ISLAM WITH EMAN

🌏 أربعين اور عراقی قوم 🌏

کئی سال پہلے پی ٹی وی کے شو نیلام گھر میں طارق عزیز نے ایک سوال پوچھا کہ وہ کونسی قوم ہے جسکے چند دن کے اخراجات پاکستانی بجٹ سے زیادہ ہیں۔
کچھ نے مختلف جواب دیئے مگر ایک شخص نے کہا شیعہ۔
طارق عزیز نے تفصیل سے بتایا کہ شیعہ قوم کے ماہ محرم کے اخراجات پاکستانی بجٹ سے زیادہ ہیں۔

اس کیبعد جیو نیوز کے کامران خان نے اپنے پروگرام میں ایک مختصر ڈوکومینٹری پیش کی جسکا عنوان تھا
"ملک بند رہا مگر معیشت کا پہیہ تیزی سے چلتا رہا"
اس پروگرام میں محرم کے دس دنوں کا بجٹ پیش کیا گیا جسمیں ہرخرچہ بتایا گیا۔
جب کل اخراجات سامنے رکھے گئے تو وہ سینکڑوں ارب روپے بنا، گوکہ اسمیں جو قیمت لگائی گئی وہ کم سے کم کے طور پر لگائی گئی۔
اس کیبعد دوسرے نیوز چینلز نے بھی اپنے مطابق اس پر اپنے پروگرام کئے۔

2010ء میں عاشورہ عراق میں کرنیکا اتفاق ہوا، عراقی اخراجات دیکھے پاکستان پھر بھی میری نظر میں سرفہرست رہا، یہ اور بات ہے کہ عراق کو دوسری پوزیشن مل گئی۔
2015ء میں اربعین پھر سے عراق میں کرنیکا اتفاق ہوا اور نجف اشرف سے مولا علیؑ کے روضہ کی زیارت کیبعد کربلا کی جانب پیدل سفر شروع کیا جوکہ 90 سے 100 کلومیٹر ہے۔
جیسے ہی سفر شروع ہوا تو بالکل نئی دنیا نظر آئی۔
تمام سفر میں کوئی جگہ ایسی نظر نہیں آئی جہاں کوئی موکب نہ لگا ہو اور ہر شخص اپنے موکب کے سامنے کھڑا عزاداروں کو پکار رہا ہے کہ مہربانی فرما کر ہمارے موکب میں آ کر کھانا کھا لیجئے۔
کچھ تو ہمیں دیکھکر ہمارے ساتھ ساتھ چلنے لگے اور عربی میں کچھ التجا کرنے لگے۔
کچھ تو واسطہ اور ہاتھ جوڑنے لگ جاتے۔
ہمارا سفر تین دن کا تھا مگر خیمے اس سے بہت پہلے کے لگ چکے تھے۔
آپکو اس سفر میں کبھی ایسی نوبت پیش نہیں آئیگی کہ آپکو کچھ خریدنا پڑے۔
آپکو کھانا، پانی، جوس، فروٹ، چائے سب کچھ ملے گا اور آپ پیسہ دینے کے بجائے گویا ان پر احسان کر رہے ہیں کہ آپ نے انکو اس قابل سمجھا کہ آپ انکے موکب میں تشریف لائے۔
کھانے سے پہلے اور بعد میں آپکے ہاتھ دھلوانے کی ذمہ داری ان کی۔
ایک شخص برتن میں پانی لیکر اور دوسرا صابن اور تولیہ لیکر خادم کیطرح کھڑے ہونگے۔
آپکو کچھ کچھ فاصلے پر مفت انٹرنیٹ مل جائیگا تاکہ آپ اپنے دوست احباب سے رابطہ کر سکیں۔
موبائل چارجنگ کی سہولت۔
موچی اور نائی کی دکانیں آپ کیلئے کھلی ہونگی۔
آپکا جوتا چل چل کر ٹوٹ جائے تو آپ صحیح کروا سکتے ہیں۔
اگر آپ تھک گئے ہیں تو آپکی ٹانگوں کا مساج بھی ہوسکتا ہے۔
اگر سونا چاہتے ہیں تو موکب میں آپ کیلئے بالکل نئے گدے، تکیہ اور کمبل موجود ہیں۔
عراق کے کچھ قبائل کا رواج ہے کہ جب وہ اپنی بیٹی کو شادی پر جہیز دیتے ہیں تو اس جہیز کے سامان کو استعمال نہیں کیا جاتا بلکہ وہ سامان اربعین کے دنوں میں موکب میں رکھدیا جاتا ہے تاکہ آنے والے زائرین انھیں استعمال کریں اور جب اربعین ختم ہوجاتا ہے تو اس کیبعد وہ سامان اپنے گھر میں استعمال کیاجاتا ہے۔
اس واک کے دوران آپکو کچھ پریشانی نہیں ہوتی بلکہ آپکو ایسا محسوس ہوتا ہے کہ آپ کسی امیر ریاست کے شہزادے ہیں اور آپکے ہزاروں خدام آپکی خدمت کیلئے ہمہ وقت تیار رہتے ہیں۔
یہ سب دیکھ کر میرے ذہن میں جو خیال تھا کہ پاکستانی قوم اخراجات میں اول نمبر ہے، وہ ایک ریت کی عمارت کی طرح دھڑام سے گر گئی۔
کیونکہ ہماری قوم تو عراقی قوم کے مقابلے میں کچھ برابر بھی نہیں ہے۔
آپ سے آپکی شناخت نہیں پوچھی جائیگی۔
آپ سے نہیں پوچھا جائے گا کہ تم مسلمان ہو بھی یا نہیں۔
مسلمان ہو تو شیعہ بھی ہو یا نہیں۔
آپ پہنچ گئے، آپ انکے مہمان ہیں۔
کربلا پہنچ کر اگر آپکے پاس ہوٹل کا کمرہ نہیں ہے تب بھی مسئلہ نہیں ہے۔
ایک طویل قطار میں عراقی کھڑے نظر آتے ہیں جو فوراً زائر کے پاس آ کر پوچھتے ہیں کیا تمھارے پاس رہائش کا بندوبست ہے اگر نہیں تو میرا گھر حاضر ہے، مجھے مہمان نوازی کا شرف بخشو اگر آپ نے قبول کرلیا اور گھر پہنچ گئے تو گھر کے افراد فخریہ گلی محلہ میں چلتے ہیں کہ آج ہمارے گھر امام حسینؑ کے زائر مہمان ہیں اور انکے دوست احباب اسکی قسمت پر رشک کرتے ہیں اور پھر اسکے گھر میں جاکر زائر سے ملاقات کرتے ہیں اور کل کیدن کی دعوت دیتے ہیں کہ میرے مہمان بنو۔
یہ ہے عراقی قوم کا ایک روشن پہلو۔
اس سال اربعین واک کیلئے پاکستان سے ایک اہلسنت قافلہ کچھ دن پہلے عراق پہنچا ہے۔
سوشل میڈیا پر انکی نجف سے کربلا تک پیدل واک کی کافی تصاویر آچکی ہیں، جسمیں کہیں وہ چل رہے ہیں تو کہیں شیعہ کے ساتھ کندھا ملا کر نماز ادا کر رہے ہیں۔
ایسی ہی ایک تصویر میری نظر سے گزری۔ پاکستانی اہلسنت اپنے روایتی لباس میں کھڑے ہیں اور عراقی شیعہ نیچے بیٹھے انکے جوتے پکڑ کر پالش کر رہے ہیں۔
میں نے آج تک کسی میزبان کی، مہمان کی ایسی میزبانی نہیں دیکھی۔
بیشک عراقی قوم اہلبیتؑ کی محبت میں انکے زائرین سے بھی عشق کرتے ہیں۔
اللہ عراق کو ہمیشہ شاد و آباد رکھے اور یہ شیعہ سنی اتحاد قائم و دائم رکھے آمین۔

Copied

1.12K views17:05