استاد کریمی مراغه ای

شاعر: #استاد_عندلیب

شعر : #زبانحال_حضرت_ام_البنین_سلام_الله_علیها

@karimi_maraghei

اَسیرِ هجر اُولانا رنج عَجب، اِسارت عَجب
اُوغول غَریب آناوی اِینجی دور بو غُربت عَجب

مدینه گُللّرینی کربلادَه ووردی خَزان
نجه خَزان که اُولور صُحبتی نَهایت عَجب

گُول اُولمویان چَمنون باغبانه لذّتی یوخ
پُوزوب خَراب اِیدی روحیه سین سیاحَت عَجب

داریخمیشام گَل آپار کربلا چولون گزدیر
قوجالمیشام گِیدوب اَلدَن اُولان صَلابت عَجب

حسین مَزارینه اوّل آپار حسینی گُوروم
صُورا فَراته گِیداق اِیلیوم زیارت عَجب

آپار گُوروم بالا آتدان یخیلدیقین یِئری من
نجه دوشندَه قیامت اِیدیب او قامت عَجب

قولون دوشن یِئری گُورست ئوپوم طواف اِیلوم
مریضِ عشقه دوا دور اُوقانلی تُربت عَجب

چیخات او تلَه، قوجاتدی حسین حرملَرینی
حرم عَجب دَم عَجب قَتل عَجب جنایَت عَجب

یوخودا چوخ گجه گُورم قولون بدندَه دَگُول
یوخی عَجب سوز عَجب گُوردوقوم او حالت عَجب

@karimi_maraghei

گِجه گُورن یوخونون دردینی گُونوز چَکورم
ندَن او قولاری من گُورمَدیم سلامت عَجب

اِیشتموشم سنی قولسوز گُوروب ووران چوخودی
ووران عَجب سن عَجب پِیکریندَه طاقت عَجب

اَلین بدندَه دَگُولدی اُولا سپر باشیوا
عَمود عَجب باش عَجب آچدیقی جَراحت عَجب

اُوغول، اُوگِجه که چیخدون مَدینه دَن آغلار
دِیدون آنا یول عَجب وادی شَهادت عَجب

دویونجا من آنالار تَک ئوپمدیم یوزیوی
آنادان اِینجیمه باعث اُولوب بو علت عَجب

دِیدیم حسین آناسیز دور سنی گُورر اُوتانار
سزادی حالِ حسینی اِیدم رَعایت عَجب

گِئجه گُونوز اُوتورب اِنتظاریوی چَکدیم
اُمید حَیاتیما اُولدی همان بو حسرت عَجب

گَتورمدیلَر اَقلاً جَنازه وی وَطنه
مَزارین اُولمادی بو بی پناهه قسمت عَجب

@karimi_maraghei

اَیاقلانا گُول اگر پایمال اُولار سُوز یوخ
اَیاقلیان سنی دَرک اِیتمدی بو حکمت عَجب

مَحالی دور گُولون عَطرین فضادَه مَحو اِیتماق
کرم عَجب اَل عَجب اِیتدیقی کرامت عَجب

مدینه کوچه لَریندَه هَله دَه عَطرون وار
چَمن عَجب گُول عَجب شُوق عَجب طَراوت عَجب

چوخ اُوخشوری بالان عَبداللّهیون گُوزی گُوزیوه
جَمال عَجب گُوز عَجب گَوزدَه کی شَباهت عَجب

گُوزیوی چوخ چوخ ئوپردیم آنان ئوله نه بُولوم
اوخوندا وار گُوزی ئوپاقلیقا حَسادت عَجب

بو نوع ردیفیدَه مَرحوم #ذهنی نوحه یازیب
قَلم عَجب پای عَجب شیوهء کتابت عَجب

دِیدیم یازیم اُوخویان #ذهنیه دِیسون رَحمت
مَقامِ شعریدَه فرض اُولماسین اِهانت عَجب

اَلیمی دوت گُونان ای اَللّری هر اَلدَن اُوجا
گِدا سنونکیدی گاه اِیتدیقی جَسارت عجب

@karimi_maraghei

مریضِ عشق دواسین طبیب لَر نه بُولَر
توتوب وِجودیمی بیر مُختصر کَسالت عَجب

نه وار بیرینه نیازیم نه مالِ دنیایه
اِیدر قاپوزدا بُو نوکرلیقیم کفایت عَجب

التماس دعای فرج

#استاد_عندلیب ( عزیز ممی ‌پور )

@karimi_maraghei

2.9K views04:16