Містычная матэматыка, ці магічны лік 6174
#цікава #факт #матэматыка

На маю думку, адной з абавязковых рыс паспяховых людзей, не толькі праграмістаў, з’яўляецца #дапытлівасць. Няспыннае жаданне дакапацца да праўды і вывудзіць нават самую маленькую кропельку інфармацыі з любой даступнай крыніцы.

На прошлым тыдні, чытаючы ліст рассылкі аднаго з ангельскамоўных інжынераў, натрапіў на цікавую спасылку пра лік 6174. На Вікіпедыі перакладу на беларускую мову няма, таму я вырашыў падзяліцца з вамі гэтым цікавым фактам тут.

Лік 6174 – натуральны лік, на першы погляд нічым не адметны, пакуль не пачаць яго вывучаць. Лік вядомы пад назвай пастаяннай Капрэкара, па імені вынаходцы – індыйскага матэматыка D. R. Kaprekar.

Лік 6174 вядомы цікавымі асаблівасцямі, калі выканаць наступныя крокі:

⓵ Вазьміце чатырохзначны лік, выкарыстоўваючы як мінімум дзве розныя лічбы (пачатковыя нулі дазваляюцца)
⓶ Расстаўце лічбы ў парадку змяншэння, а потым у парадку ўзрастання, каб атрымаць два чатырохзначныя лікі
⓷ Адніміце меншы лік ад большага
⓸ Вярніцеся на пункт 2 і паўтарыце

У выніку вы заўсёдны дацягнеце ліку 6174 не болей чым за 7 паўтораў. Гэты працэс вядомы, як аперацыя Капрэкара (у гонар таго ж матэматыка). Напрыклад для 1410 (год Грунвальдскай бітвы) працэс будзе выглядаць так:

4110 - 0114 = 3996
9963 - 3699 = 6264
6642 - 2466 = 4176
7641 - 1467 = 6174
7641 - 1467 = 6174

Для трохзначных лікаў аналаг пастаяннай Капрэкара – лік 495. Для любога трохзначнага ліку без паўтораў лічбаў патрабуецца не болей шасці ітэрацый. Для лікаў больш за 4 лічбы пераўтварэнне Капрэкара ў большасці выпадкаў рана ці позна прыводзіць да цыклічных паўтораў лікаў.

Існуе толькі два шасцізначныя лікі, якія з'яўляюцца нерухомымі кропкамі пераўтварэння Капрэкара (549945 і 631764). Для двух-, пяці- і сямізначных лікаў нерухомых кропак пераўтварэння Капрэкара не існуе.

Калі вам хтосці скажа, што магіі не існуе, смела адпраўляйце гэтага чалавека да матэматыкі. А я вас адпраўляю паставіць 👍 і падзяліцца з сябрам!

Мэтанакіраваны тыдзень, або focused week

Час ад часу я збіраю цікавыя падыходы, якія людзі прыдумваюць, каб неяк справіцца са стосам сваіх спраў. Звычайна гэта называецца #прадукцыйнасць, але па выніках усё зводзіцца да спроб зрабіць жыццё лепшым і лягчэйшым. На жаль, срэбнай кулі не існуе.

Калі ведаеш што і як рабіць, то пачаць даволі лёгка і ўсё цудоўна атрымліваецца. Вы і самі ведаеце. Каб такога дасягнуць, патрэбна ўмець планаваць загадзя. Аднак, куды важней ведаць і трываць у галаве галоўную мэту і ўмець на ёй сканцэнтравацца падчас працы.

Падыход з мэтанакіраваным тыднем на самой справе шмат хто апісвае ў кніжках, толькі называюць яго па рознаму, ці ўвогуле выкарыстоўваюць яго як частку нейкай іншай ідэі. Я ж хачу прывесці два прыклады, з якімі я сам асабіста пазнаёміўся.

Канцэнтрацыя

Адзін з варыянтаў апісваецца ў кніжцы “12-тыднёвы год” (The 12 Week Year), дзе аўтар настойвае на максімальнай канцэнтрацыі вакол задач і прапануе скарачэнне звычайнага перыяду планавання з аднаго году да 12 тыдняў. Самая ідэя 12-тыднёвага тыдня вельмі цікавая і я пра яе больш падрабязна планую распавесці ў наступным выпуску рассылкі ў панядзелак, таму мае сэнс падпісацца.

Дык вось, аўтар прапануе пры такім падыходзе вызначаць на тыдзень адну важную справу, ці нават мэту, вакол якой павінны будавацца план. Эфектыўнасць кожнага дня ён прапануе ацэньваць па таму, наколькі вы прыблізіліся да сваёй мэты.

Такая канцэнтрацыя дапамагае адсекчы розны шум і сканцэнтравацца толькі на выніковай дзейнасці. Калі лічыць, што кожны тыдзень будзе такі (малаверагодна), то праз 3 месяцы вы выканаеце 12 вялікіх задач, якія вы спачатку планавалі на цэлы год.

Я часам карыстаюся такім падыходам, збіраючы на пэўны тыдзень нейкую групу аднатыпных задач у межах праекту і максімальна шчыльна над імі працую, каб атрымаць адчувальны вынік. Але падтрымліваць такі тэмп пастаянна даволі складана з-за розных жыццёвых акалічнасцяў.

Цыклічнасць

Другі прыклад выкарыстання тыдня, як перыяду дзейнасці, я ўбачыў у аднаго даволі папулярнага інды-хакера, які адзін зрабіў некалькі паспяховых праектаў. У яго выпадку складанасць была ў тым, што яму аднаму патрэбна было як рабіць праект, так і неяк расказваць пра яго аўдыторыі і ён вырашыў чаргаваць такія перыяды актыўнасці.

Адзін тыдзень ён працуе над праектам наўпрост, то бок піша код і робіць іншыя тэхнічныя задачы, дадае новыя магчымасці да сваіх праграм і публікуе іх. А на наступным тыдні ён збірае ўсё тое, што зрабіў і расказвае пра гэта карыстальнікам. У канцы перыяду піша выпуск рассылкі, дзе дзеліцца гэтымі дасягненнямі і публікуе план на наступны тыдзень.

Такім чынам, адзін тыдзень яго для распрацоўкі, адзін для маркетынгу сваіх прадуктаў. Ён нават стварыў адмысловы сайт для такіх жа незалежных стваральнікаў, які паказвае, які зараз тыдзень – праграмавання ці маркетынгу.

Гэта толькі два прыклады, але на самой справе спосабаў планаваць свой час, энергію і ўвагу даволі шмат. Кожны падбірае для сябе той спосаб, які яму лепш пасуе. Я буду вельмі рады, калі прыведзеныя мной прыклады камусці дапамогуць хутчэй разабрацца з заваламі і вызвалены ад працы час правесці са сваімі блізкімі. ♥️

Як зроблены і працуе сайт з правіламі беларускай мовы (ч.1)
#інжынерства

Раней я ўжо расказваў пра Jamstack, генератары сайтаў і безгаловыя CMS, цяпер жа надышоў час нарэшце распавесці пра тое, як быў зроблены і працуе сайт з правіламі беларускай мовы – pravilna.by.

Спачатку трошкі гісторыі

Або чаму я ўвогуле вырашыў стварыць яго? Аднойчы я шукаў нейкае правіла адносна беларускай мовы і трапляў на спасылкі з тэкстам закона, дзе ўсё было апісана. Дзесці гэта былі вялізныя дакументы ў фармаце pdf ці doc, дзесці проста web-старонкі, але шукаць нешта ў вялікім дакуменце не вельмі зручна. І неяк мне на вочы трапіўся падобны сайт, але з правіламі рускай мовы і я вырашыў, а чаму б не зрабіць такі ж, але для нашай, роднай мовы?

Свае сайты я ўжо ў той час рабіў з дапамогай генератараў, таму што гэта было амаль бясплатна, а для некамерцыйнага праекту вельмі важна эканоміць рэсурсы. Я набыў толькі дамен, за які даводзіцца плаціць і цяпер. У якасці генератара я абраў Hugo, бо актыўна цікавіўся ў той час мовай праграмавання Go і было цікава скарыстацца інструментам, напісаным на той жа мове праграмавання.

Што сабой уяўляе сам сайт

Два вялікія раздзелы – арфаграфія і пунктуацыя, 11 падраздзелаў і 66 параграфаў з непасрэдна правіламі. Кожны параграф мае тлумачэнне і прыклады слоў ці моўных канструкцый. Самі параграфы дадаткова падзяляюцца на асобныя пункты, на якія можна асобна спаслацца. Па сутнасці гэта тэкст закону “Аб правілах беларускай арфаграфіі і пунктуацыі”, разбіты на часткі. Так, правілы беларускай мовы – гэта закон! 🙂

Тэхнічна гэта 66 асобных файлаў у фармаце Markdown, якія дадаткова пазначаны спецыяльным кодам Front Matter у якім пазначаны раздзел і падраздзел.

+++
title = "Агульныя правілы правапісу вялікай і малой літар"
chapter = "Правапic вялiкай i малай лiтар"
section = "Арфаграфія"
+++

У некаторых выпадках, каб палепшыць выгляд галоўнай старонкі, некаторыя параграфы спалучаны разам, дзе гэта мае сэнс. Напрыклад старонка “Перадача акання і якання на пісьме” апісвае параграфы §4 і §6, якія называюцца "Передача акання на пісьме" і "Перадача якання на пісьме" адпаведна, але кожны параграф усё яшчэ мае асобную старонку, на якую можна спаслацца асобна.

Усе гэта зроблена з дапамогай генератара Hugo і простага шаблону (ці тэмы) збіраецца ў сайт, які потым загружаецца на GitHub Pages і там захоўваецца. Змены ў кодзе ці тэкстах правіл аўтаматычна збіраюцца з дапамогай GitHub Actions і трапляюць на сайт. Увесь код даступны публічна, таму каму цікава пакорпацца, запрашаю на GitHub.

Як бачыце, сайт даволі просты, калі казаць толькі пра афармленне, старонкі і самі правілы, але вось з пошукам давялося добра так пасядзець і прыдумаць простае, зручнае і бясплатнае рашэнне, пра якое я распавяду ў другой частцы.

Як і заўсёды, буду ўдзячны за ❤️‍🔥 пад допісам і распаўсюд. І падтрымку 😇.

Веламатарам не нараджаюцца, ім становяцца
#нефармат #веласіпед

Суботнія веласіпедныя вітанкі! 🚴

Пад прошлым анонсам было 16 рэакцый у падтрымку новага фармату, таму сёння спецыяльны нефарматны допіс, у межах якога я хачу распавесці вам пра сваё захапленне веласіпедам.

Адкуль пайшло

Калі я быў малы, то кожнае лета на канікулы я ездзіў да бабулі ў вёску. Вёска знаходзіцца даволі далёка ад горада, дзе я жыў з бацькамі, таму паездка туды была падобна на экспедыцыю на востраў, бо мабільнай сувязі тады яшчэ не было, а звычайны тэлефон быў толькі ў суседкі праз тры дамы.

І вось у такім рэжыме палескіх рабінзонаў я бавіў там час з дзядзькам, які навучыў мяне арыентавацца ў лесе і балоце, лавіць рыбу і ўмець шукаць сляды жывёл. Лясныя абшары там даволі вялікія і пешшу не адолець, таму мы актыўна карысталіся веласіпедам. Ехалі, пакуль атрымлівалася, а калі сцежка зусім знікала, хавалі веласіпеды і далей ужо нагамі.

З тых часоў засталіся даволі яркія ўспаміны, да таго ж гэта дзяцінства, калі дарослых турбот няма і ўсё, што здараецца, новае, таму неверагодна цікавае. Думаю, гэта і паспрыяла таму, што паездкі на веласіпедзе для мяне – нешта такое, што вяртае мене ў тыя часы і супакойвае думкі. Нагадвае медытацыю.

Першы далёкі заезд

Калі я пераехаў у Мінск вучыцца, то зразумела, што ў інтэрнаце захоўваць веласіпед было немагчыма. Таму да веласіпеда я вярнуўся толькі на 4 курсе, калі пераехаў на асобную кватэру. Спачатку браў на пракат, а потым і свой набыў. Першыя паездкі былі не надта доўгія, але ж азарт пачаў разбіраць і хацелася заехаць усе далей і далей, праверыць, колькі змагу адолець.

І вось аднойчы я вырашыў паехаць у свой першы вялікі велапаход. У якасці маршрута я абраў шлях з Баранавіч да Лунінца, таму што амаль увесь час аўтамабільная дарога па маршруце ішла ўздоўж чыгункі. На выпадак, калі нешта здарыцца ці я моцна стамлюся, я ў любы момант мог сесці на “дызель” да Лунінца. Гэта была мая страхоўка.

Але 145 кіламетраў я пераадолеў даволі лёгка, вельмі моцна здзівіўшы бацькоў, калі нечакана з’явіўся дома. Цяжкімі былі можа быць першыя 40 хвілін, бо да Баранавіч я ехаў начной электрычкай і калі толькі выехаў з горада, было яшчэ зусім цёмна і нязручна.

Брэветы і медалі

Ужо пазней, калі я зноў прывёз свой веласіпед у Мінск, я пачаў шукаць маршруты, па якім было б цікава паездзіць. Дакладна не памятаю, якім менавіта чынам, але я патрапіў на форум, дзе абмяркоўвалі свае паездкі ранданёры. І там жа дазнаўся, што праводзяцца брэветы – спецыяльныя заезды, дзе няма гонкі за першае месца, але патрэбна выканаць пэўныя правілы, каб твой вынік залічылі.

Пачатковая дыстанцыя для сапраўдных брэветаў – 200 кіламетраў, якія патрэбна праехаць за адведзеныя 13 гадзін і 30 хвілін (сярэдняя хуткасць 15 км/г). Было боязна ехаць, але свой першы брэвет з залікам і медалём я праехаў 19 красавіка 2014 года за 12 гадзін 52 хвіліны. Другі паспяховы брэвет адбыўся 16 красавіка 2016 года з вынікам у 12 гадзін і 27 хвілін.

Была яшчэ спроба праехаць брэвет на 300 кіламетраў, але на пачатку маршрута трапіў у яму ў цемры і трошкі паламаў веласіпед (пагнуў колы і амаль не было задніх тармазоў), што запаволіла тэмп і давялося сысці з дыстанцыі, калі не паспеў на прамежкавы кантрольны пункт.

Потым пачалося сямейнае жыццё, дзеці і іншыя турботы, таму на некаторы час я выпаў з ранданёрскага руху, але па магчымасці выбіраўся на доўгія маршруты, калі дазваляў час. Але ж планую ў хуткім часе вярнуцца да брэветаў і актыўна трэніруюся, бо без падрыхтоўкі такую адлегласць не праехаць.

Калі вам цікава даведацца больш пра ранданёрскі рух у Беларусі, стаўце агеньчык 🔥, наступным разам распавяду і пакажу, дзе знайсці інфармацыю і далучыцца да супольнасці. Ну і праехаць свой першы брэвет, бо каляндар на гэты год ужо зацверджаны!

SSH і порт 22, правіла 1-3-5, цяжкасці працы і ранданёркі рух
#абнаўленні #анонс

Вітаю! 👋 Сёння нядзеля, а значыць час пазнаёміць вас з планам на наступны тыдзень.

Між тым я нарабіў тэм ажно на 4 тыдні наперад, засталося толькі напісаць змест да ўсіх. Працэс напісання і публікацыі ўдакладняю амаль кожны дзень, каб дасягнуць прадказальнай рэгулярнасці.

Таму чакайце гісторыю пра SSH і чаму менавіта 22 порт быў выкарыстаны, так сама пра цікавае правіла прадукцыйнасці 1-3-5. Яшчэ збіраюся распавесці пра асаблівасці працы з грашыма ў праграмах, паразважаць наколькі цяжка быць праграмістам і ў суботу распавесці пра брэветы і ранданёраў.

Акрамя гэтага планую некаторыя абнаўленні адносна ўзроўняў падтрымкі і нешта цікавае для тых, хто падпісаны на мяне праз Patreon ці BMC.

P.S. На выхадных запісаў некалькі кароткіх відэа пра тэхналогіі, якія планую апублікаваць на тыдні ў Instagram Reels, TitTok і YouTube Shorts, таму можаце падпісацца, дзе вам зручней.

Чаму SSH выкарыстоўвае менавіта 22-гі порт
#гісторыя #факты

Калі працуеш над Open-Source праектамі, прызвычайваешся, што многія рэчы, як і ў сапраўдным жыцці, вырашаюцца на ўзроўні звычайных чалавечых адносін. Так, дакладна можна напісаць Лінусу Торвальдсу з прапановай, які прафесійна затопча цябе ў гразь за недахоп ведаў, але па факце гэта будзе асабістая размова з легендай, няхай і праз інтэрнэт.

Калі тэхналогіі толькі пачыналі развівацца, многія рэчы рабіліся проста праз дамовы паміж людзьмі. Часам нейкія фармальныя працэдуры патрабаваліся, напрыклад напісаць RFC ці ліст да публічнай рассылкі, але ўсё было даволі проста – патрэбна было толькі папрасіць. Менавіта так і зрабіў у 1995 годзе Tatu Ylonen (яго Twitter/X).

Першапачаткова для сувязі паміж камп'ютарамі выкарыстоўваўся пратакол telnet, які быў зроблены ажно ў 1969 у першыя дні працы IP-сеткі. Пратакол не прадугледжвае ўбудаваных мер бяспекі і гэта робіць складаным яго выкарыстанне, калі ёсць нагоды не давяраць цалкам удзельнікам сеткі.

Для перадачы праз сетку файлаў у тыя часы ўжо існаваў пратакол ftp (File Transfer Protocol), які так сама не меў аніякіх сродках забеспячэння бяспекі. Таму Tatu Ylonen напісаў свой пратакол – SSH (Secure Shell). Ён распрацаваў SSH, каб замяніць як telnet (порт 23), так і ftp (порт 21). І так склалася, што порт 22 быў як раз паміж партамі ftp і telnet і быў свабодны. Tatu палічыў, што нумар можа быць адной з тых дробязяў, якія нададуць нейкую аўру даверу. Але патрэбна было неяк атрымаць гэты порт.

У той час асноўны працэс размеркавання партоў быў даволі простым, бо Інтэрнэт толькі пачынаўся. Нумары партоў выдзяляліся арганізацыяй IANA (Internet Assigned Numbers Authority). Кіраваў ёй у той час Jon Postel, рэдактар пратаколаў IP, ICMP і TCP. Напісаць чалавеку, які быў аўтарам галоўных дакументаў Інтэрнэту, было страшнавата.

І ўсё ж Тату напісаў ліст Джону, дзе распавёў пра асаблівасці сваёй новая праграмы ssh і папрасіў вылучыць для яе порт з дыяпазону ад 1 да 255, каб трапіць у WKS (Well-Known Services) – спіс давераных сервісаў, і спытаў, ці можна ўзяць нумар 22, бо ён ім ужо карыстаўся ў бета-версіі.

На наступны дзень 10 ліпеня 1995 года прыйшоў адказ: "Tatu, мы прызначылі порт 22 для ssh, дзе ты пазначаны як кантакт". Пасля гэтага, 12 ліпеня, аўтар афіцыйна напісаў сваім бета-тэсцерам і анансаваў першую версію ssh-1.0.0. Такім чынам порт 22 стаў звычайнай з'явай для тых, хто працуе з серверамі праз сетку. Такая вось гісторыя, цікавая і бадай непаўторная, хаця ўсё развіваецца і хто ведае, што будзе праз 100 гадоў.

Буду ўдзячны вашай падтрымцы і распаўсюджванню, як і заўсёды.

Правіла планавання 1-3-5
#прадукцыйнасць #прыярытэты

Прадукцыйна працаваць вельмі важны навык і дакладна можна сказаць, што шмат у каго не заўсёды атрымліваецца, інакш не было б столькі кніжак напісана па гэтай тэме. Людзі розныя, таму і метадаў шмат, бо не кожны працуе аднолькава для ўсіх. Менавіта таму я знаёмлю вас з рознымі падыходамі, бо калі не першыя пяць, то магчыма шосты вам падыдзе і вырашыць вашую праблему.

Сёння хачу расказаць пра даволі вядомы, просты і эфектыўны метад планавання 1-3-5, які часцяком выкарыстоўваюць у інжынерных камандах. І задача гэтага метаду не столькі павысіць агульную прадукцыйнасць каманды, але дапамагчы асобным удзельнікам сфакусіравацца на сапраўды важных для бізнесу задачах.

Правіла прапануе замест бясконцага спісу задач ствараць для выканаўцаў адмысловыя наборы задач, раздзеленыя па прыярытэтам. Спачатку вызначаецца адна вялікая і важная задача, якую патрэбна зрабіць абавязкова і ў першую чаргу. Пасля яе ідзе спіс з трох важных, але не крытычных задач і нарэшце спіс з пяці малых задач.

Канешне, не для ўсякай працы такое падыдзе, і задачы патрэбна рабіць зразумелыя, з бачным канчатковым вынікам і хоць прыблізна зразумелым часам выканання, але гэта ўжо іншая тэма для абмеркавання. Асноўная ж ідэя падыходу – гэта зразумелае для ўсіх размеркаванне прыярытэту.

Правіла можна прыстасаваць да любога перыяду часу, але на маю думку, лепш за ўсё яно будзе працаваць у выпадку тыднёвага планавання, бо дзевяць задач агулам – гэта вельмі шмат, каб паспець за адзін дзень. А калі запісваць зусім дробязі, то будзе складана такую сістэму ўліку абслугоўваць.

Я гэты падыход так сама выкарыстоўваю, але адаптаваў пад сябе і свае патрэбы. Замест адной галоўнай задачы ў мяне – мэта на тыдзень. Калі вы чыталі мой допіс на тэму мэтанакіраваных тыдняў, вы зразумееце, пра што я кажу. Мэта проста апісвае паказчыкі, якіх я жадаю дасягнуць за тыдзень працы.

Мэту я разбіваю на тры задачы, якія патрэбна выканаць, каб паказчыкі былі дасягнуты. Задачай можа быць напісанне артыкулу, ці запіс і мантаж відэа, калі мы гаворым пра праект развіцця ўласнага блогу. Астатнія задачы, якія ў агульным правіле лічацца малымі, у маім выпадку не адносяцца да мэты наўпрост, а павінны дапамагчы з развіццём усяго праекта. То бок гэта ўсё, што тычыцца абслугоўвання і паступовага ўдасканалення.

Прымяненне такога правіла не азначае, што кожная хвіліна павінна быць нечым занята, рабіць перапынкі патрэбна абавязкова і правіла можна прымяняць у камбінацыі з іншымі падыходамі. Карысць жа ў тым, што гэта прымяненне гэтага правіла заўсёды дае вычарпальны адказ – а што на самой справе самае важнае.

👍 калі было карысна 😇 І са святам! 🥰

​​Я хоць і рэкамендую выкарыстанне генератараў сайтаў і ўмоўна бясплатных файлавых хостынгаў, але нават з імі могуць здарацца непрыемнасці. Такая непрыемнасць нядаўна адбылася з адным з карыстальнікаў Netlify, якому выставілі ў разлік $100000 (сто тысяч) за выкарыстанне рэсурсаў сервіса звыш нормы.

Сайт 4 гады як быў размешчаны на хостынгу і па словах уладальніка меў добра калі 200 наведвальнікаў на дзень. Хутчэй за ўсё сайт быў атакаваны метадам DDoS, што і вызвала вялікія выдаткі на абслугоўванне.

Уладальнік звярнуўся ў падтрымку і там яму адказалі, што звычайна за такія выпадкі, калі была атака, яны бяруць 20% ад агульнай сумы выдаткаў (то бок 20 тысяч!), але з-за таго, што сума і так надта вялікая, яны прапанавалі яму варыянт – 5%, то бок заплаціць усяго 5 тысяч. 🤡

Тэма актыўна пачала абмяркоўвацца на Reddit і HackerNews і для ўладальніка сайта завяршылася даволі паспяхова. У адну з галін абмеркавання прыйшоў дырэктар Netlify і сказаў, што па іх абноўленых правілах сістэма не будзе выключаць сайты, якія былі атакаваны зламыснікамі, але яны будуць дараваць выдаткі, якія яны панеслі.

Добра, што вынік станоўчы, але не вядома, як бы завяршылася б гэтая гісторыя, калі б не шырокі розгалас. Таму нягледзячы на тое, што сервіс усё яшчэ выдатны і зручны, патрэбна з засцярогай падыходзіць да выкарыстання любых сервісаў.

Велікодныя яйкі ў праграмах і гульнях 🐣

🔗 Чытаць праз сайт

Вітаю! Віншую са святам тых, хто святкуе!

Сёння хачу распавесці вам пра такую з'яву, як "Easter Eggs" у праграмах. Звычайна гэта схаваныя ці таемныя элементы, якія аўтары дадаюць да сваіх праграм. Гэта можа быць што давядзецца, пачынаючы з гумару і нейкіх карысных функцый і да звычайных варыяцый гульнявых персанажаў ці сакрэтных назваў.

Лічыцца, што першым такім сакрэтным "яйкам" быў спецыяльны пакой у гульні "Adventure" для кансолі Atari 2600, якая выйшла ў далёкім 1979 годзе. У тыя часы кампаніі, што стваралі відэагульні і іншыя праграмы, не пісалі нічога пра праграмістаў з-за страху, што іх папулярнасць можа нашкодзіць брэндам гэтых кампаній. Каб пераадолець гэта, стваральнік гульні "Adventure" – Warren Robinett, дадаў у гульню схаваны пакой, дзе было напісана, што гэта ён яе праграмаваў. Каб знайсці і ўвайсці ў гэты пакой, гульцу патрэбна было зайсці ў катакомбы і выканаць паслядоўнасць пэўных дзеянняў.

Навошта праграмісты дадаюць такія схаваныя функцыі да праграм? На першы погляд, гэта можа падацца проста марнаваннем часу альбо занадта несур'ёзным. Але такія схованкі часта радуюць карыстальнікаў і могуць ствараць пазітыўныя эмоцыі, што дадаткова ўзмацняе брэнд. Калі вы кажаце, што ў гульні ёсць схаваныя рэчы, гульцы пачынаюць даваць парады па іх пошуку і ствараць дадатковую інтрыгу вакол гульні. У дадатак, гэта можа быць забавай і для саміх праграмістаў, якія могуць дадаваць у код тайныя элементы, як невялікі спосаб самавыяўлення.

Я не выключэнне, бо так сама дадаю невялікія сакрэты да сваім праграм, калі гэта мае сэнс. Напрыклад, у адной гульні я дадаў такую функцыю, што калі дадаць да імені карыстальніка пэўны набор сімвалаў, то выява профілю замяняецца на выяву робата згінальшчыка Бэндэра з мультсерыялу Футурама. А яшчэ зрабіў так, каб пераключэнне экранаў мабільнай праграмы ў пэўным парадку актывавала спецыяльны пін-код, які ў сваю чаргу можа запускаць некаторыя функцыі, якія звычайным чынам нельга выканаць.

Дарэчы, вы і самі можаце знайсці такія схованкі, напрыклад на сайце Google. Паспрабуйце пашукаць наступныя выразы:
– "askew"
– "do a barrel roll"
– "super mario brothers" - націсніце на міргаючы блок
– "cha-cha slide" - націсніце на мікрафон
– "green hill zone" - націсніце на Соніка

P.S. З-за даволі напружанай працы апошнія тыдні не было магчымасці пісаць якасныя артыкулы, але здаецца, што рэжым пакрысе нармалізуецца. Таму буду працягваць знаёміць вас тэхналогіямі.

Падтрымаць: Patreon | Buy Me a Coffee

Instagram | Twitter | TikTok | YouTube | Telegram

Айцікаст — гэта падкаст пра тэхналогіі па-беларуску 🎙

Старонка падкасту 🎧

Цікава, што цяперашні праект "Тэхнабеларус", дзе я намагаюся распавядаць пра тэхналогіі па-беларуску ў розных фарматах, калісці быў ідэяй менавіта падкасту. Можна сказаць, вяртаемся да каранёў! :)

Калі я пачаў больш актыўна займацца ідэяй праекту, стала зразумела, што проста аўдыё - цікава, але не так шмат людзей слухаюць падкасты ўвогуле, а калі казаць пра беларускую мову, то аудыторыя яшчэ менш, таму мае сэнс рабіць нешта большае. Аднак ёсць людзі, што падкасты слухаюць і таму я ўсё ж стварыў падкаст і апублікаваў трэйлер, каб наладзіць пачатковы распаўсюд па пляцоўках.

У падкасце я буду распавядаць пра гісторыю стварэння галіны інфармацыйных тэхналогій, пра прафесіі, пра мовы праграмавання, пра асноўныя паняцці, якімі карыстаюцца праграмісты штодзень, а яшчэ пра прадукцыйнасць, цікавыя і зручныя інструменты, і часам агляды важных навін. Спіс тэм жорстка не абмежаваны. Фармальна гэта будзе копія зместу з YouTube, але для больш зручнага выкарыстання, калі няма YouTube Premium.

Падкаст ужо апублікаваны і даступны на многіх вядомых пляцоўках, можна скарыстацца пошукам, але ж на ўсялякі выпадак ніжэй ёсць альтэрнатыўныя старонкі, дзе вы можаце выбраць для сябе найбольш зручны спосаб падпіскі.

Podcasters for Spotify | Mave

P.S. Даруйце, калі бачылі пра падкаст ужо, але я думаю, што не ўсе, хто падпісаны тут, падпісаны на іншыя старонкі праекту і гэтая інфармацыя можа быць карыснай.

SpaceX падзялілася эпічным відэа трэцяга тэставага палёту Starship.

Запуск адбыўся 14 сакавіка. Прагляд палёту ў рэальным часе стаў магчымы дзякуючы тэрміналам Starlink, якія працавалі на Starship.
У дадзены момант кампанія працягвае рыхтавацца да наступнага выпрабавальнага палёту.

#навіны

Ці ёсць магія ў праграмаванні?

#тлумачальны

Паразважаў трошкі на тэму, ці існуе магія ў праграмаванні, бо часам здаецца, што сапраўды існуе, асабліва калі на нечым захрас і ня ведаеш, што рабіць далей.

Вырашыў рабіць пад-праект “Тлумачальны”, дзе ў фармаце кароткіх відэа да адной хвіліны (з-за YouTube Shorts) публікую невялічкія тлумачэнні розных паняццяў з сусвету IT.

Пакуль не ведаю, ці мае сэнс дубліраваць іх тут, таму пастаўце 🔥 калі ласка, калі лічыце, што патрэбна.

Яшчэ можна падпісацца на іншыя старонкі і глядзець там, дзе вам зручней.

Twitter | IG Reels | TikTok | YT Shorts

Першая праграма кожнага праграміста

#тлумачальны

Заўсёды з чагосці патрэбна пачынаць і праграмісты пачынаюць знаёмства з тэхналогіяй першай праграмай. І так павялося, што звычайна гэтая праграма - Hello World. Тлумачу, адкуль пайшло.

Twitter | Reels | TikTok | YouTube

Інжынерны мем па пятніцах

Галоўнае, што працуе, а дэталі рэалізацыі пакіньце сапраўдным экспертам 😃

—

Вывучаў тут магчымасці Тэлеграму і пакуль не ведаю, як гэтым можна будзе скарыстацца і што менавіта гэтыя Тэлеграм-бусты дадуць на практыцы.

Але калі ў каго ёсць жаданне і магчымасць, то можаце бустануць канал праз адмысловую спасылку: https://t.me/boost/ikbytech

Што за дэйлік і навошта ён айцішнікам

#тлумачальны

Відэа пра daily stand up: хутка і зразумела тлумачу, што такое штодзённыя стэндапы, навошта яны патрэбныя і як правільна іх праводзіць. Ідэальна для каманд, якія хочуць палепшыць узаемадзеянне і павысіць прадукцыйнасць.

Twitter | Reels | TikTok | YouTube