#مطعم_الكفاح

بقلم: #نمارق_دفع_الله

الجزء 18


في يوم من الايام وفاطمة راجعة من المدرسة ومعاها هديل وهم لافين بي لفة كدة بس شافو عربية لافة بي نفس اللفة بتاعتهم ..وفاطمة خافت شديد. وبقت تلاوز للعربية لحد ما صدمتها ..ووقعت في الارض وهديل بدت تصرخ. في اللحظة دي العربية وقفت. نزل منها ولد كدة يكون عمرو زي 28سنة طويل حلاتو وملامحو اصيلة نيلية. رفع فطومة في العربية وجري علي المستشفى فتح بلاغ تحت اورنيك 8جنائي ودخلوها الدكاترة سريع اسعفوها. والحمد لله طلعت رضوخ بسيطة وكسر في اليد اليسرى. واتصلو لناس بيتهم وحضرو في المستشفي سريع. سهير تكورك وتسكلب. كر علي يا بنتي الحصل عليك شنو. ووب علي عين ووقعت عليك . وصديق وعمر يسكتو ويصبرو فيها. عبد المعطي قال ليها :يا سهير ده قدر ومكتوب الا شيلي الصبر واتحزمي في الحارة. وهم بتكلمو كدة الدكتور طلع وقال ليهم. وين اهل المصابه. عبد المعطي قال ليهو انا ابوها. ودي امها واقفه معاي. اها الدكتور :كل الحصل رضوخ بسيطة في الظهر وعشان نتاكد اكتر انو مافي شي خطير. عملنا صور مقطعية للراس ومنطقة الحوض بتظهر بعد ساعتين. وبالنسبة للكسر. فحاجة بسيطة بتاخد مدة وتشفي. وللاطمنان اكتر. ننتظر الصورة تطلع ونقرر علي اساسها .. الدكتور مشي منهم. وجاهم الولد اللي ضرب فاطمة بالعربية ووقف سلم عليهم وعبد المعطي وسهير عرفوهو لانو ده اشرف ولد سلمي جارتهم. المهم مرت الايام وقفلو الموضوع وعم عبد المعطي قال البت بنتي والولد ولدي ما عايز اي قضية وعفا الله عما سلف. والضربة دي كانت سبب لحاجة تانية ربنا مقدر انها تطلع ويسر ليها الاسباب وحنفهم الحكمة من الحادث في الحلقة القادمة. اها مودة دي عندها صحبتها اسمها يسرا حكت ليها باءحساس صديق تجاهها. وانو منتظر منها رد ومنتظر يتكلم ويتناقش معاها يسرا :هوي يا مودة عايزة الجد ولا ود عمو مودة :اكيد عايزة الجد يسرا :اسمعيني هوي. بلا حب بلا جوطة الولد ده لا بحبك لا شي وثم ثانيا حتي لو كان بحبك حيعمل ليك شنو يعني. الولد ده لسه قدامو مستقبل. حتخرج متين ويشتغل ويقدر يفتح بيت ويعيشك عيشة الملوك. يا بنتي خليك عملية وانجزي اقرب واحد جادي يجيك عرسيهو طوالي ولا تتلفتي. مودة :والله يا يسرا انا ما بحبو وما عندي شعور تجاههو سوي الاحترام وما بنظر ليهو غير انو زميل دراسة وبس. يسرا :خلاص عندي ليك فكرة مودة :فكرة شنو؟ ؟ يسرا :بما انك ما عندك شعور تجاهو. فليش ما تحسسيهو بانك بتحبيهو. ياخ عيشي وقتك وبس ..وبعدين فكيهو عكس الهواء منها تعرفي اذا بحبك جد ومنها تتسلي وتلقي اللي بيهتم بيك مودة :انتي يا يسرا بتنقضي نفسك بي نفسك كيف يعني اختبرو اذا بحبني او لا وفي نفس الوقت انا ما عندي ليهو شي. وما حارتبط بيهو ده اسمو يا يسرا لعب بالمشاعر ودي ما من اخلاقي يسرا :ما تعملي لي فيها مثالية بالله. البنات دي كلها بتحب واحد واتنين وتلاتة مودة قاطعتها :هو حب ولا قطع غيار. لالا والله انا م بعمل حاجة زي دي. ما بقول ليهو بحبك بالكذب وفي نفس الوقت ما بقدر اجرحو. والله ما عارفه اعمل شنو يسرا :خلاص خليك كدة *انا العلي عملتو ووريتك تعملي شنو. مودة :فوضت امري لله. واكيد لو الموضوع فيهو خير ربنا بسهلو لي والعكس صحيح



يتبع....

#مطعم_الكفاح

بقلم: #نمارق_دفع_الله

الجزء 19



مرت الايام وفطومة طلعوها من المستشفي بيتهم. وزيارات اشرف اتوالت عليهم وطوالي بجيها يطمأن علي حالها ولمن يغيب ما يجي فطومة بتكون قلقانة ويومها ناقص. اها يوم كالعادة من الصباح طالع عشان يمشي علي بيت عم عبد المعطي سلمي امو قبضتو في باب الشارع. اها علي وين يا ابو الشوش. اشرف :والله يا امي ماشي اطمئن علي البنت الضربتها دي. سلمى:هوي يا ولد البنت بقت نصييبحة وتجري زي الحصان مالك ومالها. والله شايفاك سويت الدرب ساساقه لكن. كل يوم جاري بيت الناس. خلاص بعد ده كفا. واعقل اقعد ف الارض دي. وعلى فكرة انا زاتي خلاص قررت اعرس ليك اشرف :تعرسي لي شنو يا امي. لسة والله ما عايز اعرس هسة. سلمى:هوي ها على كيفك هو. انا لقيت ليك بنت اصيلة وبنت بلد وبتحترمني زي امها وحتحبك وتصونك في غربتك يا ولدي. اشرف:لكن يا امي انا لا شفتها ولا بعرفها اوافق بيها كيف؟ سلمى :ومنو القال انك ما حتشوفها وما حتتعرف عليها. بكرة مش الجمعه. حنعزمها هي واهلها شاي المغرب ومنها تقعد وتتونس معاها. اشرف :والله يا امي انا ما عارف اقول ليك شنو؟ لكن انا قلبي اتفتح لانسانه تانية وحاسس نفسي حاقدر اعيش معاها هي وبس. سلمى:انا اديت الناس كلمة وكلمت ام البنت. عايز تكسر كلمتي مالك. وثم ثانيا بلا قلبك انفتح بلا اتقفل. خليك مع اختياري واختيار قلبك ده خليهو ساي غير يوجعك ما حتستفيد حاجة. اشرف :حاضر يا امي. الله يكتب الفيهو الخير. خلاص استاذنك انا حامشي بيت عم عبد الفتاح ومنهم حاطلع لجماعه اصحابي. وبجي العصر. يلا السلام عليكم. اها اشرف طلع بي جاي وسلمي شالت التلفون وطوالي اتصلت لمنوو؟ اتصلت لتهاني والدة لينا. عشان تبشرها انها فتحت الموضوع مع ولدها وهو وافق مبدئيا كدة. تهاني لمن سمعت كلام سلمى طارت من الفرح ولو ما خافت سلمي تفكر انها مستعجلة وخفيفة كان زعردت لكن كتمتها. وسلمى طبعا عزمتها هي ولينا انو يشرفوهم بكرة المغرب في البيت. اها تهاني بعد قفلت الخط نادت لينا. تعالي يا لينا اجري يا بنتي. عاد جبت ليك خبر السرور لينا جات جارية. مالك يا ماما في شنو؟ تهاني :طاقه القدر واتفتحت لينا يا عسل لينا :طاقة شنو. وده كلام شنو البتقولي فيهو يا ماما. تهاني :ببساطة كدة في عريس لقطة طالبك للزواج وبكرة عازميننا اهلو المغرب وحنلبي دعوتهم اكيد لينا :عريس منو يا امي ومنو القال انا عايزة اعرس. تهاني :هوي يا بنتي تعرسي او ما تعرسي ده ما قرار بتتخذيهو انتي. عايزة اعرس ليك انا امك دي وباءرادتي عشان اطلعك من ذمتي. يا امي انا ما عايزة اعرس. ويلا انا طالعه وحامشي لفاطمة ازورها واجي. وطلعت وقفلت باب الشارع وراها وخلت امها واقفه في نص الحوش وتنادي ولينا ولا اشتغلت بيها. وسبحان الله اشرف ولينا الاتنين كل واحد ماشي يشوف حبيبو ماشين بيت الحب. بيت عم عبد الفتاح لكن كلو حب من طرف واحد. لينا بتحب صديق وصديق بحب مودة. اما اشرف بحب فاطمة ودي شكلها بتحب حسام صاحب صديق. وكل الجماعه داخلين في حلقة تسمى دوامة الحب. وتلك الدوامة التي تدخل في متاهة ليس لها اخر وبعد ده كلو ما معروف القسمة والنصيب وين. تحب انسان وتتعلق بيهو وهو كمان يعشقك ويموت عليك. لكن يجي النصيب ويحدد حنكمل حياتنا مع منو. انت تريد وانا اريد والله يفعل ما يريد. ما علينا في الحياة الا الرضا بالمقسوم لانو عبادة. ولانو رضا بحكم ربنا. فالصبر لا ياتي الا بالفرج



يتبع....

#مطعم_الكفاح

بقلم: #نمارق_دفع_الله

الجزء 20

لينا وصلت لي فاطمة وقاعدة تتونس وتضحك معاها وسهير مغيوظة منها لكن ما قادرة تطردها لانو الناس بتجيهم عشان تكفر لي فاطمة وفي جواها بتقول السترة والفضيحة متباريات.هسة لو رميت لي كلمة لبنت الناس دي. اللوم حيلبسني من ساسي لي راسي. اها عملت العصير ونادت خديجة الصغيرة. تعالي يا خدوج وخديجة قاعدة في التلفزيون ولا همها وامها تنادي وتنادي. اها قامت سهير وشالت العصير لي صحبات فاطمة المعاها ورجعت المطبخ عندها حلة في النار. وهي قاعدة كدة جاها عبد المعطي((عفوا في الحلقة 1كتبتو عبد الفتاح وفي حلقة تانية برضو عبد المجيد تقريبا لخبطت في الاسماء هههه ..وخير الاسماء ما حمد وعبد) ). اها قال ليها اشرف ده جاي يشوف فاطمة امشي كلميها خليها تلبس عباية ولا توب. سهير نفضت يدها ودخلت لي فاطمة في البرندة وهديل ولينا قاعدات. قالت ليها يا فطومة اشرف ده جاي يشوفك. ختي ليك حاجة في راسك ده وطلعت قالت لي عبدو خليهو يتفضل. اها اشرف وصديق الاتنين واقفين في باب البرندة بالطرف. اشرف قال يا ساتر وصفق. فاطمة بي صوت حنين كدة اتفضل يا البرة. اشرف جا داخل وصديق معاهو طبعا دخلو سلمو علي البنات وقعدو زي خمسة دقايق وطلعو. بعد طلعو لينا قالت :ووب يا فطووومة عااد الضربك ده. بس دماااار عديل ملاك نازل علي الارض. والله لو ما كنت بحب واحد تاني كان ثبتتو طوالي. لكن تقولي شنو القلب وما يريد فاطمة قالت ليها :انتي تعالي هنا يختي بتحبي منو ؟ لينا :البحبو انتي بتعرفيهو حق المعرفة ويوميا بتشوفيهو ..وبرضو بتحبيهو زي ما انا بحبو. فاطمة في اللحظة دي نططت عيونها وخافت من جواها انو يكون المقصود اشرف هديل نطت ليهم في نص الونسة --يا فطوم لينا دي ما عايزة تورينا خايفة اننا نحسدها او نخطفو منها وفي اثناء الونسة صديق جاء راجع تاني ووقف برة في الباب ..قال ليها يا فاطمة هاك التلفون ده في زول عايزك فاطمة عايزة تقوم. لينا قالت ليها :لالا اخدي راحتك م تتحركي. انا بجيبو. وطلعت برة شالت التلفون من صديق وهي بتبحلق فيهو لمن خجلت الولد دنقر في الارض ومشي. ادت فاطمة التلفون. الو :السلام عليكم. حسام :وعليكم السلام ورحمة الله. كيفك يا فاطمة. ان شاء الله اتحسنتي. فاطمة :والله كويسة الحمد لله حسام :خلاص بطلي استهبال بعد ده وقومي عشان امتحاناتك قربت. انتي نسيتي انو السنة الجاية ممتحنة الشهادة وعايزين نسمعك في الاذاعه. طبعا حسام غاظها وهاظرها وضحكها كعادتو. وفي النهاية ودعها وقفل الخط. وهي لسه خاتة التلفون في اضانها وسارحة هناك وبتقول والله الولد ده بحبو عشان خفة دمو وظرافتو دي لينا قالت لي هديل :اقرصيني في يدي ي هدولة. انتي سمعتي الانا سمعتو. هديل :ااي سمعت يختي. كدي دقيقه تخليها تكمل سرحتها دي فجاة وهم قاعدين كدة سمعو صوت كواريك ولمن طلعو برة شافو النار والدخان يكتم النفس ولمن وصلو لقريب خشم الباب. كان الدخان كثييف لدرجة ما قدرو يشوفو الحاصل شنو.



يتبع...

#مطعم_الكفاح

بقلم: #نمارق_دفع_الله

الجزء 21


الحريق ده كان في المطعم. مطعم الكفاح. اللي تعبت فيهو اسرة عبد المعطي كلها. اي فرد في الاسرة كان ليهو الدور في قيام المطعم وشهرتو. مطعمهم اللي كان مصدر دخلهم بعد مهنة ابوهم اللي ما بتغطي احتياجاتهم لكن صابرين وشاكرين ربهم. السبب في الحريق. تسرب الغاز. مما ادي اللي احتراق المطعم بالكامل. وكان جواهو علي وعمر لكن الزباين ساعدوهم وانقذوهم واتصلو بالمطافي اللي كالعادة بتجي بعد النار تقضي علي الاخر واليابس. زيها وزي الشرطة البتجي بعد الجريمة تحصل وتنتهي ومرات تروح الادلة. زيها وزينا لمن نقيف في الصفوف منتظرين في المصالح الحكومية ..وده حال البلد. ربنا يصلحو. حريق المطعم كان كارثة للاسرة كلها وحتي الزباين حزنو شديد. وطبعا عمكم عبد المعطي ..اصابو حرق طفيف في يدو. لكن مع الادوية البلدية. حالتو اتحسنت. وزي ما بقول المثل. الرجال مواقف. يلا اشرف وقف معاهم وقفة لا تنسى في مصيبتهم ..وجاء لي عم عبدو وقال ليهو انا عايز اشاركك. وما تفتكر اللي حاقولو ليك ده مساعدة مني او حاجة تانية .. انا بس عايز ارجع الاتهدم من اول وجديد عايز ابنيهو. والخسائر كلها علي. نوقف المطعم من جديد وانتو بي شغلكم وجهدكم وانا بي قروشي. والربح بالنص اها رايك شنو؟ عم عبد المعطي قال ليهو :الله يسوي الفيها الخير كلامك كويس ..وبدآ في اجراءت الصيانة الكاملة واشتري كل الادوات والاواني اللازمة للمطعم. وطبعا سلمي لمن عرفت جاطت جوطة شديدة في اشرف. وقالت ليهو :انت عايز تكمل قروشك مع الناس. انا علمتك تبقي فاعل خير لكن كمان ما علمتك تدي قروشك للغاشي والماشي. اشرف ده يا اخواننا نوع الاولاد البالهم طووويل حبل بس ((تعالو شوفو اخونا واحد هههه احممممق لدرجة وبزعل من اقل شي) ) وسلمي كلامها ما بتخليهو لكن ما بناقشها ولا بسالها بس ما بقول . ليها غير حاضر ونعم . ولسة مصرة علي موضوع عرسو من لينا. لكن بعد الحاح وتمثيل واستخدام كل الوسائل قدر يقنعها بانو لينا دي ما البنت اللي هو عايزها. وانو عايز فاطمة وبرضو ما وافقت عليها الا بعد تعب .. مرت الايام والمطعم ازدهر من اول وجديد. وفتحو منو فروع كتيرة في مناطق عديدة. وبي مرور الايام والازمان بتتغير حاجات كتيرة. مودة طبعا ابوها اتوفي الله يرحمو ويرحم موتانا. وصديق وقف جمبها واثبت ليها حبو. وطبعا اتخرجو من الجامعه واشتغلو في شركة هندسية استشارية كدة. وبالفاتحة في بيت الحلال ربنا توج حبهم. واتزوجو .. وناس عمر وعلي برضو علي وشك تخرج. والاتنين واحد دخل كلية الشرطة واحد دخل كلية الطب. والبنات فاطمة اتزوجت اشرف. وخديجة برضو خطبها شيخ الدين صاحب صديق. وحسام اتزوج هديل صاحبة فطومة. ولينا سمعت انو خطبها واحد من الحلة واتزوجت ولا لا ما متاكدة .. بالكفاح والعمل يدا بيد نحو الغد. الراجل والمرة بيقدرو انهم يربو اولادهم مهما صعبت الحياة وضاقت وسيلة المعيشة. بالحب والود بتتفتح ابواب مقفولة. الاسرة لمن تتعاون مع بعض بتقدر تتخطي كل المشاكل. بتقدر تكون اسرة ناجحة. لمن وسيلة المعيشة تكون حلال دي حاجة مهمه وحلوة جدا بغض النظر هي شنو. والصح ما نخجل او نستعر من مهنة الوالد او الوالدة. لانهم ولولانا نحنا م تعبو للدرجة دي وكانو مرتاحين. لكن في سبيل راحتنا بيعملو اي شي





....... الـنـهـايـة .......

الورد اليومي👇

أوليس الابتعآد عن شخص خوفاً من
الوقوع في حبّه هو ذآته حُب؟ "♥️

أنا لستُ شخصاً سيئاً ،
أنا شخص جيد حدثت له
أمورٌ سيئة.🥀"

ويشهد الله على ‏أن كل شيء
- حتى العلاقات . .
لم تكن يومًا بالمدّة وإنما بالعمق !

- أي رجل يقول لك أنه يفهم
النساء تمامًا ..
هذا مغفل ،
لأنهن مخلوقات غير قابلة للفهم !

- كان يخون ذات الشعر الأسود مع الشقراء
فعندما سألوه لماذا لا تخبرها بأن تغير لون شعرها للأشقر
قال : حتى لا تنجرح مشاعرها و تظنني لا أحب لونه
.
ما ألطف الرجال ❤️🙂

يقول احدهم : ‏فقدت الثقة في النساء من أيام الإبتدائي، حين قلت لزميلتي في الصف أنني أحبها فأخبرت المعلمه بذلك .. 🌚💔

“فلا وِصَال لمن بالوصل قد بَخلوا
ومن تناسى فإنّا قد نسيناهُ.” 💙

بكامل ارادتي ؛
لم أعد أريد أن أعني لأحد شيئاً ،
أريد سلاماً داخلياً فقط .

مسامحين كُل اللي أذوكم؟💛

ما تتعمقوا في العلاقات .. !"

‏«العلاقة الوحيدة التي لا تفشل، ولا تتخللھا ظنُون، ونوايا خبيثة، هي علاقة الانسان بـ ربه وأطهر طرق هذا التواصل : " الصلاة " 💙🌸

قالت:
لكنك كنت سابقاً تشرب القهوة بالحليب صباحاً صح؟!
قال:
كيف تذكرتِ هذا كان ماضياً أخبرتك عنه عند بدايتنا،، في وقت كنت أظن أنك لا تبالين فيه بي..
قالت:
اممممم حسناً كنت أبالي ربحت أنت مجدداً..
لكنه ذات الوقت الذي كنت فيه تخبرني أنك منظم بالطبيعة، فاتن دون تصنع، لبق القشور و الدواخل، طيب بطبيعتك، كنت أقرأ هذا بين أسطر الرسائل و أسمعه مع كل تحية بداية حديث، و كل نهاية يوم 🌸..

قال : و هل خابت قراءتك لي؟!
قالت: " حاشاك " خابت احتمالات الخيبة، و مخاوف البدايات أنا اليوم أحيا سعادة الاختيار الصائب، و أملئ كفاي كل ليلة حمداً و أنثره على سجادة الصلاة التي شهدت إستخاراتي الأولى، مخاوفي الكبيرة، بوحي الصامت، و حديثي غير المرتب إلى الله 🌸...

"لن يخطر ببالك شعور الخوف الذي عايشت،، خشية الخيبة أشد وقعاً منها حين تكون " 🌸..

قال:
لكنني قد أكون بالغت بالتمثيل وقتها لعذر ،، إن صحبتك ليست بالشيء الهين، كنت أرتب الحديث طويلاً، أتردد بين عبارة و أخرى ، أتلعثم قبل النطق :
(( السلام عليكم أو صباح الخير ،، في أمان الله أم مع السلامة )) ...
أبدأه منمقاً فينتهي حلواً منثوراً كقطع السكر،، أتعلمين كل محادثة بيننا أعددتها قبلها بساعات ، و أعدت قراءتها بعدها عشر مرات و أكثر...

قالت: عشر فقط؟!
قال ضاحكاً : قراءة كل محادثة كانت تجعلني أتمنى بدء أخرى جديدة،، فكنت أرسل مجدداً السلام عليكم...
أكمل:
أتعلمين مهما بالغت وقتها فأنا معذور ،، على قدر أهل العزم تأتي العزائم 🌸...

" و الله يا صاحبة حين وجدتك أيقنت أنك ستكونين نصيبي، أن كل ما كان قبلك كان ليخلق الفراغ بحجمك و أقسم أن لا حجم لك أنت فرحتي غير القابلة للقياس ،، عمري الذي لا أرتجي له نهاية ،، ليس نصفاً لي أبداً بل كأننا غيمتان متداخلتان يتخلل كلاً منا ضوء صاحبه ،، و يستر أحدنا تشقق صاحبه،، نمطر سوياً، و نرحل سوياً....
أدين لك بالشكر لأنك في حياتي،، أنك مذ بدئنا كنت إطمئناناً و بقاء، بلا احتمالات خيبة و لا مخاوف من ذبول، كنت سبباً لأصبح أفضل،، أتعلمين صدقاً ماكنت أمثل كنت أفعل مابوسعي لأكون أفضل، لأستحقك،، أدركت أن بإمكاني التغيير منذ اللحظة الأولى يوم اتسع قلبي لمحبتك بهذا القدر..
قالت بخجل:
و أنا تغيرت بعد أن أخبرت أمي موافقتي ،، كنت أضع بيني و بين كل الناس مساحة حذر و عقل أما بعد رأي أبي و استخارتي فتحت لك مساحة يشرق منها ضوئك ،، و تظلم مساحات الخوف ، و أصير بها طيبة أستحق الطيب الذي زارنا ،، اممممم سأذهب لأكمل دراستي الآن ..

قال : سأرسل ابنتنا بعد دقائق تناديك ،، أو آتي لأهمس لك مساء الخير أو الأفضل أن أقول السلام عليكم ؟!
قالت: يكفيني يقيني أنك تريد أن تكون الأفضل عندي حتى إن بقيت صامتاً لبيت نداءك 🌸...

" الصاحب الطيب ك #العطر_المعتق يثبت لك في كل ثانية تمر أنه أطيب من عرفت ، لا يدخر في ذلك جهداً و لايكفيه أنك صرت له نصيب " 🌸....
#قلبي_يحدثني_بأنك_متلفي_24
اللهم لا خيبة بعد تعلق ، و لا جهد دون منال ، و لا اقتلاع بعد غرس المحبة ، و لا خذلان بعد ثبات الرضا ....
#Jasmeen_Ali
💌🌸...

#repost
#dou77a

‏أما والله أنّي كنتُ للحبّ كارهاً ولكنّني إبتليتُ بك بلاءً جميلاً💙