رد بالك دير الغلط وتكابر، قعمز مع نفسك خاطبها وافهم علاش الغلط درته؟

عالج المشكلة وحاول معاش تكرر نفس الغلط.
لكن إنك تغلط وتكذب على نفسك إنك صح ف هذا الشيء مش حيضر حد إلا أنت.

في النهاية إحني بشر وكلنا نغلطوا وهذا شيء طبيعي.

لكن اللي مش طبيعي إنك دير الحوله على الغلط اللي ارتكبته وتعتبره صح وتكمل حياتك عادي.

في النهاية لا يصح إلا الصحيح.

في شيء ديمه ندير فيه وللأمانة استفدت منه هلبا، دائماً في نهاية اليوم راجع نفسك شن درت صح وشن درت غلط وحاول اليوم الثاني اطور من نفسك وتتعلم من غلطتك.

الفترة هذه كلها كنت مضايقة للترليون وحرفياً كنت كئيبة يعني متع خلاص ما خاطري نهدرز مع حد لكن أمس نقلب في الصور متع نهاية العام إللي فات وبداية العام هذا، قلت لنفسي أنا شن ندير؟
معقولة أنا أنانية للدرجة هذه؟

معقولة أنا مدايره في نفسي هكي على الرغم من كل شيء جميل عشته؟

يعني أبسط مثال، وصلت في صور كأس العالم والله فرحت على خاطر اذكرت شعوري كيف كان لما ربحوا الأرجنتين.

مقصدي، أنا في حياتي لحديث الآن عشت هلبااااا مواقف جميلة جداً جداً وكذلك عشت مواقف محبطة ولكن للأسف قررت لا إرادياً نركز على المواقف المحبطة أكثر وسمحت ليها انها تتوغل داخلي وتعيشني في حزن.


وهذا شيء غلط.
مفروض معاش نسمحوا لشيء يأخذ أكثر من وقته، معاش نسمحوا لشعور معين ياخد جزء كبير من حياتنا ويسلب منا طاقتنا وحماسنا ويخلينا نعيشوا في جوه.

الحياة مش واقفه على موقف معين صار، ف علاش إحني بنوقفوا؟

أصلاً هي علاش إسمها حياة؟
كل شيء فيها حي، جميع المشاعر والمواقف حية، سواء كان سعادة، حزن، ألم، غدر، حماس، متعة، كل شيء فيها حي.

ف خلوا في بالكم فكرة انه عادي لو تعرضنا لموقف يضايقنا لكن مش عادي نخلوه يأثر علينا ويأثر على اسلوب حياتنا.

لأنه زي ما في مواقف حتضايقنا، حيكون في مواقف تخلينا أسعد الناس في الحياة.

أصلاً في حياتنا ضروري ما يكون في توازن، أكيد يعني مش حنعيشوا حياتنا كلها زي ما نبوا!

والقدام حتقابلنا هلبااا مواقف تضايقنا، ف ضروري نتعلموا من توا كيف نتعاملوا معاها.

وبس، في إللي بيقولي الكلام ساهل!
فعلاً صح الكلام ساهل وحتى الفعل ساهل على حسب الشخص شن يبي وعلى حسب الشخص شن بيصدر قدام أي موقف.

الموضوع كله عبارة عن قرار.

وبس، وفي النهاية خليكم دائماً واثقين بالله سبحانه وتعالى أن كل مُر حيمر.

فيديو مهم جداً.

كالليلة السرمدية

اذهب كل ليلةٍ إلى ذلك المكان، على أمل العودة، انظر إلى تلك الأوراق المتساقطة التي تذكرني بتساقط ذلك الأمل، اترقب خيالك بينما أنا جالسة على نافورتنا الفيروزية وأكتب تلك القصيدة التي وعدتني أن نكتبها معًا وكأنني شاعرة الموت، أصبح المكان من دونك مكتظ بالغبار على تلك النافورة
لقد نزحت جميع الطيور وتساقطت جميع أوراق الشجرة الخشبية، جميع الألوان تحولت إلى الأبيض والأسود.
كيف لي أن أرى الآن؟
بقيت مستيقظة طوال الليل أخبر نفسي أنني بخير، كل ليلة أتحدث مع شبحك، لماذا ذهبت بعيداً؟
وكأنها ليلة سرمدية