شيعنه نعشچ فاطمه
مولاتي يامظلومه
ـ-------------

وي علي اوي الحسن وحسينچ
يالزچــــــيه احبــابچ امشيعينچ
الكون اضـلم يوم غمضت عينچ
وغابت امن اليل حتى انجـــومه
شيعنه نعشچ فاطمه
مولاتي يامظلومه
ـ--------------

لبست اســـــود شيعتچ هليله
الحزن واحــــدهم امهدم حيله
نعشچ ابوســط الگلوب انشيله
اجروحنه يم الحســـن ملچومه
شيعنه نعشچ فاطمه
مولاتي يامظلومه
ـ--------------

واجب انواسي الامـــام المنتظر
اويانه بالتشـــــــيع يافاطم حضر
نعشچ اتحمله الملائك والبشر
وكلها تصرخ ويلي عالمحـرومه
شيعنه نعشچ فاطمه
مولاتي يامظلومه
ـ--------------

ابيا ذنب كتلوچ عمـر اثمن طعش
وحتى محـد وي علي شال النعش
بيچ سـراً للدفن وحـــــــده غبش
وهسه كلنه اوياه انعينه ابيـــومه
شيعنه نعشچ فاطمه
مولاتي يامظلومه
ـ--------------

سجلينه ابدفترچ مـــــن الخدم
ابلا رضاچ الدنيه اشـــبه بالعدم
الماخـــدملچ باچر ايكتله الندم
ويشعر ابنقصه وضميره ايلومه
شيعنه نعشچ فاطمه
مولاتي يامظلومه
ـ--------------

✍ الخادم
كامل السعيدي

(( قصيدة لتشييع الزهراء))

شيعه ونشيع نعش فاطمه
                ــــــــــــــ

نعشچ اليوم نشيعه ونشيله اعله المتن
والمدامع دمه اتسيل يفاطم عالچفن
حتى جبريل بالمصاب لبس ثوب الحزن
وي الحسين وبوحسين عله امصابچ يون

       والسماء والارض متئلمه
                ــــــــــــــ

هذا وجب علينه يبت خير العمل
من خدمتچ يزهراء وحقچ مانمل
بالارض والسماوات ألچ نعش نحمل
وسفه يابت محمد خذچ منه الأجل
      
دارچ امست حزينه ومضلمه
                ــــــــــــــ

هل عزه ايدوم يزهراء ونضل انجدده
والذي ايلوم علينه   ابولانه انعانده
انصيح لبيچ يزهراء وندانه انردده
انقدم اسنين عمرنه الچ كلهن فده

    والعمر لجلچ هديه انقدمه
                ــــــــــــــ

رب الاكوان خلقنه الچ نعمل خدم
باچر الما خدملچ يعض اصبع ندم
احنه لوما وجودچ ترى نصبح عدم
اولوله طه وعلي الدين تخلخل ونهدم

       انتو انوار الرساله الخاتمه
                 ــــــــــــــ

بعصرت الباب حسافه انكسف نور الشمس
احنه كل يوم يزهراء بألم ضلعچ نحس
يلعن الله السقيفه الصفت ساس الرجس
ويلعن الله الثلاثه الفتو قتل النفس

   
    نارهم بالباب ضلت مضرمه
              ــــــــــــــ

مانسينه المصيبه الحزينه المؤلمه
الله يگطع رقاب العصابه الظالمه
شنهو ذنبه جنينچ وگع يافاطمه
وشنهو ذنبچ تموتين يمصباح السمه

    ياعزيزة والدچ يالعالمه
              ــــــــــــــ

خل يشاهد ولانه اليضدنه اويعترض
مو خرافه لطمنه زلازل عالارض
رافضه احنه وعرفنه قوانين الرفض
نرفض الما تبعنه وعليه حق ننتفض

       كلا كلا للعصابه الظالمه
                 ــــــــــــــ


    الخادم
كامل السعيدي

وين گبـــرچ فاطمه ... احبابچ امضيعينه
المهدي يظهر ننتظر ... وعـــنچ ايـــدلينه
شيعتج كلهه تصيح
يمـته نبنيلج ضريح
           يازهراء            يازهراء 
             ــــــــــــــ ــــــــــــــ ــــــــــــــ

گبرچ اعلينه اختفه يم الحسن وين
نــاذر اوصله زحــف لوشافته العين
بربعينچ هــم تجـي الشيعه مـلايين
ويه زوارچ يجـي مشـــاي الحسـين

كنه نوكَفلچ خــدم ... والمئـاتم قائمه
يعتني من كل كتر ... زايرچ يافاطمه
معتني ابكَلبه الجريح
يمته نبنيلج ضـــريح
           يازهراء            يازهراء
               ــــــــــــــ ــــــــــــــ ــــــــــــــ

ابـلايه تشييع انحمل نعش الزجيه
ابليل دافنهه علــي حامــي الحميه
منها جـان ابهل أمـــر يحمل وصيه
اتكَلــه ماريـدن عمــر يبجـي عليه

منه ماتت غاضبه .... وزمرته الملعونه
ماعلمنه ابيا كــتر .... فاطمه مدفــونه
آه يـا أم الـذبيـــــح
يمته نبنيلج ضريح
            يازهراء            يازهراء
              ــــــــــــــ ــــــــــــــ ــــــــــــــ

بيده يبنيلــــــــج كَبـــر مهدينه باجر
وحنه يم كَبرج نجي ونحيي الشعائر
بسمــــــــج الرادود يقره اعله المنابر
يمـن حبـــج يسكـن ابوسـط الضمائر

عدنه حاجات اشكثر ... بصحـن نحجيهه
ضاملــج دمعة عتب ... بضريـح ابجيهه
حبج الكل هـــم يزيح
يمتـه نبنيلج ضـــريح
               يازهراء            يازهراء
             ــــــــــــــ ــــــــــــــ ــــــــــــــ

ننتضر راعي الفـــرج يافاطمه اسنين
يضهــر ايدلي ابكَـبــــــــرج للمجانين
وبعد وي مهدينه والله ايظهرن اثنين
سيف ذل فقــار بيده ومهر الحســين

ريت الحـكَ عالفـــرج ... وبقه حي اليومه
وبيدي اشد راية علي ... ونصر المضلومه
حتى من همي استريح
يمته نبنيلج ضــــــريح
               يازهراء             يازهراء
            ــــــــــــــ ــــــــــــــ ــــــــــــــ

صح ألج وسط الكَلب حضره ومزارات
لجن ردنه اعله الأرض تعله المنـــارات
الكل قبور اهل البقيع انسـوي حضرات
كـــافي ملينه الصبر حتى الصبر مـات

يمته نتعنه البقيــــع .. حتـى نبني اقبورها
يالله يالمهدي العجل .. وياك نمشي انزورها
وكل قصر ضالم يطيح
يمته نبنيلج ضـــــريح
                 يازهراء             يازهراء
          
ــــــــــــــ ــــــــــــــ ــــــــــــــ

      الخادم
كامل السعيدي
                       

مقدمه للزهراء ع

ظلعچ يم الحسن
نبچيله ابكل زمن
سلاماً سلاماً    سلاماً عالظلع
©©©©©©©©©©©

الگالو اصحاب النبي وطوع الرساله
ابمقتلچ غضـــبو علي ورب الجلاله
والجريمتهم كســـر ظلعــــــچ دلاله
حالــچ ايفت الصـــخر كلشي بچاله
نور الكون انطفه
ياروح المصطفى
سلاماً سلاماً    سلاماً عالظلع
©©©©©©©©©©©

ياسلام الله على المحسن جنينچ
طحتي يالزهره اوگع گدام عينچ
الله يجــــــــبر گلبچ والله يعينچ
امدوهنه وتتصـارخ اگبالچ بنينچ
گلبچ يلهب جمـر
يالخدچ منصـطر
سلاماً سلاماً    سلاماً عالظلع
©©©©©©©©©©©

صاح جبـــرائيل ودمــــــوعه جريه
الله يلعن قاتل الزهــره الزچـــــيه
اللــه واكــــبر ياعظـــم هاي الرزيه
عمره لحظه المحسن وميت خطيه
موهــــين مقتله
هاي اكبر معظله
سلاماً سلاماً    سلاماً عالظلع
©©©©©©©©©©©

شحال گلب الحسن وحسين ابغيابچ
وزينب اليلهب گلبـها ابنــــــار بابـــچ
يالوديعه ايشـــيب الرضــع عـــذابچ
الله يجـــبر كسرچ ويجبر مصــــابچ
الله انطاج الصبر
وتحمـلتي الكسر
سلاماً سلاماً    سلاماً عالظلع
©©©©©©©©©©©

بالروايات الثـــــــــلاثه الفاطمـــــيه
انموت اذا مانحـــــظر اقرايه وعزيه
اي وحق دمعة اعيـــــــونج يالزچيه
ايصير واهس عدنه من نلطم سويه
بالمجلس ننجمع
ونواسـيج ابدمع
سلاماً سلاماً    سلاماً عالظلع
©©©©©©©©©©

الخادم
كامل السعيدي

#نزال_

فاطـمي فاطـمي للابـد
فاطمي فاطمي عالعهد
****

بالمجالس ـ ابقه عابس ـ وفختــــر خادم عشت
أقرء وخدم ـ ونعه ولطم ـ بالســـواد اتوشـحت
راسي عالي- الهل ليالي- والله كل عمري انذرت

امحـــزم ابهاي المجالس للأبد
ما اعوفنها وحـــق واحـد احد
هالشعائر عندي ألذ إمن الشهد
ألها نذرتني الحنينه امن المهد

ملتــزم ملتـــزم بالوعد
فاطمي فاطمي عالعهد
****
يالزجـــيه ـ كلشي بيه ـ ملكچ وعبـدچ صرت
من البدايه ـ وللنهايه ـ ابهل وضيفه اتشرفت
اخدملكم ــ وكتبــلكم ــ صيــت ابـد مادورت

همي بس ترضـين عني ابدنيتي
يالسبب صرتي برفعتي وهيبتي
يالزچــــــــيه انتي ادره ابغايتي
ما ادور شــي مقابل خدمـــــتي

خدمتچ خدمتچ چن شهد
فاطمـي فاطمـي عالعـــهد
****
حبچ آيه ـ وبي هدايه ـ يخـتلف عن كل عشگ
مو حكايه ـ اولاروايه ـ يحمل اخلاص وصدگ
يالوفيـــه ـ ابهل عـــزيه ـ هامه اطبـرلچ وشگ

ســــجلي يم حســــين يمج لهفتي
ولطمتي وعزمي وحسرتي وعبرتي
اركض اعله المجلس آني ودمـعتي
وركضت اطويريج صـارت ركضتي

والگلب والگلب ما برد
فاطمي فاطمي عالعهد
*****

هذا دوري ـ ابكل شـــعوري ـ لازم اتهدل وون
يالكسـيره ـ يالنـــــذيره ـ عسعس اليل ابحزن
انتي دمنه ـ وانتي امنه ـ وانتي للخادم وطن

انتي رايـه ارتفعت ابچـف الخــدم
رابــــح اليهـــواچ واللـه وما نـــدم
ابلا مجالس هالخـــدم تصبح عدم
نزحفلها ازحوف موش اعله الجدم

هالقسم هالقسم والصمد
فاطـمي فاطـمي عالعـهد
***

مانعوفچ ـ يالنشوفچ ـ بالسمه اهلال وشمس
من وفائچ - من ابائچ - شيعتج تاخذ درس
فاطميه - هاشميه - حبج اغلى امن النفس

احـــنه مـــن دونچ نضل ابلا هوه
انتي فضـــلچ عالجرح مثل الدوه
انتي آيات الحــــــــمد والقل هوه
ابلا وجودج كلشي يبقه ابلا ضوه

والعشگ والعشگ ماله حد
فاطـــمي فاطـــمي عالعهد
***

     الخادم
كامل السعيدي

#مقدمه_للزهراء

طب للبيت ـ شاف البيت ـ خالي من فاطمه


يطب الدارها ويخــــــتنگ بالوحشه
علي ملچـــوم فارگ ضحكت الغبشه
يشوف حسين بيده افراشها ايفرشه
ويحس ابگلبه نار اومنگـــطع هرشه

وين ايروح ـ كلها اتنوح ـ حتى الارض والسمه
**

گطـعو مــنه ورده وذبل بســـــتانه
مــر بيه الخــريف ويبست اقصانه
يطــــب للـدار يلگـه الدار حـــزنانه
على الزهره نحيل اوروحه خلصانه

كل اغروب ــ گلبه ايذوب ــ مجروح حامي الحمه
****

بالتغســـيل شــاف الما امســـــولفته
زعل بس الوصــــــــــيه ابهاي لازمته
شاف السطره البخدها وبچه ابسكته
العقيله اتموت كون ينــــوح سامعته

بالتغسيل ـ باد الحيل ـ ودنيا صفت مظلمه
****

علي اتعـــذب دليله ابفرگت الزهره
كلشي اضلم عليه من ماتت الگمره
مـن يذكـر ظلعها ويذكـر الصــطره
تهيـج اجروحه كلها ويختنگ عبره

صابه البين ـ بم احسين ـ وسهم البعد المه
****

يگعــــــد يم گبــــرها وينحب وينعه
موضلع الزچيه ألي انكســــــر ضلعه
يكـــابر عالالم گوه ابجــفه البضـــعه
تبچي وتوگف اعله ادموعهه الشمعه

ابگلبه النار ــ فكره احتار ــ من المدامع عمه
***

      الخادم
كامل السعيدي

ألْبَسْ سواد
أعلِن حداد
  بمصيبة الزهره الزچيه
ــــــــــــــ ــــــــــــــ ــــــــــــــ
ابچي ويصب دمع الحزن
يلچمني صوت الناعي
گبل الزچيه ام الحسن
كسروها ريت اضلاعي
اي والخلگ ارض وسمه
ولما يرجـــــع داعي
بالمجلس احضر كل وكت
للزهره اروحـن ساعي

هذا العزاء
يعني الولاء
واجب نقيمه ابكل مسيه
ــــــــــــــ ــــــــــــــ ــــــــــــــ

الزهره تحضر كل عزه
خل نحضر احنه اوياهه
من تبچي للمحسن نجي
نبچــي ابكثر مبچاهه
نِذَّكـــر اصــواب الظلع
والظالم الصـــاباهه
بسمار نبت بالصـــــدر
تنزف ألـــم خــــلاهه

صاب البتول
اذه الرسول
وكل احنه نشعر بالاذيه
ــــــــــــــ ــــــــــــــ ــــــــــــــ

احضر وشارك بالطـم
بچفوفي اورم صدري
والغايه من هذا العمل
ام الحسن بيه تدري
ضامن شفاعتهه غـداً
هيه اتكفل أمـــــري
ألهه آنه ابد ماقصرت
بالخدمه خلص عمري

الام الجنين
فدوه السنين
خادم وضل انصب عزيه
ــــــــــــــ ــــــــــــــ ــــــــــــــ

بانت عـــــلامات الألم
سود الحزن لبسوهه
مو دمعه اثر جمره انطبع
بوجـــوه اليحبوهه
مظلومه ماتت فاطمه
اهل الحقــــد ظلموهه
عصروهه والمحسن وگع
وعلى الوجه صطروهه

صوت البكاء
هَز السماء
هاي افجع واعظم رزيه
ــــــــــــــ ــــــــــــــ ــــــــــــــ

العنده حاجه ويستحي
للزهره خل يحچيها
والله اذا صفــــه الگلب
قبل الطلـب تنطيها
والأذته اجــروح الگلب
بس للمحب يشكيها
وأم الحسن تشفي الجرح
هنيــاله اليواليها

الام الحنان
في كل زمان
ننصب مئاتم فاطميه
 ــــــــــــــ ــــــــــــــ ــــــــــــــ

        الخادم
   كامل السعيدي

بنار المصاب - فاطمه اتلوع
منهه بالباب - كسرو اضلوع
ناحو املاك السمه
يوم مقتل فاطمه
ــــــــــ ــــــــــ ــــــــــ

ورده چانت فاطمه بس ذبلوهه
وبين باب وحايط ابقسوه اعصروهه
العاشو اسنين بئمان ابجال ابوهه
هسه نكرو فاطمه وبنار اجوهه

ابلا اذن ليش - دخلو الدار
الچانو اصحاب - طلعو اشرار
اتلطخت چفهم دمه
يوم مقتل فاطمه
ــــــــــ ــــــــــ ــــــــــ

كذبو كل الاحاديث الشريفه
وبدل حيدر نصبو منهم خليفه
سلبو حق فاطمه الزهره العفيفه
خذو من عدهه فدك اهل السقيفه

حگهه يدرون - ولهه مكتوب
بس يظلون - سوده الگلوب
زمره كلش ظالمه
يوم مقتل فاطمه
ــــــــــ ــــــــــ ــــــــــ

ابضربت البسمار متهشم ضلعهه
تبچي والكرار بيده ايمش دمعهه
اگبال زينب والحسن تكتم وجعهه
اتخاف الحسين ايتعذب لوسمعهه

اتنازع الموت - ضلت ايام
اتغيرت حيل - كثر الالام
الدار ظلت مضلمه
يوم مقتل فاطمه
ــــــــــ ــــــــــ ــــــــــ

راح منهه الرادته لحسين اخيه
ضخر ويسنده ابليالي الغاظريه
ازغير بعده المحسن وكلفه الرزيه
لعنت الله اعله السقيفه وآل اميه

عاشت ابحال - يهدم اجبال
شالت اهموم - كلهن اثگال
كل عمرهه مئلمه
يوم مقتل فاطمه
ــــــــــ ــــــــــ ــــــــــ

صبرت وماحشمت شيخ الغياره
تدري يگلبهه گلاب ابذل فقاره
أوصيه عنده لمن ايدخلون داره
يصبر وباچر المهدي ايجب ثاره

ابصبره مرهون - عمر الاذان
من يسل سيف- ترد الاوثان
اشگد صبر حامي الحمه
يوم مقتل فاطمه
ــــــــــ ــــــــــ ــــــــــ

الخادم
كامل السعيدي

لِفاطمه وأبيها
وبعلُها وبنيها
      الله خالقنه خدم…….

الله خالقــــنه خــــــــدم لترابهم
انجعلو النه احباب وحنه حبابهم
يمته نتــــعنه ونقبل اعتـــــابهم
ونخــــدم ونكنس ابعتبت بابهم
هذهِ آمالُنا نَحكيها…. 


الفاطمه احنه اعيونه انبچيهه
وهل مجالس نحضر ونحييهه
والله هل خدمه انتشرف بيهه
وبالدمــــاء وبالنفـس نشـريهه
ولها ارواحنُا نفديها.…..


شرف هاي الشـيعه ربك زادهه
بخدمة الزهره وعلي واولادهه
همه للدنـــيه العمد وســيادهه
وثورة حسين اصبحو قوادهه
ولهُم دمعاتُنا نبكيها..... 


هل مجالس نعمه من رب المله
جعل بيهه اعظم مكانه ومنزله
يوم فاطـــــم بالحزن نستقبله
وبالمجالس والدمـــوع السايله
نَنّصِبُ المأتَمَ كي نُرثيها..... 


يلي تلطم لم حسن ومصابهه
الجنه تفتحلك جميع ابوابهه
وحـق تربت فاطمه ومحرابه
اتفوز باجر بالجــنان احبابهه
ومِنَ الحوضِ غداً تسقيها…... 

✍كامل السعيدي

ذكرى استشهاد الزهراء ع


     عالوعد       والعهد
نحي الليالي الفاطميه جينه
©©©©
ابثوبي الاسود وبدموعي وهذا حالي
احظـــر المجلس اجيت وراسي عالي
والله اعــــــوف الدنيه كلها وما ابالي
اولا اعـــوفن ليله مـــن هاي الليــالي
   عهدي أنه    ابكل سنه
نحي الليالي الفاطميه جينه
©©©©

هالمجــالس هيه عشـي وهيه بيتي
وهالمـــنابر هيه المكبـــرتلي صيتي
خادم الزهـــــراء مكتــوب ابهويتي
وابقـــه انعاهه لحد ســـاعة منيتي
     بمدمعي      والنعي 
نحي الليالي الفاطميه جينه
©©©©

لو قره الناعي وذكــــر كسرت ظلعها
عيــــني من دم يبقه يتفايض دمعها
الزهره ورده اومو شريف ألي گطعها
دين ماعنــــــــــده الضربها والدفعها
   اتحزمت    حشمت
نحي الليالي الفاطميه جينه
©©©©

اهواي عــــدوان الزچيه وقله الاحباب
وگعو منها الجنـــــين ابعصـــرت الباب
ابيا ذنب ضربو متنهه وشنهو الاسباب؟
اليدعون اصــحاب هسه انگلبو اذياب
      بالهظم    والطم
نحي الليالي الفاطميه جينه
©©©©

شكبر بختي وصــرت خادم للزچيه
وربحي بالدنيه الولايه الحيــــدريه
ناجح ابحب الزچيه وخــــذت ميه
حيل ادگ صدري عليها ابهل مسيه
    ابهل ذكر     نستمر
نحي الليالي الفاطميه جينه
©©©©

ريت هاي اليله وي حامي الحميه
انشـــارك ابتشيعها وننصب عزيه
فايز اليحـــــــيي اليالي الفاطميه
ترضه عنه فاطمه وسيد البريه

انضل خدم    بالالــم
نحي الليالي الفاطميه جينه
©©©©
     الخادم
كامل السعيدي