Idea Foundation - دەزگای ئایدیا

143 views15:47

⁨ لە دیدی وەرگێڕی کتێبی (نێکسەس)ەوە

کتێبی نێکسەس (nexus) لە پیشانگای هەولێر بۆ کتێب بڵاو دەبێتەوە، کتێبەکە لە سێ بەش و هەر بەشێکیش لە چەند پاژێک پێکدێت. کۆی کتێبەکەش ڕاڤەکردن و قسەکردنە لەسەر کۆمەڵێک تێما و بابەت کە لەدونیای ئەمڕۆدا بایەخ و گرنگی زۆریان هەیە. بابەتەکانیش بریتین لە (تەکنەلۆژیا، ژیری دەستکرد، تۆڕەکانی زانیاری، سیاسەتی کۆمپیوتەری، تۆڕە مرۆییەکان، بایۆتەکنەلۆژیا، ئەلگۆریتم و داتاگەرایی و) زۆر بابەتی دیکە.. یۆڤاڵ نوح زمانێکی سادە و ئاسانی هەیە بۆ گوزارشتکردن و باسکردنی ئەو بابەتە ئاڵۆزانەی سەرەوە، بەتایبەتیش تەکنەلۆژیا. ئەو پێی وایە تەکنەلۆژیا هەر وەک ئایدۆلۆژیا ڕۆڵی گرنگی لە ژیانی ئەمڕۆدا هەیە، تەنانەت وەک چۆن مرۆڤی ئایدۆلۆژیی بیر و هزری خۆی دەسپێرێت بە ئایدیۆلۆژیا، بەو شێوەیەش ڕەنگە لەداهاتوودا بیرکردنەوەمان بسپێرین بە ژیری دەستکرد و تەکنەلۆژیا، ئەو لەبری ئێمە بیربکاتەوە.. بەڵام لەڕاستیدا کێشەی گەورەی ئەمڕۆش کە لەداهاتوودا زیاتر یەخەی مرۆڤ دەگرێت تەکنەلۆژیایە نەک ئایدۆلۆژیا، گەر ئایدۆلۆژیا دوێنێ خەڵکی لەسەر کوژرابێت ئەوەی ئەمڕۆ مرۆڤ ئەکوژێت تەکنەلۆژیایە، یان بەجۆرێکی تر، گەر دوێنێ بە بڕینی سەری ئمپراتۆر سیستەمێک هەرسی بهێنایە و کێشەی گەورە دروست بکربایە، ئەوە ئەمڕۆ بە بڕینی کێبڵێکی ئینتەرنێت کێشەی گەورەتر دروست ئەبێت. بۆیە دەکرێت بڵێین، تەکنەلۆژیا ئەو وەحشە زەبەلاحە هەموو شتزانەیە کە بەتەواوەتی ڕۆچووەتە نێو بوونمان. سەردەمانێک فرۆید پێی وابوو کە بەشێکی زۆر لە بیرکردنەوەکانمان لە نەستدا شاردراونەتەوە، نەست کانگای شاردنەوەی ئارەزوو و شتە سەرکوتکراوەکانمان بوو، بەڵام چیتر نەست ئەو دوورگە پڕ نهێنیەی مرۆڤ نیە نەتوانرێت دەستی بۆ ببرێت، بەڵکو تەکنەلۆژیای ئەمڕۆ دەرفەتی زیاتری بۆ ئاشکراکردنی ئەو لایەنە شاراوانە دروست کردووە. لەلایەکی دیکەوە، زمانە سادەکەی یۆڤاڵ نوح وایکردووە تێگەیشتنێکی ساویلکانەشی هەبێت بۆ پەیوەندی نێوان مرۆڤ و تەکنەلۆژیا. چونکە لایەنە کۆمەڵایەتی و ئابوورییەکان پشتگوێ دەخات کە لە پشت پەرەسەندنی تەکنۆلۆژیاوە هەن.. هەروەها ئەیەوێت لەڕوانگەی بایۆتەکنەلۆژیاوە داهاتووی نایەکسانی و جیاوازی نێوان چینەکان باس بکات، هەر بۆیە وەک زۆربەی لیبڕاڵەکان، ناتوانێت چوارچێوەی سیستەمی سەرمایەداری تێپەڕێنێت بۆ بیرکردنەوە لە چارەسەرەکان. بەرهەحاڵ، کتێبەکە گرنگە و قسە زۆر هەڵەگرێت...هیوادارم هەموو کەسێک بیخوێنێتەوە، دڵنیام زۆر شتی تیایە کە بەسوودن بۆ ئینسانی ئەمڕۆ کە بیزانێت و تێیبگات.⁩

138 views18:38