کۆچەکەت نۆ ڕۆژ تێدەپەڕێنێ
ئاور لە هەموو ناخم وەردێنێ
دۆێشەو ساقیش هات بوو بە میوانم
کەمی هەر نەکرد ئازاری گیانم
لە دەس هیجرانت پەنام برد بۆ مەی
غەمی هێندە تاڵ، کەی مەی دەیبا،کەی؟
ون نابی ساتێ لە دیدەکانم
چۆڵ ناکەی دەمێ نێو ڕوح و گیانم
وەک خوێن دەگەڕێی بە دەمارمدا
تا دەمرم هەر هەی لە هەوارمدا
یاری با وەفام،دۆستی گیان گیانی
ڕەسمی ڕەفاقەت هەر تۆ دەتزانی
هێستا من بێ تۆ هێندە دەردەدار
دەبێ چۆن تەی کەم چەرخەکەی ڕۆژگار.