#مولد_الاقمار_المحمديه

كشخة شـعبان مولدكم
ومحيرة الناس هيبتكم
سيادة…  قيادة … عباده
🌹🌹🌹🌹🌹🌹🌹🌹🌹

ميلادك يحســـــــين الاول منبع للنور
ياهيبتنه وياكشـــــــخته وللعالم سور
بيك اتباهينه ابهل ليله والكل مسرور
غالي وتستاهل نفرحلك ونعلگ ازهور

بيــك الاكوان فرحانه
يانجم اسهيل بسمانه
سياده .. قياده .. عباده
🌹🌹🌹🌹🌹🌹🌹🌹

يوم الرابع من شعبان اشــگد حبيناه
ميـــلادك عباس الغيــره انولدة وياه
بالمحفل حاضر مهدينه اهنا حسيناه
نقرالك اجمل مانكتب ويصـــيح الله

يا آية زود ومــــروه
بيرغ مرفوع للخوه
سياده .. قياده .. عباده

🌹🌹🌹🌹🌹🌹🌹🌹🌹

يومك يالسجاد الخامس ومفرح الناس
نستنشق بي عطـر المولد نسـم بالراس
من عندك نتعلم كلشي حتى الاحساس
ياكعـــــبة معــرفه للعالم بيمن تنقاس؟

بيك الاحساس هناني
يالحبك صــار عنواني
سياده .. قياده .. عباده

🌹🌹🌹🌹🌹🌹🌹🌹

يالاكبر يالتشـــــبه جدك والله شمحلاك
نحبك حب الطـــير العشه واكثر نهواك
اجمل قصة حب عشناها بشعبان اوياك
حتى الاملاك اتحب تلهج دوم ابطرواك

ذكــــرك آيات قدسيه
واسمك ينهاب طاريه
سياده .. قياده .. عباده

🌹🌹🌹🌹🌹🌹🌹🌹🌹

يالمهدي الاملاك ابحفلك مصطفه اصفوف
حبك كعبه وبيه اكليبي يوميه ايطوف
يالساكن وســط الدلال وغيرك منشوف
نور الكون ابوجهك شع وقدرك معروف

والله امن اصباي حبيتك
وبنص الروح ضميـــــتك
سياده..  قياده..  عباده
💐💐💐💐💐💐

✍️الخادم
كامل السعيدي

مولد شيخ العشيرة ـ ومولد بدر العشيرة
الله شلون اثنين ،،،، أبوفاضل وحسين
🌹🌹🌹🌹🌹🌹🌹🌹🌹

يا اهــــلاً كلنه انرحب بالاقـــمار الميـــــمونه
واحدهم حلى الدنيه ومحتاره ابلون اعيونه
عباس الكشخه الهيبه وراعي الغيره يسمونه
وحســــــين الشيخ العام وكل الناس يحبونه

حبهم رحمه وهدايه ــ حبهم اجمل بدايه
انسميهم فخر الدين ــ أبوفاضل وحسين
🌹🌹🌹🌹🌹🌹🌹🌹🌹

فرحــــــة زينب هاي الليله اولا فرحه تماثلها
مولود القـــــــــدوه وهيبتها وعزوتها وكافلها
ضل يهمس بذن اخته الكافل ماندري شگاللها
يمكن دگ صــــدره الها ابمهده واعدها ايدللها

ضحكت من كل گلبها ــ انولدو رفگت دربها
يالتسأل ذوله منين ــ أبوفاضل وحسين
🌹🌹🌹🌹🌹🌹🌹🌹🌹


همه اجمل وطهر ورقه وافه اخوان بدنيانه
بدرين ويتساطع ضــــــيهم ومحلين اسمانه
مو عالگاع الله امـــــــــنزلهم آيات ابقـــرئانه
مايگدر يوصـــفهم شاعر من وحيه اوجدانه

صارو مصدر غرامي ــ حبهم رافعلي هامي
اليشبهم يحصل وين ــ أبوفاضل وحسين
🌹🌹🌹🌹🌹🌹🌹🌹🌹

حيـــــدر فرحان ابمولدهم بيــــهم رافـــع راسه
أذن بذن حســــــــين اليمنه وشم عباس وباسه
شايل بيـــــــــده اورود الجنه اوزع اهله وناسه
اليهديه الله افحول اثنين اتوقع شنهو احساسه

بيهم صار افتخاره ــ چنهم نور المناره
ابمولدهم فرحانين ــ أبوفاضل وحسين
🌹🌹🌹🌹🌹🌹🌹🌹🌹


  ✍الخادم
كامل السعيدي

هلا بهاي الانوار وهلا بطاريها
ابوالسـجاد والعباس شع بيها
گلـبي فرح بيهم
فدوه الاساميهم
            ـ………………………ـ

هاي الليالي امن العمر غنيمة
موفقه ومبــــــــاركه وكريمه
بيـــــها ولادات اربعه عظيمه
وبيـها انولد للمصطفى كليمة

ليالي اثمرت خدمه حسينيه
ليالي مكلله باقمار قدســــيه
فرض واصـليهم
فدوه الاساميهم
           ـ………………………ـ

وجه الحسين امن المهد تلاله
انجوم الســمه تتغازل بجماله
هيبه انخلق ما اعظمه بكماله
فاز الذي بيه انجعل وصـــاله

مصحف للغرام نرتله كل ليله
يشفه المعتلي لوعنه نحچيله
فاز اليــــــواليهم
فدوه الاساميهم
           ـ………………………ـ

عبـــــاس اول ما فتـــحها عيـنه
تبـــسم الان شاف اخته الحنينه
مدري شحچتله وطلع الها ادينه
وضـــلت تبوس ابيسرته ويمينه

ابتسبيحة الزهره امگمط اليله
وزينب گاعده ابصفه وتلوليله
يامـحله طاريهم
فدوه الاساميهم
         ـ………………………ـ

الســجاد مملكة العشگ نشوفه
نكشــــخ ابحــبه وابد مانعوفه
ينشرح صدره الينطق بحروفه
كاروكه ورده والنـــحل يطوفه

نولد راعي الصحيفه ومنبر الشيعه
نبــــــــيع الدنيه كلها وحبه منبيعه
للمــــوت اواليهم
فدوه الاساميهم
      ـ………………………ـ

الاكبر حبيبي وافتخر عشگته
اسمه على ارواق الگلب كتبته
نور النبي ايشع وترس وجنته
ذبت بهواه وابـــد ما تركـــــته

شبيه المصطفى مااجمل اعيونه
حضاره امن العشگ عند اليحبونه
راسي ارتفع بيهم
فدوه الاساميهم
       ـ……………………ـ

✍الخادم
كامل السعيدي

تحضير لحفل ولادة الاقمار المحمديه
مبدعين مدينتي الزبير الحبيبه

المبدع أحمد الخفاجي
المبدع وسام البصري
المبدع عبدالله الصرايفي
المبدع رائد العبادي
المبدع صفاء الصرايفي
✍كلمات كامل السعيدي

مولد علي الاكبر ع..لحن المستهل وختام النص هوسات…

ميــــــلاد الأكبــر هليله
يستاهل فرحه انسويله
           @🌹@🌹@🌹@

هله وميت هله بأصل البساله
ورث من حيدر افنونه وقتاله
من جده النبي ماخـذ خصاله

وماخذ من غيرة عباسه………
           @🌹@🌹@🌹@

الاكـــبر نـور ميـــــــــلاده تـلاله
شبيه المصطفى ابخلقه وجماله
ومن حـــيدر اخذ قدره وجلاله

يستاهل صفگه وهلهوله………
           @🌹@🌹@🌹@

يوم اهدعش من شعبان ســـرنه
وبمـــــولد علـي اليـله احتفلـــنه
حتى الزهره اجت تحظر فرحنه

وتهني حسين ابميلاده………
             @🌹@🌹@🌹@

حســـين ابتشر هليله وتبسم
وصله اعله النبي وعليه سلم
باســه ابجبهــــته أويا تكلــم

يمكن عالطف ضل يحچيله………
         @🌹@🌹@🌹@

حرت شكتب شوصفك انته آيه
جمــــــيل وصــورك رب البرايه
الك هوســــــاتنه اقبلهن هدايه

وسجلنه ابحبك وفايه……
            @🌹@🌹@🌹@


         الخادم
✍كامل السعيدي

يمهدينه    يمهدينه     بلمولد انسرينه يمهدينه
بخمس طعش شعبان
گلب المحـب فرحــان
   بلمولد انســـــرينه يمهدينه
                    🌷🌷🌷🌷

گلب المحب فرحان اليله الولاده
يلمهدي نورك بات نور الســـعاده
دين اللـه رحب بيك ونته عماده
نورك يضـــي اعلينه ......  يمهدينه
                   🌷🌷🌷🌷

ربنـه هـــــداك اليـــوم للرافضــيه
وبسمك عرفنه سرار هاي الهــديه
ارض اوسمه اتحييك يبن الزجيه
وبشخصك اتبـاهينه ....… . يمهدينه
                  🌷🌷🌷🌷

يا قائم آل البيت حبك جمعـنه
نورك يشــــع مولاي نور ارضنه
ماينوصف بلكون هذه فرحــنه
غيرك فلا حبينه ...… .... يمهـدينه 
                  🌷🌷🌷🌷

اخمس طعش شعبان عيد اومسره
ولينطـــرك مـــولاي صارتله بشــره
والعــدل يا مــولاي بيــــدك تنشـره
ونتـــــه تضـل واليـنه ......... يمهدينه
                🌷🌷🌷🌷

بيك الفــرح مرسوم من الطفـوله
يلمهدي نشأن بيك غيره اورجوله
انته الشلت مــولاي رمــز البطوله
ألكل يومك امتانينه ......... يمهدينه 
                🌷🌷🌷🌷

يبن الحسن اهديك احلى المشاعر
وبحبكـم آل البت سمـوني شــاعر
انتم سفينت نوح ولضدهه خـاسر
بس حبك اينجينه ...…...... يمهدينه
                🌷🌷🌷🌷


         الخادم
✍كامل السعيدي

حسين العيساوي

مولد الامام المهدي عج..


يالحــــبك نجـــاة الكل مــوالي 
راسي ابخدمتك يالمهدي عالي
       
🌷🌷🌷🌷
يالحــــــبك نجــات الكل الاطياف
ابيقضه وبالحــلم يالمهدي تنشاف
عشـگك رحمـة اللـه اشلون ينعاف
الما حبــــك خســـر يغله الغـــوالي
🌷🌷🌷🌷

ياحجـة الباري وللخــلگ ســـــور
اطـوف ابمهــدك الامـــلاك وتزور
خــدك يشع جن قنـــديل من نور
يالاصبــح جمـــالك شـي مثـــالي
🌷🌷🌷🌷

يا شــــمام گلبـــي اولب الالبـــــاب
يانسـمة اعذيبـي اويه الهوه الهاب
انته اطهر وليد امن اشرف انساب
بســـمك نحتــــــفل هـاي اليـــــالي
🌷🌷🌷🌷

يا منـــبر عشـــگ والحبه سلطان
يا اجمل اشــراقه ابنصف شعبان
يا بــاب العلــــــم يا بـــاب ريــان
ابحــبك كل وكت يســرح خيالي


🌷🌷🌷🌷
اكماطك نور.  عطره اينسم الراس
جـــوري وسعفران وعنــــبر وياس
ربك وي قــــــــدومك بشــر الناس
منقــــــذكم المهــــدي وهــوه والي
🌷🌷🌷🌷

        الخادم
✍كامل السعيدي

🎤كامل السعيدي
🎤حسين العيساوي

هوسات للامام المهدي عج🌷


چن بالحلم محضوضين والدارك تعنيه
وشفنه النبي اشگد فرحان وبيده ايعلگ الزينه
وشاركنه الفرح وياه اورد شلنه بايادينه
…. وبابك محفل سوينه ….


هوسنه اوقرينالك قصايد صور متروسه
الشعر وياك يحلى اهواي ونته اصبحت قاموسه
الك وردة عشگ مولاي ابنص الگلب مقروسه
بحفل مولدك هاليوم حضر عيسى وحضر موسى
وحضر كل شاعر وذواق منك ياخذ ادروسه
ويتبرك حضر جبريل وهوه اعله اگماطك ايبوسه
يبوصالح يموگ العين بيك الناس محروسه
يمته اترف الك رايات وشكو عاذل سوه اندوسه

يومك يالمهدي متانينه

✍كامل السعيدي

مولد الامام العباس ع
مدينة الاهواز
الرادود عيسى الولائي
الشاعر كامل السعيدي

https://youtu.be/epo-60WTCvo?si=wWnhdAM711paoPuM


علي العنتاكي
كامل السعيدي

استديوهات رياحين العترة للإنتاج والتوزيع الفني

قرأت هذا الابيات عند قبور خدمة الحسين ع الراحلين
السيد جاسم الطويرجاوي
والسيد محمد باقر الفالي