Прадстаўляем вашай увазе візуальныя матэрыялы, каб нагадаць, як прайшоў Кангрэс у 2022 годзе!
Фотагалерэя.
Відэазапісы.

Афіцыйная інфармацыя: наступны (адзінаццаты) Міжнародны Кангрэс даследчыкаў Беларусі пройдзе 22-24 верасня 2023 года ў Гданьску. Асноўны партнёр - Музей Другой сусветнай вайны.
Чакаецца ўдзел 400-500 спецыялістаў з усяго свету. Інфармацыя пра call for papers будзе пазней.

Сумная навіна, сыйшоў з жыцця прафесар Дэвід Фрык, вядомы даследчык праваслаўнай культуры ў Рэчы Паспалітай, шматканфесійнага і шматкультурнага жыцця Вільні XVII стагоддзя. У 2013 годзе ён выступаў на пленарным паседжанні Міжнароднага Кангрэса даследчыкаў Беларусі ў Коўне, публікаваўся ў часопісе "Палітычная сфера" (Цярпенне невыцерпнага:суіснаванне ў Вільні XVII стагоддзя). Светлая памяць!

Адзін з акадэмічных вынікаў мінулага Дзясятага Кангрэса - у новым нумары часопіса Topos апублікаваныя вынікі круглага стала, які адбываўся падчас Кангрэса, і быў прысвечаны праблемам антрапалогіі ў часы сацыяльных катастроф, як даследаваць супольнасці, калі ідуць рэвалюцыі і войны? Гэты блок выдатна кладзецца на агульную тэматыку нумара, прысвечаную таму, як акадэмічная супольнасць адрэагавала на пачатак расійскай агрэсіі ў Украіне. Спасылка на нумар.

Беларускую навуку, па ўсёй бачнасці, чакае зацяжны крызіс, які працягнецца як мінімум да завяршэння вайны і зняцця санкцый.
Большасць праектаў з заходнім фінансаваннем ўжо спынена. Развіццё адносін на ўзроўні дзяржаўных устаноў немагчыма. Наўрад ці гэтыя страты будуць кампенсаваныя дзяржаўным бюджэтам ці Расіяй, хіба што ў асобных галінах і інстытутах, звязаных з абаронай.
Некалькі хваляў палітычных звальненняў пасля 2020 года ў Акадэміі навук і ўніверсітэтах вымылі з іх не толькі спецыялістаў, але і менеджараў, здольных генераваць ідэі і кіраваць даследчымі праектамі. Гэты патэнцыял і так быў даволі сціплым, а цяпер перажыў крытычнае скарачэнне. Значная яго частка ўжо пакінула краіну або сышла ў далёкія ад навукі сферы.
Прынятыя і яшчэ будучыя санкцыі прывядуць да дэфіцыту тэхнікі, матэрыялаў і ўсяго, што можа быць выкарыстана для падвойнага прызначэння. Мабільнасць даследчыкаў і доступ да вынікаў замежных калегаў будуць моцна абмежаваныя.
У такой сітуацыі важна разумець, якія магчымасці яшчэ засталіся для працягу паўнавартаснай кар'еры. І ў тых, хто застаўся ў дзяржаўнай сферы і ў тых, хто быў вымушаны сысці.
У панядзелак, 13 лютага, пройдзе сустрэча з дэлегацыяй нямецкага даследчага фонду - найбуйнейшай падобнай арганізацыяй Германіі, якая фінансуе даследаванні на мільярды еўра кожны год.
Мэта сустрэчы - растлумачыць, якія існуюць магчымасці падтрымкі для навукоўцаў Беларусі, прычым як і для тых, хто ў краіне, так і для тых, хто знаходзіцца за мяжой. Гэта тычыцца абсалютна ўсіх дысцыплін - сацыяльных, прыродазнаўчых і тэхнічных.
Рэгістрацыя да панядзелка (13 лютага) 13.00 па мінскім часе (12.00 па Вільні)

Арганізацыйны камітэт абвяшчае збор заявак на стварэнне панэляў у межах XI Міжнароднага Кангрэса даследчыкаў Беларусі. Сёлета Кангрэс адбудзецца з 22 па 24 верасня 2023 года ў Гданьску (Польшча).


Панэлі могуць быць прысвечаны абмеркаванню асобных даследчых праблем ці прэзентацыі вынікаў навуковай дзейнасці ў межах асобных дысцыплін ці даследчых накірункаў. Пры падачы матэрыялаў арганізацыйны камітэт не ставіць дакладных тэматычных ці дысцыплінарных абмежаванняў, пакідаючы магчымасць прадстаўнікам акадэмічнай і экспертнай супольнасці самастойна артыкуляваць свае прыярытэты і зацікаўленасці.


Колькасць удзельнікаў панэляў на стадыі падачы заяўкі таксама не абмяжоўваецца. Калі ўдзельнікаў будзе больш за шэсць чалавек, заяўленая панэль можа быць падзеленая на некалькі асобных панэляў, калі ўдзельнікаў будзе больш за 20 чалавек, яна можа працаваць як асобная секцыя.


Арганізацыйны камітэт запрашае даследчыя і экспертныя арганізацыі і супольнасці, а таксама акадэмічных лідараў прыняць удзел у вызначэнні тэматычных прыярытэтаў сёлетняга Кангрэса.


Заяўка можа быць як калектыўнай, так і індывідуальнай. Заяўнікамі могуць выступаць асобы, а таксама зацікаўленыя інстытуцыі і арганізацыі. Для падачы заяўкі неабходна да 20 сакавіка 2023 года запоўніць наступную анлайн-форму: Call for panels 2023 (wufoo.com)


Дадатковыя пытанні можна задаць, напісаўшы нам на пошту: icbs@palityka.org

Збор намінацый на Прэмію Кангрэса за найлепшую навуковую публікацыю (да 10.05.23)

Арганізацыйны камітэт Міжнароднага Кангрэса даследчыкаў Беларусі аб’яўляе збор намінацый на Прэмію за найлепшую навуковую публікацыю ў галіне сацыяльных і гуманітарных дысцыплін па вынікам 2022 года.

Запрашаем прадстаўнікоў акадэмічнай супольнасці вылучыць на Прэмію найлепшыя навуковыя публікацыі і зрабіць свой унёсак у папулярызацыю дасягненняў беларускай навукі і ўзнагароджанне іх аўтараў за іх дасягненні.

Прапановы можна падаць на адрас premija@palityka.org да 10 мая 2023 года.

Урачыстае наданне прэміі адбудзецца 23 верасня 2023 года падчас XI Міжнароднага Кангрэса даследчыкаў Беларусі ў Гданьску (Польшча).

Фундатары Прэміі: Беларускі дабрачынны фонд (Лондан) і сям’я Кіпель (ЗША).

Прэмія аб’яўляецца ў трох намінацыях: – Гісторыя; – Гуманітарныя навукі; – Сацыяльныя навукі: палітычныя навукі, сацыялогія.

Праводзяцца два асобных конкурса для навуковых манаграфій і артыкулаў.

Звяртаем вашу ўвагу, што заўтра завяршаецца збор заявак на арганізацыю панэляў на ХІ Міжнародным Кангрэсе даследчыкаў Беларусі. Збор індывідуальных заявак пачнецца з красавіка.

Арганізацыйны камітэт Міжнароднага Кангрэса даследчыкаў Беларусі абвяшчае збор індывідуальных заявак на ўдзел у XI Міжнародным Кангрэсе даследчыкаў Беларусі, які адбудзецца з 22 па 24 верасня 2023 года ў Гданьску (Польшча). Галоўныя польскія партнёры ХІ Кангрэса - Музей Другой Сусветнай вайны ў Гданьску, Еўрапейскі цэнтр Салідарнасці, Нацыянальны Mарскі Mузей ў Гданьску.

У 2023 годзе праца Кангрэса будзе адбывацца па 14-ці даследчых накірунках (Панэлі), якія ўключаюць усе асноўныя сацыяльныя і гуманітарныя дысцыпліны: гісторыя, міжнародныя адносіны і паліталогія, сацыялогія, лінгвістыка, літаратуразнаўства і іншыя.

Для таго каб прыняць удзел у Кангрэсе ў якасці выступоўцы неабходна запоўніць АНЛАЙН-ФОРМУ і прадставіць тэзісы памерам 2-4 тыс. знакаў. Дэдлайн - 15 траўня 2023 года.

Шаноўныя сябры! Нагадваем, што 15 траўня завяршаецца збор індывідуальных заявак для ўдзелу ў ХI Міжнародным Кангрэсе даследчыкаў Беларусі (22-24 верасня 2023 года, Гданьск). Яшчэ ёсць час падаць сваю заяўку!

Ад імя арганізацыйнага камітэта Міжнароднага Кангрэса даследчыкаў Беларусі мусім паведаміць пра складаную фінансавую сітуацыю з Кангрэсам, які запланаваны 22-24 верасня ў Гданьску.

На вялікі жаль і цалкам незапланавана для нас асноўныя партнёры, якія фінансава падтрымлівалі Кангрэс, істотна скарацілі дапамогу на гэты год. Гэта пры тым, што цэны значна выраслі ва ўсім рэгіёне.

Асноўная місія Кангрэса – збіраць вялікую колькасць навукоўцаў і экспертаў розных дысцыплін, ствараць прастору для супольнай камунікацыі. Але сітуацыя ў гэтым годзе ставіць канцэпцыю пад пагрозу. У Арганізацыйным камітэце нават ставілася пытанне пра адмену Кангрэса ў гэтым годзе.

Пасля працяглай дыскусіі мы змушаны значна скараціць колькасць субсідый на пражыванне і транспарт, а таксама перавесці частку секцый у анлайн-рэжым. Гэта рашэнне для нас вельмі складанае, паколькі разбурае традыцыйны фармат падзеі, але на дадзены момант мы не маем іншага выбару. Вельмі спадзяемся на ваша разуменне складанай сітуацыі, у якой апынулася арганізацыйная каманда Кангрэса.

У анлайн рэжым пераводзяцца наступныя секцыі:

9. Філалогія
10. Гістарычная і культурная спадчына
11. Культура і культурныя даследаванні

Арганізацыйны камітэт

Міжнароднага Кангрэса даследчыкаў Беларусі

Шаноўнае спадарства!

У папярэднім публічным звароце мы паведамілі пра складаную сітуацыю, якая паўстала з фінансаваннем Кангрэса ў сувязі з чым было прынятае няпростае рашэнне пра перавод некалькіх секцый Кангрэса (культурніцкай скіраванасці) у анлайн-рэжым. Гэта рашэнне выклікала публічную дыскусію, але таксама і хвалю падтрымкі Кангрэса. Мы шчыра ўдзячныя ўсім, хто звярнуўся з прапановамі дапамогі, бо выявілася, што Кангрэс – гэта сапраўды важная з’ява для беларускай навукі, для беларускага грамадства, для нашай супольнасці.
Мы паведамляем, што зараз вядуцца перамовы пра падтрымку, якая дазволіць нам вярнуць усе секцыі ў звычайны рэжым. Выбачаемся, што сітуацыя склалася такім складаным чынам, але спадзяемся і на аднаўленне працы ўсіх секцый і панэляў, як гэта было першапачаткова запланавана.

З павагай,
Арганізацыйны камітэт
Міжнароднага Кангрэса даследчыкаў Беларусі

Радыя паведаміць, што адкрыта рэгістрацыя для прадстаўнікоў медыя, удзельнікаў круглых сталоў, арганізатараў публічных мерапрыемстваў, валанцёраў і гасцей на XI Міжнародны Кангрэс даследчыкаў Беларусі, які пройдзе 22-24 верасня 2023 года ў Гданьску (Польшча).

Рэгістрацыя працягнецца да 10 верасня 2023 года.

Зарэгістравацца можна па наступнай спасылцы

Пабачыў свет першы нумар філасофска-культуралагічнага часопіса «Топас» (Topos) за 2023 год. Выпуск прысвечаны 100-годдзю з дня нараджэння французскага філосафа Карнеліуса Кастарыядзіса. Адной з падрыхтоўчый стадый для гэтага нумара стала адмысловая панэль на Міжнародным кангрэсе даследчыкаў Беларусі ў Коўне - 2023.

Артыкулы, прадстаўленыя ў выпуску, працягваюць традыцыю міждысцыплінарнай дыскусіі, накіраванай на аналіз розных аспектаў сацыягуманітарных ведаў у сучасную эпоху. У нумары разглядаюцца розныя грані філасофскай творчасці Карнэліюса Кастарыядзіса ў кантэксце ўплыву яго ідэй на грамадства, культуру і палітыку. Артыкулы прапануюць усебаковы разгляд тэорый Кастарыядзіса і іх актуальнасці ў сучасных дыскусіях аб дэмакратыі, трансфармацыі грамадства і мастацкім самавыяўленні. Нумар даступны па спасылцы.

📣 Прайдзіце апытанне для правайдэраў беларускіх адукацыйных праграм – дапамажыце SALT-2 палепшыць падтрымку

У межах праграмы EU4Belarus – SALT-2 (Support for Advanced Learning and Training) Еўразвяз правядзе конкурс грантаў для праектаў дыстанцыйнага навучання. Калі вы працуеце з такімі праектамі, то адпаведны грант можаце атрымаць і вы.

Каб палепшыць гэты і іншыя фарматы падтрымкі студэнтаў, выкладчыкаў і арганізацый беларускай адукацыі, была запушчаная апытанка: https://forms.gle/GiZLGQMGtyVi56jp9

Калі вы з'яўляецеся прадстаўніком праграмы, ініцыятывы або платформы, што распрацоўвае і праводзіць дыстанцыйныя адукацыйныя курсы любога ўзроўню, – мы просім прайсці гэтае апытанне.

З яго дапамогаю вы зможаце расказаць аб патрэбах і праблемах, з якімі сутыкаецеся ў працы. Гэта дапаможа адаптаваць праграму SALT-2 пад патрэбы арганізацый беларускай фармальнай і нефармальнай адукацыі і аказваць ім больш эфектыўную падтрымку.

Арганізатары апытання гарантуюць яго канфідэнцыйнасць.

Апублікаваны шорт-ліст Прэміі Міжнароднага Кангрэса даследчыкаў Беларусі, узнагароджанне пераможцаў адбудзецца падчас Кангрэса 23 верасня ў Гданьску.

У Гданьску выдатнае надвор’е!