Menimcha, o‘yin juda hujumkor ruhda o‘tadi, chunki biz ikki to‘p farqi bilan ortdamiz. Ularning qarshi hujumlari ko‘plab o‘yinlarda hal qiluvchi bo‘lgan, shuning uchun juda ehtiyot bo‘lishimiz kerak. Asosiy fikrimiz — gol urish, keyin o‘yinning qanday kechishini ko‘ramiz. Lekin ikki gol ortda ekanimizni unutmaymiz, vazifa — imkon qadar tezroq hisobni qisqartirish.

Yil boshidan beri murabbiy Chivu menga juda ko‘p maslahatlar berdi. Kolarov ham shunday. Ikkalasi bilan birga ishlash men uchun katta omad.

Bizda urinib ko‘rish mas’uliyati bor, chunki biz — “Inter”miz. O‘z maydonimizda “Inter”ga xos o‘yin ko‘rsatishimiz kerak, buni oldingi yillarda ko‘p bor isbotlaganmiz. Italiya bilan Jahon chempionati masalasi ham xuddi shunday: ikki marta qatnasha olmadik, endi borish majburiyatimiz bor.

Pio Esposito? U juda kamtar va tinimsiz harakat qiladi. Uni jamoada borligi — biz uchun katta omad.

“Bodø/Glimt” A Seriyada o’ynaganda qayerda bo‘lardi? Qiziq savol. Aniq bilmayman, lekin ular juda yaxshi tashkil etilgan jamoa. “Manchester City” va “Atletiko” kabi jamoalarni osonlikcha yutib bo’lmaydi.

Norvegiyada oson bo‘lmasligini bilardik: maydon va ob-havo moslashishni talab qildi. Afsuski, buni to‘liq uddalay olmadik yoki faqat ayrim pallalarda uddaladik. “Bodø/Glimt” Madridda g‘alaba qozongan, “Manchester City”ni yenggan, Dortmundda durang o‘ynagan. Ayrim lahzalarda yetarli darajada bo‘la olmadik, umid qilamanki bu qayta takrorlanmaydi.

Lautaro kabi yetakchi yo’qligi bilinadimi? Bizda ko‘plab yetakchilar bor. Hammada mas’uliyat hissi bor va hozirgacha buni yaxshi ko‘rsatishdi. Hammaning ishtiroki va ishonchi bor. Men jamoamizning yetakchiligi, ishtiyoqi, ochligi va kamtarligini qadrlayman. Shu poydevor asosida davom etishni istaymiz.

Bu yigitlarda ishonch bor, so‘nggi 3 oyda buni ko‘rsatishdi. Yutuqlar ham bo‘ldi, pasayishlar ham, ayrim o‘yinlarni yutqazdik, lekin bu ishonch va mehnat madaniyatini yo‘qotmadi. Muhimi — har zarbaga zarba bilan javob berish va doim maksimal darajada harakat qilish.

Qaytish (comeback) majburiyatmi? Yo‘q, bu bizning burchimiz. Ishonch bilan maydonga tushishimiz kerak. Agar kimdir bu vaziyatni o‘zgartira olsa, u “Inter”. Ammo bu oson bo‘lmaydi: muvozanat va ishonchni yo‘qotmaslik zarur. O‘yin 100 daqiqa, ba’zan 120 va penaltilargacha cho‘ziladi. Boshlanishidan tayyor bo‘lishimiz, darhol gol urishga shoshilib muvozanatni yo‘qotmasligimiz kerak. Lahzalarni to‘g‘ri boshqarish muhim.

“AC Milan”dan +10 ochko yondashuvni o‘zgartiradimi? Yo‘q. Biz birinchi o‘yinda yutqazganimizni bilamiz. Chempionatning bunga aloqasi yo‘q. Bosqichdan o‘tishni istasak, faqat eng yaxshi “Inter” bo‘lishimiz shart.

“Bodø”ga yutqazish uyat? Siz buni aytib kulayapsizmi? Futbolda uyat degan narsa yo‘q, raqibni hurmat qilish kerak. Siz bunday deyish bilan bizni hurmatsiz qilyapsiz. Biz esa “Bodø”ni hurmat qilamiz — ular buni yirik jamoalarga qarshi isbotlashgan. Biz uyalmaymiz, aksincha birinchi o‘yindan keyin ham ularni tabriklaganmiz. Ular sog‘lom loyiha namoyish etishmoqda.

“Meazza” effekti “Bodø”ni qo‘rqitadimi? Biz uchun eng muhimi — futbolchilarimiz yana haqiqiy maysada futbol o’ynashadi.

Murabbiy bunday o‘yinlarda motivatsiya bera oladimi? Men futbolchi bo‘lganimda murabbiyni ko‘p tinglamasdim, o‘z ishonchimga tayanardim va jamoadoshlarimni ranjitmaslikni o‘ylardim. Balki murabbiyni ko‘proq tinglaganimda, yanada katta martaba qilardim, lekin men shunday edim.

Italiyada bizning stadion maysasi haqida juda ko‘p gapirishyapti. Lekin bu mening qo‘limda emas. Muhimi — faqat ta’sir qila oladigan narsalarga e’tibor qaratish. “Manchester City” bu mavzuni umuman ko‘tarmadi, faqat bizni maqtadi. Endi navbat bizga, va aynan biz bu turdagi maydonga o‘rganmagan jamoamiz. Sovuq yoki boshqa tashqi omillar haqida haddan tashqari o‘ylaydiganlar, meningcha, aqlli ish qilmayapti. Agar yaxshi o‘yin ko‘rsatmoqchi bo‘lsang, bunday narsalar haqida bosh qotirmasliging kerak.