إسلوب حيااه🌻💛

‏دي بالجد حتكون أهم تغريدة حتقروها الليلة.
اقروها بليز!
إتخيل تكون ماشي عرس في الحلة الجديدة وانت ما حصل مشيت الحلة الجديدة قبل كدا.. لبست وركبت عربيتك وقررت تتحرك بدون ما تعرف بيمشو ليها بي وين وركبت الزلط على أمل انه بالصدفة تصل محل ما ماشي
تفتكروا حتصلو العرس؟
يتبع👇🏽
‏كل سنة إحنا بنحدد هدف انه عايزين نحققه فيها.
زي العرس دا والبيحصل إنه بننوي بس وعلى أمل إنها تتحقق و بنكون محطوظين لو قدرنا نحقق هدفنا أو نحافظ عليهو لي كم شهر بس خليك من السنة كلها.
المشكلة عندنا في التخطيط وكتير مننا مستخسر يقعد مع روحه نص ساعة يحدد أهدافه ويخطط ليها.
‏وأنا أولكم عشان كدا قررت أنه السنة دي أضغط على روحي واخطط من بدري.. اتفرجت ٥٠٠ فيديو وقريت كم مقال عن التخطيط للسنة الجديدة لكن لقيتهم كلامهم كتير وعايزين دفاتر معينة ومسطرة وقلم والوان وكلام كتير.. المهم عارفكم كسلانين 😂 عشان كدا حاحاول ألخص الكلام دا كله في الثريد دا..
‏أول خطوة.. اقعدوا مع روحكم كدا الليلة ان شاء الله نص ساعة براكم كدا.. جيبوا ورقة وقلم او في الnotes وفكروا في ٢٠١٩ دي..
أنجزتوا شنو فخورين بيهو واكتبوا قائمة بالحاجات دي..
الإنجازات قد تكون في حياتك العملية، الإكاديمية، الشخصية علاقتك اتحسنت مع زول معين، لقيت زولك/زولتك ❤️❤️
‏روحانية: بقيت تصلي، تقرا قرآن او اي شي فخور بيهو..
انجازات صحية في ستايل حياتك واخر شي انجازات شخصية، تطوير في نفسك عادات كويسة، اي شي تاني..
بعدين في خانة تانية نكتب أي فشل حصل لينا في ٢٠١٩ وسبب لينا عائق او حزن، ومع كل فشل فكر في اسباب ليهو وكيف ممكن تتفادى الحاجات دي في ٢٠٢٠.
‏بعد كدا حنكتب أهداف ٢٠٢٠ براها لكن لازم تكون بي شروط.. كتير منكم عارفين يعني شنو
S.M.A.R.T وللماعارفين سمارت دي شروط الأهداف الحنعملها.. انها تكون محددة ما حاجة عايمة بدل تقول عايز اضعف تقول عايز انزل ٢٠ كيلو..
تكون قابلة للقياس مثلاً كل اسبوع ممكن توزن نفسك وتعرف الفرق.
‏تكون قابلة للتحقيق في السنة دي وما عندك شي بتعارض معاها.. وتكون واقعية يعني ما تسرح بي نفسك وتقول عايز تلعب في برشلونة.. دي اهداف ما طموحات في فرق.
وآخر شي انها تكون مربوطة بي زمن معين.. يعني عايز اضعف ٢٠ كيلو في ٤ شهور..
عايزة اقرا ٤٠ كتاب في ٦ شهور.. عايز انجح البتاع شهر ٤ وكدا
‏يلا وزعوا الأهداف على جميع النواحي الروحانية الصحية الاكاديمية والعملية والشخصية وما تكتبوا اكتر من ١٠ أهداف بالكتيييير..
‏بعد كدا حنجي لي مرحلة التخطيط.. وكيف حنقيس مدى التزامنا بالخطة..
يعني لو هدفنا الصحي انه نضعف معناها عندي هدف يومي اني اتريض وهدف يومي اني آكل اكل صحي وهدف يومي اني اتفادى حاجات معينة.. هدف روحاني اني اقرا قرآن كل يوم.. عايز انجح في امتحان معناها كل يوم عايز اقرا ساعتين والخ..
‏بعد ما نقسم اهدافنا لي حاجات يومية بتنطبق عليها الشروط حنجي للقياس في حاجة إسمها habit tracker ودي عبارة عن ورقة بتكتب فيها الحاجة العايز تعملها وتحدد اليوم وتجي كل يوم بالليل تعمل صح قدامها بس.. ختها جبن سريرك في المراية في الحمام في الباب وخت جنبها قلم وكل نهاية يوم اعمل صح..
‏دا برجعنا لي نقطة انه كل ما نعمل صح كم مرة بنكون مشتجعين اننا نحافظ على سلسلة النجاحات دي وما نفط يوم.. أرجعوا لي ملخص كتاب العادات الذرية حيفيد شديد في النقاط دي..
‏وأخيرا وليس آخرا لازم نعمل check points كل شهر نشوف مدى التزامنا، نشوف انجازاتنا والنتايج الوصلنا ليها.. عشان نتشجع نكمل او نزيد الهمة شوية..
‏عارف الموضوع قد يكون تقيل عليكم لكن التخطيط مهم شديد وكلنا جربنا الطريقة بتاعت النية ساي وما نجحت السنة دي جربو كلامي دا من باب التجربة بس وخلو التغيير يبدا منكم انتو.. ٢٠٢٠ و ٢٠١٩ هم نفس عدد الأيام مافي جديد لكن التغيير منك.. اقيف مع نفسك وصدقيني انت بتستاهل تقعد مع روحك نص ساعة
‏تخطط ليها ودي مفترض تكون اولوية وما رفاهية.. عشان تحقق اي هدف انت عايزه.. المهم انا حاسي اني اتكلمت كتير والكلام ما مرتب شديد فأعفوا لي لكن بتمنى تكونو فهمتو الرصة شنو..

838 viewsأُمنيااآه💭, 23:09