بەرهەمەکانی حاتەم مەرزەنگ

بەرگێکی تر لە یادەکانی سەراو

سەگێکی سپی سەرزلی گوێ بڕاوی کلک گری خۆش دیمەن،خەڵکی دەیانگوت لە نەسلی سەگی هەوشارە لە گەڵ کوێستانچی هاتۆتەوە نێودێ.ئەوە سەگی ماڵی مام حەمە بوو، حەمە بەدری.حەمەبەدری پیاوێکی دەستەی چوارشانەی زۆر خوێن شیرین بوو،کۆت و پاتۆڵی لەبەردەکرد،چاوی نەیدەدی.من کە دەمدی تەمەنم چوار وپێنج ساڵان بوو،مامەحەمە تەمەنی لە شێست تێپەریبوو، هەرکات دەهاتە نێودێ سەگە سپی لە پێشێوە بوو،سەگە سپی هەموو کەس خۆشیان دەویست،نێوەڕاستی ئاوایی سەراو دەبۆ دەرکی دوکانەکانی نەنەنێرگس و میرزاحەسەن و سەید جەعفەرو ئەحمەدی مام ڕەحمان.
سەگە سپی زۆر نەترس وئازا بوو،سەنتەری ئاوایی قۆرغ کردبوو،هەرچی قەسابی لە نێو دێ دەکرا گۆڵە سپی پێش هەموو خەڵکی گوند بەشی خۆی وەردەگرت. ڕۆژەکانی هەوەڵی پایز بوو،قەسابەکان ئەحمەد دوختەر،عەلی مام حوسێن و بابە عەلی جوانەگایەکی دووساڵەی ڕەشیان لە عەرز دابوو،کەوڵ کرابوو خەریک بوون بە یارمەتی دەورووبەر بە کاریتەی بەر هەیوانی دووکانی سەید جەعفەرەوە هەڵیان داوەسی،گۆڵە سپی لە قولیچکی دیوارەکەی ماڵی نەنەسەکینە خەریکی خواردنی چەقاڵتەبوو.گۆڵە سپی تەمەنێکی هەبوو ڕۆژی خۆی شەکەکاڵی لە دەم گورگ دەرهێنابۆوە،جێ پەنجە وکەڵپی گورگ وشایەدیش لە شەڕەسەگدا بە جەستەیەوە دیار بوو.
پۆلێک سێروو بە جریوەجریو و بە پەلە بەرەو دارە بڵیندەکانی حەوشەی ئاغایی بە ئاسمانی گوند دا تێپەڕین،هیچ چاوەڕوان نەبوون دەست وسیلەی تفەنگێک لێیان لە کەمین دایە، تەواو نەگەیبوونە سەردارەکان تەقەی تفەنگی تاپڕو ئاوری سوچمە دڵی زۆریانی لەکار خست.
ئای بەشەری بێ ڕەحم،من بەتەمەنم هیچ گیاندرێکم لە بەشەر بێ ڕەحمتر نەدیوە.
لەهەر چوارلای گوندەوە یانی گەڕەکی سەرێ،خوارێ،لای سەرجۆگە و پشت ماڵانەوە خەڵکی بەرەو دوکانەکان دێن،لاتان وانەبێ سەراو ئەوێ زەمان هەرئەو چەند دوکانەی هەبوو نانا،دوکانەکانی مەلاجوانە،عوسمانی بەرجەستە،مستەفاخان،عەبەمیرزا،عەلی تەیموور و چەندی تریش کە من بە تەواوی لەیادم نین.
لە ڕۆژئاوای گوندەوە،لە ڕێگای باغێوە دوو عەڕابە بە باری گزرە وکاوە هەر کام دووکەڵ لەژێر نیریان دا گەیشتنە سەرجۆگە،لە پاناوکەکەی خوار ماڵی عەلی حەمەمراد پەڕینەوە بە کۆڵانەکەی ماڵی میرزا یۆسفدا بەرەو سەرێ،کەڵ وعەڕابەی مینەی مام پیرۆت و عەوڵای عەلی ناسک پێکەوە گزرەو کای محانە دەکێشنەوە،سەرەتای پایزە و خەلەو خەرمان بەتەواوی کۆ نەکراونەوە،دەسووڵی سمایل شێربەگ لە لای دوکانی مەلا جوانەوە،واتە لە گەڕەکی سەرێوە گۆدرێژێکی وەپێش خۆی داوە و دوو سەگ بە دواوە گەیشتە لای قەسابەکان،کاک ڕەسووڵ شوانی وردە ماڵە و بۆخۆشی هێندێکی وردە هەیە،،........ درێژەی هەیە

239 views10:49