بە تەورات و به ئێنجیل و سوحوف یا ئینە فورقانەن
بە چل تیکەو دڵی مەڕیای وەهاروو ئێمە زمسانەن

زوانی سوور سەرەش هوونەن، بەڵا شیرین بەڵام توونەن
خەتابار چێگە گەردوونەن عەداڵەت دەس به گۆچانەن

دڵێ دڕیەی بە هاوارێ، سەرێ کریەی به سەربارێ
وەشی پووش و خەمێ دارێ، بەهاو لاشەی پەلێ نانەن

جەفا ڕۆڵەن وەفا زۆڵەن، حەیا شیرین‌تەرین سۆڵەن
شەرەف کۆڵبەر، ڕیا کۆڵەن، سەفا چەک، خەنده سەروانەن

دەموو مەرگی تەڕەن ئارۆ، چەموو دەریای بەڕەن ئارۆ
دڵوو هیزی پەڕەن ئارۆ، بڕەش کەی ئینە دەورانەن؟!

قەفەس کریاوە باڵ بڕیا، زەمین بەسیا و سەما دڕیا
تەقا دڵ، تاقەتش وڕیا، هەژاری مەرده سوڵتانەن

شەوێم ئاور بە ئاخێنێ، ڕوێم گرد بێ قوڵاخێنێ
دڵم داخێش دەماخێنێ جە سۆزیم ناڵە ناڵانەن

#جەماڵ_قادرپوور

دەگاو جــــــۆڵانــــــــدێ

@joolandeh

مزگی بەرەش بەسیا سەرم، مەیخانە قاچاخەن وەنەم
دڵ یانە بێزاروو جەسەی، ئاخ یانە قاچاخەن وەنەم

شادی خەزانش کەردەن و دانش پەڵەو هەڵسەو چەمی
خەم ئەرخەوانش سوورەن و ڕۆخانه قاچاخەن وەنەم

پەردەو دەلاقەو تاقەتی دڕیا بە تۆفانوو خەمی
سا ئینه (ما لا طاقَةَ)ن، شوکرانه قاچاخەن وەنەم

جادەو نەژیوای پەڕ تەوەن، ماشینوو ژیوای پەنچەرەن
ڕای ڕاسه ماڕۆ شافەنەر، متمانه قاچاخەن وەنەم

شار ئاوەدٚانی کاولەن، قاڵی سەراپا خەڵوەتەن
موفتی گرانەن ئاوەدٚان، وێرانە قاچاخەن وەنەم

داخێ فرێنێ دڵمەنە و هووناوەکێم کەردش کەلاو
ئاخم نەپیما پەڕ بە دڵ، پیمانه قاچاخەن وەنەم

سەردەن هەناسەو ئاوەزی و دڵ پەی زوکامی مامۆرەن
قاتەن هەناروو دڵوەشی و بەی‌دانه قاچاخەن وەنەم

#جەماڵ_قادرپوور

دەگاو جـــــــۆڵانــــــــدێ

@joolandeh