كلشي بتعوزوه موجود بالمثبتة 👆🏻

🔴بالنسبة للي عم يسألني أنو الدكتورة فاطمة شو الها أسئلة هية كاتبتن شخصيا
🔵 عد على إيدك
🔹6 أسئلة فقط بالنظري بدورة ال2025 ونسخ لصق ال6 نفسن بالحملة 🌚
هدول موجودين بااااخر صفحة بالبنك ومكتوب عليهم مكرر
🔹 أسئلة العملي دورة 2024
🔹 أسئلة العملي دورة 2025 (تبعتكم يعني)
بتلاقو الاثنتين بالمثبتة

🔴 دكتور أنا درست ملحقين النظري للدكتورة فاطمة ارجع على ملحق العملي؟
🔵 خليني فهمك شغلة: ملاحق العملي اذا بتجيبن وبتنفشن نفسن بيطلع معك ملحقي النظري واذا بتجيب ملحقي النظري بتختصرن وبتلخصن بيطلع معك ملحق العملي
فاذا انت دارس وفهمان وممكن النظري خلص وضعك تمام
🔵 إذا ما حابب تشغل مخك زيادة بالامتحان افتح اقرأ أول 7 سلايدات من ملحق العملي (بالمثبتة) هدول عن الترصد وعلى شكل تعدادات مختصرة راجع منهم بياخدو منك هلق 5 دقايق كرمال تحفظ الصيغة تبع ملف العملي
وهيك بتكون عملت كلشي عليك فيك تعملو بهالقسم 🩵

إن شاء الله بجاه آذان المغرب 😇

الكل يجيب بكرة أكثر مما توقع 🤲🏻
ويجبر بخاطركم جميعا 🩵
وتطلعوا بأحلى النتائج🔥

🕘الساعة الآن التاسعة مساءا

يعني لا يزال هناك 14 ساعة للامتحان...
بحر...🌊

موعدنا بعد نصف ساعة لنبدأ سوية الملاحظات الامتحانية المرتبة من فريق البوابة 🔥🔥

سهرتنا الليلة هون إن شاء الله 😌

#تذكير رقم 1
#لا_تنسى_الآلة_الحاسبة

ما شاء الله قطعنا ال300 محاااااااااادثة
لك ما عاد لحقت 🤣💔
برد على وحدة بيكون واصلني بدالها 7

الفكرة انو رح حاول من هون لبكرة الساعة 11 ضل عم رد بلا توقف بس الفكرة أنو ما بعرف إذا بلحق رد عالكل 😅

وأكيد حأتأخر لاقدر رد عليك إذا باعتلي صعب رد فورا لهيك تحملوني شوي على التأخير 🩵

صدقا معطل عن دوامي وقاعد متفرغ بس إلكم هالفترة كلها كنت فأكيد ما رح أتوانى عن تقديم أي مساعدة لأي حدا بأي استفسار
بس الفكرة أنو الضغط أكبر من أنه يقدر الواحد يلحق عليه لو عم يرد بسرعة ☺️

لهيك يلي بيقدر يبعت سؤاله عالشات بيكون أفضل وأحسن وأسرع
منه قاعد عم رد عالشات ومنه إذا في حدا بيعرف يجاوب الشباب ما عم يقصرو الله يعطيهم العافية 🩵

ومتشكر جدا لثقتكم وحبكم الكبير 🩵🩵

#ملاحظات_امتحانية 1
#نكشة

💠 تقسم البيانات حسب طبيعتها إلى:
🔹 اسمية
🔹 رتبية
🔹 كمية منقطعة (عشوائية منقطعة)
🔹 كمية مستمرة (عشوائية مستمرة)

أول نوعين تسمى وصفية / نوعية / كيفية
ثاني نوعين تسمى كمية / عددية / متغيرات عشوائية (يعني رقمية)

💠 تقسم البيانات حسب الاستمرار إلى:
🔵 بيانات مستمرة:
تضم البيانات الكمية المستمرة فقط

🔵 بيانات منقطعة: (بدون كلمة عشوائية)
تضم كلا من البيانات الكمية المنقطعة + الرتبية + الاسمية

☘ إذا إجاني سؤال عن شي متغير اسمي مثلا اختصاص الطالب شو بجاوب؟

🔴 كيف بدي أعرف عن شو عم انسأل يعني حسب شو؟
🌐 من الخيارات
☘ في حال شفت شي وحدة من هالكلمات ضمن الخيارات (اسمي رتبي وصفي كمي ) فحتمااااااااا السؤال عن الطبيعة
⭕️ هون لازم يكون الجواب (اسمي) واذا ما لقيته بتختار (وصفي) وإذا ما لقيته بتختار (كل ما سبق خاطئ) ❌ ممنوع تقرب عكلمة منقطع/منفصل لانو ما عم يسأل عن الاستمرار

☘ في حال ما شفت شي من هدنك الكلمات وكانو الخيارات مثلا:
A. منقطع
B. مستمر
C. متصل
D. غير ذلك
هون وضوحا السؤال عن الاستمرار وممنوع ❌ تختار غير ذلك وإنما بتختار منقطع هنا ✅

#ملاحظات_امتحانية 2
#نكشة

🔵الوسيط🔵
من أهم ميزاته التي تفضل استخدامه عن المتوسط أنه أقل تأثرا بالقيم الشاذة(المتطرفة):

السبب المباشر (والحرفي) لذلك أن الوسيط لا يأخذ بعين الاعتبار جميع القيم المدروسة
وهيك بدو ياها الدكتور بالحرف لهيك اختار d

كرمال الخيارات:
A. خاطئة
هي الجملة صح للمتوسط

B. صحيحة علميا
لما تكون البيانات زوجية بيكون الوسيط هو متوسط القيمتين اللي بالوسط وعلى فكرة هاد بيساهم بكون الوسيط لا يتأثر بالقيم الشاذة بس الدكتور ما بدو👀
C. جملة خاطئة

#ملاحظات_امتحانية 3
#نكشة

فكرة خارجية أنسألت عنها كتيير مو مطلوبة بمنهاجنا
🔵 الوسيط الاحتمالي 🔵
بيكون عندي جدول فيه قيم وتحتهم احتمالاتهم فكيف بحسب الوسيط؟
هو فعليا ليس القيمة التي تقع في الوسط
ولا حتى القيمة يلي الاحتمالات قبلها تساوي الاحتمالات التي بعدها لانو مو شرط يتساوو على طرفي الوسيط أساسا

الوسيط هو القيمة التي تفصل بين 50% من البيانات قبله و50% من البيانات بعده

طيب كيف بدي احسبه؟
بتمسك أول احتمال لحاله إذا كان أكبر او يساوي 0.5 بيكون صاحب هذا الاحتمال هو الوسيط
إذا أقل بجمعله تاني احتمال وبشوف المجموع صار 0.5 ولا لسا إذا لاء بجمع معن الاحتمال يلي بعده وهكذا لحتى يصير المجموع 0.5 أو اكثر
بس يصير المجموع أعلى من 0.5 فاخر احتمال ضفناه هو احتمال القيمة الوسيطية وصاحب هذا الاحتمال هو الوسيط

وإذا مانك مركز وما استوعبت
فانسى الموضوع كله لانو قلتلك بالأصل هو خارجي وما موجود بمنهاجنا لا هالسنة ولا بالسنين الماضية اطمن 🩵🩵

سؤال إجا مرتين بقسم الدكتور مازن
وبالمرتين رفض الاعتراض عليه

ينتقل عن طريق جهاز التنفس:
الجواب: شلل الأطفال حسب السلم

طبعا شلل الأطفال انتقاله هضمي
المالطية (البروسيلا) انتقاله بالتماس وهضمي
التهاب الكبد A انتقاله برازي فموي
الكوليرا (الهيضة) انتقاله برازي فموي
التهاب الكبد B انتقاله غير مباشر (جنسي / نقل دم / حقن)

يعني كلن سبيل هضمي عدا التهاب الكبد B انتقال جنسي وبسوائل الجسم

يعني ولاااااا واحد منن تنفسي
بس هيك الدكتور بده ✌🏻
إذا احا منحلو شلل الأطفال متل ما بده 💔

شو رأيكم هيك شي بوست نحكي فيه عن التقرييييييييب بشكل كامل ؟؟؟ 🔥🔥🔥

🔴 موضوع التقريب 🔴

بداية نعرف التقريب بأنو الانتقال من الدقة الاعلى  إلى الدقة الادنى وله مراتب
حيث يوجد لدينا في منهاجنا ثلاثة انواع من التقريب

وتذكر أنه اسمه تقريييييييييب
يعني انت عم تنتقل من شي حقيقي لشي تااااني بس بيشبهو يعني قريب عليه وليس نفسه (يعني مو تضل مصر انو في فرق وغلط هو في فرق بس مش غلط تقرب )

مبدأ التقريب:
عندما نريد ان نقرب الى خانة ما ننظر الى الخانة الاصغر منها (التي قبلها)
فإذا كانت الخانة التي قبلها احد الارقام التالية
(5 6 7 8 9)
نضيف واحد الى الخانة التي نريد التقريب اليها
مثلا   0.346 >> 0.35    لأن الستة احد الارقام التي نضيف فيها

واذا كانت الخانة التي قبلها اقل من الخمسة اي انها احد الارقام: 0 / 1 / 2 / 3 / 4
لا نضيف شيء (انتبهو ما منطرح)
مثال 0.344  >> 0.34

✨انواع التقريب✨

☘التقريب الى اقرب عدد طبيعي (يعني نساوي بلا فاصلة)
ونستخدم هذا التقريب فقط في حال عم نحسب عدد تابع لمتغير منقطع مثلا حساب حجم العينة المراد دراستها
حيث حجم العينة يجب ان لا يمتلك فاصلة فنقوم بالتقريب (مافي منها بمنهاجنا حاليا)
امثلة
256.7 >> 257
134.1 >> 134

هنا ننظر الى اول رقم بعد الفاصلة

☘ التقريب الى اول رقمين بعد الفاصلة ويسمى التقريب المئوي (الاكثر استخداما)

عند حساب اغلب المؤشرات فانه قد يكون الناتج يملك عدد كبير من الارقام بعد الفاصلة لذلك نقوم بالتقريب للناتج الى ثاني رقم بعد الفاصلة
وهنا للتقريب سنضطر الى معاينة الرقم الثالث بعد الفاصلة للحكم بالزيادة او البقاء كما هو

أمثلة
V(x)= 45.67095 >>> 45.67
p=0.5693  >> 0.57
p=0.0003  >> 0.00
Fo= 354.5035 >>  354.50

انتبهت لهاد الشكل؟ 0.00 هاد نفسه هاد 0 نفسه الصفر يا عيوني

☘ التقريب الى اول رقمين بعد الفاصلة غير معدومين (نادر)
هذا التقريب نستخدمه خاصة عندما نتعامل مع ارقام متناهية في الصغر لاسيما في بعض الاحتمالات
هون منعمل حالنا مو شايفين كلشي صفار بعد الفاصلة كما يلي
0.000794  > 0.00079 / 0.0008
0.0569      > 0.057

طيب بالامتحان كيف بدي اعرف شو قرب
حسب التقريب المستخدم في الخيارات بتشتغل
ببين معك مثلا كل الخيارات فيهم رقمين بعد الفاصلة

او الخيارات فيهم اربع ارقام بعد الفاصلة

او الخيارات محطوطين كاملين بدون تقريب

فانت بالسؤال فيك تحكم

شغلة اضافية ممكن نحتاجها
بفرض اننا في مسألة توزيع طبيعي حيث قيم الفاي المعطاة تكون مقربة لاول رقمين بعد الفاصلة ونحت سنقوم بالحساب بناء على هذا التقريب
لكن قد يكون هناك فارق بين جوابنا وبين الخيارات وهنا يجب ان نختار الجواب الذي يساوي جوابنا او يمكننا التسامح ب± واحد بالمية (1% أي 0.01) والا نختار غير ذلك
(هي الاشكالية بتظهر اكتر شي لما يكون الطلب ما احتمال ان يكون x بين قيمتين او اكبر من قيمة معينة)


عطييييينيييي أمثلة افهم وتريحني

🔴في حال طلع الجواب لسؤال ما
0.847

بهي الحالة تالت رقم هو 7 ولازم قربه لفوق ويصير 0.85 علميا
وعند د.حسين منقربه بالقطش وبيصير 0.84
بهي الحالة انت بالخيارات رح تلاقي 0.84 بس تلاقيها بتختارها وبتمشي
إذا ما لقيتها وقتها بتدور عال 0.85 بتختارها وبتمشي
❌ إذا ما لقيت لا هي ولا هي وقتهااااااااااا صار مسموح تفكر بخيار اسمه "كل ما سبق خاطئ"
تذكر انه منتسامح ب1%

🔴 الحالة الثانية
في حال عم احسب جواب وطلع معي مثلا 0.93 بالضبط
هون لازم تلاقيه متل ما هو بالخيارات إذا لقيته بتختاره
إذا ما لقيته بتطلع يمين ويسار 👀 هل يوجد 0.92 أو 0.94 إذا لقيت واحد منن ف70% هو الصح ولازم اختاره قبل ما فكر ب "كل ما سبق خاطئ" مو تروح تتشاطر وتعند وفورا تختارها 🥲
طيب إذا لقيت 0.95 لااا هاد صار بعيد 2% صار غلط اكيد

🔴 الحالة الثالثة
في حال كان الرقم يسعى إلى الواحد
يعني مثلا 0.995 وهالموديلات يعني كل ما يترواح بين 0.99 والـ 1
هون يا عزيزي بيكون ال0.99 صح والواحد صح واللي بشوفه منهم بالخيارات بختاره وما بفكر ب"غير ذلك" الى لاخر خطوة

وبالمقابل إذا بدي فكر بالمتمم للناتج فكمان رح كون امام خيارين
0.01 خيار اول صحيح و0.00 يلي هو الصفر كمان صحيح (أو أصح حتى) 🌚

يعني عمليا مشان اصدمك
ال1 عكسها 0.00
وال 0.99 عكسها برضه 0.00
اي نعم والواحد بالمية ضلو ملزقين عالسكينة 🔪 😂

🔴 الحالة الأخيرة
في حال طلع معي الرقم 0.268
هون شو بتتوقع تلاقي خيار؟
يا أما 0.26 ومنختاره
يا أما 0.27 ومنختاره
طيب بركي اجو سوا؟☠
إقرأ الفاتحة على أول علامة يباشا 💔

هون يا صديقي مع الأسف 92% التقريب للقطش صح يعني بتصير 0.26 مع الاسف
و8% تقريب نظامي يعني بتصير 0.27 (ومرة وحدة فقط الدكتور قرب تقريب نظامي بكللللل دوراته) والباقي كلللللللن بالقطش

وطبعا الدكتور ما رح يعترف عشي اسمه تقريب بالقطش او انه عم يعمل هيك اساسا وولا رح يقبل هيك اعتراض 🙃🩵

بقا اتأقلم أنت🩵

#ملاحظات_امتحانية 4
#نكشة
هااااااااااااام 🔥🔥🔥🔥🔥🔥

🔵مسألة التوزيعات المستمرة🔵

لها أربعة أشكال
💠 1. توزيع معياري Z وعاطيك فايات
Φ (z) = كذا
بيعطيك كذا فاي لتستخدمه بالطلبات

💠 2. توزيع طبيعي N وبيعطيك معه متوسطه وانحرافه/ تباينه وكمان مع كمشة فايات لتستخمدهم بالطلبات وهون بيكون عندك خطوة زيادة أنك تقوم بمعايرة كل طلب

هون عندك 3 أنواع من الطلبات:
🔹 ما احتمال ان يكونx أقل من كذا بتاخد فاي القيمة
🔹 ما احتمال أن يكون x أكبر من كذا
بتاخد متمم فاي القيمة يعني
(1-Φ)
🔹 ما احتمال أن يكون x بين قيمتين
هون بتطلع الفايات تبع القيمتين وبتطرحن

⭕️ في قيمة فاي وحدة لازم تكون حافظها وهية
Φ(0)=0.5

وبرجع بذكر اذا مسألة طبيعي ما تنسى تعاير كل طلب قبل ما توصل لمرحلة الفايات



💠 3. الحالة الثالثة
يجيني توزيع طبيعي معياري بس بدون فايات معه

💠4. الحالة الرابعة
يجيني توزيع طبيعي عادي مع توقعه وتباينه بس بدون فايات برضه

أو بالحالتين ممكن يكون في فايات بس الطلبات محتاجة فايات مانها موجودة بالمعطيات هون لازم تشك أنو المسألة تتكلم عم القيم الكبيرة والمساحات الكاملة✌️🏻
وغالبا الخيارات هون كلها رح تكون كما يلي
A. 0.00
B. 0.05
C. 0.99 \ 1
D. غير ذلك

هون لازم نتذكر شي اسمه قاعدة الفايات الكبيرة
اي رقم معياري (او طبيعي بس عايرته) وطلع معي +3.5 فما فوق هاد الفاي تبعه بتكون 0.999999 يعني بيمشي حالها عال1 وبيمشي حالها عال0.99 عند الدكتور
بالمقابل أي رقم سالب كبير يعني من -3.5 ونااااازل تكون الفاي تبعه 0.000000 يعني 0.00

وبعدها شوف طلباتك يا كبير اذا بده اكبر او اصغر مشان تعرف تاخد الفاي نفسها ولا متممتها

ورح اعطيك امثلة تساعدك

☘ توزيع معياري
ما احتمال ان تكون Z اقل من 20
هون فورا بقلو فاي ال20 يعني 1 او 0.99 شو ما شفت منن بحطها واذا ما لقيت لا هي ولا هي وقتا بختار غير ذلك

طيب بركي بالطلب الاشارة اكبر (اكبر من 20) باخد وقتها متممة الفاي فبتصير صفر يعني 0.00

وبالعكس ما احتمال أن تكون Z أقل من -20 هون باخد فاي ال-20 يلي تساوي صفر يعني 0.00
وإذا كان بالطلب إشارة أكبر باخد متمم الصفر يلي هو 1 او 0.99 ما بيناتنا

تمام؟

بالطبيعي كيف بكتشف اني عم اتعامل مع ارقام كبيرة ؟
بتكون واضحة
افترض المتوسط 100 والانحراف 5
اذا سألتك عن ال500 اي هي بعيدة شي 80 انحراف يعني بدك تاخد فاي ال80
أو اذا سألتك عن الصفر فالصفر بعيد عن ال100 شي 20 انحراف بس لورا يعني بدك تاخد فاي الناقص عشرين وهكذا ✌🏻


⭕️والنكشة الاخير في حال ما عندي فايات وكان الطلب (بين قيمتين) هون غالبا بدو يكون من فقرة المجالات الشهيرة هون يا بتكون دارس الفقرة منيح يا بدك ترسم الرسمة بالامتحان وتحدد المجالات ٦٨.٢٦ و٩٥.٤٤ و٩٩.٧٤ وتشوف الطلب بين وين وين وتعرف تطرح متل الصورة صفحة 11 بالمحاضرة الثانية لحسين ✌️🏻

الكل يقرأ اخر رسالتين 👆🏻👆🏻
مافيهم مزح
عم نحكي عن اربع علامات نحن 🙃🙃
رح يحلولك نص مشاكلك يلي طلعو معك بهاليومين 🔥🔥

رح ارجع عيييد الفكرة للمرة الثالثة 👀🌚

منسامح ب1 بالمية
يعني إذا طلع الجواب 0.96 عادي نحط 0.97 والعكس صحيح

إذا طلع معك 0.34 عادي تحط 0.35 او 0.33 والعكس صحيح

لا كتير تعنّد بالامتحان ترى علامتك بتهمني 👀
بس تطلع من الامتحان وقتها اعمل البدك ياه وقلي صح علميا وغلط علميا هو اساسا اسمه تقرييييييييييييييب يا حبيبي ودمتم بخير

يلي بيقرب على "غير ذلك" فورا بدي احظره من القناة الفصل الجاي 🤣🤣


ااااااااخر شغلة مسموح تفكر فيها بكل أسئلة د. حسين هية خيار "غير ذلك" ما بقرب عليه غير لعيد الحل مرة تانية واتاكد انو لا الخيار موجود وولا في شي بيقربه موجود

#ملاحظات_امتحانية 5
#نكشة

إذا اجانا تحليل التباين أحادي الاتجاه ANOVA

صرنا منعرف الجدول كيف نعبي ارقامه

السطر الاول هو (بين العينات B)
السطر الثاني هو ( ضمن/داخل العينات E)
السطر الثالث هو (الكلي (يعني مجموعهم) T)

هيك ترتيبهم وغالبا ٩٩% بيضل ترتيبهم هيك احفظهم (يعني صعب يتبدل مكان السطرين الاول والثاني)

على كلٍ
السطر الاول (يلي هو بين العينات)
دوما هو صاحب درجة الحرية الاقل (يلي هية k-1) يعني عدد العينات المدروسة مطروح منها واحد

لو اجاني طلب بالعكس عطاني درجة الحرية مثلا 7 وقلي كم عدد العينات المدروسة بشتغل بالعكس بضيف للرقم 1 وبقلو تفضل هي 8

بس الفكرة انو السؤال ما رح يكون كم عدد العينات
وانما حسب الشيء المدروس ممكن كون عم قارن بين متوسطات شركات فبيقلي كم عدد الشركات
او كم عدد الجامعات
او كم عدد المجموعات
أيا يكون لحالك لازم تعرف انو عم يسأل عن هالموضوع
وهون بسرعة بتاخد اصغر رقم بالجدول يلي حيكون باول سطر عاليسار وتضفلوا واحد ويعطيك العافية 🩵

قاعد بآمان الله عم رد قد ما بقدر على محادثات خاصة وجاوب الطلاب ومنهمك بالأسئلة

وإذا بيفاجئني سؤال 🤣

ربع فضاوة بالو للطالب/ة يلي عم يسأل
ربع هدوئه وثباته الانفعالي 🤣🔥

وانا بكون مستعد نفسيا لشي مسألة ضخمة او عطل عالالة الحاسبة او شي سؤال دورة مريخي خارجي محذوف مدري من وين جايبه الطالب

واذ بنصدم بسؤال عن علامتي🤣🩵

خلص رح شجعك وشجع الكل معك تكرم/ي

بفضل الله سكرت المادة عملي ونظري وقت كنت تالتة
عقبالكم بكرة تبيضوها بأحلى العلامات يلي بترفع الراس 🩵🙏🏻🤲🏻
قولو آمين 🤲🏻

🩵🩵🩵🥹🔥

كل الشكر 🩵
الله يوفقكم جميعا بكرة ويجبر بخاطركم 🩵

بكرة الصبح بكيير في ڤويس امتحاني ضروري وهام
اعملوا حسابكم من هلق انو تشيلولي شي عشر دقايق بالكتير🩵

صباح الخير 🩵
#تذكير

رسالة التعديلات 👇🏻👇🏻
https://t.me/interestingstatistic/864

في حال كان في حدا مو شايفها مبارح
عدلوهم

+ في تصويب واحد سقط سهوا عالسرعة بس واضح✌️🏻
سؤال عوز اليود رقم 92 صفحة 72 جوابه هو d كل ما سبق خاطئ (وليس صحيح)

#تذكير
#لا_تنسى_الآلة_الحاسبة