🎧قناة ملا مصطفى السعد🎤

محرررم 1442 هـ فاطمة العليلة .ع.

من موتي ليش خايف علية
خليني اموت واترك رقية
خذ روحي خذ روحي
وخليني اموت واترك رقية

ياللي نويت ابسفرتك . ماخذ بديك ابنيتك
هاي العزيزة والدي . خليها بويه ابداعتك
خايف علية او ماخفت . توگع رقية اعله الطشت
واتموت اخيتي اعله النحر . واعليها زينب تلتفت

على بختك يبويه دَمعت عيني
صعود ارقية عالناگه يبچيني
زغيره اهوايه هالطفلة دحاچيني
أروح ابدال اخيتي بويه خليني

خلي تعيش هذي طلبتي
ما تمشي اريد لطف اخيتي
خليهـــا خليهـــا
اهنا يالحنين والزم إدية
__________
امحلفتك ابداعة هلك . إترك رقية ابمنزلك
ماريدن اسمع يالأبو . ماتت رقية اتصد الك
آنه احتمل ضيم السفر . وذيچ السياط اعله الظهر
ماتحتملها ارقيتك . اتشوف الچفوف اعله النهر

عزيز اعليها عمها ويصعب اتشوفه
على وجهه يطيح او گطعوا اچفوفه
ولا متعودة طايح عمها واتعوفـــه
تمر گدامه فوگ الناگه مچتــــوفه

خليني اعيش طفك حبيبي
ابدال اختي هاي وآخذ نصيبي
مرتاحه مرتاحه
خليها روح ابداع الزچية
_________
مو مالت اشموس او تعب . او تمشي اعله شوك او عاللهب
بنتك يبويه امدللـة . المفروض تمشي اعله الذهب
تدري ابجسمها اشگد ترف . خافن تروح او تنچتف
كلما أصد اعليها اون . واعيوني تنظرها او ترف

ولا خفت اعله روحي او خايفه اعليها
أخافن بالعدو ياخذ تراچيهــــــــــــا
إذا طحت انته ياهو اليلزم ايديها
الشمر يبقى يعت بيها او يأذيها

خليني اموت بالطف يغالي
وخلي تعيش بنتك بدالي
اترجيتك اترجيتك
تاخذني كون وخليها هيه
____________
خل تحتمل ظيم الهجر . ولا تحتمل ظيم الشمر
ما تحتمل نوم الفله . او لا ركضه يحسين الظهر
ما ريدن اسمع عالجمر . تزحف رقية تنجبر
خوفي عليها تنصدم . لمن يرد خالي المهر

صعب يابويه بنتك حادي يضربها
او صهيل الخيل يابو اليمه يرعبها
إذا عطشت منو مايك يشربهـــــــا
الشمر يركض وراها اشگد يتعبها

الهاي الجروح آنه استعديت
خليني اموت او ما ابقى بالبيت
ناديتك . ناديتك
وياك اروح للغاضرية
_________
خلي يبويه الطف الي . واترك رقية ابمنزلي
مشتاگه اموتن بالخيم . واوگع مثل وگعة علي
أركض يبويه اويه الحرم . او خل تنچوي هاي الجدم
يم الرضيع اوگع انه . واحظن معاه ذاكى السهم

انه ابليل اهدعش وي زينب الحره
يبويه خنصرك بين الثرى اندوره
ندور اطفالك الضيعوهم ابصحره
يبويه او چم كسر بضلوعك انجبره

خليني ثوب بليل اغطيك
واعليك انوح واگعد واحاچيك
بالحومه . بالحومه
وياك اموت بلكت سوية

حيدر الحلفي

22 views16:54