‏من گتلك حيل أحبّك
وأللّٰه من گلبُي گلتها
زعلت نأسِي علمودك
ولجلك الدنيا عفتها
ردت بس گلبك يحبنَي
هيه بس هأي الردته

عود دلوك الدرب
بس ضيعوك
واخذوا التمرات وانطوك النوه
وانتَ عطشان و ابد ما شربوك
يا سراب الي عطش منه ارتوه
انه ردت انساك
بس شوكك جبير
ردت اكلك روح والفضها تعال
وانه جنحك لو رحت
بيمن تطير
ليش بجناحك تحط بعدك شكال
هي نزوه وتنتهي وباجر تحير
اسمعني مره واصفن لهذا المثال
انتَ يم عيونهم ما وچدوك

لهَسة صُواب زعلك حَار بينه،
وطبيب الطْيب السل حَار بينه
عفتنه واحنا لأجلك حاربينة،
اهلنا ولا گُلت فشلة وخطية
وبچتف مخلوع وأنتَ طارحتني
أمس وايدك بسدية طارحتني،
ياريت أمي بشْهرهَا طارحتني ،
ولا أعِيش وأشوفك خُنت بيه
وصدى صوتَك يدك بالراس و إيران
بعقلي وگلبِي من فرگاك و إيران
حرب صَدام ثمَن سنِين و إيران
رضت وأنتَ عْلى زعلك ذاك بيه,

انتهت القصه ، و قطعت كفوف حامل لواء الحسين ، و استشهد ورده الشباب ، استشهدت شمعه الحسين ، و استشهد ابا عبدلله وقطع خنصره .💔

عتاب الامام الحسين مع اخيه الامام العباس عليهم السلام

نايم هاا يبعد الروح والعين
تعوفه بلا اخو محتار الحسين
صارت صدك جنها ورحت ياعباس
عكبك يابوفاظل حالي موزين
علي ياخويه كلها التمت الكوم
وحيد اني وبقيت اويه النساوين
اذا ارجع شكل لزينب اهناك
عفته اعله الهنر مكطوع نصين
اكلها اجفوف ماعنده ويجي ليج
لو عنج يزينب كلنه ماشين
كوم انهض يخويه بداعتي اعليك
المهم انته عدل والماي بعدين
المهم انته عدل والماي بعدين ....

انه اتغيرت يانس فهموني
بكثر ماونيت احس اهلي ملوني
وصلت المرحله من الوجع والضيم
صحت بصوت عدموني مخبل منجرح مجنون شتسموني سموني

مدن بيها حرب وبيون مهجووه
واصابع طاحت من جفوف مبتوره
مشهد حيل مرعب منه ذيب يخاف
موته بدون روس وجثث مشموره
اصوات اطفال تبجي ويمها ناس تموت
وقاده مئسره وخدود مسطوره
وصوره بجيبي جانت بيها اني وياك
ماخفت اعله نفسي خفت ع الصوره

ميخالف كضت والحزن ميدوم
تطيب جروحنه وماتبقة للدوم
اضحك واليكرهك وعيش محبوب
الزين من الوراثه وموش تعلوم
والوزين كله الماي ميروب
والخسرته بدنيتك مترده الهموم
عيش ولا تهم وكلشي مكتوب
والمتروسه تفرغ لابد بيوم
الرزق رزق الكرامه وموش الجيوب
لتسولف بهمك خله مكتوم
الصبر مفتاح اصبر صبر يعكوب
شتسوي ذنب يم الله معلوم
تدخل للكبر وياك الذنوب
لا تهدم ابنادم عيش مهدوم
ولاتسلب حقوق وعيش مسلوب
انا علي المضن ماعيش مندوم
احب روحي وضحكتي وحتي العيون