✔️ Agentlik xodimlari o‘rtasida sport tadbiri o‘tkazildi

2026-yil 7-aprel kuni O‘zbekiston Respublikasi Prezidenti Shavkat Mirziyoyev raisligida o‘tkazilgan videoselektor yig‘ilishida jismoniy tarbiya va sport sohasini yangi bosqichga olib chiqish, aholini ommaviy sportga keng jalb etish, seleksiya va tayyorgarlik tizimini takomillashtirish masalalariga alohida e’tibor qaratilgan edi.

Yig‘ilishda sport nafaqat musobaqa, balki sog‘lom turmush tarzini shakllantirish, intizomni mustahkamlash, vatanparvarlik tuyg‘ularini oshirish hamda mamlakat nufuzini yuksaltirishda muhim omil ekani ta’kidlandi. Shuningdek, davlat organlari va tashkilotlarida sportni ommalashtirish bo‘yicha yangi tartib joriy etilib, rahbar kadrlar o‘z jamoasiga shaxsiy namuna ko‘rsatishi zarurligi qayd etildi.

➡️ Mazkur vazifalar ijrosini ta’minlash maqsadida Sanoat kooperatsiyasi va davlat xaridlari agentligi tomonidan 22-aprel kuni sport tadbiri tashkil etildi. Xususan, jamoa o‘rtasida futbol musobaqasi o‘tkazilib, sog‘lom turmush tarzini targ‘ib qilish, jamoaviy ruhni mustahkamlash hamda xodimlarning jismoniy faolligini oshirishga alohida e’tibor qaratildi.

Bunday tadbirlar xodimlarning ish samaradorligini oshirish, korporativ madaniyatni rivojlantirish va sog‘lom ish muhitini shakllantirishga xizmat qiladi.

🔹Facebook 🔹Instagram 🔹Telegram 🌍Veb-sayt

➡️ Ilmiy va innovatsion hamkorlikni kengaytirish yo‘lida navbatdagi uchrashuv

Bugungi kunda loyiha va injiniring xizmatlari, ilmiy-tadqiqot hamda tajriba-konstruktorlik ishlari o‘rtasidagi uzviy integratsiyani ta’minlash ustuvor yo‘nalishlardan biri hisoblanmoqda. Shu bilan birga, zamonaviy texnologiyalar transferini jadallashtirish, innovatsion va raqamli yechimlarni keng joriy etish hamda mavjud ishlanmalarni takomillashtirish muhim ahamiyat kasb etmoqda.

🎤 Mazkur vazifalar ijrosini ta’minlash maqsadida Agentlik mutaxassislari O‘zbekiston Fanlar akademiyasi Yadro fizikasi institutining direktori akademik Ilxom Sodiqov va mutasaddi xodimlari bilan uchrashuv o‘tkazdi.

Uchrashuv davomida yuqori texnologiyali va ilmiy salohiyatga ega istiqbolli loyihalar atroflicha muhokama qilinib, ularni amaliyotga joriy etish mexanizmlari yuzasidan fikr almashildi. Shuningdek, ilg‘or mahalliy va xorijiy “R&D” markazlari bilan hamkorlikni rivojlantirish, ilm-fan va sanoat integratsiyasini mustahkamlash hamda innovatsion ekotizimni yanada kengaytirish masalalariga alohida e’tibor qaratildi.

Mazkur hamkorlik istiqbolda qo‘shilgan qiymatga ega mahsulotlar yaratish, sanoat tarmoqlariga zamonaviy yechimlarni joriy etish hamda milliy iqtisodiyotning raqobatbardoshligini oshirishga xizmat qiladi.

🔹Facebook 🔹Instagram 🔹Telegram 🌍Veb-sayt

📌 Qoraqalpog‘iston Respublikasida tadbirkorlar bilan ochiq muloqot o‘tkazildi

Sanoat kooperatsiyasi va davlat xaridlari agentligi tomonidan respublika hududlarida tadbirkorlar bilan to‘g‘ridan-to‘g‘ri ochiq muloqotlar izchil davom ettirilmoqda. Navbatdagi uchrashuv joriy yilning 23-aprel kuni Qoraqalpog‘iston Respublikasida tashkil etildi.

Mazkur tadbirda Agentlikning hududiy loyiha ofisi vakillari, “O‘zbekekspertiza” AJ hamda “Raqamli transformatsiya markazi” MCHJ mutaxassislari, shuningdek, 66 nafar tadbirkor ishtirok etdi.

➡️ Muloqot davomida tadbirkorlar tomonidan 18 ta murojaat va taklif bildirildi. Ularning 15 tasi joyida hal etildi, 3 tasi yuzasidan zarur tushuntirishlar berildi.

✍️ Navbatdagi ochiq muloqot ertaga Farg‘ona viloyatida o‘tkazilishi rejalashtirilgan.

🔹Facebook 🔹Instagram 🔹Telegram 🌍Veb-sayt

✔️ Yoshlar kuni doirasida talabalar bilan muhim uchrashuv o‘tkazildi

Joriy yilning 24-fevral kuni O‘zbekiston Respublikasi Prezidenti Shavkat Mirziyoyevning yoshlar bilan ochiq muloqoti bo‘lib o‘tgan edi. Unda davlatimiz rahbari barcha darajadagi rahbarlar yoshlarni xorijiy tillar va kasb-hunarga o‘rgatish, sportga keng jalb etish, ularning g‘oya, loyiha va startaplarini qo‘llab-quvvatlash, bandligi va daromadini ta’minlash borasida yanada faol ishlashi zarur ekanligi qayd etilgan edi.

🎤 Shu bilan birga, mamlakatimizda har haftaning payshanba kuni vazirlik va idoralarda “Yoshlar kuni” sifatida o‘tkazilishi belgilandi.

Mazkur topshiriqlar ijrosini ta’minlash maqsadida Sanoat kooperatsiyasi va davlat xaridlari agentligi direktori Baxtiyor Xaydarov Toshkent shahridagi Singapur Menejmentni rivojlantirish instituti talabalari bilan uchrashuv o‘tkazdi.

Uchrashuv davomida Agentlik rahbari talabalar tomonidan ishlab chiqilgan startap loyihalar taqdimoti bilan tanishdi. Har bir loyiha yuzasidan tegishli vazirlik, idora va tashkilotlar bilan hamkorlikda amaliy ko‘mak berish masalalari belgilab olindi.

Shuningdek, institut talabalari uchun Agentlik huzuridagi “O‘zbekekspertiza” AJda amaliyot o‘tash imkoniyatlarini yaratish bo‘yicha kelishuvga erishildi.

Tadbir yakunida Agentlik va institut o‘rtasida o‘zaro hamkorlik memorandumi imzolandi. Shundan so‘ng Agentlik direktori institutdagi o‘quv jarayonlari hamda talabalar uchun yaratilgan zamonaviy amaliyot infratuzilmasi bilan yaqindan tanishdi.

Mazkur hamkorlik yoshlarning innovatsion salohiyatini ro‘yobga chiqarish, ularni amaliy ko‘nikmalar bilan ta’minlash hamda kelgusida raqobatbardosh mutaxassislar sifatida shakllanishiga xizmat qiladi.

🔹Facebook 🔹Instagram 🔹Telegram 🌍Veb-sayt

📌 Farg'ona viloyatida tadbirkorlar bilan ochiq muloqot o‘tkazildi

Bugun Sanoat kooperatsiyasi va davlat xaridlari agentligi tomonidan hududlarda tadbirkorlar bilan bevosita muloqotlarni yo‘lga qo‘yish doirasida Farg'ona viloyatida navbatdagi uchrashuv tashkil etildi.

Mazkur tadbirda agentlikning hududiy loyiha ofisi vakillari, “O‘zbekekspertiza” AJ hamda “Raqamli transformatsiya markazi” MCHJ mutaxassislari, shuningdek, viloyatdan 32 ta mas'ul tashkilotlar hamda 100 tadan ortiq ishlab chiqarish korxonasidan jami 160 nafar vakil qatnashdi.

⚫️Muloqot davomida tadbirkorlar tomonidan 27 ta murojaat va takliflar bildirildi. Ularning 6 tasi joyida hal etildi, 18 tasi yuzasidan esa zarur tushuntirishlar berildi.

➡️ Navbatdagi ochiq muloqot ertaga Andijon viloyatida o‘tkazilishi rejalashtirilgan.

🔹Facebook 🔹Instagram 🔹Telegram 🌍Veb-sayt