شیرینتر لە گیان،ئازیزتر لە چاو
پەروەردەی کەش و هەواکەی سەراو
هەناسەی ژینم،خوێنی دەمارم
مەڵحەمی زامی دڵی پڕ زارم
ڕۆڵە قەت نەبێ سەگی گورگە مێش
بۆ گورگ و چەقەڵ کەلاک نەکەی کێش
قەت خائین نەبی بە خاکی کوردان
بێ شەرەف مەبە قەت لەگەڵ ئینسان
بخوێنە،مەرد بە،ڕەند بە و دوڕدی کێش
ژیان میزان کە بە سرواو بە کێش
چاوت ماچدەکەم،شادیت ئاواتم
لە بوونت پڕن گشت سات و کاتم.

10 ی گوڵانی 1404hatam

جەفا بەسێتی ئیهمالی وەفا چەند؟
نە من بەردم،ئەدی جەورو جەفا چەند؟

هەتا کەی هەر بە کەیفی دوژمنی من؟
ڕق و قەهرت بە ئەمنی بێ نەوا چەند؟

خودایە بێ بەڵا کەی ئەو گوڵەی من
کەچی بۆ من بەڵا بوو،ئاخ بەڵا چەند؟

لە مێژە بۆ شەوێ دیدار دەناڵم
ئیتر بەسسە،ئەزیزی دڵ ڕیا چەند؟

ئەزیزم ماچی لێوی تۆم دەوایە
برینی ئەو دڵەی من بێ دەوا چەند؟

لە حەڵقەی عەشقی تۆدا من دەروێشم
لە مێژە خول دەخۆم گیانە سەما چەند؟

لە چاوم سەر دەکەن خوێناوی ناخم
بە سەرما دێنی ئەی دڵ ماجەرا چەند؟

دڵم ماڵی غەمە و عەیشم گرانە
سەفا خەونە لە لام،باسی سەفا چەند؟

گوڵم حاتەم لە سوێت شێواوە حاڵی
ئەتۆی ئەفسونگەر ئاوا ناتەبا چەند؟؟

31 ی گوڵانی 1404
حاتەم سەراوی