ISLAM WITH EMAN

🌹 پڑوسی کی شکایت🌹

ایک شخص رسول اللہ صلی اللہ علیہ وآلہ وسلم کی خدمت میں حاضر ہوا اور اپنے پڑوسی کی شکایت کرتے ہوئے کہنے لگا کہ میرا پڑوسی مجھے اتنا پریشان کرتا ہے کہ میرا جینا دو بھر ہو گیا ہے۔

رسول اکرم صلی اللہ علیہ وآلہ وسلّم نے ارشاد فرمایا صبر کر اور اپنے پڑوسی کے خلاف شور و غل مت اٹھا بلکہ اپنی روش میں کچھ تبدیلی پیدا کر لے۔

کچھ دنوں بعد وہ شخص رسول اکرم (ص) کے پاس دوبارہ حاضر ہوا اور اپنے پڑوسی کی شکایت کی اس بار بھی رسول مقبول نے ارشاد فرمایا: صبر کر۔

کچھ دنوں بعد وہ شخص تیسری بار خدمت رسول میں حاضر ہوا اور کہنے لگا "یا رسول اللہ میرا یہ پڑوسی اپنی بری حرکتوں سے باز نہیں آتا اور پہلے کی طرح مجھے اور میرے گھر والوں کو بری طرح سے پریشان کئے ہوئے ہے۔“

اس بار رسول اکرم (ص) نے اس سے کہا ”جمعہ کا دن آ گیا ہے تو جا اور اپنے گھر کا سارا سامان باہر نکال کر سر راہ ایسی جگہ رکھ دے جہاں لوگ آتے جاتے اسے دیکھ سکیں۔ تیرے سامان کو راستے میں پڑا ہوا دیکھ کر لوگ تجھ سے دریافت کریں گے کہ آخر تو نے اپنا سارا سامان گھر سے باہر نکال کر کیوں رکھ دیا ہے؟
جب لوگ اس طرح کا سوال کریں تو ان سے کہنا کہ میں اپنے پڑوسی کی بداخلاقی کی وجہ سے بے حد پریشان ہوں، اس طرح تو اپنی شکایت عوام کے کانوں تک پہنچا دے۔"

شکایت کرنے والے نے رسول اللہ صلی اللہ علیہ وآلہ وسلم کی ہدایت پر عمل کرتے ہوئے بالکل ویسا ہی کام انجام دیا۔

موذی ہمسایہ یہ خیال کرتا تھا کہ پیغمبر اسلام ہمیشہ لوگوں کو صبر اور بردباری کا حکم دیتے ہیں، اسے یہ نہیں معلوم تھا کہ جب دفع ظلم اور حقوق کے دفاع کا سوال پیدا ہوتا ہے تو اسلام کی نظر میں متجاوز کا کوئی احترام باقی نہیں رہ جاتا۔

لہذا جیسے ہی اسے اس بات کی اطلاع ملی کہ اس کے پڑوسی نے اس کی زیادتیوں سے تنگ آکر معاملے کو عوام کی عدالت میں پیش کر دیا ہے تو وہ بری طرح گھبرا گیا اور اس آدمی سے التماس کرنے لگا کہ اپنا سامان راستے سے اٹھا کر گھر واپس لے چل صرف یہی نہیں بلکہ اس نے اس بات کا عہد کیا کہ وہ آئندہ اپنے پڑوسی کو کبھی پریشان نہ کرے گا اور اس قسم کی شکایت کا موقع پھر نہ آنے دے گا۔

📚 سچی کہانیاں مؤلف شہید مرتضی مطہری جلد1 صفحہ:101۔

🌹 پوسٹ پسند آئے تو دوسروں کی معلومات کے لیے شیئر ضرور کریں۔

https://t.me/islamwitheman
⭕ ISLAM WITH EMAN ⭕