ISLAM WITH EMAN

بسم اللہ الرحمٰن الرحیم

*منہ پہ ماری جائے گی*
از قلم: محمد زکی حیدری

سندھ میں ایک ڈاکو قسم کا آدمی تھا، خیر محمد عرف خیرو ! چونکہ وہ ڈاکو اور مجرم قسم بندہ تھا اور گاؤں میں اس کی دہشت تھی لہٰذا گاؤں والے اسے "خیرو خطرناک" کے نام سے یاد کرتے تھے. ایک بار خیرو کو تبلیغی جماعت والے ملے اور اجازت چاہی کہ انہیں گاؤں میں تبلیغ کی اجازت دی جائے، خیرو نے کہا یہ تبلیغ کیا چیز ہے؟ ایک مولوی نے کہا دیکھو خیر محمد بھائی یہ آپ کے گاؤں میں جو ھندو رہتے ہیں کیا آپ چاہو گے کہ یہ کل جہنم کی آگ میں جلیں؟ خیرو بولا نہیں یہ تو غریب ہیں بیچارے. تو مولوی نے کہا ہم ان کو کلمہ پڑھائیں گے یہ آگ سے بچ جائیں گے. خیرو نے کہا ٹھیک ہے جاؤ بچاؤ انہیں آگ سے. خود خیرو نے بھی اس دن سے ٹھان لی کہ جو بھی ہندو دیکھے گا اسے کہے گا کلمہ پڑھو، اگر کسی نے ضد کی تو وہ زبردستی اسے کلمہ پڑھوائے گا، کیونکہ ہندو کو کیا پتہ کہ اگر کملہ نہ پڑھا تو وہ آگ میں جلے گا. بالقصہ ایک دن اسے ایک ھندو پنڈت راستے میں مل گیا، خیرو نے اسے آواز دی اور بلا کر کہا کہ کلمہ پڑھو. پنڈت لرزنے لگا بولا سائیں خیر محمد ھندو مسلمان بھائی بھائی ہیں، بھلا دین دھرم کے جھگڑے میں کیا رکھا ہے اور آپ کے والد تو میرے دوست تھے، آپ میرے ساتھ ایسا کروگے. خیرو نے اسے کلہاڑی دکھا کر کہا کہ کلمہ پڑھو نہیں تو مار ڈالوں گا. مرتا کیا نہ کرتا پنڈت نے کہا میں تو ھندو ہوں مجھے کلمہ نہیں آتا تم ہی مجھے سکھا دو.
یہ سن کر خیرو کے پیروں تلے زمین نکل گئی کیونکہ خیرو کو خود کلمہ نہیں آتا تھا لہٰذا اس نے پنڈت سے کہا "جاؤ ابا کے دوست ہو اس لیئے تمہیں معاف کیا."

آج کل ہمارے یہاں ولایت کے بعض نام نہاد علمبرداروں کا بھی کچھ خیرو خطرناک والا ہی حال ہے. ان میں سے کسی سے بھی کہہ دو کہ برادر نماز پڑھا کریں تو آگے سے کہتا ہے ولایت نہیں تو نماز منہ پہ ماری جائے گی، کہہ دو کہ بھائی عید پہ ماتم مناسب نہیں تو کہتے ہیں ولایت نہیں تو عید منہ پہ ماری جائے گی، بھیا جمعہ نماز پڑھو... ولایت نہیں تو جمعہ منہ پہ مارا جائے گا...

میں آپ کو وثوق سے کہتا ہوں، آپ ان میں کسی کو بھی پکڑ کر پوچھ لیں کہ ولایت کی مکمل تعریف کردیں تو ان کی اکثریت کو ولایت کی تعریف نہیں آتی ہوگی. اور دوسری بات یہ کہ یہ سمجھتے ہیں کہ یہ خود جو کام کرتے ہیں وہ ہی ولایتی کام ہیں باقی جو شیعہ نماز پڑھ رہے ہیں، روزے رکھ رہے ہیں ان کی نظر میں یہ سب ولایت علی (ع) سے دور ہیں اور یہ سب کچھ ان کے منہ پہ مارا جائے گا. اسی لیئے ان کی زبان پہ یہ ہی ورد رہتا ہے کہ ولایت کے بغیر ہر عبادت منہ پہ ماری جائے گی. گویا ولایت علی (ع) پر صرف ان ہی کا عقیدہ ہے باقی سب عقیدۂ ولایت سے محروم ہیں. ویسے یہ عوام کو بلیک میل کرنے کا ایک حربہ ہے. یہ صاحبان یہ تو مانتے ہیں کہ ولایت و محبت اہلبیت (ع) کے بغیر کوئی عبادت کسی کام کی نہیں، یہ تو ہر شیعہ کا عقیدہ ہے مگر تصویر کے دوسرے رخ کو ماننے سے یہ لوگ انکار کرتے ہیں وہ یہ کہ اگر اطاعت و تقوی نہ ہو تو ولایت کسی کام کی نہیں.

*ہم شیعان حیدر کرار کا عقیدہ صاف و اظہر من الشمس ہے کہ اگر عبادت ولایت علی (ع) کے بغیر ہو تو منہ پہ ماری جائے گی لیکن اگر ولایت بھی بغیر اطاعت کے ہو تو وہ بھی منہ پہ ماری جائے گی، کیونکہ بقول امام جعفر (ع) دین ایک پرندہ ہے جس کا ایک پر عقیدہ ہے، دوسرا اطاعت! ایک پر پہ کوئی پرندہ پرواز نہیں کرتا. یہ ہمارے دوست سمجھتے ہیں کہ ولایت علی (ع) ہو پھر جو من میں آئے کرو، ایک پر ہی کافی ہے. جب کہ یہ ان کی خام خیالی ہے، یہ نہیں جانتے کہ جیسے بغیر ولایت کے عبادت منہ پہ ماری جائے گی عین اسی طرح ان کی بغیر اطاعت والی ولایت بھی ان کے منہ پہ ماری جا سکتی ہے.*

https://t.me/islamwitheman
⭕ ISLAM WITH EMAN ⭕