل لا جنت انسان عادي واغلب الناس مكتئبين يعني تشوفه يبجي من دوامة يبجي من حياته يبجي من كلشي حرفيا الناس تحب السلبية بشكل عام ، اني فجاءة ادركت شغلة وحدة غيرت حياتي وهي الدُنيا فانية يعني تخيل تبجي على شي هو زائل اصلا؟ وغير انو هو زائل هو وسيلة! ليش نبجي على امتحان باجر بدال ما نبجي ع صلاتنا الي فاتتنا على تقصيرنا ؟ ليش تفكيرنا يصير دنيوي؟ هل احنا مختارين الدنيا؟ اذا نبجي عليها هواي يعني تركنا الاخرة واختارينا الدنيا! وهذا غلط الدنيا وسيلة وليست غاية وشغلة لخ تخليك ترضا دائماً باوع للاقل منك راح تشوفف انت شكدددد بنعمة وخيررر شكد انت مرتاح مقارنة بي هيج تحمد رب العالمين وترتاح وتدعي الله يفتحها بوجوه الجميع

الحياة حلوه مو؟

هواي حلوة وهواي بيها اشياء تخبل وهواي بيها اشياء مريحة وهادئة وهواي بيها تعب بس بدون التعب ماتحس بقيمة الراحة، انطي لنفسك فرصة تعيش كل المشاعر حتى المو حلوة خلي بالك فكرة عادي ابجي اليوم وبعد شوية اضحك طبيعي يعني كلشي يصير يدرج تحت عنوان "حياة" ف هي حلوة بكل انواع المشاعر الي تمر بيها انت 🤍.

السلام عليكم اني مرحلة اولى يريدون من عندنا تقارير بالانكليزي شلون اكتب تقرير اول شي 🥹😞

وعليكم السلام
السالفة كالتالي تجيبين اسمٍ الموضوع تبحثين عنه تفهمينه وتشوفين الدكتور يريد صور يريد حل واسئلة واجوبة لو سرد تسالون الدكتور يعني وعدكم chatGpt كلش يساعدكم وها اها وبعد شوفي الدكتور يريدها بخط اليد لو طبع وهيج بسيطة يعني

احس الحمدلله قناتي بدت تفضى من طلاب السادس الحمدلله عشت وشفت الأيام التي تسألوني بيها عن الجامعة

تباً لأحلام البسطاء

وحدة من الدروس اللي تعلمتها هالسنة أن مرات حتى التفكير الزايد يكون نعمة يخليني اتوقع كلشي من الناس بحيث حتى لو صار الشي اللي چنت خايفه منه ما راح أنصدم لأن سبق وأن توقعته يصير .