🙂24-æм апрелы Цæгат Ирыстоны паддзахадон университеты ирон филологийы факультеты дæр байгом Наукон конференцитæ, докладтæ æмæ студентты раныхас.

Цæгат Ирыстоны паддзахадон университеты ирон филологийы факультеты дæр байгом наукæйы бон. Бæрæгбон райдыдта Гæздæнты Гайтойы роман «Вечер у Клэр»-ы ирон æвзагмæ тæлмацыл ныхасæй («Изæр Клэрмæ»). Чиныг мыхуыры рацыд Дзгойты Валерий æмæ Пухаты Оледжы – æхсæнад «Гæздæнты Гайтойы хæлæрттæ»-йы уæнгты хъæппæрис æмæ фæлхасæй Мæскуыйы, фыссæджы 120 азы юбилеймæ. Уымæй размæ, 2021 азы, фыссæджы 50 азы мысæн бонмæ, ирон æвзагыл рацыд йæ зындгонддæр роман «Призрак Александра Вольфа» («Алыксандр Вольфы æндæрг»). Дыууæ романы дæр ирон æвзагмæ ратæлмац кодта ирон филологийы факультеты, ирон литературæйы кафедрæйы доцент Безаты Фаризæ, уымæ гæсгæ йын лæвæрд уыд фыццаг ныхасы бар.

👍Тæлмацгæнæг раарфæ кодта, чингуытæ рухс кæй фæрцы федтой, уыдонæн, дарддæр бæрæгбоны архайджытæн радзырдта Гайтойы цардæй цымыдисаг цаутæ, базонгæ сæ кодта фыссæджы сфæлдыстады хæдхуызадимæ, тæлмацыл куыстмæ домæнтимæ, тæлмацы сусæгдзинæдтимæ.

📌Цымыдисаг, æхсызгон æмæ пайдайаг уыд студентты-чиныгкæсджыты æххуысæй иллюстрацигонд æрмæг – оригинал æмæ тæлмацы текстты абарст.