الأربعين



ها هُنا  ...   ياجابر انذبحت زلمنه
ها هُنا  ...   ياجابر احترگت خيمنه
ها هُنا  ...   ياجابر انسلبت حرمنه
ها هُنا   ...   ها هُنا


ـــــــــــــــــــــــــــــــــ


هلّـه هلّـه اشلون ملگه بين جابر والأمام
دمعه واتلگتها دمعه والدمع ابلغ كلام
واحسيناً صاح جابر بعدك العالم ظلام
وناده ابو الباقر يبويه جيتك وذابحني شام

بالدموع   ...   جابر والضعون الحزينه
بالدموع   ...   أحيو زيارة اربعينه
بالدموع   ...   زينب تناديله انهضمنه
ها هُنا


ـــــــــــــ


گـلّـه يلـ انصاري  عيني مُختصر ما شافته
اهنانه ياجابر حبيبك من وگع من مهرته
بالحجر صابو جبينه ودمّـه خضّـب لحيته
اهناكه داسنّه الحوافر والشمر حز رگبته

علرمال   ...   ظل مرمي وبشمس الضهيره
علرمال ...   ثوبه انسلب شيخ العشيره
علرمال   ...   والسلباه رد و سلبنه
ها هُنا


ـــــــــــ


جابر وصوب الشريعه اهنانه طايح النه  عم
گطعو ايمينه ويساره وما وگع منه العلم
عمي يا جابر شگلك عينه صابوها ابـسهم
وجوده حين اتبده مايه حيله هلـ لحظه انهدم

للكفيل   ...   كلمات ارتّـــــلها ابشجوني
للكفيل   ...   يانفسي بعد احسين هوني
للكفيل   ...   كلنه اعله ابو الغيره انكسرنه 
ها هُنا


ـــــــــــــ


اهنانه چان امخيم النه للفواطم بي ستر
واحنه بي حرگوه علينا زمرة ايزيد وشمر
لهسه اذا تشتمني تلگه من دُخان الطف عطر
والـهضمني ابلايه خيمه اشلون تبقه ام الخدر

كربلاء   ...   بيها اشكثر ماتت يتامه
كربلاء   ...   حرگت لبو الأكبر خيامه
كربلاء   ...    آل النبي وبيها انشتمنه  
ها هُنا


ــــــــــــ


اهنانه يا جابر تصوب نحر عبد الله الطفل
وجاسم اچفوفه تحنت من دماه ومنچتل
اهناه علي الأكبر وگعته اهناه توذر بالنَصِل
اهنانه ياجابر اشدهن من صعدنه اعله الهزل

بالحبال   ...    ياجابر انشدت ادينه
بالحبال   ...    وللكوفه والشام انسبينه
بالحبال   ...    ومن الچفوف ايسيل دمنه 
ها هُنا


ــــــــــ


گبر ابو اليمه يجابر لا تعوف ازيارته
مُستجابه الدعوه يمه والشفاء ابتربته
باچر ابرغم النواصب عاليه اترف رايته
الذهب شنهي الذهب يفخر لأن صار ابگبته

للحُسين   ...   كلمن تعنّــــــــــه بـــ أربعينه
للحُسين   ...   عد فاطمه اجره وعد علينه
للحُسين   ...   مشايه وابـچفه علمنه 
ها هُنا

ـــــــــــ

سيد علي عبدالزهره الناجي


https://t.me/httpsm80100000

ينڪسر ضهري ابغيابك خويه عباس
مو وڪــــتها الروحتك يارفعت الراس
يا ڪافلي والحامي    سلبوني من اخيامي
🗯🗯🗯🗯
آنـــــه زينب والستر يحسـب حسابي
والمثل ياخــويه مضـــروب ابحجابي
وهاذي بالطف ابتدت رحلت مصابي
سلّبوني وچتـــلوا اگـــــــــبالي شبابي
يذبح اسياده العبد وابيا زمن هاي
اجنبيه ايگلي وايگــــولوله مولاي
ذبحولي كل احلامي    سلبوني من اخيامي
🗯🗯🗯🗯
كلنه گــــيدونه سوه يابو الحميه
ومن يجرون الحبل نوگع سويه
يم سڪينه اعتني تــــوگع رقيه
اتڪــفلت ايتامــــــك وآنه سبيه
اختنگ لمــــن اشاهد دمع الايتام
خويه ياعباس بيه اشسوت الشام
بعد الذبيح الضامي     سلبوني من اخيامي
🗯🗯🗯🗯
 
من اجيت الهــودج ايحرسونه اخوتي
او محد امن الناس سامع والله صوتي
هسه ياعبــاس ڪـــون ايجيني موتي
وڪت مابيه اشــيل ايدي القنـــــوتي
والوكت اغبر يمشيني اويه اجناب
وآنه گضيت العمر مـــاشايفه الباب
چتلوا هلي جدامي     سلبوني من اخيامي
🗯🗯🗯🗯
 
يل چنت دومك تگلي خويه أُمري
فدوه لعيــونچ يزينب افدي عمري
ابحالي هسه يالگمر بس الله يدري
العـــدو يمشي ويگود الليله خدري
انضر ابعيني يخــــــويه وشاهد الحال
تلگه فوگ النــــــوگ نسوانك والعيال
صارت سراب ايامي    سلبوني من اخيامي
🗯🗯🗯🗯
 
لليـــــتامه مــن اصــــد حفاي تمشي
امتــربين وڪــربله سلــبتنه ڪلشي
وآنه حرمه ابوحّدي ومابيدي أي شي
چـــــانت امنيتي اشوف اگبالي نعشي
خويه كل ديره اطبها ابگه انخاك
اذكر ايامي العـــزيزه واذكر الواك
تكتل كتل آلامي     سلبوني من اخيامي
🗯🗯🗯🗯
 
خويه خصم الحچي يل كلك حميه
راحت اختك يا ڪــفيل الهاشميه
عگبك الشامت يضل يضحك عليه
ماڪــو مثلي شــافت امريه اذيه
بيرغك وكت السبي يا خويه ينراد
وانه اخر ڪلمه عندي وسفه انگاد
عفتك چتیل ودامي    سلبوني من اخيامي
🙜🙜🙜🙜🙜🙜🙜🙜🙜🙜🙜🙜🙜🙜🙜
وليد المندلاوي

https://t.me/httpsm80100000

 
يالمنطي الناس .. چــف العباس
عظيم انته
رحـيم انته
الحسين انته

***

يمخجل الموجودات .. لا مـا تحــتاج إثبــات
يالمتــصدق بآيـــات
انته بكربله
يالضحيت وضحيت .. ويا من للناس انطيت
عين وچف آل البيت
بدر العايله
 
أجمل من جميلك وين   بيــك الــناس
متحـيّرين
فقط بالكون بس واحد   وهذا الواحد
انت حسين
 
حيره شننطيك .. وبيش نجازيك
حبيب انته
طبيب انته
الحسين انته

***

ردنه نشرحك مولاي .. الگيناك هواي هواي
يمفحط گلب الماي
لا ما تنشرح
للزين وللــمـو زيـن .. منطي عيون وچفين
دينك شيرده الدين
يالفوگ الرمح
 
رحلك ســيدي اتسلب    ونسائك وسف
تتغرب
منو احنه سيدي يحسين    ولجلنه
تنسبي زينب
 
إشكد خجلانين  .. ويــاك مقصرين
سليـب انت
غــريب انت
الحسين انته

***

يا مــولاي الينـطــون .. مــرة اثنـــين يملون
والمثلك منطي متون
لامامل ابد
لجل الناس بعاشور .. محني وظهرك مكسور
شفته اگبالك منحور
عباس السند
 
أوادم حتـــى نتسمه   ارخصت
كلشي يبواليمه
حتى انشوف احنه الصح   گلت عين الگمر تعمه
 
 
اشكد ما ننطيك  .. لا مـــنوفـــيك
قدير انت
كبـير انت
 الحسين انته

***

بفضالك ليحسـبون .. يا مـولاي يتعبون
يا من صدرك مطحون
لا ما تنـحسب
ما كفــاك الكفال .. رديت انطيت أطفال
شافوا ضيم وأهوال
من گد الضرب
 
منو اليستاهل أفضالك   يالمــثـــلــــوم دلالك
لجل هالناس يا الغالي    راحت للسبي اعيالك
 
يالعــالتــربان .. تلهث عطشان
طريح انت
ذبــيح انت
الحسين انته

***

حيره شلون نوفيك .. وكل هاي الرحمه البيك
محتارين اشننطيك
يالمنطي گمر
خيرك غامر هالكون .. شــلون نجازيك شلون
يا عون ونعم العون
عالـعالم ستر
 
يا ساتر عيوب الكل    اشكد همومنه
تحمل
انتـه لمستوانه دوم      يبعد العـــافيه تنزل

صاير اشلاء .. وگلبك معطاء
سخاء انت
عطـاء انت
الحسين انته
***
حيدر تركي الكربلائي


https://t.me/httpsm80100000

يالمنطي الناس جف العباس
عظيم انته
رحيم انته
الحسين انته


بصوت الخادم ملا مصطفى السعد 🥺💔🌺

#زينب_تنسبي_اعله_الـنوگ
السبي

زينب تنسبي اعله النوگ هاي شلون ترضوها
چــا ويـن الهواشم وين ثـايـتـهـم يـدگــوها

==========================

فرسان الحــرايب ويـن ويــن ازلام هـاشـمـهـا
خل تفزع اسياد الگـوم وتفـيـض الـرگــب دمها
واتصول وتخلي احدود تگـلـب عـالــي سـافلها

نســوان وحــرايـر هاي ويـاهـــم يـرجـعــوهـا

==========================

حيدر وين ابو الصعبات الخلّـص يونـس ونجـاه
وين الرجّــــع اليعگوب شوفه ورجعـالـه اضناه
زينب هاي فـــوگ النوگ حـيــدر خلتصد عيناه

فوگ الهزله وسط السوگ زينـبكــم يشـتـمـوها

==========================

هـزلـه النــوگ وممشاها يعـذب الراچـب وتعرج
وحادي النوگ مسرع دوم بالمـمـشـه ولا يـرفــج
منظــر يلهـواشـم هــاذ منـظـر للگلـب يحــرج

اخوتها امطرح اعله الگاع و النســوان يـسـبـوها

==========================

تمـشـي الروس وياهــن وگــدام الركــب تمشي
حرگــان الگلـب والنـوح كل عـيـن التصـد تبـچي
زيــنــب آه يـا زيــنــب المن بالهضـم تـشـكــي

روس اخوتها فوگ ارماح ومچـتـوفه يـشـوفـوهـا

==========================

اه السوك شسولف بــي حــزن الـسـاده والأهـات
تشتم ناس وناس احجار وناس بهل ظعن شمّـات
موش ابساع ممشه النوگ الحادي ريّض الخطوات

حتى الناس كلها اتشـوف والـعـيـلـه يهـضـمـوها

==========================

ابمجلس يزيد اهناك زينـب يـا اهــــل زينـب
وحدها وتدير العـين شوصف والوصف يصعب
ماكو حسين لاعباس وحـيـده بالظعن من طب

ابمجلس غرب وانذال زيـنـبـكـم يـوگـفـوهـا

==========================

✍️عباس مالك آل عفريت

نسألكم الدعاء

https://t.me/httpsm80100000

زينب تنسبي اعله النوگ هاي شلون ترضوها
چا وين الهواشم وين ثايتهم يدگوها


بصوت الرادود الحسيني ملا مصطفى السعد

قصيدة اسشتهاد الرسول الاكرم ص

استأذن الموت وخذاك ــ ويتــم العـــــالم وراك
انته بس  ماكو سـواك ــ استأذنه الموت
©©©©©©©©

يمن نزلت آية الباري اعله صدرك
بالأرض لو بالســمه ينحفــر گبرك؟
الأنبياء يمك تجــي لو غاب بدرك؟
لو ملائكت العرش تنزل تحظــرك؟

يا سـراج المهتدين ــ ياضياء الصالحين
ياهو قبلك يا آمين ــ استأذنه الموت
©©©©©©©©

اتيتمو هاليوم حيـــــدر والزچيه
يبو الزهره امصيبتك اعظم رزيه
اتگابلو يم راســـك اونو ســـويه
اوداعـة الله يامحمد هالمســــيه

ادموع حيدر والبتول ــ تجري من دم يالرسول
كاذب الغيــــرك يگول ــ استأذنه الموت
©©©©©©©©

يطــرق البـاب بأدب مثل اليـزورك
استأذنك ميريد ابد يجرح شعورك
گالك رب العرش يطلب حظـــورك
وبان ياطــه على وجهك ســـرورك

وانته لبيت النداء ــ ورفع روحك للسماء
ياهو مــن الانبياء ــ استأذنه الموت
©©©©©©©©

الدعو اصحاب.  الجرح عافو نزيفه
الك ما نصــبو عزاء نصـــبو سقيفه
انكـرو عهـدك والاحـاديث الشـريفه
وقبل دفنـــك نصبو منهم خليـــفه

وي علي ماشــــيعوك ــ ابسرعه ياطه نسوك
اوماكو غيرك يعرفوك ــ استأذنه الموت
©©©©©©©©

وي علي الليله تضـــل بس ذكريـاتك
ومنـــك بأيده بقـت سبـحت صـلاتك
نكسر ظهره وتدري عنده شگد غلاتك
اوياه الامــــلاك انزلت تبچي ابمماتك

ارد اسألك يالحنين ــ يانبي قبلك امين
قبل لاتغمضله عين ــ استأذنه الموت
©©©©©©©©

✍الخادم
كامل السعيدي

https://t.me/httpsm80100000

#تـراث ميمر

ضعن الفواطم يحسين
طب كربلا حاديها
ــــــــــــــــــــــــــــــــــــــ
من اليسر ردن بنات الهادي
الطف كربلا اورجنت ابحنها الوادي
اوعالگبر زينب اوچبت واتنادي

يحسين من كثر ابچاي
عيني نشف جاريها
ــــــــــــــــــــــــــــــــــــــ
يبن أمي من خليتك اعلى الغبره
دم طبره من جسمك يكت ابطبره
بالله الچتل يحسين هين أمره

لاچن يبـو اليمه ليش
لچفوفك امگطعيها ؟
ــــــــــــــــــــــــــــــــــــــ
الجمّال گص چفك الخاتم الخاتم ناله
والطمع غره اوهاي سوء أعماله
لاچن يخويه اشرادت الخياله

يبن أمي لضلوعك ليش
بالحافر امهشميها ؟
ــــــــــــــــــــــــــــــــــــــ
يحسين ما مسلم إلحن الحالك
سهم المثلث جرَّه من دلالك
يبن أمي أدري بالسهم چتالك

اوذاك السهم مسجـي إسموم
والچبدتك ماذيها
ــــــــــــــــــــــــــــــــــــــ
ضامي الگلب يحسين ذبحوك الگوم
اوظليت من شرب الميه محروم
امن الماي هل صح لك غسل يا مظلوم

لو جثتك يا مظلوم
من دمك مغسليها ؟
ــــــــــــــــــــــــــــــــــــــ
يبن أمي ما تگعد تشاهد حالي
ابجمر المصايب منمرد دلالي
زينب أنا المحد يشوف اخيالي

عگب الخـدر للشامات
أمشي ابيسر تاليها
ــــــــــــــــــــــــــــــــــــــ
يحسين يوم اللي مشه حادينه
اعله المعركه اعله اجسومكم مرينه
ردنه الموادع ما حصل بيدينه

يبن أمي واگلوب الـگوم
خوف او رحم مابيها
ــــــــــــــــــــــــــــــــــــــ
يبن أمي ما تدري شنو الأذانه
اوشنهو الهظمنه اوشنهو البچانه
وگفونه بين ايدين ابن مرجانه

بحبـال من إيد الإيد
لطفالك امچتفيها
ــــــــــــــــــــــــــــــــــــــ
واللي جرح گلبي جرح ما يلتام
الشام آه الشام من طبة الشام
الحال الأرامل من أصد والأيتام

تكسر الخـاطر وابنار
گلبي يهيج إعليها
ــــــــــــــــــــــــــــــــــــــ
يحسين والثگل حنيني او نوحي
شاهدت عيني امصاب مارد روحي
ونة عليلك لچم بيها اجروحي

من كثرة الشامت گام
ونْة الگلب يخفيها
ــــــــــــــــــــــــــــــــــــــ
يخفي ونينه لاچن ابروحه ايجود
ما يجزع او راضي ابقضاء المعبود
إيصد اليتاماك اودمع عينه ايجود

تبچي اعله حـاله الأيتام
والونته اتنابيها

الشاعر المرحوم
الشيخ كاظم المنظور الكربلائي

#اللهم_عجل_لوليك_الفرج

https://t.me/httpsm80100000

فعلاً عطوني⁠