የመከላከያ ዋር ኮሌጅ ከፍተኛ መኮንኖች በኢመደአ የሥራ ጉብኝት አደረጉ

በኢፌዲሪ መከላከያ ሚኒስቴር ሥር የሚገኘው የመከላከያ ዋር ኮሌጅ ከፍተኛ መኮንኖችና አመራሮች በኢንፎርሜሽን መረብ ደህንነት አስተዳደር (ኢመደአ) ዋና መሥሪያ ቤት ትምህርታዊ የሥራ ጉብኝት አደረጉ።

ጉብኝቱ በዋናነት ከፍተኛ መኮንኖቹ በኮሌጅ ቆይታቸው በክፍል ውስጥ የተማሩትን የደህንነትና የጦርነት ንደፈ-ሃሳብ (Theory) በትግባር ላይ ካለው የቴክኖሎጂ አቅም ጋር ለማስተሳሰር ያለመ ነው። በተለይም በዘመናዊው ዓለም የጦርነት አውድ ውስጥ አንዱና ዋነኛው እየሆነ የመጣውን የሳይበር የጦር አውድ (Cyber Warfare) በትክክል ለመገንዘብና የሀገሪቱን የሳይበር መከላከያ ዝግጁነት ለመመልከት ጉብኝቱ የጎላ ፋይዳ እንዳለው ተገልጿል።

በጉብኝቱ ወቅት የኢንፎርሜሽን መረብ ደህንነት አስተዳደር ም/ዋና ዳይሬክተር አቶ ዳንኤል ጉታ ለኮሌጁ አባላት የእንኳን ደህና መጣችሁ አቀባበል ያደረጉ ሲሆን፤ ኢመደአ የሀገሪቱን ቁልፍ የመረጃ መሠረተ-ልማቶች ከሳይበር ጥቃት ለመከላከል እያከናወናቸው ያሉ ስራዎችንና የቴክኖሎጂ ባለቤትነትን ለማረጋገጥ እየተደረገ ያለውን ጥረት አስረድተዋል።

ከፍተኛ መኮንኖቹ በጉኝታቸው ወቅት በሰጡት አስተያየት፤ የወደፊቱ ጦርነት ከምድር፣ ከባህርና ከአየር ባለፈ በሳይበር ምህዳር ላይ የሚወሰን በመሆኑ፣ እንዲህ አይነት የልምድ ልውውጦች ለሀገራዊ ደህንነት ግንባታ ያላቸው ሚና ከፍተኛ መሆኑን ገልጸዋል።