ISLAM WITH EMAN

🔷 سردی کا پیاسا 🔷

میں مردانہ کمرے میں مریضوں کو دیکھ رہا تھا۔ یک بیک ایسا معلوم ہوا کہ زنانہ کمرے کی تمام عورتیں چلا رہی ہیں۔میں نے لڑکے کو بھیجا کہ جاؤ دیکھو کیا بات ہے؟ ہو سکتا ہے کوئی بلی یا آوارہ کتا اندر گھس گیا ہو۔ لڑکے نے آ کر بتلایا کہ ایک بچے کی حالت اتنی زیادہ خراب ہے کہ اسے دیکھ کر تمام عورتیں چلا رہی ہیں۔ میں تیزی سے زنانہ کمرے میں گیا۔

میں نے جو منظر دیکھا اس کے تصور سے آج بھی رونگٹے کھڑے ہو جاتے ہیں۔ نئی عمر کا ایک جوڑا کھڑا تھا۔ دیکھنے سے صاف پتہ چلتا تھا کہ وہ کسی خوشحال گھرانے کے ہیں۔ لڑکی اپنی گود میں ایک بچہ لیے ہوئے تھی۔ جس کا چہرہ اوپر اور پیٹھ نیچے تھی اور بچہ اپنے دونوں ہاتھ اور پیر اس طرح چلا رہا تھا کہ جیسے پانی میں تیرتے وقت چلاتے ہیں اور ایسا معلوم ہوتا تھا کہ دونوں آنکھیں نکل کر اب باہر نکل پڑیں گی۔

میں نے کہا مختصر طور پر اس بچے کا حال بتاؤ کہ بچہ کب سے بیمار ہے؟ لڑکے کی ماں کہنے لگی کہ پرسوں شام کو بچہ رونے لگا ، چپ کروانے کی بہت کوشش کی گئی لیکن بچہ چپ نہیں ہوتا تھا تو مقامی ڈاکٹر کا علاج ہوا ، دوا دیتے رہے لیکن بچہ رات بھر چلاتا رہا۔ ایک سیکنڈ کے لیے بھی سویا نہیں۔ صبح ہم اسپتال میں لے گئے، وہاں بھی کل دن بھر اور آج رات بھر ڈاکٹر کوشش کرتے رہے لیکن کامیابی نہیں ہوئی، جب لڑکے کی حالت زیادہ خراب ہوئی تو اس نے رونا بند کر دیا اور اس طرح ہاتھ پیر مارنے لگا۔ میں نے پوچھا پرسوں جس دن لڑکے نے رونا شروع کیا تھا کیا اس کو دست بھی آئے تھے؟ اس نے جواب دیا ہاں تین چار پتلے دست ہوئے تھے پھر ٹھیک ہو گئے۔

میرے ذہن میں ایک بات آئی اور اللّٰہ کا نام لے کر بچے کو ماں کی گود سے اپنے ہاتھوں میں لے لیا اور لے کر جلدی سے کمرے کے اندر چلا گیا۔ ( آج بھی سوچتا ہوں تو کانپ جاتا ہوں کہ کیسا غلط اقدام میں نے کیا تھا، اگر بچہ اس دوران میں اللہ کو پیارا ہو جاتا تو بچے کی ماں کو میں کیا جواب دیتا؟ مگر عزت اور ذلت کے مالک نے مجھے رسوائی سے بچا لیا۔ ) کمرے کے اندر آ کر میں نے اپنے معاون سے کہا کہ جلدی سے ایک گلاس پانی لے کر آؤ! وہ شیشے کا بڑا گلاس پانی بھر کر لے آیا۔ میں نے گلاس بچے کے منہ کو لگا دیا۔ بچے نے گلاس فوراً دونوں ہاتھوں سے پکڑ لیا اور گلاس کو تیزی سے منہ سے دباتا رہا اور پانی تیزی سے پیتا رہا، ایسا لگتا تھا کہ بچہ گلاس توڑ دے گا، بچے نے جلدی سے پانی کا پورا گلاس ختم کردیا ۔اب بچہ بالکل ٹھیک تھا ، ہاتھ پیر کا ہلنا بند ہو گیا تھا، آنکھیں اپنی جگہ ٹھیک ہو گئیں تھیں۔ اب اِدھر اُدھر دیکھ رہا تھا کہ جیسے وہ اپنے ماں باپ تلاش کررہا ہو۔ جب تک میرا معاون دوسرا گلاس پانی لے کر آگیا۔ میں نے پھر گلاس منہ سے لگا دیا، چند گھونٹ پانی پینے کے بعد بچے نے گلاس منہ سے ہٹا دیا۔

میں نے بچہ لے جا کر اس کی ماں کو دے دیا ، وہ لوگ بڑی حیرت میں تھے۔ ماں نے بچے کو سینے سے لگا لیا۔ بچہ کچھ دیر دودھ پیتا رہا پھر سو گیا۔ میں نے کہا بچے کو سونے دو، اٹھے تو مجھے بتا دینا! کچھ دیر سونے کے بعد بچہ جاگ گیا ، وہ مسلسل دو رات ایک دن نہیں سویا تھا۔ میں نے بچے کو جا کر دیکھا تو بچہ بالکل ٹھیک تھا۔ میں نے اس کی ماں سے پوچھا کہ بچہ کیسا ہے؟ اس نے کہا بالکل ٹھیک ہے۔ میں نے کہا لے جاؤ اسے دوا کی ضرورت نہیں۔ بچہ تمہاری قسمت کا تھا اللّٰہ تعالٰی نے بچا دیا۔ لیکن وہ دونوں گم صُم کھڑے تھے۔ بچے کے باپ نے کہا کہ آپ کی کیا خدمت کی جائے؟ میں نے کہا کہ جتنی خوشی تم لوگوں کو ہو رہی ہے مجھ کو بھی اتنی ہی خوشی ہو رہی ہے۔ وہ لوگ ہنسی خوشی مجھے دعائیں دیتے چلے گئے۔

احباب ! سوال یہ ہے کہ دراصل ہوا کیا تھا؟
وہ بچہ کافی تندرست اور ہوشیار تھا لیکن بولنے کی عمر کو نہیں پہنچا تھا۔ شدید جاڑوں کے دن تھے اس لیے ممکن ہے کہ ان لوگوں کا دھیان بچے کو پانی پلانے کی طرف نہ گیا ہو۔ پیاس کے آخری اسٹیج پر میں نے بچے کی جو حالت دیکھی اس کا میں تصور نہیں کر سکتا کہ پانی کے بغیر ایسی حالت بھی ہو سکتی ہے۔ کتنی قیمتی نعمت ہے یہ پانی جو اللّٰہ تعالٰی ہمیں مفت دے رہا ہے۔ مگر ہمیں اس کا کوئی احساس نہیں۔ اس نعمت کی قدر کیجیے، اسے ضائع ہونے سے بچائیے اور سردیوں میں پیاس نہ ہونے کے باوجود بھی مناسب مقدار میں پانی پینا اپنے معمولات میں شامل رکھیے۔

اللہ تعالیٰ ہم سب کو ایمان اور صحت کی بہترین حالتوں اور کیفیتوں سے سرشار رکھے آمین

حکیم فاروق سومرو

https://t.me/islamwitheman
⭕ ISLAM WITH EMAN ⭕