إسلوب حيااه🌻💛

أمبارِح العصُر كدا .. كنت قاعدة في صيدلية منتظرَة المواصلات ، اللهُم الإنتظَار طال ، بقيت مرّة أقرأ في تلفوني ومرّة أسمع البنات الماسكات الصيدلية بيتونسُوا ، فجأة كدا جاء داخل واحد -متلازمة داون- ينشاف كبير في العُمر وشعرو مشيّب بس ياهو ملامحهُم البريئة ديك ، المقاعد بتاعات الإنتظار كانوا تلاتة فااا جاء وقعد في الكرسي التالت وخلى بيناتنا مسافة كُرسي في النُص وقال لي السلامُ عليكم ، رديت ليهو السلام وبقيت مواصلَة في تلفوني
بعد شوية طلّع جزمتو ووقف وبدأ يصلِّي..
كان بصلّي في الكُرسي لأنو شوية كبير في السِن..
ما ركزّت معاه بس كان مجتهد شديد في صلاتُو وبالرغم من إنها كانت ما صاح نوعاً ما ، بعد إنتهى بقى يهبّش في المعروضات كدا ، وشكلهم بعرفُوه ، البت نهرتُو : "لا عيب يا حمودي"
كان في عطر بخّ منو في يدو كدا وطلع!
بالرغم من إنهم شايفنو صغير وزي الشافع بس مين عارِف مقامو عند ربنا قدُر شنو!!
الموقف خلّاني أتفكّر في إنو ربنَا بيمنح حبه لمن يشَاء
الإلتزام بالعِبادات دليل محبة وتوفِيق من الله ؛ الناس البقيموا الليل ساعتهم البيولوجية بقَت مظبوطة على كدا ، وبرضُو الناس البيصحُوا للفجر في وقتو حتى ولو تلفوناتهم قافلة شحن والكهرباء كانت قاطعَة وما واصلهم صوت آذان .. بس بيَصحُوا ، مهما كانوا غرقانين في النوم بتجيهم صحيَة في الوقت البقوموا فيهو دايماً ، بدون منبِّه ، كأنوا ربنا بناديهُم ليهو
الآية بتقول :
{ والذِّينَ جَاهَدُوا فِينَا لنَهدِينَّهم سُبُلَنَا وإنَّ اللهَ لمعَ المُحسِنينَ}
يعنِي البتكُون عندو نِية الصَلاح وسعَى وخالَف هواه -مخالفة هوى النفس جهاد- حيلقَى بإذن الله التوفِيق والإعانة ، وختم الآية بإنَّ الله لمع المحسنين..
ما قال مع الصابِرين ولا قال معَ المتقِين ، قال مع المُحسنين
والإحسَان زي ما قال الرسُول عليه أفضل الصلوات وأتم التسليم "أن تعبُد الله كأنَّك تراه فإن لم تكُن تراه فإنه يراك"
فإنت لو وصلت لمرحلة الإحسان في العِبادات ما بعِيد يلازمك التوفِيق والإستعانة
لو إنت كثير الذكر فدا من توفِيق ربنا ليك ، لو محافظ على صلواتك في وقتها دا من باب توفِيقو ليك ، لو قاعد تتوب بعد كُل ذنب دا من باب توفيقُو ليك..
{ إيَّاك نعبُد وإيَّاك نستَعين * اهدِنَا الصِّراطَ المُستَقِيم } .. بنقُولها خمسة مرات كُل يُوم ، ملاحظين العبادَة معاها طلب الإستعانة على طُول ، لأنو نحن بدُون توفيق ربنا ولا شئ!
فااابالحِيل حيرنِي موقف حمودي ، وهو بحالتو دي وفي العُمر دا بس بصلِّي!
تفتكروا السبب الوفَّق حمودي متلازمة داون للصلاة في وقتها بينما مئات الـ "حمودي" صحيحوا البَدن والعقل ليسوا كذلك ؛ شنو السبب؟
حـ أخلي السؤال معلّق ، إتفكّروا وفتشُوا عن السبب في أنفسكُم!
#مريم_الشيخ💛

●

159 viewsأُمنيااآه💭, 10:00