إسلوب حيااه🌻💛

في حركة ظريفة جدًا و respectful بيعملوها الناس الراقيين في نهاية علاقاتهم –بغض النظر عن طبيعة العلاقة شنو اسمها ال closure أو (إغلاق العلاقة) أو ممكن نسميها النقطة الفي نهاية السطر .. المهم
شكل العلاقة الناجحة ال (وصلت لنهاية) بيكون عامل كده: [ علاقـــــة ] .. القوس التاني ده هو ال Closure.

حكى لي صديق عزيز انو عنده واحد قريبه عايش في الولايات ليهو سنين و حتى أولاده اتولدوا و اتربوا هناك، ف قريبه ده بيحكي ليهو انو أولاده في الولايات اتعلموا حاجات في التعامل و العلاقات الانسانية ما كانوا ح يتعلموها لو كانوا اتربوا هنا .. منها حكاية ال closure دي .. ف بيحكي انو ولده الفي الروضة عنده ولد جيرانهم صاحبه شديد و بيجي طوالي يلعب معاه في البيت .. المهم ولدنا ده بقى ما مهتم باللعب مع جاره الامريكاني ده –لسبب أو لآخر .. ف جا جارهم ده يوم عايز يلعب مع ولدنا كالعادة ف بعد دخل و كده جا ولدنا الصغير ده و قال لجاره: يا فلان اسمعني .. أنا بحبك لكن أنا ما عايز ألعب معاك بعد كده. و جاره بكل اريحية قال ليهو: و أنا برضو بحبك. و قام حضنوا بعض و جارهم رجع بيتهم .. بهذه البساطة.
صحبي قال لي انا لي عشرين سنة ما قادر اعمل الحركة العملها الشافع ده، إني أقول لزول أنا ما قادر أكمل معاك بعد كده و بقطع ساي ناشف.

احنا محتاجين نتعلم الحاجة دي و الله .. عشان نحترم الطرف الآخر في علاقاتنا و نحترم العلاقة نفسها و نسيب بعض بالحسنى .. مش زهجت من زول تحذف رقمه من طرف او تعمل ليهو بلوك او تتحاشى تقابله و تبقى ناشف معاه و هو ما عارف انت الغيرك شنو. لأ .. انت حاسي إنك ما قادر تكمل في علاقة أقيف .. من حقك تقيف .. ما عادي الزهج بيحصل و الملل و بتحس مرات إنك مستهلك في العلاقة دي زيادة عن اللزوم و إنها بقت عبء عليك بس .. من حقك لما ده يحصل تقرر إنو العلاقة دي ما تمشي لقدام .. لكن من حق العلاقة دي عليك و حق الطرف التاني إنو يعرف قرارك ده و يعرف أسبابه لو أمكن .. خليك صريح وواضح .. يا فلان و الله انت ع العين و الراس و أخو عزيز لكن أنا ما قادر أكمل معاك في علاقتنا دي عشان كده و كده و كده .. و الناس تشكر بعض على الاوقات الحلوة و تعتذر لو قصرت في حق بعض و العفو و العافية و اتمنوا لبعض كل خير و افترقوا بالحسنى .. الموضوع خطير؟ ما خطير .. الخطير انو الناس تقطع من طرف و تشيل في نفوسها من بعض و تقلب دراما و وجع قلب و حموضة ..

بس خلاص ..
منقول لجماله 😊

18 viewsأمنيااآه😻🔐, 15:18