کۆچەکەت نۆ ڕۆژ تێدەپەڕێنێ
ئاور لە هەموو ناخم وەردێنێ
دۆێشەو ساقیش هات بوو بە میوانم
کەمی هەر نەکرد ئازاری گیانم
لە دەس هیجرانت پەنام برد بۆ مەی
غەمی هێندە تاڵ، کەی مەی دەیبا،کەی؟
ون نابی ساتێ لە دیدەکانم
چۆڵ ناکەی دەمێ نێو ڕوح و گیانم
وەک خوێن دەگەڕێی بە دەمارمدا
تا دەمرم هەر هەی لە هەوارمدا
یاری با وەفام،دۆستی گیان گیانی
ڕەسمی ڕەفاقەت هەر تۆ دەتزانی
هێستا من بێ تۆ هێندە دەردەدار
دەبێ چۆن تەی کەم چەرخەکەی ڕۆژگار.

سووڕی زەمانە.


چەرخەکەی گەردوون چەپگەردی ڕوو ڕەش
مەینەت و دەردت بۆ من کردە بەش
هێستێش بە بێ یار بێ ساقی و بێ مەی
ئەو عومرەی ماوە چۆنی بکەم تەی؟؟
وا پازدە ڕۆژە نابینم چاوی
نابیسم دەنگ و ترپەی هەنگاوی
کەی وابوو عەهدی بەینی من و ئەو؟
جێم بێڵێ و ڕۆژم لێ بکاتە شەو
سوکنایم نایە بە گریان و شین
کورەی دەروونم دەجۆشی بە تین
وەفادارێکەی شوهرەی ئافاق بوو
پەی دووری یارم تاقەتم تاق بوو
ئەرای دووریەکەی دیدەم چون جەیحوون
ئارام ناگرێ دەروونی پڕ هوون
ئەی داو و بێداو لە دەس هیجری یار
دڵەی ماڵ کاوڵ ئەناڵێ وەک تار
خوشکی بێ گەردو دلۆڤانم ڕۆ
یاری وەفادار گشت ژیانم ڕۆ
هاتمەوە ورمێ بێ یاری گیانی
شینێکم گێڕا ئەمڕۆ بەیانی.

ورمێ.. 17 ی خاکەلێوەی 2725 ی کوردی
ساڵۆنی دادگوستەری، کاتژومێر 10 ی بەیانی
حاتەم سەراوی
@Hatam_marzang