"ЕЛЛЕРИМ БАРДЫ". Халық артисти Айымхан Шамуратова.10.06.1917-29.05.1993.


✨ 𝐓𝐞𝐥𝐞𝐠𝐫𝐚𝐦: https://t.me/ibratli_sozler

🤔#КҮН СОРАУЫ#

Бир жигит бир қызды атына мингестирип киятыр екен, сонда алдынан бир жигит шығып
«Мына қызды алып қашып киятырсаңба?» – дейди.

☝️Сонда қыз:
– Ҳәй-ҳәй жигит, ҳәй жигит,
Абайлап сөйле сен жигит,
Бул жигиттиң қайын енеси,
Мениң анамның қудағайы,
Сонда мен неси боламан дейди???

Жуўабыңызды пикирлер бөлиминде күтип қаламыз.

https://t.me/ibratli_sozler

#СИЗ БИЛЕРМЕДИҢИЗ? #

БАРСА КЕЛМЕС

Арал теңизинде «Барса келмес» деген атаў бар. Бул туўралы да түрли халық аңызлары тилден-тилге айтылып жүр. «Барса келмес» көлеми жағынан әдеўир үлкен атаў. Онда мал оты ушын жуғымлы от-шөплер, түрли өсимликлер өседи. Бурынлары Арал жағалаўларында отырған байлар, қыс күнлери өзлериниң малларын қыслатыў ушын Барса келмеске алып келип, ерте бәҳәрде муз ериў алды малларды алып кетеди екен. Бир жылы бәҳәр ерте келип, күтилмеген ўақта бирден муз түсип кетип, маллар қайта алмай атаўлап қалған. Бул ҳәдийседен кейин халық бул жерди «Барса кел мес» деп атаған. Бул туўралы халық аңызының басқа бир түринде, бир ўақытта атаўда үлкен сең басыў апатшылығы болған. Онда турған адамлар ҳәммеси набыт болып жан-жаныўарлар қырғынға ушырайды екен.

©Қәлендер Әбдимуратов "Неге усылай аталған" китабы.

... БУЛ ЕНДИ АҢЫЗ. СИЗ БУЛ ТУУРАЛЫ НЕ БИЛЕСИЗ ЗАМАНЛАС????

#ўақыя

ҚАРЫНДАСЫМ ҲӘМ ҲАЯЛЫМ

- Ким болыпты өзи ол, қарындасыма қол көтереди?! Еле көрсетип қояман, — ашыўланған әжаға қарындасының көгерген қабағына қарап оннан беттер ашыўланып.
— Қойың... — жылаўда даўам етти қарындас,— Күйеўимниң ашыўы тез... — ҳәзир ғана күйеўинен шикәят етип турған қарындасы әжағасынан қорқып күйеўиниң тәрепин алды, — азырақ ўақыттан кейин кеширим сорап келип қалады.
— Урып болып, енди кеширим сорайма?! Кеширимин писирип жесин! Мен қарындасымды хорлатып қоймайман. Мен де оның маңлайына бир муш урып, кейин кеширим сорайман!
— Ондай қылмасын, — қарындасы көзин мөлтиретип кишесине қарады.
— Ағасы... — тилге кирди ҳаялы да, — шаңарақ болғаннан кейин бундай ҳәдийселер болып турады...
— Сен араласпа!
— Ҳаў... — ҳаялы жерге қарап әсте сөйледи,— мениң әжағаларым топалаң етип келген жоқ қо...

Еркек дәрриў ҳаялының көзине қарады. Еле азырақ изи бар екен. Өткен ҳәпте жумыста ярым түнге шекем усланып қалған еди. Сонда ашыўланып үйге келгенде «Неге кеш келдиңиз?» деп сораған ҳаялын жумыстағы ашыўын баса алай ийтерип жиберген еди. Соннан көзи қапыға тийип көгерип қалды.

Кишесиниң сөзиниң астындағы мәнини түсинген қыз ойнап жүрген баласын жетелеп, уялғанша әсте шығып кетти.

... ПИКИР ЖҮРИТЕЙИК ӘЗИЗЛЕР!!! 👇👇👇

... СИЗГЕ ТАНЫС ЖАҒДАЙМА ӘЖАҒА?!??

.... СИЗ СОНДАЙ ЖОЛ ТУТТЫҢЫЗБА КИШЕ?!??

.... БАСЫҢЫЗДАН ӨТКЕНИ ӨЗИҢИЗГЕ АЯНҒОЙ ҚАРЫНДАС, СОЛАЙ ЕМЕСПЕ??!!

👇👇👇👇
https://t.me/ibratli_sozler

#мәнили сөзлер#

"ИЙТ БАСЫНА ИРКИТ ТӨГИЛГЕН ЗАМАН"

  ... Бул гәп әсиресе жасы үлкен ғаррылардың тилинде көп қолланылады.

   Иркит- сөзи бизиң тилимизде қатық дегенди аңлатады. Бул гәптиң келип шығыў дереги төмендегише болған деседи: Өткен заманларда ағарған бизиң халқымыздың тийкарғы күн көриси болған. Ағарғанды бийдарық (жөнсиз) жерге төкпеген. Халқымызда ағарған қатқан аўқатты ийтке қуймайтуғын дәстүр еле бар.
Ертеде хешким ағарғанды пулға сатпаған. Хәтте түн болса ағарған хешкимге берилмегенде, хешким буған өкпелемегенде....

   Ҳәзирги заманда ҳәмме нәрсе молшылық болып кетти. Нан да, ағарған да табылады. Ҳәтте керегиңнен аўысып, төгилип-шашылып атырған заман. Соның ушын халық тилинде "ийт басына иркит төгилип атырған заман" дейди.



Дерек: Әбдисайыт Пахратдинов. Мәнили гәплер ҳәм халық әпсаналары. Ред. А. Қарлыбаев - Нөкис "Қарақалпақстан" 1989, 116 б

https://t.me/ibratli_sozler

"ЕРКИН БАЗАР"

Ергенекли бул дүньяның
Ҳәзир еркин базары көп. 
Жер жәҳәннен дүнья малдың
Келип турған гүзары көп.

Ҳәр ким оған барын салған, 
Ҳәтте намыс-арын салған. 
Биреў сәтли саўда қылған,  Биреўлерге ҳазары көп.

Ҳасыл гәўхар. зери де бар, 
Аптекте жоқ дәри де бар, 
Пулың болса бәри де бар. 
Пулсыз көзиң қызары көп.

Импорт этикети керек, 
Кимге қустың сүти керек. 
Кенгурийдиң ети керек, 
Хәўес етсең мазалы деп.

Арақ-шараплар базары, 
Қурал-жарақлар базары. 
Тест ҳәм сынақлар базары, 
Компьютерди бузары көп...

Қымбат қағазлар базары, 
Сәўбет ҳәм сазлар базары, 
Жилўа хәм назлар базары, 
Арқа-мойын жазары көп...

Алып-сатарға мал керек, 
Биреўлерге ҳамал керек. 
Керекке жығылар терек, 
Аллергияң қозары көп.

Бул базардан инсап күтпе, 
Бағынбас өл ҳүкиметке. 
Арзанлар деп дәме етпе,
Жүрегиңниң сазары көп.

Қиянет көп, мириўбет аз, 
Болды десең ҳәммеси саз, 
Доллар деген бир "көк қағаз
Бәрин пыт-шыт бузары көп...

Көлденең әўмет базары, 
Кәҳәтли хүжжет базары, 
Жумыс ҳәм мийнет базары, 
Табаныңның тозары көп.

Ҳәр ким пайдасын гөзлеген, 
Ырас-жалғаннан сөзлеген. 
Бирақ бунда мен излеген, 
Муҳаббаттың базары жоқ.

Сондай базар болғанында, 
Сен базарлап барғаныңда, 
Шасәнемдей баяғыда —
"Мен Ғәрипти сатып ал" деп, 
Жығыларем аяғына

Ибрайым Юсупов.

👉https://t.me/ibratli_sozler

✅ЖУМБАҚТЫҢ ЖУУАБЫ:

Жигит мингестирип киятырған қыз, қарындасы болады.

https://t.me/ibratli_sozler