الابراج !
- مالها
من آمن بها فقد كفر
- ومن قرأ عنها لن تقبل له صلاة أربعين يوما !

صباح الخير على قلبي، وعلى اللي يحبهم قلبي♥️.

‏أنت إنسانٌ ناجِح مهما أخبرك البعض بعكس ذلك ،سَيسطع نُور إنجازك يوماً فقط؟ آمن بِذلك♥️.

قالت :
قبل فترة كنت متشاكلة مع صحباتي كلهم، و حرفياً الدنيا كان بتكفت فيني وبتحداني أضحك عديل، كُنت حاسة روحي تايهة تماماً ما عارفة يميني من شمالي، ولا عارفة أفكر علشان أحل الحاصل دا كلو ، ومن بين صحباتي كلهم أنا كُنت مشتاقة ليها هي، وكُنت متأكدة أنا مجرد ما أحضنها أي شي حيترتب، بس بقعد وبعاند..
قفلت تلفوني وبعدت عن ناس بيتنا، أعتزلت الجامعة وقاعدة بين أربعة حيطان ما بمرق منهم مهما حصل..
يوم صحيت بي جوطة فوق راسي لقيتها هي زاتها بتتونس مع أختي، حسيت روحي زي البحلم دا شنو وهي متين جات، وأساساً هي زعلانة مني..
قبل ما أفتح خشمي وأتكلم كانت لاماني في حضنها، أي هي لملمتني أنا كنت مشتتة وضايعة ، حسيت بي أمان الدنيا كلو لحظتها، بكيت وهي كانت بتقرا لي آخر تلاتة آيات من سورة البقرة وأنا ببكي، بكيت شوقي ليها ، وبكيت زعلي منها، بكيت الأيام الكُنت بعيدة منها فيها، بكيت تعبي..
بعد فكتني عاينت لي ودموعها عشرة عشرة قالت لي
" بقيتي أحسن؟"..
وأنا حقيقة كنت في أحسن حالاتي بي شوفتها وحضنها..
ما سألتني مالك؟، أو لامتني على العملتوا معاها
مكيجنتي، وأختارت لي فستان وودتني البحر، أكلنا تبش وذُرة وأسكريم، أتونسنا في أي شي مُبهج ممكن تتخيلهوا، أنا كنت مليانة سعادة لمن بدفق، طول الطريق كانت ماسكة يدي وما فكتها، في نهاية اليوم قالت لي
" مهما حصل ومهما زعلتي مني أو من الدنيا أنا قاعدة، وأنا أساساً إتخلقت علشان أشيل منك وتشيلي مني، أوعك تسمحي لي روحك تصلي المرحلة دي تاني، وأنا معاك في كل خطوة حتاخديها إلا أنك تنهي صحبتنا وتبعدي مني"

-
فالمهم يخوانا الصحبات أعتذار الكون عن السوء المعيشنا فيهُ دا ، مافي حاجة أسمها مجتمع البنات كعب وماف بنت ممكن تكون صحبتك شديد، أنتِ بس ما عرفتي تختاري صح و ختيتي مجتمع البنات شماعة لي غلطك، نحن حلوات وبنسعد وبنشجع بعض كمان، أنتِ أختاري صح بس 💙💙.

#رُبا_خالد

‏" يصل الإنسان إلى النضج، فلا تعود معظم الأشياء التي كانت تعنيه ، تعنيه ."

انا طالبه جامعيه كنت شغاله في صالة افراح قبل الحظر ابوي متوفي انا الكبيرة واخوي الاصغر مني عمرو 20 سنه اسي سافر الدهب ليهو 15 يوم ولسه ما جا ونحنا ظروفنا تعبت شديد الفترة دي قطعنا مصاريف واكل واالله حق الشاي ما عندنا ولا سكر بعت تلفوني ومشينا بيهو اسبوع وقطعنا اخواني الصغار بمشو ياكلوو مع شفع الجيران وبجو وامي بترفض تمشي تاكل عندهم تقول لو متنا من الجوع ما بنمشي نشيل لقمة غيرنا من صحنهم وهي عندها سكري م بتتحمل الجووع والله امبارح صحيت الصباح لقيتها رابطه بطنها من الجوع قلبي وجعني طلعت اليوم كلو فتشت شغل ما لقيت حاجه اشتغلو مع الوضع دا والصالات لسه ما اشتغلت انا بس عايزاكم تساعدوني بي مواد اكل اي شي ان شاء الله كيس عدس و رز اي شي يمشينا بس لحدي ما اخوي يجي او انا اشتغل بعد الاوضاع تتصلح وارجع شغلي بس البقدر يساعدني بوصف ليهو البيت ويصلنا لحدي البيت ان شاءالله لو بي كيس عيش وفي ميزان حسناتكم

يا جماعه مناشدة خير عليكم الله انك تشير بوست أو توصلو لي جمعية خيرية إذا بتعرف م صعب عليكم الله شيرو البوست في اي مكان إذا زول عايز يتبرع دا الرقم رسلو ليها
الشير للخير بس😭💛💛💛💛


0128765058

#منقول
"انّا لله و انّا اليه راجعون" .. 💔💔💔

‏"ما تبرر لأي زول مشاعرك ومزاجك ماف زول عاش ضغوطاتك ولا في زول عارف تفاصيلك ولا عارف أنت استحملت شنو وخلي في بالك أنو ماف زول مجبور يستحملك وأنت م مجبور تحافظ على أي زول."

‏لازم نتعلم ثقافه التخلص، التخلص من اي حاجه ماعندها معنى، زوائد تثقل كاهلنا، اصدقاء سيئين، مشاعر مؤذيه، اشخاص وجودهم زي عدمو، بعدها هنلاقي مساحه كبيره في حياتنا، وأشخاص رائعون يشبهوننا وإجابية عاليه، بعد تطبيق هذه الثقافه.

‏يعرفني ككُل الأشياء المألوفة والدافئة في العالم، يعرف أنني أهرب له من قلقي ليمنحني الطمأنينة، وأنه إذا هرب من الضجيج إليّ سأمنحه السكون، نحبّ بعضنا لأنه يفهمني وأفهمه، ولأن حبّنا يشبه التحليق بعد سنواتٍ من البحث عن الأجنحة، لكنه لم يمنحني جناحًا هذه المرّة، لقد أعطاني السماء♥️..

‏مافي زول عارف عمره الجاي اكتر من الراح ولا أقل بس عارف ان الحياه ماناقصة تعقيد نهائي ليه البني ادم بحب يصعب الدنيا ما بس علي غيره لا بصعبها علي نفسه هو كمان و في يوم من الايام حيحس انوا الدنيا ما مستاهله بس دايما البني ادم بعرف الحاجة متأخر شوية..

‏ليس الطريق لمن سَبَق، إنَّما الطريق لمن صَدَق.
- الإمام الشافعي

‏تمادوا بحُب الأشياء التي تجعل أرواحكم رحبة♥️.

‏"انا ماكنتش عايز اعلق نفسي بحب نهايته جروح ."💔

‏يوجد في الشارع الذي تقيمين فيه تسع نساء أجمل منك، وسبع نساء أطول منك ، وتسع نساء أقصر منك و أخرى تحبني أكثر مما تفعلين، وفي العمل هناك امرأة تبتسم لي دائماً ، وأخرى تستحثني علي الكلام ، والنادلة في المطعم تضع لي العسل بدلاً من السكر في الشاي ،ولكنني أحبك أنتِ.

‏"يقتلني منتصف الأشياء دائمًا .. المكان الذي لا أعرف فيه إلى أين أنتمي وهل عليّ التقدم قليلاً أم التراجع للأبد , اللحظة التي أظل أتخبط فيها و أدور في نفس الدائرة دون أن أفهم ما لي وما عليّ".

لو مُمتحن شهادة سودانيِّة البوست دا ليك 💙

أول حاجة أخد نفس عميق كدا وأطلع من الدبرسة بتاعت الإمتحان قرب ويمكن ما أقدر ألحق دي..
قول بسم اللّٰه وأحسبها براحة كدا.. عندك في الشهر دا 11 يوم، وشهر 8 بحالو و13 يوم من شهر 9.. طلع منها يوم العيد وتانية العيد، دي كم يوم؟
53 يوم بالضبط!
53 يوم ل7 مواد.. حأديك إستراتيجيات بسيطة تقدر تعمل بيهم جدول زابط شديد، من خلالو حتقدر تخلص المواد كلها في الفترة دي وكمان تراجعها وتركزها كويس بإذن اللّٰه 👌

-الإستراتيجية الأولى:
بالنسبة لزول ما قرا شيء في الفترة الفاتت دي.. حكاية إنك تمسك مادة واحدة تكملها وتمشي للبعدها يمكن تكون مملة شوية وحتحِس بإنو المادة كتيرة وما عايزة تخلص بالذات المواد المحتاجة حفظ.
-طيب الحل شنو؟
التربية الإسلامية، الإنجليزي، والأدب.. المواد دي خليها ثابتة في جدولك بتاع المذاكرة، قسمها لدروس وكل يوم لازم تقرا درس من كل المواد دي، درس واحد وما تزيد عليهو.. لو بديت من بكرة بالطريقة دي حتنجز الأتِي 👇🏼

" -في 25 يوم حتخلص الأدب
-خلال 38 يوم حتخلص التربية الإسلامية
-تقريبًا القِطع الفي الإنجليزي ما فايتة ال20 فحتقدر تخلصو في أقل من 20 يوم لو كل يوم بتقرا قطعة و 10 أيام أديها للliterature"

كدا ضِمنت إنك خلَّصت مادتين كاملات ومعاهم الأدب، وبدون ما تحِس بي أي ضغطة وإجهاد كبير. 👏

الإستراتيجيَّة التانية:
-عندنا في الشهر دا باقي 9 أيام من غير يوم العيد وتانية العيد أخدوهم إجازة
-شهر 8 نقسمو على ثلاثة أقسام "كل قسم فيهو 10 أيام"
-و 10 أيام من شهر 9

المواد الباقية اللي هي "كيمياء، أحياء/هندسية/حاسوب، فيزياء، رياضيات متخصصة" -بالنسبة للعلمي-
"تاريخ، جغرافيا، دراسات إسلامية، رياضيات أساسية" -بالنسبة للأدبي-
بالإضافة للبلاغة ووالقواعد..

ديل كدا ستة كتب، وبالنسبة للعلمي سبعة كتب -كتابين الرياضيات-

-ال 9 أيام الباقية من الشهر دا أدوها لكتابين بسيطات زي البلاغة مثلًا ومعاها الرياضيات "كتاب رياضيات واحد بس بالنسبة للعلمي.. يُحبذ تدوها للكتاب الثاني"
لما يجي العيد حتكونوا خلصتوا الرياضيات والبلاغة سوا
-باقي الكتب أي كتابين أدوهم 10 أيام، ال 10 الأولى من شهر 8 أدوها للكيمياء بس لأنها تقيلة وبالنسبة للأدبي أدوها للجغرافيا.
-ال10 أيام التانية من شهر 8 أدوها "للأحياء/هندسية/حاسوب" ومعاها الرياضيات الكتاب الأول لأنو بسيط.. وبالنسبة للأدبي أدوها للتاريخ.
-ال10 أيام الأخيرة من شهر 8 أدوها للفيزياء والقواعد، وبالنسبة للأدبي أدوها للدراسات.
-ال10 أيام الأولى من شهر 9 ركزوا فيها القريتيهو وحلوا إمتحانات كتيرة ولو في حاجة حسيتوا إنكم ما مزبطنها زبطوها في الأيام دي.
-ال3 أيام القبل الإمتحان دي ما تجهدوا نفسكم فيها وراجعوا فيها الملاحظات الصغيرة اللاقتكم أثناء قرايتكم.
أها ال53 يوم كفت ولا ما كفت؟

أخر حاجة عايزة أقولها ليكم ما تشتغلوا بالكلام السلبي من نوع لو كنت قريت من زمان كنت خلصت وأنجزت وكنت فعلت وفعلت و...الخ بعد دا الندم ما بفيد بشيء والفات خلاص إنتهى ولسه قدامكم فترة عشان تنجزوا فيها، هي فعلا فترة ضاغطة بس لو عزمتوا عزيمة حقيقية ما في شيء بوقفكم والله 💙
إتوكلوا على ربنا والأيام الجاية دي مباركة فأدعوا فيها كتير شديد، صلوا على الرسول كتير، أصحوا قبل الصبح بساعة صلوا فيها، وأدوا نص ساعة لنفسكم إتخيلوا فيها إنكم جبتوا النسبة العايزنها ورافعين راس أمكم وأبوكم 🌸
وكل ما تحسوا نفسكم تعبتوا رددوا لا حول ولا قوة إلا بالله، رددوها انتوا داخلين ومارقين..
"ما زاحم القرأن شيئًا إلا باركه" حاولوا تداوموا على سورة البقرة كل يوم وحتبارك ليكم في قرايتكم ووقتكم.
أخر حاجة الشهادة السودانية دي عايزة قعدة كرسي وعلى قدر ما تتعبوا هسي حتفرحوا بعدين..
والله الونسة ملحوقة والفيس ملحوق وما في شيء حيفوتكم 😂 كلها أيام بس، أيام حتحدد مستقبلكم فاغتنموها كويس. 🌸