((موشح))

الـنـوح كـلـه الفاطمـه والـعـينهـه
انعـزي زينب والحسن وحسينهـه

*---------------------*-------------------*

دايـم ايـضـل الـعـزاء الـفاطـمـه
والمجالس هـاي تـبقـى قـائـمـه
والصدور اعله الزچيه مـوسّـمـه

ديـن هـذا ومانـوفّي الـديـنـهـه

*------------------------*------------------*

مانعـوف الـنـوح عالصـار وجـره
اضلوع عدنـه للوديعـه امكسـره
نكشـف افعال العصابـه الـغـادره

احـنـه للزهـره وعد منـطـينـهـه

*----------------------*-----------------*

عـهـد هـذا وبـالدمـوع انـجـدده
للعصرهه الـباب بچفـوف الـعـده
تـلـهـب الـنيران بـيـنـه امـوقـده

وهل جريمه العظمه ماناسينهـه

*-------------------------*--------------------*

بـالأمـأتــم هـاي نـشـرح لـلـمـلـه
والهدف ظلمِ الـزچـيـه انـوصـله
تـعـرف الناس السبب والـمسألـه

ليش عصرتهه العده امعتمينهـه

*------------------------*------------------*

بابهه اچفـوف الأثـيمـه دفـعـتـه
وغطت افعال الزنيـم وسطـرتـه
أذّو الـهـادي ابـغـيابـه ابـضـعـتـه

بـاگـوا احـلام الـعـمـر وسنيـنهـه

*-----------------------*--------------------*

نـنـتـظـر مـوعـود يـظـهــر بـاللـوّه
للجروح ايـصيـر بـجفـوفـه الدوه
يـصلـب الجبتين يـا عـالـم سـوه

وطلعته اهـل الـوفـه امتـانينهـه

*-----------------------*--------------------*

✍خادم الزهراء ع
الشاعر رعد الجريخي

https://t.me/httpsm80100000

إذا مو للزچية ادموعي أجريها
عَسَنها اعيوني عمية ولا شفت بيها


ـــــــــــــــــــــــــــــــــــــــــــــــــــــــ


لون لم الحسن دمعاتي ما توفي
عسن لا بارك الله ابعيني وابشوفي
أنه الأنعاها واجب حتى بطيوفي

أنام ودمعتي اعله الخد تواسيها

ـــــــــــــــــــــــــــــــــــــــــــــــــ


ليالي أم الحسن كل ما تمر بيه
مُحرم عاد أحس حزنه ولياليه
اليدوّر عني يلگاني ابحُسينية

مجالس فاطمة اتنفّس نعاويها

ـــــــــــــــــــــــــــــــــــــــــــــــــــــ


أنه بوجهي الحزن متفصلة ارسومه
وأنه الـ بالأسود ايظل صابغ اهدومه
أنه الأسباب نوحه ضلوع مهشومة

أنه المأساته للزهرة ومآسيها

ـــــــــــــــــــــــــــــــــــــــــــــــــــــــــــ


ظُلامة فاطمة إشما أحچي موضوعي
ومواساة الضلع ، كون أكسر ضلوعي
اعله خدها المنسطر ما قيمة ادموعي

جمر لو دمعي صب هيهات أجازيها

ـــــــــــــــــــــــــــــــــــــــــــــــــــــــــــ


أهيم ابعالم أحزاني وتجيني أفكار
شنو إحساس بگلبها اليدخل البسمار
شنو إحساس اللي إديها اتچوت امن النار

وباب من الجذوع إنطبگت اعليها

ـــــــــــــــــــــــــــــــــــــــــــــــــــــ


معروف العظم يتجبر ويبره
لچن كسر الضلع من يگدر ايجبره
تأن من الوجع ياويلي علزهره

يلچمها الضلع كل شهگه ياذيها

ـــــــــــــــــــــــــــــــــــــــــــــــــ


لا زالت حزينه اتصب دمع هامل
نحيله وكلشي بيها امن القهر ذابل
الى أن جاها يطلب معذره القاتل

وابد لا ما رضت تشهد دعاويها

ـــــــــــــــــــــــــــــــــــــــــــــــــ


خدامچ يفاطم شلنه ايادينه
نريد المجلس ابعينچ تنظرينه
نظل ابهلدرب مولاتي وفقينه

خدم خدامچ الأسماء اكتبيها

ـــــــــــــــــــــــــــــــــــــــــــــ

يمولاتي وطلب كل هادم ورايه
المزيد امن المجالس وامن القرايه
نحلفچ بالچفوف الشالن الرايه

وعليهن چن نهر زينب بواچيها

ــــــــــــــــــــــــــــــــــــــــــــــــــ

سيد علي عبدالزهره الناجي

https://t.me/httpsm80100000

حب الولايه وخدمة احسين
الله يرزقك ذني الاثنين
لمن اتواسي الزجيه
بالليالي الفاطميه
يالموالي


١/لو ردت رزق الحلال اتنوله بس دك بابهه
اطلب وفشلان صدك مايرد طلابهه
احنه احباب ام ابوهه ونبجي دم لمصابهه
وفاطمه ابيوم القيامه ماتعوف احبابهه

باب الزجيه افضل البوب
يغسل ضميرك من الأذنوب
يلله كوم احيي العزيه
بالليالي الفاطميه
يالموالي


٢/عالضلع ابجي وتصيرابمنزلة سلمانهه
وعابس الثاني تحسبه الينجوي بنيرانهه
إم حسن وحسين فايض عالخدم احسانهه
لو تطشرنه الذنوب ايلمنه بيت احزانهه

مد ايدك وكللهه محتاج
اتلبسك بديهه ام الحسن تاج
جرب وشوف العطيه
بالليالي الفاطميه
يالموالي


٣/اكبر أمن الدنيه سفرة فاطمه الخدامهه
(فكلو منها هنيئا) يالحييتو ايامهه
عالسطوح وبالشوارع خل ترف اعلامهه
وباللعن اهل السقيفه كسرو اصنامهه

ولمن تكتبون اعله الاضلاع
كون القصايد بيهن اوجاع
حباً بجدة رقيه
بالليالي الفاطميه
يالموالي


٤/الزهره مضلومه ابعمرهه واحنه كلنه انصارهه
الله خالقنه أمن اجلهه ومن أجل كرارهه
بالونين وبالمناحه ينشلع بسمارهه
وسطرت العين ابدمعنه تنمسح آثارهه

عاشور الاول يهدم الحيل
والثاني باسم السحكته الخيل
الدمعه والخدمه سويه
بالليالي الفاطميه
يالموالي


٥/مبني بالحب والعقيده وماتهدم ساسنه
والغبار البالعزاء انصوغه تاج ابراسنه
الزهره ريحانة ابوهه التسوه اهلنه وناسنه
المايحب الزهره احنه انحطه جوه امداسنه

لو عالسراط اتزل الاقدام
هيه التنجيكم يخدام
رحمه من الله ونبيه
بالليالي الفاطميه
يالموالي


٦/باجر بيوم القيامه اتكظنه واتدلينه
وتلتقطنه الزهره وامن اجهنم اتنجينه
ويم علي على منابر من ضوه اتخلينه
واحنه من فاضل الطينه ربك امسوينه

آمنه بيهم واحنه ذرات
وخلص عمرنه بالعزائات
يلله حط ايدك بديه
بالليالي الفاطميه
يالموالي

#محمد_الجماسي


https://t.me/httpsm80100000

📜قصيدة: توأم يازمان
✒للشاعر ️: السيدعبدالخالق المحنة

توأم يا زمان أمي والحنان
أمي دعوتها نبي والحب وحيها
🍂🍂🍂🍂🍂
أمي من تدعي أشاهد
السماء تنزل عليها كلها طيبة
واني انظر رحمة الله
كلها تنزل فوگ يديها كلها هيبة
أمي مملوحة سوالف
واري الله يحب حچيها شگد قريبة
بيها أشتم ريحة الله
وهو الله وصى بيها هالحبيبة
تتمنى تصير خبزة لكل فقير
أمي من تبچي الصخر يبچي لبچيها
🍂🍂🍂🍂🍂
الجنة تحت اقدام أمي
وهاي من الله هدية ياعظمها
تبتسم حتى بحزنها
والهلا عندها سجية من كرمها
أني تدعي بكل مسية
للخلق مو بس إلي هذا همها
شگد حنينة تخاف حتى
من الهوى لو مر علي وانا يمها
خوفي من سنين أفگد هالحنين
والحياة بلاية أم شنسوي بيها
🍂🍂🍂🍂🍂
يا خلگ زينب تراني
الما شفت غير الهضيمة لوعتني
علي چانت أمي خيمة
وانا هسة بلاية خيمة ضيعتني
هي كل أم عندها رحمة
ماكو مثل أمي رحيمة عجبتني
شگد تحبني أمي لكن
تقدم علي اليتيمة عودتني
من رادت تموت وصتني بسكوت
يمه لو شفتي يتيمة أبچي عليها
🍂🍂🍂🍂🍂
مو مثل كل حرمة أمي
أمي عند الله چبيرة بگد رحمته
الله خالقها أميرة
بس تنام على الحصيرة تغفى حتى
شگد غنية أمي لكن
تلبس ثياب الفقيرة تبچي سكتة
علمتني الزعل أمه
ما يظل براسه غيرة يا حسرته
واليجرح يتيم شيطان رجيم
لعنة الله على السطر وجه أم أبيها
🍂🍂🍂🍂🍂
علمتني الغالي يرخص
هيبة الحرمة بسترها الله ساتر
و الأخو مو تمشي أخته
بيده خل يمسح أثرها خل يحاذر
المرأة من تصبر تجاهد
و احنا نتباهى بصبرها من تصابر
والتصابر عالمصيبة
ربچ يضاعف أجرها يعني باچر
ترخص له الرگاب خيط من الحجاب
حتى لو بارض الغرب ذبحوا وليها
🍂🍂🍂🍂🍂
ما تموت الام لونها
ربت أبطال و غيارى نفرح الها
والتضحي بدم إبنها
عندها وي الله تجارة الجنة الها
الخسارة الباع دينه
المات عالحگ مو خسارة بعرف الها
الما يوقر أمه حتماً
ينسلب منه وقاره أصفن الها
يالتسمع نداي ربي الثاني هاي
كل صباح و كل مساء قبل ايديها
🍂🍂🍂🍂🍂
أمي تركت لي حصيرة
وسبحة طين و كل حزنها و دنيا ظلمة
أمي بس هالثوب عندها
أسود و سووا چفنها والله هضمة
شما أشوف الباب اذكر
وگعة أمي و موت إبنها محسن إسمه
بيا ذنب يا ناس أمي
ماتت و أزرگ جفنها آييمه
حرموني المنام أولاد الحرام
وادعي يا رب السماء وديني ليها
🍂🍂🍂🍂🍂
أمي وصتني وصية
بدمعة نزلت منها حمره شهالوصية
من يظل حسين بالطف
وحده محد ينصره راح أخيه
يمه قدمي له جواده
يمه بوسيه على صدره هذه ليه
صيحي يمه يالزچية
من يحز السمر نحره يالسبية
يا بنيتي أريد بوسي بالوريد
بي أثر بوسة علي و بوسة نبيها
🍂🍂🍂🍂🍂
#اللهم_عجل_لوليك_الفرج


https://t.me/httpsm80100000

توأم يا زمان أمي والحنان
أمي دعوتها نبي والحب وحيها

بأداء الرادود الحسيني ملا مصطفى السعد 😢💔😢

بيدي سبحه وقاعده بمحرابي...نية الشيطان يحرق بابي
قمت للباب بورع...لكن الباب اندفع

خرزة خرزة استغفرت ربنه العظيم...هاي دقت بابي مو من جف يتيم
عذت بالله من الشيطان الرجيم...وقلت بسم الله الرحمن الرحيم
أسمع الأول يقل للثاني...حرق باب الله فعل شيطاني
قله للثاني وسمع...لكن الباب اندفع
 
 جان فوق الباب أكو عش للحمام...حسين يسمع صوتهن يالله ينام
خفت يوقع صحت يا رب الأنام...اجعل النيران برداً وسلام
السمه صاحت وحق دمعة عينج...حرق باب البيت يحفظ دينج
صوت الآذان ارتفع...لكن الباب اندفع
 
ابقيت أدعي وأقره بآيات الكتاب...وقمت أسولف ويه زينب عالحجاب
بيومها بنيتي لبوي أطبخ ثواب...ضلعي يكرم عمره ما رجعله باب
الدلة تفرح لو چِوُوُهَا بنارها...وبابنه الما جوعت مسمارها
أكل من ضلعي وشبع...لكن الباب اندفع
 
انجرح قلبي من اسمعت كلمه وإن...ما نشف صبري لجن فاض الحزن
ردت أطمن روحي بس بيش اطمئن...قبل دفعت بابي ظل ضلعي يون
آنا بت من والعده يضربوني...زلم بالسوط اعتنت لمتوني
السوط بمتوني انطبع...لكن الباب اندفع 
 
فضه صاحت ها يبت سيد البشر...بعز شبابج ليش محنيه الظهر
سنديني وخدي ينطيج الخبر...انكسر قلبي وخاطري وضلعي انكسر
دمعي غالي وطاح دمعي الغالي...ودمعة الكرار تتروالي
والدمع كله فزع...لكن الباب اندفع

 والوصية الجتفت جف ذو الفقار...والصبر بالشده معناته انتصار
محسن بدمي وأحس بيه كله ثار...صحت يبني وصاح ها يا يمه صار
حس بالمناغاه البينه وبيني...لمن راد الثاني يسطر عيني
فزع محسن ما وقع...لكن الباب اندفع
 
كلهن اصبرت إلهن بعزه وإباء...من خذوا حيدر صرخة بهالنداء
خلو بن عمي إذا أصد للسماء...وأرفع الشيله تره أقلبها بدعاء
انسيت كلشي وصحت حيدر وينه...أصبر وأسكت الخاطر عينه
حبل البــ جفه انقطع...لكن الباب اندفع
 
ببابي جف الهادي جم شمعه علق...من قبل ما سامعه بباب احترق
وآنا متعوده تجي ببابي الخلق...بين طبعة حنت لو شدة علق
والاجوني من سمعت أصواتهم...جنها سطرة عيني بنياتهم
مدري يا خد انصفع...لكن الباب اندفع


https://t.me/httpsm80100000

اَللَّهُمَّ أَلْهِمْنَا طَاعَتَكَ، وَجَنِّبْنَا مَعْصِيَتَكَ، وَيَسِّرْ لَنَا بُلُوغَ مَا نَتَمَنَّى مِنِ ابْتِغَاءِ رِضْوَانِكَ، وَأَحْلِلْنَا بُحْبُوحَةَ جِنَانِكَ، وَاقْشَعْ عَنْ بَصَائِرِنَا سَحَابَ الِارْتِيَابِ، وَاكْشِفْ عَنْ قُلُوبِنَا أَغْشِيَةَ الْمِرْيَةِ وَالْحِجَابِ، وَأَزْهِقِ الْبَاطِلَ عَنْ ضَمَائِرِنَا، وَأَثْبِتِ الْحَقَّ فِي سَرَائِرِنَا، فَإنَّ الشُّكُوكَ وَالظُّنُونَ لَوَاقِحُ الْفِتَنِ، وَمُكَدِّرَةٌ لِّصَفْوِ الْمَنَائِحِ وَالْمِنَنِ..

#اللهم_عجل_لوليك_الفرج

روي عن الإمام علي (عليه السلام)انه قال:
«اللهَ اللهَ في الصَّلاةِ؛ فإنَّها خَيرُ العَمَلِ، وإنَّها عَمودُ دينِكُم».

📚الكافي - الشيخ الكليني - ج ٧ - ص ٥١

#الامام_علي
#الصلاة
#العتبة_الحسينية_المقدسة