📍 Toshkentda tarix va zamonaviy san’at uyg‘unlashgan yangi madaniy makon ochilmoqda

✅ Joriy yil 6-sentabr kuni poytaxtimizda Toshkent zamonaviy san’at markazi — CCA Tashkent o‘z eshiklarini ochadi. Bu shunchaki yangi muzey yoki ko‘rgazma zali emas, balki bir asrdan ziyod tarixga ega inshootga yangi hayot bag‘ishlangan yirik madaniy loyihadir.

📑 Ma’lumot o‘rnida: 1912-yilda me’mor Vilgelm Geynzelman loyihasi asosida barpo etilgan bino dastlab tramvay deposi, keyinchalik dizel elektr stansiyasi sifatida foydalanilgan. Bugun esa uning tarixiy qiyofasi va industrial ruhini saqlagan holda, zamonaviy san’at, ta’lim, tadqiqot va madaniy muloqot markaziga aylantirildi.

🇺🇿Davlatimiz rahbari tashabbusi bilan amalga oshirilayotgan ushbu loyiha tarixiy merosni asrab-avaylash va unga zamonaviy mazmun berishning yorqin namunasidir.

🇫🇷 Fransiyaning mashhur Studio KO byurosi tomonidan ishlab chiqilgan arxitektura konsepsiyasi tarixiy meros va zamonaviy infratuzilmani uyg‘unlashtirgan. Markazda ko‘rgazma zallari, ta’lim va jamoat maydonlari, kutubxona hamda tadqiqot infratuzilmasi faoliyat yuritadi.

✔️Eng muhimi — bu yerda nafaqat tarix saqlab qolindi, balki unga yangi mazmun berildi. Ilgari energiya ishlab chiqarilgan makonda bugun ijod, yangi g‘oyalar, san’at va insonlar muloqotining yangi energiyasi yuzaga keladi.

🌍Veb-sayt 🔹Telegram 🔹Instagram 🔹Facebook 📹Youtube X 🔹Linkedin

🔬 Yadro fizikasi institutining ilmiy va ishlab chiqarish salohiyati muhokama qilindi

4-sentabr kuni Sanoat kooperatsiyasi va davlat xaridlari agentligi direktori tomonidan O‘zbekiston Respublikasi Fanlar akademiyasi Yadro fizikasi institutining ilmiy va ishlab chiqarish salohiyati, istiqbolli loyihalari hamda sanoat korxonalari bilan kooperatsiyani kengaytirish masalalariga bag‘ishlangan yig‘ilish o‘tkazildi.

Yig‘ilishda Agentlik rahbariyati, boshqarma va bo‘lim rahbarlari, Yadro fizikasi instituti direktori, akademik Ilhom Sodiqov hamda Materialshunoslik instituti direktori Odilxo‘ja Parpiyev ishtirok etdi.

📑 Akademik Ilhom Sodiqov institutning ilmiy salohiyati, erishilgan natijalar, istiqbolli loyihalar va mavjud masalalar yuzasidan taqdimot qildi.

Qayd etilganidek, institutning 42 gektarlik ilmiy-ishlab chiqarish hududida VVR-SM tadqiqot reaktori, U-150 siklotroni, U-003 elektron tezlatgichi hamda gamma qurilmasi faoliyat yuritmoqda. Institutda 60 dan ortiq turdagi radioizotop mahsulotlari, jumladan, 20 dan ziyod tayyor radiofarmatsevtik preparatlar ishlab chiqariladi. 2025-yilda mahsulot va xizmatlar eksporti 6,09 mln AQSH dollarini tashkil etgan.

🎤 Yig‘ilish davomida radiofarmatsevtika, tibbiy buyumlarni radiatsion sterilizatsiya qilish, materiallar xususiyatlarini yaxshilash, neytron radiografiyasi va yuqori aniqlikdagi element tahlili yo‘nalishlaridagi mavjud imkoniyatlardan sanoat tarmoqlarida kengroq foydalanish masalalari ko‘rib chiqildi.

🤝Muhokamalarda institutning asosiy ilmiy qurilmalarini modernizatsiya qilish, muhandis-texnik kadrlar salohiyatini mustahkamlash, ilmiy ishlanmalarni mahalliy sanoat korxonalari ehtiyojlari bilan bog‘lash, amaliy kooperatsiyani kengaytirish hamda istiqbolli ishlanmalarni tijoratlashtirish masalalariga alohida e’tibor qaratildi.

〰️ Yig‘ilish yakunida ilm-fan va ishlab chiqarish o‘rtasidagi kooperatsiyani kuchaytirish, institutning mavjud ilmiy-texnologik imkoniyatlarini sanoat tarmoqlariga kengroq integratsiya qilish bo‘yicha tegishli vazifalar belgilab olindi.

🌍Veb-sayt 🔹Telegram 🔹Instagram 🔹Facebook 📹Youtube X 🔹Linkedin

🇺🇿🇨🇳Xizmat safari doirasida o‘quv seminari boshlandi

4–24-sentabr kunlari Xitoy Xalq Respublikasining Uxan, Chansha va Yichan shaharlarida “5G va sanoat internetining asosiy texnologiyalari hamda ularni qo‘llash” mavzusida o‘quv seminari bo‘lib o‘tmoqda.

Seminarda Agentlik hamda Agentlikning quyi tashkilotlari vakillari ishtirok etmoqda. O‘quv mashg‘ulotlari davomida ishtirokchilar 5G texnologiyalari, sanoat interneti, zamonaviy raqamli yechimlar hamda ularni amaliyotga joriy etish bo‘yicha nazariy va amaliy bilimlarini oshirmoqda.

Shuningdek, seminar doirasida Xitoyning raqamlashtirish va sanoatni modernizatsiya qilish borasidagi ilg‘or tajribasi o‘rganilib, zamonaviy texnologiyalarni amaliyotga tatbiq etish bo‘yicha tajriba almashilmoqda.

〰️ Dastur doirasida ma’ruzalar, amaliy mashg‘ulotlar, tajriba almashish hamda zamonaviy texnologik obyektlarga tashriflar tashkil etilishi ko‘zda tutilgan.

🌍Veb-sayt 🔹Telegram 🔹Instagram 🔹Facebook 📹Youtube X 🔹Linkedin