ه꧂ ᪣ #بە_جرموو_کناچە_بیەیم ᪣ ꧁ه
📝بەشوو چوارۆمی
بە دەموو گرەوایوە و دڵی پەڕموە هەرسی پێسەو قرمەو وارانی ملوو کۆپامەرە مجیێنێرە واری. حەر وێڵکۆنەو بابەیم نەبێنێ و واتم بابە گیان!!! من وێم مزانوو ئننە وەشت نمەی بەڵام قەسەمت مدٚەوو، تۆ ئەرواحوو ئەدٚایم بازەم با بلوو شۆنی دەرسەکەیمەرە، قەوڵ مدٚەوو هۆشم موحەمەدی و ڕەزایچوە بۆ. بابەم سەرەش نامنارە و لوا دلێ ویرا و دمای سەرەنجێو چەمە پەڕ هەرسە سوور بیاکاو منش دا و واتش: باشەن بلۆ وانگە و دەرسەکەیت بوانە بەڵام هاگات بۆ خەتایوە کەری سەرەت بڕیەنم و نیانم سەروو دڵیتوە. نمەزانوو ئا ساتە بابەم بە چێشی یاوا دلێ چەمامەنە هەکە ڕازی بی. فرە وەشحاڵە بیانی پا قسێشە و واتم: سەروو چەمام بابەگیان، پەڕ بە دڵ حەز کەرێنا بلوو وێم وزوو باوەشیش و تێر و پەڕوو وێم ماچێش کەروو. بەڵام فرەش پۆوە نەشی زەوق و وەشی منش نەوینا و بێ‌دەنگێو لوا هودٚەکەو وێش و بەرەکەش بینا...
وانگە کریاوە و لوانی سەروو دەرسەکەیم. بە لوایما پەی وانگای دەرسەکانوو وێم و موحەممەدی، ئەرکم چن وەراوەروە بی. بە جۆرێو قۆرس بێ پەیم نەتاوێنا بە ڕێک‌وپیکی هەرمانەکام بەروو ڕاوە. هەر چی هەوڵیچ دێنا دیسان حەر کەم ئارێنا یاگێوەنە هەرمانەکێم ناتەمام مەنێوە.
وەختێو بابەم دیش هێز و تەوانم نەمەنەن و عال نمەیاوو بە هەرمانەکامەرە، زەنگش دا پەی خاتوونێوە هەکە وەڵتەر بە بیەو ئەدٚایم هەرمانێش پەی کەردێبێنمێ واتش: بەشکوم حەفتەکێنە دوێ کەڕەتێ بەی پاک و پۆختەیە یانەی کەری پەیما. نامێش خاتوو فاتمە بێ، چەنێ ئێمە فرە مێهرەبانە بێ و بە دڵ موحێبەتما پەنە کەرێ. هەمیشە واچێ ڕۆڵە گیان حەر وەخت حەر هەرمانێوتا بیە واچدێم پەنە، تەنانەت ئەگەر یانەو وێچما بوو نەگندێ دلێ ڕوودەرباسی، زەنگم پەی بدٚەیدێ دڵنیای بیدێ عازا وێم میاونوو. خودٚایش هەر وەخت ئامایا بە گیان و دڵ دڵسۆزانە هەرمانێ کەرێ، تا هەم دیسان ئامایاوە هەرمانێم نەمانێنێ. یەک ساڵ بە نەبیەو ئەدٚایم بە سەختتەرین شێوە ڕوێما دەی سەر. وردە وردە باسوو ژەن ئاوردەو بابەیم گەرم بی. حەر کەس چەمش گنێ بە بابەیم واچێ ڕۆحوو خێزانێت بە بەهەشت شاد بۆ، بەڵام ویروو وێچت و ئا زاڕۆڵایچتەنە بە، مشۆم کەسیە بۆ پاک و پۆختەیشا کەرۆ و بیاوشا پۆرە. وێچت جوانەنی نمەکریۆ تەنیا بنیشیەرە. زانێنا دڵوو بابەیمەنە چێشەن و وەروو ئێمە تەرێق بۆوە و نمەیارۆ حیچ واچۆ.
ماوایە ویەرد تا ڕوێوشا ئەدٚا گەورێم کە لوایبێ پەی ئاڵمانی ئاماوە. لوایبێ پەی لاو مەتیێم زاڕۆڵەش بیەبێ تا کومەکش کەرۆ و نگنۆ دلێ عەزیەتی.
وەختێو ئەدٚا گەورێم ئاماوە گردیما پێوەرە لوایمێ پەی یانەیشا. چاگەنە بابەم بە ئەدٚا گەورێم واتش: ئەدٚا.....!!!
مەگەر چێش بۆ ماوایە بەی پەی یانەو ئێمەیچ و هاگات زاڕۆڵا بۆ. ئەدٚا گەورێچم سەرێوەش هۆربڕنا و وردەو بابەیموە بیە و واتش: وەڵڵا ڕۆڵە من ئێتر پیرە بیێنا و هێز و تاقەتوو ویاری کەردەو زاڕۆڵام نەمەنەن، بە تایبەت ئەگەر کوڕێچ با. بە نەزەرەو من خاستەر ئانەن تۆ ژەنێوە باری هەم بیاوۆ زاڕۆڵەکاتەرە و هەمیچ سەروو سامانێوە بۆ یانە و مەنزڵیت و وێچت تەنیاینە بەی بەر..
بە ئەژنەویەی ئا قسێ دڵم پەڕ بی و دەسم کەرد گرەوای، هەرسیم پێسەو قرمەو وارانی مجیایرە. ئاخر نەتاوێنا حیچ کەسی بە یاگێ ئەدٚایم قەبووڵ کەروو. ئەدٚا گەورێم و چەنی بابەیم بێ ئانەیە هەرسەکاو من بوینا بە قساشا حەر درێژە دێنێ، ئاخروە بابەم واتش: وەڵڵا من نمەزانوو. دمایی بە بۆنەو ئانەیوە من نەزانوو چەمێوەش قرتنا پەی ئەدٚا گەورێم و هۆرێستوە لوا بەر تا ئێمە تەنیای بیمێ...
بابەم پاسەش زانا من نەزانانم، بەڵام من گردوو ئا ئیشارەت و ڕەفتاراشانە حەوایوە گێرێناوە و حیچ چێوێو لاو منوە نەشاریێوە. بابەم لوا بەروە چەنی ئەدٚا گەورێم مەنایمێوە پەنەش واتم: من حەز نمەکەروو بابەم ژەنی بارۆ. ئەدٚا گەورێم بە نەرم و نیانی واتش: پاییزە گیان، کناچە شیرینەکێم. تۆ ئیسە خەریکوو واناینی، دڵنیاێنا ساڵێوتەر سەدٚی جە سەدٚ قەبووڵە بی و ملێ پەی زانشگای. ئەگەر تۆ بلی کێ هاگاش براڵەکات بۆ؟ واتم ئیسە تا ساڵێوتەر وەخت فرەن فکرێو کەرووە. ئەدٚا گەورێم واتش: ئەسڵەن زاڕوڵێ حیچ، بابەت چێش جوانەن و دڵش موازۆ ڕەفێقێوەش بۆ. هیزیکەیچ مامۆت واچێ دێر مەی و زوو ملۆ پەی دووکانیچ. وێچت خاس مزانی دووکانەنە زیارە ڕاوە نمەیوە یانە، کام لا ملۆ؟ نمەزانمێ. تەرسی ئانەیمانە هەنە ئاوڕووما بلۆ. ژەنی بارۆ خاستەرەن تا گنۆ داموو ڕەفێقی خرابی و ماڵ و ئەمواڵش چەنە کێشارە. پی قسانە نەختێو ئەهوەنیم پەنە یاوا و هەقم دا بە بابەیم و بە بێ‌دەنگیم ڕەزایەتوو وێم سەلەمنا پەنەشا.
ڕوی دماینش ئەدٚا گەورێم کەوتە دلێ فامیل و ئاشنای پەرسان پەرسان پەی ژەنێو عالێ پەی بابەیم...
درێژەش هەن.........
✍#شەریفی_بێساران
دەگاو جــــــــۆڵانــــــــدێ
@joolandeh
📝بەشوو چوارۆمی
بە دەموو گرەوایوە و دڵی پەڕموە هەرسی پێسەو قرمەو وارانی ملوو کۆپامەرە مجیێنێرە واری. حەر وێڵکۆنەو بابەیم نەبێنێ و واتم بابە گیان!!! من وێم مزانوو ئننە وەشت نمەی بەڵام قەسەمت مدٚەوو، تۆ ئەرواحوو ئەدٚایم بازەم با بلوو شۆنی دەرسەکەیمەرە، قەوڵ مدٚەوو هۆشم موحەمەدی و ڕەزایچوە بۆ. بابەم سەرەش نامنارە و لوا دلێ ویرا و دمای سەرەنجێو چەمە پەڕ هەرسە سوور بیاکاو منش دا و واتش: باشەن بلۆ وانگە و دەرسەکەیت بوانە بەڵام هاگات بۆ خەتایوە کەری سەرەت بڕیەنم و نیانم سەروو دڵیتوە. نمەزانوو ئا ساتە بابەم بە چێشی یاوا دلێ چەمامەنە هەکە ڕازی بی. فرە وەشحاڵە بیانی پا قسێشە و واتم: سەروو چەمام بابەگیان، پەڕ بە دڵ حەز کەرێنا بلوو وێم وزوو باوەشیش و تێر و پەڕوو وێم ماچێش کەروو. بەڵام فرەش پۆوە نەشی زەوق و وەشی منش نەوینا و بێ‌دەنگێو لوا هودٚەکەو وێش و بەرەکەش بینا...
وانگە کریاوە و لوانی سەروو دەرسەکەیم. بە لوایما پەی وانگای دەرسەکانوو وێم و موحەممەدی، ئەرکم چن وەراوەروە بی. بە جۆرێو قۆرس بێ پەیم نەتاوێنا بە ڕێک‌وپیکی هەرمانەکام بەروو ڕاوە. هەر چی هەوڵیچ دێنا دیسان حەر کەم ئارێنا یاگێوەنە هەرمانەکێم ناتەمام مەنێوە.
وەختێو بابەم دیش هێز و تەوانم نەمەنەن و عال نمەیاوو بە هەرمانەکامەرە، زەنگش دا پەی خاتوونێوە هەکە وەڵتەر بە بیەو ئەدٚایم هەرمانێش پەی کەردێبێنمێ واتش: بەشکوم حەفتەکێنە دوێ کەڕەتێ بەی پاک و پۆختەیە یانەی کەری پەیما. نامێش خاتوو فاتمە بێ، چەنێ ئێمە فرە مێهرەبانە بێ و بە دڵ موحێبەتما پەنە کەرێ. هەمیشە واچێ ڕۆڵە گیان حەر وەخت حەر هەرمانێوتا بیە واچدێم پەنە، تەنانەت ئەگەر یانەو وێچما بوو نەگندێ دلێ ڕوودەرباسی، زەنگم پەی بدٚەیدێ دڵنیای بیدێ عازا وێم میاونوو. خودٚایش هەر وەخت ئامایا بە گیان و دڵ دڵسۆزانە هەرمانێ کەرێ، تا هەم دیسان ئامایاوە هەرمانێم نەمانێنێ. یەک ساڵ بە نەبیەو ئەدٚایم بە سەختتەرین شێوە ڕوێما دەی سەر. وردە وردە باسوو ژەن ئاوردەو بابەیم گەرم بی. حەر کەس چەمش گنێ بە بابەیم واچێ ڕۆحوو خێزانێت بە بەهەشت شاد بۆ، بەڵام ویروو وێچت و ئا زاڕۆڵایچتەنە بە، مشۆم کەسیە بۆ پاک و پۆختەیشا کەرۆ و بیاوشا پۆرە. وێچت جوانەنی نمەکریۆ تەنیا بنیشیەرە. زانێنا دڵوو بابەیمەنە چێشەن و وەروو ئێمە تەرێق بۆوە و نمەیارۆ حیچ واچۆ.
ماوایە ویەرد تا ڕوێوشا ئەدٚا گەورێم کە لوایبێ پەی ئاڵمانی ئاماوە. لوایبێ پەی لاو مەتیێم زاڕۆڵەش بیەبێ تا کومەکش کەرۆ و نگنۆ دلێ عەزیەتی.
وەختێو ئەدٚا گەورێم ئاماوە گردیما پێوەرە لوایمێ پەی یانەیشا. چاگەنە بابەم بە ئەدٚا گەورێم واتش: ئەدٚا.....!!!
مەگەر چێش بۆ ماوایە بەی پەی یانەو ئێمەیچ و هاگات زاڕۆڵا بۆ. ئەدٚا گەورێچم سەرێوەش هۆربڕنا و وردەو بابەیموە بیە و واتش: وەڵڵا ڕۆڵە من ئێتر پیرە بیێنا و هێز و تاقەتوو ویاری کەردەو زاڕۆڵام نەمەنەن، بە تایبەت ئەگەر کوڕێچ با. بە نەزەرەو من خاستەر ئانەن تۆ ژەنێوە باری هەم بیاوۆ زاڕۆڵەکاتەرە و هەمیچ سەروو سامانێوە بۆ یانە و مەنزڵیت و وێچت تەنیاینە بەی بەر..
بە ئەژنەویەی ئا قسێ دڵم پەڕ بی و دەسم کەرد گرەوای، هەرسیم پێسەو قرمەو وارانی مجیایرە. ئاخر نەتاوێنا حیچ کەسی بە یاگێ ئەدٚایم قەبووڵ کەروو. ئەدٚا گەورێم و چەنی بابەیم بێ ئانەیە هەرسەکاو من بوینا بە قساشا حەر درێژە دێنێ، ئاخروە بابەم واتش: وەڵڵا من نمەزانوو. دمایی بە بۆنەو ئانەیوە من نەزانوو چەمێوەش قرتنا پەی ئەدٚا گەورێم و هۆرێستوە لوا بەر تا ئێمە تەنیای بیمێ...
بابەم پاسەش زانا من نەزانانم، بەڵام من گردوو ئا ئیشارەت و ڕەفتاراشانە حەوایوە گێرێناوە و حیچ چێوێو لاو منوە نەشاریێوە. بابەم لوا بەروە چەنی ئەدٚا گەورێم مەنایمێوە پەنەش واتم: من حەز نمەکەروو بابەم ژەنی بارۆ. ئەدٚا گەورێم بە نەرم و نیانی واتش: پاییزە گیان، کناچە شیرینەکێم. تۆ ئیسە خەریکوو واناینی، دڵنیاێنا ساڵێوتەر سەدٚی جە سەدٚ قەبووڵە بی و ملێ پەی زانشگای. ئەگەر تۆ بلی کێ هاگاش براڵەکات بۆ؟ واتم ئیسە تا ساڵێوتەر وەخت فرەن فکرێو کەرووە. ئەدٚا گەورێم واتش: ئەسڵەن زاڕوڵێ حیچ، بابەت چێش جوانەن و دڵش موازۆ ڕەفێقێوەش بۆ. هیزیکەیچ مامۆت واچێ دێر مەی و زوو ملۆ پەی دووکانیچ. وێچت خاس مزانی دووکانەنە زیارە ڕاوە نمەیوە یانە، کام لا ملۆ؟ نمەزانمێ. تەرسی ئانەیمانە هەنە ئاوڕووما بلۆ. ژەنی بارۆ خاستەرەن تا گنۆ داموو ڕەفێقی خرابی و ماڵ و ئەمواڵش چەنە کێشارە. پی قسانە نەختێو ئەهوەنیم پەنە یاوا و هەقم دا بە بابەیم و بە بێ‌دەنگیم ڕەزایەتوو وێم سەلەمنا پەنەشا.
ڕوی دماینش ئەدٚا گەورێم کەوتە دلێ فامیل و ئاشنای پەرسان پەرسان پەی ژەنێو عالێ پەی بابەیم...
درێژەش هەن.........
✍#شەریفی_بێساران
دەگاو جــــــــۆڵانــــــــدێ
@joolandeh