✔️O‘zbekistonda xalqaro standartlarga javob beradigan antifriz ishlab chiqarish imkoniyatlari muhokama qilindi

Sanoat kooperatsiyasi va davlat xaridlari agentligida Amerikaning Prestone PFX kompaniyasi hamda “Global Petrochemical Group” MChJ vakillari bilan ishchi uchrashuv o‘tkazildi.

🎤 Uchrashuvda O‘zbekiston hududida xalqaro standartlarga javob beradigan antifriz mahsulotlarini ishlab chiqarishni yo‘lga qo‘yish, qo‘shma korxona tashkil etish, texnologiyalar transferini amalga oshirish hamda mahalliylashtirish darajasini oshirish imkoniyatlari muhokama qilindi. Shuningdek, tayyor mahsulotni ichki bozorga yetkazib berish va eksportga yo‘naltirish masalalari ko‘rib chiqildi.

Tahlillarga ko‘ra, O‘zbekistonda antifriz mahsulotlariga bo‘lgan yillik ehtiyoj qariyb 19 ming tonnani tashkil etadi. 2025-yilda mamlakatimizga 12 ming tonnadan ortiq, umumiy qiymati 11,23 million dollar bo‘lgan antifriz mahsulotlari import qilingan. Bu ichki bozorda yuqori sifatli mahsulotlarga barqaror talab mavjudligini hamda mazkur yo‘nalishda mahalliy ishlab chiqarishni tashkil etish uchun yetarli bozor shakllanganini ko‘rsatadi.

PFX Group avtomobillar uchun texnik suyuqliklar, issiqlikni boshqarish tizimlari va maxsus kimyoviy mahsulotlar ishlab chiqarishga ixtisoslashgan. Kompaniya tarkibida 17 ta ishlab chiqarish maydoni va 4 ta ilmiy-tadqiqot markazi faoliyat yuritadi, uning mahsulotlari esa 40 dan ortiq mamlakatda taqdim etilgan. Prestone brendi qariyb bir asrlik tarixga ega bo‘lib, antifriz mahsulotlarini ishlab chiqish va takomillashtirish sohasidagi yetakchi xalqaro brendlardan biri hisoblanadi.

“Global Petrochemical Group” MChJ esa 2011-yildan buyon motor moylari, antifriz va avtokimyo mahsulotlarini ishlab chiqarib kelmoqda. Korxonada ishlab chiqarishning barcha texnologik bosqichlari, jumladan, mahsulotlarni qadoqlash uchun polimer idishlar ishlab chiqarish jarayoni ham yo‘lga qo‘yilgan.

Mazkur loyihani amalga oshirish ichki bozor ehtiyojini mahalliy mahsulotlar hisobidan ta’minlash, import o‘rnini bosish, zamonaviy texnologiyalarni jalb etish hamda Markaziy Osiyo bozorlariga eksport salohiyatini oshirish imkonini beradi.

🤝 Uchrashuv yakunida istiqbolli qo‘shma loyihalarni shakllantirish, ularni amalga oshirish mexanizmlarini ishlab chiqish, mas’ul tashkilotlar va ishchi guruhlarni belgilash bo‘yicha keyingi vazifalar muhokama qilindi.

🌍Veb-sayt 🔹Telegram 🔹Instagram 🔹Facebook 📹Youtube X 🔹Linkedin

“Sinoma Wind Power Blade Central Asia” bilan investitsiya loyihasi yuzasidan uchrashuv o'tkazildi

Sanoat kooperatsiyasi va davlat xaridlari agentligida “Sinoma Wind Power Blade Central Asia” MChJ XK vakillari bilan ishchi uchrashuv o‘tkazildi.

Unda Jizzax viloyati Zomin tumanidagi erkin iqtisodiy zona hududida amalga oshirilayotgan shamol turbinalari parraklarini ishlab chiqarish loyihasi doirasida yuzaga kelgan amaliy masalalar muhokama qilindi.

Uchrashuv davomida kompaniya vakillari ishlab chiqarish uchun zarur xomashyoni import qilish, bojxona imtiyozlaridan foydalanish, TIF TN kodlarini aniqlashtirish hamda loyiha hujjatlarini belgilangan tartibda rasmiylashtirish bilan bog‘liq masalalar yuzasidan ma’lumot berdi.

Qayd etilganidek, loyiha doirasida foydalaniladigan xomashyoning asosiy qismi xorijdan import qilinadi. Mavjud mahalliy xomashyoni ishlab chiqarishga jalb etishdan avval esa uning texnik talablarga muvofiqligini aniqlash uchun laboratoriya sinovlari va sifat ekspertizasidan o‘tkazish talab etiladi.

Shuningdek, import kontrakti asosida olib kelinayotgan xomashyo dastlabki ishlab chiqarish ehtiyojlari uchun mo‘ljallangani, ishlab chiqarishning yillik quvvatini ta’minlash uchun zarur hajmdagi xomashyoni bir vaqtning o‘zida olib kirish amaliy jihatdan murakkab ekani bildirildi.

Agentlik vakillari tomonidan kompaniyaga loyiha bo‘yicha zarur hujjatlarni tayyorlab, “Loyihalar va xaridlar samaradorligini oshirish markazi” davlat muassasasiga taqdim etish tavsiya qilindi.

Uchrashuv yakunida investitsiya loyihasini amalga oshirish jarayonida yuzaga kelayotgan masalalarni tegishli tartibda ko‘rib chiqish hamda Agentlik vakolatlari doirasida amaliy ko‘mak ko‘rsatish bo‘yicha fikr almashildi.

🌍Veb-sayt 🔹Telegram 🔹Instagram 🔹Facebook 📹Youtube X 🔹Linkedin

⚙️ Mahalliy sanoat salohiyati: “UzHydroPower” faoliyati bilan tanishildi

Sanoat kooperatsiyasi va davlat xaridlari agentligi direktori Baxtiyor Xaydarov hamda “O‘zbekgidroenergo” AJ Boshqaruv raisi Islom Abduraxmonov “UzHydroPower” zavodiga tashrif buyurib, mahalliylashtirish dasturi doirasida yo‘lga qo‘yilgan ishlab chiqarish jarayonlari bilan tanishdilar.

Tashrif davomida gidroelektr stansiyalari uchun ishlab chiqarilayotgan turbinalar, generatorlar, gidroagregatlar, metall konstruksiyalar va boshqa muhim uskunalar ko‘zdan kechirildi. Shuningdek, korxonaning ishlab chiqarish quvvatlari hamda istiqboldagi rivojlanish rejalari muhokama qilindi.

🇺🇿 Bugungi kunda “UzHydroPower” zavodi 24/7 rejimida faoliyat yuritib, quvvati 1 kVt dan 40 MVt gacha bo‘lgan gidroenergetika uskunalarini ishlab chiqarmoqda. Xususan, Norin GES-2 va Norin GES-3 kabi yirik loyihalar uchun zarur uskunalarning mahalliy ishlab chiqarilishi sanoat kooperatsiyasi va mahalliylashtirish siyosatining amaliy natijasidir.

Mazkur tashrif davomida gidroenergetika sohasida mahalliy ishlab chiqarishni kengaytirish, import o‘rnini bosuvchi mahsulotlar ishlab chiqarish hajmini oshirish hamda milliy sanoat salohiyatini yanada mustahkamlash masalalariga alohida e’tibor qaratildi.

🌍Veb-sayt 🔹Telegram 🔹Instagram 🔹Facebook 📹Youtube X 🔹Linkedin