بە هەورامی کەرا حەشرم تەمامەن
نەواچی گێلەن و گەوج و نەفامەن

کەسێو پەشتی کەرۆ خاک و زوانیش
تەڵاقم کەوتە بۆ تۆمش حەرامەن

#جەماڵ_قادرپوور🌺

دەگاو جـــــــۆڵانــــــــدێ

@joolandeh

وەهارەن دڵ دەموو هەڵسێش ویارەن
قەرار پەی شیوەنی ئای بێ قەرارن

کەسێ کۆسش نەکەوتەن کەی مزانۆ؟
جە پاییزی خەمین‌تەر هەر وەهارەن

#جەماڵ_قادرپوور🌺

دەگاو جـــــــــۆڵانــــــــــــدێ

@joolandeh

ئەی وێمەکەی سنیا جە وێم! ئەی پەڕ جە ڕەنج و مەینەتی!
دڵ وەش به کۆمەڵگای نەمەن، سەد ڕەحمەتێ پەی خەڵوەتی

ژیوای چەماوچەم کەردەیەن، لۆمە و مەنا و زەم کەردەیەن
مەحرووم به مەحرەم کەردەیەن، سەد ڕەحمەتێ پەی خەڵوەتی

ئاوەو دەمی ئەیرش گەشەن، ئای خاسه کەردەی قەرقەشەن
دڵ هەر به تەنیایی وەشەن، سەد ڕەحمەتێ پەی خەڵوەتی

قەدر و شەرەف بی تۆڵەکێ، پووش پەی حەیای بی کۆڵەکێ
کریەی به گەز نیم چارەکێ، سەد ڕەحمەتێ پەی خەڵوەتی

شیرین به شاهێد تاڵەن و ڕۆ بێ سەنەد هەر ساڵەن و
قەل مەدرەکش هەن داڵەن و سەد ڕەحمەتێ پەی خەڵوەتی

پرمەو دەسی دڵ پەڕ کەرۆ، لووشەو خەمی گۆش تەڕ کەرۆ
پرخەو هەوای چەم کەڕ کەرۆ، سەد ڕەحمەتێ پەی خەڵوەتی

ئەی وێمەکەی بێ وێم! سڵام، بڕیان جه کۆمەڵگای تەمام
گەل حورمەتش کەردەن حەرام، سەد ڕەحمەتێ پەی خەڵوەتی



✍ #جەماڵ_قادرپوور

دەگاو جــــــــۆڵانــــــــدێ

@joolandeh

ئەی کۆنە خەمی تازەم! کولیاوه دڵی ڕێشم
کریامەوە تاسەو تۆ چی چەرمه نەبۆ ڕیشم؟

بۆ وینه هەرم ژیرەن، دانامه زەمین‌گیرەن
چل ساڵەنه دڵ پیرەن چی چەرمه نەبۆ ڕیشم؟

دەنگش نەمەنەن گۆشم، بی خەنده فەرامۆشم
هۆشش نەمەنەن هۆشم چی چەرمه نەبۆ ڕیشم؟

ویرم وەنە ئازارەن، شەوقم چەنە بێزارەن
خەم دڵمەنە نازارەن چی چەرمه نەبۆ ڕیشم؟

دوور کەوتە جه هاتینا، بێ‌پاو دەسەڵاتینا
بڕیا جه حەیاتینا چی چەرمه نەبۆ ڕیشم؟

بێ تۆ شەوەزەنگەن ڕۆ، ژیوای شەکەتەن بێ تۆ
مەردەی گوزەرانم بۆ چی چەرمه نەبۆ ڕیشم؟

وادٚەو تەمەنی پەڕ بی، مەرگم به چەموو وێم دی
شی وادٚە، جە ویرت شی چی چەرمه نەبۆ ڕیشم؟


✍ #جەماڵ_قادرپوور

دەگاو جــــــــۆڵانـــــــــدێ

@joolabdeh