مقدمة للخدمه

بالروح جمر مصابك
مجروح. انعه ابابك
..........

ربيت بخدمتك من زغري يامولاي
مو بس ابمحرم كل وكت ويّاي
اذكرك ياحبيبي حسين وكت الماي
ضامي بلا ذنب ذبحوك عالغبره

ياريت. بية اصوابك
مجروح. انعه ابابك
..........

اليخدمك الله يرفع قدره ويحبّه
يهنياله التحبّه وتدخل بگلبه
دخيلك اسمي وي خدامك تكتبه
امشّي عليك امك فاطمه الزهره

محسوب منّ احبابك
مجروح. انعه ابابك
..........

اتنفّس هواك الينعش الريّه
احبك سيدي وحبك كبر بيّه
اذا انساك انت التنشد عليّه
رؤوف عله اليحبك طبعك تسرّه

ينزار حتى اترابك
مجروح. انعه ابابك
..........

لبست ثياب حزني وحضّرت روحي
محرم والشعائر بلسم جروحي
اظل مديون عمري شما كثر نوحي
انوح عليك حبّاً بيك عالفطره

مسلوب. حتى ثيابك
مجروح. انعه ابابك
..........

تهيج بكل محرم جمرة احزاني
اعيش بعالمك يحسين شي ثاني
حاضر بالمجالس دوم تلگاني
عله مصابك انوح واسچب العبره

ما راح دم خضابك
مجروح. انعه ابابك
..........

اظلّ بخدمتك ما اترك الخدمه
وعطرك سيدي بالمنبر اشتمّه
دخيلك نظره رايد يا ابوالرحمه
بجاه الگطعو برمية سهم نحره

ناديت يمّ عتابك
مجروح. انعه ابابك

سيد زيد الفحام
__________

https://t.me/httpsm80100000

نزلة هلالية 2022

ياشهر الاحزان ارحم گلب مهدينه
............

يا شهر عاشور تدري جرحك يهد حيله
يبچي عالمذبوح جده كل نهاره وليله
عاشر ايامك يفجعه چم جرح يحچيله
للفرج وايام ثاره كل وكت ندعيله

يتنطّـر الثـار. ما تغفه تنزف عينه
ياشهر الاحزان    ارحم گلب مهدينه
..........

الف وربعميت عام امن الحزن واللوعه
ياشهر عاشور خده منحفــر بـدمـوعــه
يبچي عالمكسور صدره موجّرات ضلوعه
والاشد جرح السبية عمّته المفجوعه

ماتنعد جروح. ما بينك وما بينه
ياشهر الاحزان    ارحم گلب مهدينه
..........
هلالك اليحمل مآسي غربته وآلامه
وين ما يمشي يشاهد كربله گدامه
يذكر حسين ومصابه وشجَرَه بايتامه
للفرج يحسب ليالي وينتظر ايامه

خلصت يعاشور. دمعه ومناحه سنينه
ياشهر الاحـــزان    ارحم گلب مهدينه
..........

من يهلّ هلال شهرك ينفجع بجروحه
تذوب مثل الشمعه ويلي بالمصايب روحه
المهدي يگضي الليل دمعه والنهار بنوحه
عالغريب حسين جده دمعته المسفوحه

نحسبله ايام. ننتظره يظهر لينه
ياشهر الاحزان    ارحم گلب مهدينه
..........

اكبر واعظم مصيبه منها شيّب راسه
زينب وجمرة سبيها تسعر بانفاسه
الشام وجروح الشماته تجرح باحساسه
تنتظر ساعة ظهوره بالمدامع ناسه

من يظهر انشوف راية نصر بيمينه
ياشهـر الاحــزان    ارحم گلب مهدينه
...........

راية العباس بيده يظهر لثاراته
ياخذ بثارات جده وتنتشر راياته
يذبح الذبحوا حسينه والسبوا عمّاته
صولة الكرار حيدر بالحرب صولاته

خدامه انصار. يوم الوعد يلگينه
ياشهر الاحزان    ارحم گلب مهدينه

سيد زيد الفحام

https://t.me/httpsm80100000

رئيسية للخدمه 2022

أنه مقصّر اجيتك ابو اليعطف لگيتك
سهيت وماعفتني. بردائك ظلّلتني
ابو اليعطف لگيتك
......

الف شـــكـراً جزيلا ياضوه العين
جبتني لخدمتك ياسيدي حسين
ربيت بحبّك وبين المواليــــــــــن
سنين الخدمه اغله واجمل سنين

عشت بين العوابس. اخدمك بالمجالس
نخيتك ساعدتني. بردائك ظلّلتني
ابو اليعطف لگيتك
......

الك نذرتني امي امن الولاده
اخدمك خدمة المنبر عبــاده
المجالس تشهد باكبر شهـاده
علـى كلمـن الك اثبـت وداده

الك دايم عزائي. وجدّدلك ولائي
امامي ودلّلتني. بردائك ظلّلتني
ابو اليعطف لگيتك
......

أنه المتمسّـك بحبـل الشعـــــــائـر
حُسين وخدمتك تحيي الضمـائـر
علـى الاخــــــــلاق ربّتني المنـابـر
احس چن حاضر الطف يوم عاشر

مثل صومي وصلاتي شفت حبك نجاتي
احس ما فارگتني بردائك ظلّلتني
ابو اليعطف لگيتك
......

الـك متحــــــزّم آنه ولابس اسود
وحسّ بجرحك عله سنيني ممتد
أنه المـاعفتـــــك ولا گلبـي يبــرد
علية دمــوع عينـي وايـدي تشهد

عشت ايامي عاشور. الك من زغري منذور
بكرامه عوّضتني. بردائك ظلّلتني
ابو اليعطف لگيتك
......

اظل طول العمـر ابچـي لمصـــابك
يبواليمّـه العمـر فـــــدوه لتــــرابك
يريت اگضي العمر ابچي عله بابك
مثل حـال البقـت تبچـي بغيــــابك

مثل حال العليله. البقت تنحب نحيله
اذكرك عوّدتني. بردائك ظلّلتني
ابو اليعطف لگيتك

#سيد_زيد_الفحام
___

https://t.me/httpsm80100000

نزله للخدمه 2022

صلى اللهُ عليكَ ياحُسين
صلى اللهُ عليكَ ياحُسين
.......

حبيتــــك وعيونك. ما عوفك ابد
من زغري. لحد موتي. مولاي العهد
حـزّمنـي. وفّقنـي. ونطيني المدد
بس حبك. يكفيني. بالمحشر سند

فيا ذبيحاً بكَتكَ كلُ عَين
صلى اللهُ عليكَ ياحُسين
.......

للخدمه. وللمنبر. كل عمري نذُر
مولاي. وماعوفك. عاشگ من زغُر
لمصابك. دلّالي. يتلاهب جمُر
ما يسوه. بلا حبك. يحسين العمُر

بكَاكَ دمعي وآهاتُ الانين
صلى اللهُ عليكَ ياحُسين
.......

متحزّم. للخدمه. بعاشور وصفَر
وبگلبي. وبصدري. تاركلك اثـر
مو دمعه. لو بيدي. ابچيلك نهر
يالصدرك. چم كسره. بالخيل انكسر

بقلبي تنعى جراحاتُ الجبين
صلى اللهُ عليكَ ياحُسين
.......

يكفيني. تحسبني. خادم للخَدَم
مرضاتك. نظراتك. ما رايد اسم
ما تطفه بضلوعي. نيران الخيم
اجرحني. وخليني. اشعر بالألم

آتيكَ سعياً باشواق الحنين
صلى اللهُ عليكَ ياحُسين
.......

اتـذكّـــر. ما انسه. آلام الذبح
يالجسمك. ظل عاري. وراسك عالرمح
يحسين. بأعضائك. چم طعنه وجرح
بمصابك. بالعالم. مثلك ما يصح

اذكر جرحك على مَرّ السنين
صلى اللهُ عليكَ ياحُسين

سيد زيد الفحام
___
https://t.me/httpsm80100000

هلالية 2022

حسين يا ابا عبدالله
حسين يا ابا عبدالله
............

حبك الجنه بحياتي سيدي وبيك اقتدي
يمك تصير النهاية وكل وكت بيك ابتدي
حسين يامعراج روحي من بداية مولدي
ما اعوفك حد وفاتي ايدي بيدك سيّدي

حسين يا ابا عبدالله
حسين يا ابا عبدالله
............

عيني بهلال المحرّم من يهل بيك التزم
البس اسود وعتنيلك للخدامه بكل عزم
المهم يحسين ترضه بغير شخصك ما اهم
احضر بهاي المجالس بالشعائر اعتصِم

حسين يا ابا عبدالله
حسين يا ابا عبدالله
............

من يهل عاشور يعني دمعه وجروح وألم
يعني ذبحوك آل امية صدرك بخيل انهشم
يعني طاح عله الشريعه ويلي شيّال العلم
يعني زينب سلّبوها حرگوا عليها الخيم

حسين يا ابا عبدالله 
حسين يا ابا عبدالله
............

ما شربت الماي ضامي واجب اعطش بالعزاء
اني لابس ثوب اسود وانت عاري وبالعراء
حسين كون ادخل ضريحك واني سابح بالدماء
راسي كون يسيل بالدم لمن ادخل كربلاء

حسين يا ابا عبدالله 
حسين يا ابا عبدالله
............
تستعر جمرة مصابك من يهل شهر الحزن
عيني تجريلك دمعها وگلبي لعتابك يحن
اني كل ليلة ابمحرم ابچي لمصابك وون
داستك خيل ال امية تلث ليالي بلا دفن

حسين يا ابا عبدالله 
حسين يا ابا عبدالله
............

سيدي ممنون منك يالجبتني لخدمتك
آني لوما انت ميت عيّشتني بنعمتك
ادري ما استاهل ادري وشملتني برحمتك
من اجيت ستقبلتني دخّلتني ابخيمتك

حسين يا ابا عبدالله 
حسين يا ابا عبدالله

سيد زيد الفحام
___

https://t.me/httpsm80100000

مقدمة للعليلة 2022

يلمدلّل بناتك
اهيم بذكرياتك
بديك اغفه وتغطّيني بعباتك
...........

إنه الطفله العليله الفارگتهه
يبويه حسين بديارك عفتهه
ضلام الدنيا بعدك ما ردتهه
عجب بنتك عليله ويتّمتهه

بقيت احسب ثواني
ولا طيفك اجاني
احن وفرشهه سجّادت صلاتك
.........

احن لشوفتك كل مغربيّة
تعال وشوف بويه الصار بيّة
عليله وليش ما تسأل عليّه
تعال وخل اشبگنّك بديّة

يبو الروح الرحيمه
عجب تترك يتيمه
عشت وردة وتباريهه بحياتك
..........
أنه وبنتك رقيه وفاطمتنه
يبويه حسين بيدك دلّلتنه
بناتك نغفه يمّك علّمتنه
ولا يوم اليمر اذكر عفتنه

خذتهن ما خذتني
اخبرك ألّمتني
لأن من دونك اتأذّه وغلاتك
...........

طبع كل طفله مشدوده لأبوها
تجيله وتشتكي لو اغضبوها
لچن آنه الوحيده الفارگوها
ابوها وعمهه وخوتهه النسوها

الى مَنْ اشكي همّي
ابويه وماهو يمّي
اذكرك من چنت يمي شحلاتك
............

يبويه حسين طَوّل هجرك هواي
بقيت انشد عليك الراح والجاي
بكثر ما ابچي طاح بياض عيناي
عفتني بلا فكر يحسين لا راي
صحت طمّنّي عنك
خبر ما ردلي منك
اخاف امن العدو تصعب نجاتك
............

نمت لحظات لن شفتك يغالي
راسك عالرمح رفعوه گبالي
الخفت منه حصل ويلاه تالي
اجه الناعي يصيح بصوت عالي.

يهل يثرب رزيّة
انذبح بالغاضريّة
ابواليمه وحچه الصار بوفاتك

سيد زيد الفحام
___
https://t.me/httpsm80100000

رئيسية للعليلة 2022

ما خذاني الغالي راح
حيلي من فارگني طاح
كلشي ويّه دموعي صاح
لا تعوفون العليله
لا تعوفون العليله
............

حضّرت روحي لسفرهم حالي من حال الخوات
مثل حال اختي رقية وخوله وي باقي البنات
حسّبت ويّاهم امشي وچانت احله الامنيات
للصبح احسب ثواني وخذت بالي الذكريات

انتظر كلمة تعاي.
والفجر طر بسماي
لوالدي عيني ورجاي
والدمع يحچي بمسيله
لا تعوفون العليله
.........

دوّرت بين المحامل بسمي محمل ماشفت
گلت ما حاسب حسابي حسين ابويه وايّست
كل خواتي ركّبوهن وآنه انظر ما رحت
انتظر بسمي ينادي حسين ابويه اتئمّلت

صدلي بعيونه افتجاع
گلّي يابنتي الوداع
هذا آخر اجتماع
صحت ياعمّه العقيله
لا تعوفون العليله
........

طلع ظعن حسين ابويه ما خذوني ودمعي سال
ظلّت عيوني بأثرهم والحزن ثگل الجبال
عيني مشبوحه عله بويه تنظر لذاك الجمال
راح عني وماخذاني وراحت ايام الدلال

راح اظل بس للنحيب
سافر وراح الحبيب.
خوفي لا يصبح غريب
هم فگدكم من يشيله.
لا تعوفون العليله
........

ميته ياريت بوداعه صعبه لحظات الوداع
يمسح بچفه عله راسي روحي حسّت بالضياع
چن يگلّي يالعليله هذا آخر اجتماع
ونفجع گلبي برحيله وتچوي نار الافتجاع

ما خذاني وگلبي ذاب
فرگة الوالد عذاب
طفله ما احمل غياب
تصرخ جروحي الثگيله
لا تعوفون العليله
............

راح عني ونتظرته ساعه ساعه ويوم يوم
ما رجع لية وهضمني گلبي ظل بية يلوم
ليش ما رحتي برحيله ليش عفتيه للخصوم
الدار ظلمه بلا ضياءه ونطفت حتى النجوم

طفله ودموعي تسيل
انتظر جيّة دليل
ما بقه برجلية حيل
شلون ياناس اعتنيله
لا تعوفون العليله
............

الطفله لو فارگها ابوها تبقى مهضومه وتنوح
تبقى ليل انهار تبچي تنزف دموع وجروح
هذا حالي بلا ابويه المن اشكي وين اروح
لا خبر من عنده ردلي لا ضوه لعيني يلوح

گاعده بدرب الضّعون
اسأل بدمعي اليجون
عن ابواليمه الحَنون
يهلي سفرتكم طويله.
لا تعوفون العليله
............

لن بِشِر ناعي المصيبه يصرخ بهذا النداء
آه يا اهل المدينه رفعوا اصوات العزاء
ذبحوا حسين وبنينه آل امية بكربلاء
طحت من هول المصيبه وسالت بعيني الدماء

اصرخ بصوت الأنين
وا حُسيناً وا حُسين
صوّبوا طه الأمين
يجرح الفاكد عويله
لا تعوفون العليله

سيد زيد الفحام
___&&&

https://t.me/httpsm80100000